Xoşbəxt sonluq mütləqdirmi?
Xoşbəxt sonluqlu
Hollivud filmləri bizləri o qədər cəlb etdi ki, çox vaxt sonu kədərlə bitən bədii
əsərləri qəbul edə bilmədik. "Əsərlər də Amerika filmlərindəki "happy end”lə
bitsə yaxşıdır” - deyə düşündük. Bəs bədii əsərlərin xoşbəxt sonluqla bitməsini
yazıçıdan tələb etmək olarmı?
"Müzakirə”də bu
kimi suallara cavab axtardıq.
Yazıçının ideyası
Yazıçı Elçin Hüseynbəyli bədii əsərlərin mütləq xoşbəxtliklə bitməsi fikri
ilə razı deyil: «Elə əsər var ki, ümumiyyətlə, novellavari qurtarır. Mənim əsərlərimin
çoxu elədir. Xüsusən faciə üzərində qurulan əsərlər daha çox yadda qalır. Xoşbəxt
sonluq məsələsi daha çox Amerika filmlərinə aiddir”. E,Hüseynbəyli bildirir ki,
yazarkən qarşısına əsərin xoşbəxt sonluqla bitəcəyi məqsədini deyil, ideya
qoyur: "Yəni sən oxucuya hansı mesajı verirsən. Sadəcə, elə əsərlər var ki,
onun sonluğunda sən azacıq da olsa bir işıq qoya bilərsən. Bu, yazıçının
ideyasından asılıdır». E.Hüseynbəyli hesab edir ki, yazıçı ona təsir edən əsərləri
sevir. Əgər əsər yadda qalırsa, demək, ona təsir edir. Oxucunun yadında qalmayan
əsər ona zövq vermir. Yazıçının fikrincə, Amerikada film ssenarilərinin daha
çox xoşbəxt sonluqla bitməsi onların bütün prosesləri keçməsi ilə bağlıdır:
"Amerika ədəbiyyatında vaxtilə kifayət qədər pessimist əsərlər yazılıb.
Görünür, artıq onlar elə hesab edirlər ki, problemləri həll ediblər və artıq
xoşbəxt yaşaya bilərlər. Ancaq Amerika filmlərində qoyulan ideya əsasən bir neçə
istiqamətə şaxələnir. Bu ideya ölkələrinin demokratik, insan haqlarının hər
şeydən üstün olması və ABŞ-ın ən güclü ölkə olması ilə bağlıdır. Çox güman ki,
xoşbəxt sonluq da məhz buna əsaslanır».
Yazıçı Əliabbas Bağırovun fikrincə, əsərin xoşbəxt sonluqla bitməsini istəyən
yazarlar oxucunun əsərdən xoş hisslərlə ayrılmasına üstünlük verirlər:
"Sosializm realizminin fundamental tələblərindən biri bu idi ki, əsərlər xoşbəxt
sonluqla başa çatmalı, oxucu cəmiyyətin kommunizmə doğru getdiyini görməli idi.
Ancaq əsərin xoşbəxt sonluqla bitməsi əsas şərt deyil. Elə əsərlər var ki,
orada labüd olaraq sənin qəhrəmanın məhv
olmalıdır. Bəzən biz deyirik ki, qəhrəmanın cismani cəhətdən məhv olması onun mənəvi
cəhətdən məhv olması demək deyil. Ancaq cəmiyyətdə biz gözləmədiyimiz o qədər bədbəxt
hadisələr, təbii fəlakətlər baş verir. Cəmiyyət elə bil bu hadisələrə
adaptasiya olub. Cəmiyyətin özündə anormal bir vəziyyət yaranıb. İnsanlar artıq
bu hadisələri elə bil həyat norması kimi qəbul edir». Yazıçı hesab edir ki, əsərin
sonluğunun onun romantik və ya realist janrda yazılması ilə heç bir əlaqəsi
yoxdur. Belə ki, cəmiyyətin özünün tələbləri, sosial sifarişi var: "Sovet
dövründə deyilirdi ki, o əsərlərin hamısı yaxşı sonluqla bitməlidir. Məsələn,
«Ulduz» və ya «Böyük dayaq» filmlərinin o cür sonluqla bitməsi labüd idi. O, cəmiyyətin
yox, təbliğat maşınının tələbi idi ki, əsər o cür sonluqla bitsin. Cəmiyyətin tələb
etdiyi ilə əsərin sonluğunun hər hansı təbliğatla bitməsi fərqli şeylərdir.
