Xocalı faciəsi haqda dünyaya çıxarılası filmimiz niyə yoxdur?
Böyük vəsait lazım olduğunu deyən də var, "müharibədə qalib gələk,
sonra çəkərik” deyən də...
28 ildir ki, qisas gözləyirik. 28 ildir ki, xalqımızın başına gətirilən
Xocalı faciəsini dünyaya çatdırmağa və qəbul etdirməyə çalışır, bu istiqamətdə
siyasət və informasiya sahəsində müxtəlif işlər görürük. Mədəni siyasət isə
siyasətin ən effektiv üsullarından biridir. Bu istiqamətdə necə, hansı şəkildə
mübarizə aparmağımız isə birmənalı deyil. Beynəlxalq müstəvidə bu faciə az-çox tanınır,
dünya mediasında zaman-zaman işıqlandırıldığının da şahidi oluruq.
Bir neçə gün əvvəl Münxendə Azərbaycan Prezidenti İlham Əliyev və Ermənistanın
baş naziri Nikol Paşinyan arasında görüşdə Dağlıq Qarabağ münaqişəsinin tənzimlənməsinə
dair fikir mübadiləsi aparıldı. Elə həmin gün Münhen Təhlükəsizlik Konfransı çərçivəsində
Azərbaycan və Ermənistan liderlərinin iştirakı ilə Ermənistan-Azərbaycan,
Dağlıq Qarabağ münaqişəsi ilə bağlı panel müzakirələr keçirildi. Panel müzakirələri
zamanı dövlət başçımız Paşinyanı diplomatik nokauta saldı.Bu fakt bütün
dünyanın diqqətindən yayınmadı.
Bütün bunların fonunda ortaya haqlı bir sual çıxır: Niyə torpaqlarımızın
işğalı, o cümlədən Xocalı faciəsi mövzularını təsirli şəkildə təsvir edən, dünyaya
çıxarıla biləcək film çəkə bilmirik? Müasir dövrdə yüksək texnologiyaların verdiyi
imkanlar varkən, biz bu "savaş”da niyə önə çıxmırıq?
Xalq yazıçısı Sabir Rüstəmxanlı deyir
ki, biz dünyaya film vasitəsi ilə sözümüzü çatdırmaqda çətinlik çəkirik: "Film
bizdə problemli məsələ olaraq qalıb. Hətta Litva rejissoru Xocalı faciəsi ilə
bağlı səmimi və son dərəcə təsirli bir film çəkmişdi. Ancaq biz daha çox
ritorik şeylər çəkirik. Film çəkərkən yalnız quru faktlara əsaslanırıq və bu da
heç kimin marağını çəkmir. Belə ki, həm faktları, həm də insan taleyini göstərə
bilən, insanlara təsir edən film çəkmirik. Əsas məsələ odur ki, "Azərbaycanfilm”
kinostudiyası çox dağılmış bir vəziyyətdədir, ağır günlərini yaşayır”.
S.Rüstəmxanlı kinonun hər bir millətin taleyində mühüm rol oynadığını
vurğuladı: "Dünyanın müxtəlif ölkələrində kino sənətinə dövlət maliyyə ayırır,
diqqət yetirir. "Cavad xan” filminin çəkilişində gördüm ki, çəkiliş prosesində
adi qrim ustasından tutmuş, filmin operatoruna qədər əsas yaradıcı heyətin üzvlərini xaricdən dəvət
etmişdilər. Axı bizim də çox istedadlı yaradıcı heyətimiz var. Onlara da özlərini
təsdiq etmək üçün şərait yaradılmalıdır. Bizim müharibəmiz hələ də davam edir.
Müharibə ölkəsində yaşayanlar üçün psixoloji mühit önəmlidir. Düzdür, Xocalı
dünyanın hər nə qədər qəbul olunmuş faciəsi olsa da, bu gün gənclər o ruhda
böyüməlidirlər. Azərbaycanda bu və keçən əsrdə törədilmiş soyqırımlarının
tarixini onlara göstərən bir neçə seriala, filmlərə ehtiyac var. Yeni nəsil
bunlardan xəbərsizdir. Bunu düşünmək lazımdır. Heç kim deməsin ki, belə
ssenarilər yazılmır. Azərbaycan tarixinin ən önəmli hadisələri ilə bağlı müxtəlif
ssenariləri var. Təəssüf ki, onların heç birinə əhəmiyyət verən yoxdur. Çəkilən
filmlərdə isə bizi, müharibədə uduzan bir xalqı ən bahalı maşınlarda gəzən, bahalı
villalarda yaşayan, heç nəyi vecinə almayan bir məmləkət kimi təqdim etməyə
çalışırlar. Ancaq biz bir millətin faciəsini təsirli çəkib, nə öz gənclərimizə,
nə də beynəlxalq arenada göstərə bilirik. Ya rejissorlarımız film çəkməyi
bacarmırlar, ya da mane olan qüvvələr var”.
