Yeni təşəbbüslər Qarabağ probleminin həllinə gətirib çıxaracaqmı?
Türkiyə və Rusiya prezidentlərinin Soçi görüşündən sonra Dağlıq
Qarabağ münaqişəsi ilə bağlı canlanma müşahidə edilməkdədir. Təsadüfi deyil ki,
ötən gün Azərbaycanın xarici işlər naziri Elmar Məmmədyarov Moskvada Minsk qrupunun
həmsədrləri ilə görüşüb. Eləcə də 19-20 noyabr tarixlərində Rusiyanın XİN rəhbəri
Sergey Lavrov Bakıya və Yerevana səfər edəcək. Təbii ki, bu görüşlərin hər
birində Dağlıq Qarabağ məsələsi müzakirə mövzusu olacaq. Çünki Rusiya və
Türkiyə ikitərəfli münasibətləri genişləndirməklə yanaşı, həm də bu problemin
həllində maraqlı tərəf kimi çıxış edirlər.
Soçi səfərindən öncə prezident Rəcəb Tayyib Ərdoğanın münaqişənin
həllinin Rusiyanın istəyinə bağlı olması replikası da heç də təsadüfi deyil.
Bəs görəsən Türkiyə-Rusiya yaxınlaşması indiki məqamda rəsmi Moskvanın
problemin həlli ilə bağlı güzəştə getməsinə səbəb olacaqmı?
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Hikmət Məmmədov bildirdi ki,
Rusiya və Türkiyənin yaxınlaşması əslində yaşadığımız geostrateji rayonda baş
verən qlobal hadisələrin zərurətindən irəli gəlir: "Çox sürətlə baş verən
mürəkkəb hərbi-siyasi proseslər regional aktorların bir-biri ilə yaxınlaşmasını
şərtləndirir. Əks təqdirdə, qlobal təhlükələrə qarşı təkbaşına milli maraqları
qorumaq çox çətindir. Geostrateji və regionun aparıcı aktoru kimi Azərbaycan bu
yaxınlaşmada və bütövlükdə regionda maraqların qarşılıqlı şəkildə təmin
olunmasında mühüm rol oynayır. Ermənistan-Azərbaycan, Dağlıq Qarabağ
probleminin həlli məsələsi ətrafında yeni təşəbbüslər də məhz yeni yaranmış
şərtlərin diktəsi ilə meydana çıxır. Ona görə də biz bilirik ki, bu şərtlərin
formalaşmasında Azərbaycan prezidentinin xüsusi rolu var. Regionda münbit
əməkdaşlıq formatının yaradılması üçün prezident İlham Əliyev üçlü diplomatik
platformalar formalaşdırıb. Bu formatlarda daim milli maraqların ortaq şəkildə
qorunması ilə bağlı çox mühüm strateji məsələlər müzakirə olunub. Heç şübhəsiz
ki, belə olduğu halda, regionda mühüm aktorlar hesab olunan Rusiya, Türkiyə və
İran Azərbaycanın milli maraqlarını mütləq nəzərə almalıdırlar. Azərbaycanın
milli maraqlarının ən başlıca prioriteti isə Dağlıq Qarabağ probleminin,
ümumilikdə ərazi bütövlüyü məsələsinin həll olunması və Ermənistanın işğalçı
qoşunlarının ərazilərimizdən çıxarılmasıdır. Təsadüfi deyil ki, son illərdə
keçirilən bütün görüşlərdə problemin həlli bu və ya digər səviyyədə daim
müzakirə olunur. Nəzərə alsaq ki, 2016-cı ilin aprel döyüşlərindən sonra
Azərbaycanın mövqeyi nə qədər güclənib, o zaman bir daha problemin həlli
vaxtının tezləşdirilməsinin bütün aktorlar tərəfindən dərk edilməsi gerçəkliyi
ilə üz-üzə qalmış oluruq. Son dövrlər Qarabağ probleminin intensiv müzakirə
olunması onun həlli ilə bağlı yeni ümidlər yaradır. Amma əlbəttə ki, bu
uzunmüddətli bir proses olacaqdır və Azərbaycan daim öz milli maraqlarını təmin
etmək üçün hər cür diplomatik, hərbi və digər vasitələrdən istifadə edəcəkdir”.
H.Məmmədov qeyd etdi ki, strateji tərəfdaşımız olan Rusiyanın xarici
işlər nazirinin Azərbaycana səfər etməsi bütün hallarda müsbət
qiymətləndirilməlidir: "Mühüm hərbi-siyasi rıçaqlara sahib olan bir ölkənin
dövlət rəsmisinin səfəri həm də Qarabağ probleminin həllinin müzakirəsi
deməkdir. Ümid edirik ki, Lavrovun səfəri səmərəli bir səfər olacaq və Qarabağ
probleminin müzakirələri ilə yadda qalacaq”.
Politoloq Tofiq Abbasov bildirdi ki,
Türkiyə və Rusiya hər zaman partnyorluq ediblər və bu iki dövlət arasında
münasibətlərin normallaşması Azərbaycanın xeyrinədir: "Hər iki dövlət Dağlıq
Qarabağ probleminin çözülməsini istəyir. Buna görə də elə bir həll yolu
tapılmasını istəyirlər ki, müharibəyə birdəfəlik son qoyulsun. Qarşılıqlı
kompromislər tapılmasa, bu məsələnin həlli mümkünsüz olacaq. Türkiyə və
Rusiyanın Dağlıq Qarabağ məsələsinin həllində baxışları üst-üstə düşür. Çünki
Cənubi Qafqaz çox kommunikativ bölgədir və burada Dağlıq Qarabağ probleminin həll
olunmamış vəziyyətdə qalması bölgə dövlətlərinə əlverişli deyil. Ermənistan 2018-ci
ilin mart ayından yeni - parlament idarəetmə sisteminə keçir, daha sonra
Rusiyada və payızda Azərbaycanda da seçkilər olacaq. Bu üç kampaniyadan sonra
Minsk qrupu ilə yanaşı, ola bilsin, Türkiyə və İranın prosesə qoşulması ilə
Ermənistana təzyiqlər artacaq. Çünki rəsmi İrəvan indiyədək əldə olunmuş
irəliləyişlərin hamısını məqsədli şəkildə dağıtmaqla məşğul idi. Ancaq bu
özbaşınalığın dayandırılması vaxtı artıq gəlib çatıb. Ermənistana havadarlıq
edən xarici qüvvələrin bir çoxu anlayır ki, prosesi təxirə salmaq olar, amma
onu ümumiyyətlə aradan qaldırmaq mümkün deyil”.
T.Abbasov əlavə etdi ki, bir müddət öncəyə qədər Lavrov açıq şəkildə
ermənipərəst mövqeyini nümayiş etdirirdi: "İyul ayında prezident İlham Əliyev
həmkarı Putinlə Soçidə keçirilən görüşündə bu məsələ ilə bağlı öz narazılığını
bildirib. Dərhal da Putin tərəfindən anlaşılan mövqe sərgilənib. Artıq Sergey
Lavrov Putin tərəfindən bu məsələyə təhkim olunub. Ona görə də Rusiya xarici
siyasət idarəsinin rəhbəri Putinin səlahiyyətli nümayəndəsi kimi, Azərbaycana
və Ermənistana səfər edəcək. Hesab edirəm ki, bu da Azərbaycan diplomatiyasının
uğurudur. Təbii ki, Lavrov problemin həlli ilə bağlı Moskvanın yeni baxışlarını
səfər çərçivəsində ortaya qoyacaq”.
Bəxtiyar MƏMMƏDLİ