Amma indi bu fərqlər itib. Kim nə istəyir, onu yazır. Detektiv, həyatda olanı və
olmayanı yazanlar var. Mənə elə gəlir ki, bədii əsərin yeganə məqsədi insanı və
insanlığı axtarmaq olmalıdır. İstəyir romantizm və ya realizm olsun, istər
nikbin və ya pessimist ovqatla bitsin - bunların məsələyə heç bir dəxli yoxdur.
Oxucu oradan öz payını götürür. Mən də oxucu olaraq istərdim ki, əsər yaxşı
sonluqla bitsin».
Xeyir və Şərin
mübarizəsi
"Düzü, sualı eşidən kimi, indiyə qədər
yazdığım irili-xırdalı əsərlərimi xatırlayası, gözümün qabağına gətirəsi oldum”
- deyən yazıçı Eyvaz Zeynalov əsərlərinin
çoxunun bu və ya digər dərəcədə xoşbəxt sonluqla bitdiyini bildirir: "Amma
aralarında qeyri-müəyyən, xoşbəxt olmayan sonluqla bitənlər də var. Məsələn, "Tələ”,
"Qisas” romanlarım, "Qış günəşi”
povestim. Xoşbəxt sonluqla bitməyən hekayələrim də az deyil. Belə demək mümkünsə,
böyüklər üçün yazdığım "Qəfəs”, "Susatan Şiraslanın oğlu”, hətta uşaqlar üçün
yazdığım "Dərs ilinin başlanğıcı”,
"Plastilin tülkü” və s. hekayələrimi nümunə göstərə bilərəm”. Yazıçı əsərlərini
yazanda onları necə, hansı sonluqla bitirəcəyini fikirləşmədiyini, bunu
qarşısına məqsəd kimi qoymadığını deyir: "Məncə, bu, təbiidir və belə də
olmalıdır. Əvvəla, onlar çox vaxt bizim sözümüzə baxmırlar, digər tərəfdən, əsərlər
həyatımızın bir parçasıdır, həyatımızda baş verənlərin əks-sədasıdır. Həyat isə
yalnız xoşbəxt sonluqlardan ibarət deyil. Doğrudur, həyat Xeyir və Şərin daimi
mübarizəsindən ibarətdir. Biz həmişə xoşbəxtliyə can atırıq. Bəlkə elə buna görə
də çox vaxt biz yazıçılar əsərlərimizi nikbin sonluqla qurtarmağa, qəhrəmanlarımızı
özümüzə, övladlarınıza arzuladığımız xoşbəxliyə qovuşdurmağa cəhd edirik”.
Yazar Günel Eyvazlı hesab edir ki, ədəbi əsərlərin xoşbəxt sonluqla bitməsi oxucu mövqeyi
baxımından həm zövq, həm də intellekt məsələsidir: "Bəli, uzunmüddətli oxunun
yekunu olaraq əsərin xoşbəxt sonluqla - "happy end”lə bitməsi oxucuda müəyyən
rahatlıq yaradır. Gərgin mütaliədən sonra gərilmiş əsəblər, həyəcan sona yetir
və indi rahat nəfəs almaq olar. Bu tip əsərlər haradasa rahat həzm olunan, məsuliyyəti
daha çox yazıçı üzərində olan əsərlərdir. Yəni əvvəldən sona qədər yazıçı əsəri
işləyir, mətn tam açıqdır, oxucu üçün sual altında heç nə qalmır. Bəlkə də əsərdən
gərginliklə, suallarla ayrılmaq bir çoxları üçün xoş deyil. Çünki sosial problemlərlə yüklənmiş insan üçün bu, əlavə
ağırlıqdır. Elə bəzi filmləri izləyən
seyriçilər də ssenaristlərin dolanbac film
strukturundan, gözlənilməzliyindən bezir. Bu gərginlik həyatlarına da
siraət edir”. Yazıçının fikrincə, oxucunun işıqlı sonluq axtarışında olması həm
də düşüncələrimizin uşaqlığımızdan qaynaqlanan rudimentidir: "Uşaqlıqdan
formalaşmış psixoloji durumdur. Dinlədiyimiz, oxuduğumuz nağılların,
dastanların tərbiyəsidir. Məlikməmmədin qaranlıq dünyaya giriftar olmasından,
ağ qoç, qara qoç üzərində yeraltı dünya səyahətindən sonra işıqlı dünyaya gəlişindən
aldığımız rahatlıqdır. Həzzdir. Yəni uşaqlıqdan biz istənilən situasiyanın
sonucunda işıq, rahatlıq axtarırıq”.