Mədəniyyət Nazirliyinin
Kinematoqrafiya şöbəsinin əməkdaşı Elşad Əliyev isə məsələ ilə bağlı
açıqlamasında 90-cı illərdə Xocalı faciəsindən bəhs edən "Fəryad” və bir neçə
başqa filmlərin çəkildiyini vurğuladı: "Son bir neçə ildə yeni filmlər çəkilib.
Onlardan Anar Usubovun "Xocalı
soyqırımı” adlı sənədli, Şamil Nəcəfzadənin "Müharibə uşaqları” adlı filmlərinin
adlarını çəkə bilərəm. Adlarını qeyd etdiyim filmlər dövlət sifarişi əsasında çəkilib.
Bunlardan başqa, "Natiq Qasımov” adlı sənədli film var ki, onun ikinci adı da
"İgid”dir. Bu film də Xocalı hadisələri ilə bağlıdır”.
E.Əliyev 2012-ci ildən başlayaraq dövlət sifarişi ilə silsilə şəkildə
milli qəhrəmanlara həsr olunmuş filmlərin çəkildiyini qeyd etdi: "O filmlərin də
bir çoxunda Xocalı hadisələrinə toxunulub. Çünki milli qəhrəmanlarımızın bir
çoxu Xocalı hadisələrində iştirak edib. Bu filmlər hər il müxtəlif vaxtlarda
nümayiş olunur. Bakıda və bölgələrdə yerləşən mədəniyyət mərkəzlərində, təhsil
ocaqlarında, hərbi hissələrdə yeniyetmə və gənc auditoriyaya nümayişi
keçirilir. Xocalı soyqırımının ildönümləri ərəfəsində tək bu filmlər deyil, digər
vətənpərvərlik mövzusunda çəkilən filmlərimizin nümayişi təşkil olunur. Bu il də
nümayişlər nəzərdə tutulub. Bundan başqa, səfirliklərimiz vasitəsilə xarici ölkələrdə
bu filmlərin nümayişi təşkil olunur. Belə ki, müxtəlif ölkələrdə Azərbaycan mədəniyyəti
günləri təşkil edilir. O günlər çərçivəsində bu filmlər nümayiş edilir. Qeyd
edim ki, bu nümayişlər dövlət sifarişi ilə həyata keçirilir. Bir neçə il bundan
qabaq Heydər Əliyev Fondunun dəstəyi ilə "Sonsuz dəhliz” adlı sənədli film çəkilmişdi.
Film Leyla Əliyevanın "Xocalıya ədalət” layihəsi çərçivəsində çəkilmişdi.
Sözügedən film bir çox ölkədə nümayiş olundu”.
"Çölçü” filmi ilə 5 qitədə
festivallarda qalib olan rejissor Şamil Əliyev filmin bir ürək işi
olduğunu deyir: "Bizdə zaman-zaman istər sənədli, istərsə də bədii filmlərin çəkilməsinə
cəhd olunub. "Muğam və başqaları” adlı sənədli filmimdə Xocalı faciəsini göstərməyə
çalışmışıq. Ancaq bu sahədə böyük film çəkməmişəm. Leyla Əliyeva hər ilə Xocalı
faciəsi ilə bağlı layihələr həyata keçirir. O ki qaldı bu istiqamətdə çəkilən
filmlərin dünya kino arenasına çıxmasına, dünyaya çıxmaq asan məsələ deyil.
Dünyada bu faciəni tanımaq istəməyən qüvvələr də az deyil. Bu faktorun özü də
böyük rol oynaya bilər. İki gün bundan qabaq Prezident İlham Əliyev Xocalı ilə
bağlı Ermənistan prezidentini lazımi səviyyədə yerində otuzdurdu. Bu yöndə
böyük işlər gedir. Siyasi müstəvidə belə addımlar atmaq isə böyük nəticələrə gətirər.
