"Xruşşovka"ların tarixə qovuşması Bakının simasını dəyişməklə yanaşı...
Bu günlərdə Azərbaycanın baş naziriArtur RasizadəBakı
şəhərinin 1-ci mikrorayonunun yenidən qurulması ilə əlaqədar tədbirlər barədə qərar
imzalayıb. Nazirlər Kabinetinin saytında verilən məlumata görə, Bakı şəhərinin
mikrorayonlarında əsasən Fransanın "Kamyu" şirkətinin istehsalı olan
və sonralar "Xruşşovka" kimi tanınan müvəqqəti yaşayış üçün nəzərdə
tutulan, öz istismar müddətini başa vurmuş iripanelli yaşayış binalarında
yaşayan sakinlərin mənzil-məişət şəraitinin yaxşılaşdırılması və təhlükəsizliyinin
təmin edilməsi üçün həmin binaların sökülərək, yerində müasir tələblərə uyğun
yeni çoxmərtəbəli binaların tikilməsi məqsədi ilə Fövqəladə Hallar Nazirliyinin
əlaqədar təşkilatlarla razılaşdırılmış təklifini nəzərə alaraq, 1-ci mikrorayon
ərazisində aparılacaq yenidənqurma işləri üzrə sifarişçi funksiyasını Fövqəladə
Hallar Nazirliyinə həvalə edilib.
Fövqəladə Hallar Nazirliyinə "Pilot
layihə" kimi Bakı şəhərinin 1-ci mikrorayonunda mülki, mənzil, şəhərsalma
və tikinti qanunvericiliklərinin tələblərinə əməl etməklə, şəhərin ümumi
görünüşünə xələl gətirən, qəzalı vəziyyətdə olan, mövcud şəhərsalma normalarına
cavab verməyən, "Xruşşovka" kimi tanınan yaşayış binalarının və həmin
mikrorayonun ərazisindəki digər yaşayış və qeyri-yaşayış təyinatlı tikililərin
sökülərək, yerində yeni binaların tikilməsi, sosial infrastrukturun yaradılması
və abadlaşdırılması üzrə ərazinin müfəssəl planının hazırlanması və təsdiqini,
həmçinin bu müfəssəl plan əsasında yerinə yetiriləcək işlərin texniki-iqtisadi əsaslandırmasının
hazırlanmasını və işlərin icrasını özündə əks etdirən Tədbirlər Planının layihəsini
hazırlayaraq,Dövlət Şəhərsalma və Arxitektura Komitəsi,Əmlak Məsələləri
Dövlət Komitəsivə Bakı Şəhər İcra Hakimiyyəti ilə razılaşdırmaqla, təsdiq
edilməsi üçün 15 gün müddətində Nazirlər Kabinetinə təqdim etmək tapşırılıb.
Mənzil bazarda
yeni canlanma olacaq
Yeni qərar əmlak
bazarına necə təsir edəcək, qiymətlərdə hansısa dəyişiklik yarada biləcəkmi?
Ekspertlərdən yeni qərarın əhəmiyyəti haqqında soruşduq.
"Qaya Real Estate Daşınmaz Əmalak” şirkətinin
satış direktoru Akif Əliyevhesab edir ki, bu fərman əmlak bazarına müəyyən qədər
müsbət təsir göstərəcək: "Əgər dövlətin bu haqda qərarı varsa və sahibkarlar da bu işə cəlb olunacaqlarsa,
tikinti şirkətləri bu işdə maraqlı olacaqlar. Bu layihə pilot olduğu üçün
sakinləri köçürüb əlavə sahələrdən mənfəət əldə etmək olar. Təbii ki, proseslər
daha da sadələşdirilsə, sahibkarlar üçün
tikinti proseslərinin aparılması üçün şərtlər əlverişli edilərsə, o zaman
bazarda müəyyən canlanma ola bilər. Belə layihələrdə qiymətlər adətən o qədər yüksək olmur. Hesab edirəm ki,
təqribən sosial evlərə yaxın olan qiymətlər
təyin edilər. Mövcud iqtisadi durumda bu addımın atılması o deməkdir ki, dövlət
tərəfindən bu sahəyə dəstək göstərilir. Bu baxımdan da bazarda yeni canlanmanın olacağını hesab edirəm. Düşünürəm
ki, yeni qərar qiymətlərə də öz təsirini göstərəcək. Mənzillərin qiyməti
devalvasiyadan öncə çox yüksək idi və reallığı əks etdirmirdi. Mikrorayonlarda
köhnə binaların yeniləri ilə əvəz edilməsi bazarda təklifi də çoxaldacaq ki, bu
da müəyyən qədər qiymətlərə öz təsirini
göstərəcək. Artıq mövcud əmlakların qiymətinə yenidən baxılacaq və rəqabətə
uyğun qiymətlər tənzimlənəcək. Hesab edirəm ki, bu pilot layihə gələcəkdə də
davam etdirilə bilər. Bu baxımdan belə bir layihənin həyata keçirilməsi çox
vacibdir”.