Yazar əsərin
nə üçün xoşbəxt sonluqla bitməməsinə aydınlıq gətirərək bildirir ki, müasir əsər
strukturları məsuliyyəti daha çox oxucu üzərinə atır: "Bəlkə də bu, yazıçının həm
də xoşbəxt olan və ya xoşbəxt olmayan yolayrıcından qaçmasıdır. Yazıçının
xilasıdır bir növ.
Məsələn, mənim
üçün ən maraqlı əsərlər- düşündürən, mətn içində ifadə olunan gizli fikirlər, suallarla dolu əsərlərdir. Bəlkə də
bu, yazıçı üçün tapıntıya səbəb olan axtarış olduğundan mənə bu qədər
maraqlıdır. Çünki sual dolu əsər yeni ideya verməklə başqa bir əsərin
doğulmasına səbəb ola bilər. Çünki sualların axtarışı milyonlarla cavab deməkdir,
mülahizə, axtarış, minlərlə mövzu deməkdir”. Müasir əsərlərin müasir dünyamıza
bənzədiyini qeyd edən yazar hesab edir ki, xaotik dünya strukturu yazıçı təfəkküründən
də yan keçmir: "Yazıçı da bu dünyanın adamıdır və onun dünyaya baxışı yeni
biçimdə oxucuya təqdim olunur- qəhrəmansız, hadisəsiz, suallarla zəngin,
intellektual yüklənmiş, mistik, mifik və s. Müasir dövrün ən sadə hekayə
janrında belə artıq qəhrəman da yoxdur. Heç hadisənin varlığı da yazıçını
narahat etmir”.
Yazar Qismət
hesab edir ki, əsərin xoşbəxt sonluqla bitməsi ilə bağlı yazıçıların qarşısına
hər hansı tələb qoyula bilməz. Belə ki, bu, mövzunun doğurduğu səbəb və nəticə əlaqəsinə
uyğun olaraq bu səviyyəyə gəlib çatmalıdır:
"Qarşımıza yalandan məqsəd qoyub yazsaq ki, hər şey xoşbəxt sonluqla
bitməlidir, bu bir qədər sovet dövrünün xoşbəxt insanı, sosializm ədəbiyyatı
ola bilər. Ancaq bunun əksi olmaq elə bil medalyonun o biri üzüdür. Qəhrəmanın
ölümü də, finalın işıqlı olması da mövzunun özündən doğmalıdır. Ədəbiyyatın
mahiyyətində elə bir etik-estetik funksiya var ki, adamları depressiyaya
salmaqdan daha çox nələrinsə yaxşı, gələcəyin işıqlı olacağına ən azı ümid verməlidir.
O mənada məcburi şəkildə yox, mövzunun özünün içindən baxmaq baxımından ədəbiyyatın
ana missiyası daha işıqlı olmalıdır”. Amerika filmlərindəki sonluğa gəlincə,
yazar hesab edir ki, xoşbəxt sonluq sovet dövründəki gözəl quruculuğun başqa
formasıdır: "Böyük ədəbiyyatda Hollivudvari məcburi gözəlliklər olmur. Əsərin
içərisində insanın daxili psixoloji təbəllüdatlarından doğan tragik vəziyyətlərin
özündə belə həyatın hələ də bitmədiyinə işarələr olur. Bunun metodları çoxdur.
Bədii ədəbiyyatda da o cür. Tutaq ki, Şoloxovun «İnsanın taleyi» povestində dəhşətli
hadisələrin sonunda final işıqlı sonluqla bitir. Bu, məcburən düşünülmüş bir şey
deyil. Süjetin öz mahiyyətindən doğur».
