Yeni il üçün Bakını seçən turistlər
Dekabrın
son günü,
Bizə tutub
üzünü.
Sevinclə,
gülə-gülə
Çoxlu
turistlər ilə.
Artıq
bir aydan sonra 2017-ci ili yola salıb, yeni
- 2018-ci ili qarşılayacağıq. Yeni il beynəlxalq səviyyədə keçirilən bayramlardandır.
Hər xalq özünə uyğun tərzdə növbəti ili qarşılayır. Dünyanın bir çox ölkələrində demək olar ki, Yeni il xüsusi
təmtəraqla, şənliklər təşkil etməklə keçirilir. Bəzi insanlar yeni il
ərəfəsində səyahətə çıxır, növbəti ili fərqli bir ölkədə qeyd etmək istəyir. Və
bir sıra ölkələr də insanların bu tələbini bilərək, daha çox turist cəlb etmək
üçün yeni il tətilinə xüsusi hazırlaşır. Həmin ölkələrdən biri də
Azərbaycandır. , "OneTwoTrip" səyahət xidməti dekabrın 27-dən
yanvarın 11-ə qədər satılmış biletlərin analizinə əsasən, belə qənaətə gəlib
ki, Rusiyanın Kazan şəhərinin əhalisi üçün bu il yeni il tətilini keçirmək üçün
ən populyar istiqamətlər Bakı və Parisdir.
Kazanlı turistlər üçün Azərbaycan paytaxtına yeni
il səyahəti "OneTwoTrip"ə görə, 12 min 900 rubla, Parisə isə 16 min
300 rubla başa gəlir. Deməli, yeni ildə turistlərin paytaxtımıza gəlmək istəyi
var. Biz necə, onları yeni xidmət keyfiyyətləri, bayram sürprizləri ilə
qarşılamağa hazırıqmı? Mövzunun əhəmiyyətini nəzərə alaraq, ekspertlərin
fikirlərini öyrəndik.
Bazar araşdırmaçısı
(marketoloq), həvəskar səyahətçi video-blogger Vaqif Hüseynov bildirir ki, məsələyə bir neçə prizmadan yanaşmaq
olar: "İlk olaraq onu deyim ki, bu məsələdə Azərbaycan Respublikası Mədəniyyət
və Turizm Nazirliyinin nəzarət mexanizmi işə düşməlidir. Bu kimi xüsusi
günlərdə müəyyən aviakompaniyalarla razılığa gələrək, endirimli aksiyalar
təşkil edilməsinə, qiymətlərin aşağı salınmasına nail olunsa, daha yaxşı olar.
Burada söhbət həm Bakıya gələnlərdən, həm də Bakıdan tranzit şəhər kimi
istifadə edənlərdən gedir. Deyərdim ki, qeyd etdiyim bu məsələ ən əsas
faktorlardan biridir. Son dövrlər Bakıya həddən artıq ərəb turistlərin
gəldiyinin şahidi olduq. Bunun səbəbi isə həmin turistlər üçün vizanın
sadələşdirilməsi oldu. Bu şəraiti yalnız ərəb turistləri üçün yox, dünyanın
digər ölkələrindən gələn turistlərinə də şamil etsələr, ölkəyə gələn turist
sayında əhəmiyyətli dəyişiklik olar. Çünki hər bir turist səyahətdən əvvəl gedəcəyi
ölkənin onun üçün yaratdığı şəraiti araşdırır. Əgər Azərbaycanın təklif etdiyi
xidmət onun tələbinə uyğundursa, bura gələcək. Üçüncü bir məsələ isə otellərin
qiyməti ilə bağlıdır. Deyərdim ki, qonşu ölkələrlə müqayisədə bizim otellərin
xidmət dəyəri daha bahadır. Bir az münasib qiymətlər təklif olunsa, daha
məqsədəuyğun olar. Bundan başqa, Bakının görməli yerlər siyahısını bir az da
zənginləşdirmək lazımdır. Belə ki, daha maraqlı, ucuz, modern yerlər əlavə
olunmalıdır”.