Tikinti
bazarında da dinamika artacaq
Əmlak Ekspert Mərkəzinin
rəhbəriRamil Osmanlı deyir ki, əgər sözügedən layihə uzunmüddətli dövrü əhatə edəcəksə,
bazara ciddi təsiri olmayacaq: " Əgər belə pilot layihə qısamüddətli dövrdə həyata keçirilərsə, o zaman bazarda müəyyən qədər
aktivlik yarana bilər. İlk növbədə qeyd etməliyəm ki, bu proseslər bir-biri ilə
əlaqəli olan proseslərdir. Qeyd olunur ki, ilkin olaraq söküləcək mənzillərdə
yaşayan vətəndaşlara nağd pul verilməyəcək. Qərarın tikinti materialları
bazarında da dinamikanı artıracağını düşünürəm.
Amma yenə də qeyd edirəm ki, layihə uzunmüddətli dövrü əhatə edəcəyi təqdirdə,
onun heç bir təsiri olmayacaq. Bu gün bazarda mənzil tikintisi 2007-2008-ci
illərlə müqayisədə bir neçə dəfə aşağı düşüb. Məsələn, il ərzində əgər 10 bina
tikilərsə, bu, böyük göstərici hesab
olunur. Amma əgər ildə iki bina tikilib, iki bina söküləcəksə, bu, bazarda
ciddi dəyişiklik yaratmayacaq”.
Müsahibim deyir ki, sökülmüş evlərin sakinlərinə
kompensasiya verilərsə, təbii ki, əmlak bazarına müsbət təsir göstərəcək: "Bu həm
də bazarda dinamikanı qaldıracaq. Əks təqdirdə,
yəni əgər insanlara kompensasiya ödənilməzsə,
daşınmaz əmlak bazarında qiymətlərə hər hansı formada əhəmiyyətli təsir göstərməyəcək.
Layihə hələlik Nəsimi rayonunun yalnız bir mikrorayonunu əhatə edir. Amma
ümumilikdə təklif olunur ki, həmin ərazi üzrə bütün mikrorayonlarda yerləşən köhnə tikililər sökülsün. Bundan
başqa, Bakı şəhərində "Xruşşofka”lardan daha əvvəl inşa olunmuş və istismar
müddəti başa çatan xeyli sayda binalar var. Həmin layihələrin taleyi hələ də
sual altındadır. İstənilən halda hər
şeyi zaman göstərəcək. İndidən bu barədə dəqiq nəsə demək düzgün olmaz. Mənzillərin
əlçatanlıq məsələsinə gəldikdə isə düşünmürəm ki, qərarın bu məsələyə hansısa təsiri
olsun. Bunun üçün əhalinin gəlirləri
artmalı, ölkənin makroiqtisadi göstəriciləri müsbətə doğru dəyişilməlidir. Gəlirlər
artmalı və alıcılıq qabiliyyətinə təsir göstərəcək amillər olmalıdır ki, mənzillər
əlçatan olsun. Əks təqdirdə buna ümid
etmək olmur”.
Qiymət siyasətinin
tənzimlənməsinə öz təsirini göstərəcək
Milli Məclisin
İqtisadi siyasət, sənaye və sahibkarlıq komitəsinin üzvü, millət vəkili Vahid
Əhmədovqəzetimizə açıqlamasında bildirdi ki,mövcud iqtisadi durumda tikinti sektoruna belə bir
diqqətin ayrılması yalnız alqışlana bilər: "Bu, hər şeydən əvvəl yeni iş yerlərinin
açılmasına səbəb olacaq. İkinci bir tərəfdən, istismar müddətini başa
çatan tikililər artıq sökülməlidir. Bu
baxımdan da düşünürəm ki, yeni qərar çox vacibdir. Həmin binalar söküləcək və əvəzində insanlar yeni, müasir şəraiti olan mənzillərlə təmin
ediləcək. Hesab edirəm ki, indiki vəziyyətdə belə bir sərəncamın imzalanması
çox müsbət haldır. Qiymət məsələsinə gəldikdə isə hazırda mənzil bazarında qiymətlər
fərqlidir. Fərqli qiymətin olmasının da əsas səbəbi mənzil bazarında son dövrlərdə
durğunluğun olmasıdır. Bu sərəncam qiymət
siyasətinin tənzimlənməsinə öz təsirini göstərəcək. Lakin qiymətlərdə ciddi
artım gözləmirəm. Burada sadəcə olaraq köhnə binalarda yaşayan insanlar yeni mənzillərlə
təmin ediləcək”.
Şəbnəm
Mehdizadə