"Bizim
bəzi yazıçılarımız əsərlərini xoşbəxt sonluqla bitirməyi ədəbi hünər hesab
edir. Hətta bir-ikisinin yazılarında, müsahibəsində oxumuşdum ki, oxucuların xətrinə,
onların arzusu və məktubları əsasında əsərin sonunda qəhrəmanlarını "xoşbəxt”
edib...” - deyən tənqidçi İradə Musayeva
hesab edir ki, xoşbəxt sonluqlu mütləqlik ancaq hind filmlərində olur. Əsil ədəbiyyatda
bu tale sonluğu heç yazıçının da əlində deyil. "Lev Tolstoy "Anna Karenina”nı
yazanda əsərin finalında qələmini yerə qoyub zülüm-zülüm ağlayır və təxminən
belə bir fikir deyir: "Mən onu öldürməyə bilməzdim, mənim əlimdə deyildi, onu
sağ saxlaya bilmədim...” Tənqidçinin fikrincə, oxucunun sevdiyi əsərlərin əksəriyyəti
xoşbəxt sonluqlu yox, düşündürücü sonluqlu əsərlər olub: "Sovet ideologiyası,
sosrealizm nəzəriyyəsi əsasında yazılan "kolxoz romanlar” kimi əsərlərdən söhbət
getmir. Yəni müəlifin oxucusuna verdiyi
töhfə xoşbəxt qəhrəmanlar olmaya da bilər, amma xoşbəxtliyə aparan yolun
ideyasını verərsə, nə gözəl! Günahların,
səhvlərin, cinayətlərin, aldanışların, anlaşılmazlıqların bədii mətn çərçivəsindəki
təhlili, obrazlı inikası çox zaman ziddiyyətli fikir qənaəti ilə də bitə bilir.
Bunu da təbii qarşılamaq lazımdır. Bütün məsələlər, istər ictimai-siyasi, istərsə
də sosial-mədəni və s. - hamısı məhz haqqında danışılan insanın içindən keçməlidir.
Elə olarsa, oxucu daha böyük ideyalara köklənmiş olur və onu ədəbi qəhrəmanın
evlənib-evlənməməsi, sevdiyi şəxslə izdivaca girib-girməməsi məşğul etmir. Hətta
məhəbbət romanlarında belə...” Tənqidçinin fikrincə, dünya ədəbiyyatında məşhur
romanların qəhrəmanları elə müəlliflərin özüdür: "Demək, real yaşantılardır bədii
mətnə gələn, uydurmalar yox... Məncə, insanlar haqlı olaraq, böyük kitabları
vacib hesab edirlər. Ola bilər ki, qısa bir hekayə və hekayələr toplusu irihəcmli
bir əsərdən daha yaxşı, daha mükəmməl olsun, amma daha effektiv, daha
yaddaqalan ola bilməz. Con Steynbek romanlarında qəhrəmanları ilə bərabərhüquqlu
şəxslər kimi davranır. Dostoyevskini oxuyanda düşünürsən ki, bir vücudda neçə insan çeşidinin xisləti, tipi, obrazı
olar? Lev Tolstoy müxtəlif sosial təbəqənin, müxtəlif cəmiyyətlərin
insanları ilə harda, nə zaman birgə yaşayıb ki, onları özü, doğma insanları qədər
yaxından tanıyır... Ekzüperi, Heminquey
qəhrəmanlarının daxili aləminə, düşüncə və yaşantılarına o qədər dərindən nüfuz
etdi ki, əlindəki çırağın və ya böyüdücü şüşənin əksetdirməsindəki həqiqətdən
diksindi, hər ikisi intihar etdi.... Qəribədir,
intihar edən qəhrəmanlarının ölümünü təkrarlamaq dünya ədəbiyyatında yüzlərlə
müəllifin taleyinə yazılıb. Bəlkə, əksinə, öz
faciələrini, ağrılı yaşantılarını bədii laboratoriyada, qəhrəmanlarının həyatında təcrübədən keçirmək,
onların üzərində eksperiment aparmaq "qəddarlığı” vadar edir ki, özləri də
onların yolunu təkrarlasın...”
Təranə Məhərrəmova