Səyahətçi deyir ki, bəzi restoran və kafelərdə ikili menyu siyasəti var: "Paytaxtda
fəaliyyət göstərən bir sıra ictimai yerlərdə ikili menyu siyasəti tətbiq
olunur. Bəzi restoran və kafelərdə yerli camaat üçün başqa, turistlər üçünsə
tamam fərqli menyu təqdim edilir. Bu menyuda qiymətlər 30-40, hətta deyərdim
ki, bəzi hallarda 50 faiz daha baha olur. Həmçinin ticarət mərkəzləri qışda tez
bağlanır. Bu, turist cəlb etməyə çalışan ölkə üçün normal hal deyil. Bu kimi
məsələlər öz həllini taparsa, düşünürəm ki, Bakı turistlərin yeni ildə seçəcəyi
şəhərlər içərisində ön sırada olacaq”.
"Luna Travel” turizm agentliyinin
direktoruRəhman Quliyev deyir
ki, paytaxtda keçirilən bayram şənlikləri turistlər üçün çox maraqlı
olmalıdır: "Yeni ili insanlar daha maraqlı keçirməyə çalışırlar. Biz otellərə də tövsiyə edirik ki, çox yüksək
səviyyədə yeni il şənlikləri təşkil etsinlər. Bu, bütün otellər üçün
keçərlidir. Çünki Bakıya müxtəlif
büdcəli turistlər gəlir. Hamısı beşulduzlu oteldə qala bilmir. Ona görə də,
ulduzundan asılı olmayaraq hər bir otel öz turisti üçün bu cür şərait
yaratmalıdır. Şəhərdə turistlərin daha çox olduğu məkanlarda şaxta baba, qar
qız və yolka ağaclarının sayını artırmalıyıq. Müxtəlif oyunlar, viktorinalar təşkil etmək
lazımdır. Bunların hamısı insanlarda xoş təəssürat yaradır. Bir dəfə gələn
turist növbəti yeni ildə də gəlmək istəyir. Yəni gələn turist Avropanı yox,
Azərbaycanı seçib gəlirsə, o, mütləq aradakı fərqli hiss eləməlidir. Hətta hər
bir kiçik parkda belə şənlik keçirmək lazımdır. Canlı musiqi saatları təşkil
olunmalıdır. Yəni bayram ab-havası hiss
olunmalıdır”.
Agentliyin
direktoru tur-paketlərdən də danışdı: "Tur-paketlər istəyə bağlı təşkil olunur.
Hər turistin fərqli zövqü var. Məsələn,
İrandan gələn turistlər daha çox şəhərdə gəzməyi sevir. Ərəb
ölkələrindən olanlar isə meşəlik ərazilərə üstünlük verir. Onu da qeyd edim ki,
gələn turistlər otellərin adi günlərdən
fərqli olaraq, Yeni il ərəfəsində bahalaşmasını müşahidə etsələr, tərəddüd
etməsinlər. Bu, çox normal haldır. Dünya ölkələrində da bu bahalaşma olur.
Məsələn, Avropada normalda gecəsi 100 dollara olan otel, həmin günlərdə 200-250
dollar olur. Yəni bu bahalaşma normaldır. Bu problem bir çox ölkələrində yaşanır”.
Azərbaycan Turizm və Menecment
Universitetinin tədris işləri üzrə prorektoru Eldar Aslanovbildirir ki, Yeni ilin gəlişi ilə əlaqədar
olaraq, çoxsaylı tədbirlər planı hazırlanır: "Bildiyim qədəri ilə, turizm
agentlikləri Yeni il üçün xüsusi tur paketlər hazırlayırlar. Şəxsən mənə
verilən məlumata əsasən, deyə bilərəm ki,
əksər otellərdə yerlər artıq "bron” edilib. Bu da həmçinin qış
turizminin inkişafını göstərir. Məncə,
Bakıda Azərbaycanın mədəniyyətini nümayiş etdirən müxtəlif tədbirlərin,
festivalların təşkil olunması turistlər üçün çox maraqlı ola bilər. Bu tədbirlər turistlərə ölkəmizin
tanıdılması, onun turizm imkanlarının göstərilməsi baxımından çox
əhəmiyyətlidir. Avropa ölkələrində ilin dəyişdiyi ərəfədə müxtəlif yarmarkalar
təşkil olunur. Həmin yarmarkalara gələn insanlar həm alış-veriş edirlər, həm də
əylənirlər. Belə yarmarkaların Bakıda da təşkil olunması arzu olunandır.
Xüsusilə də, animasiya proqramlarının təşkil olunması gələn turistləri məmnun
edər, ölkəmizdə qış turizm mövsümü daha dolğun keçər”.
Günel
Azadə