Azərbaycan kino sənayesini qurmaq əzmindədir, o yoldadır. Biz kino sənayesinin
səviyyəsinə görə nə Hollivud, nə də Bollivud deyilik, heç Rusiya da deyilik.
Sadəcə, müstəqil olduqdan sonra o yolda addımlayırıq. Azərbaycan kino sənayesini
qurmaq məcburiyyətində qaldı, buna illər lazımdır. Azərbaycan faktiki olaraq
Ermənistanla müharibə şəraitindədir. Bu məsələ hələ bitməyib. Mübarizə davam
edir. Əgər o mövzuda film çəkmiriksə, bu o demək deyil ki, biz Xocalını unutmuşuq. Biz Xocalını heç vaxt yaddan
çıxarmırıq. Vaxt gələr, kino sənayemizi daha dərindən qurarıq, o vaxt Xocalı ilə
bağlı daha sanballı filmlər çəkərik”.
Xalq artisti Şeyx Əbdül kinonun
qələm-kağızla çəkilmədiyini deyərək, bu müstəvidə film çəkməyin çətinliyindən
danışdı: "O masştabda, beynəlxalq səviyyəli film çəkmək üçün, sözsüz ki, böyük də
vəsait lazımdır. Təkcə "Dolu” filmimiz buna nümunədir. Ötən gün Prezident dünya
ictimaiyyətinin gözü qarşısında Paşinyanı rəzil vəziyyətinə qoydu. Bildirdi ki,
siz bu işdə yalançısınız. Bunun kökündə min ildən başlayan səlib yürüşləri
dayanır. Bu boş yerə deyil. Qərəz də ondadır ki, onlardan vasitə kimi istifadə
etsinlər, türk dövlətləri arasında ədavət yaratsınlar. Oyunun içində oyunlar
gedir. Burda iqtisadi siyasi məsələlər, türkə qarşı min illər davam edən ədavət
var. Çünki hələ də türkün xofu canlarından çıxmır. Dünyaya olmayan bir hadisəni
ermənilərin soyqırımı kimi tanıtmağa çalışırlar. Biz böyük bir xəyanətin
qurbanıyıq. Bu şeylər ideoloji təbliğat baxımından dünyaya əsil həqiqəti göstərməyəcəksə,
bu birtərəfli təbliğat böyük dövlətlərin qərəzli maraqları xeyrinə həll
olunaraq gedəcək. Burda kino şapalaqla üz qızartmaq kimi bir şeydir. Söhbət
daha ciddi qərəzçilikdən gedir. Bunu kino və tamaşa ilə yoluna qoymaq mümkün
deyil. Böyük dövlətlər və beynəlxalq hüquq müstəvisində bu məsələlər həll
olunmalıdır. Ondan sonra kino da çəkiləcək, dünya da onu tanıyacaq. Bu məsələni
kino vasitəsi ilə yoluna qoymaq mümkün deyil”.
Xalq artisti yaşanan hadisələrin film kimi təqdim olunmasına
qarşıdır: "Biz danışırıq, əsəbiləşirik, düşmənin qəddarlığını göstərməyə
çalışırıq. Biz bu faciələri yaşamışıq, ancaq istəmirəm ki, onlar film halında
özünü göstərsin. Çünki belə olduqda, özümüzü aşağılamış olacağıq. Niyə özümüzü
qaçqın, köçkün kimi təqdim edək? Niyə dünyaya deyək ki, ermənilər uşaqlarımızın,
balalarımızın başına bu hadisələri gətirib? Vay-şüvən qoparmaq, ağlaşma qurmaq
vaxtı deyil. Mətinləşmək, mübarizə aparmaq lazımdır. Düşməni ağlatmalıyıq, nəinki
özümüzü yazıq kimi təqdim etməliyik. Bizim bir şüarımız var: "Torpaq, uğrunda
ölən varsa, vətəndir”. Olmazmı ki, "torpaq, uğrunda öldürən varsa, vətəndir”
olsun? Bəzi bu kimi şüarlarımız da dəyişməlidir.
Hər şey mübariz, inqilabi ruhda olmalıdır. Bizim mübariz ruhumuz, müvafiq də təbliğat
olmalıdır. Təbii ki, kino da bu təbliğatın bir vasitəsidir”.
Xəyalə Rəis