Xalqın, dövlətin gələcəyini formalaşdırmaq missiyası
Müəllim
sözü ərəbcədən tərcümədə "dərs keçən, tədris edən” mənasını ifadə edir.
Azərbaycan dilinin izahlı lüğətinə görə, müəllim məktəbdə hər hansı bir fəndən
dərs deyən adama, nəsihət, öyüd və ağıl verən, öyrədən şəxsə deyilir. Müəllim -
ilk növbədə insandır, bilikli, savadlı, tərbiyəli, uşaqları və peşəsini
sevəndir, şagirdləri, tələbələri, ümumilikdə isə gəncləri xalqın, Vətənin
gələcəyi üçün hazırlayan vətənpərvərdir, vətəndaşdır, ictimai xadimdir. Müəllim
gənc nəslin mənəvi aləminin memarı, cəmiyyətin etibar etdiyi şəxsdir. Cəmiyyət
ən əziz, ən qiymətli sərvətini - uşaqları, tələbələri, öz ümidini, öz
gələcəyini məhz müəllimə etibar edir.
Hər adama müəllim deyib, uşaqları ona tapşırmaq
böyük xətadır
Təsadüfi
deyil ki, müəllim adı, müəllimlik peşəsi hər zaman uca tutulub, bu şərəfli
vəzifənin öhdəsindən ləyaqətlə gələn insanlara cəmiyyətdə hər zaman hörmətlə
yanaşılıb. İslam dinin sonuncu peyğəmbəri, Allahın rəsulu Məhəmməd (ə)
"Beşikdən qəbr evinə qədər öyrənməyi” tövsiyə edib. Onun yolunun davamçısı
Həzrəti Əli (ə) "Mənə bir hərf öyrədənin köləsi olaram” söyləməklə, dinimizdə
öyrənməyə, öyrədənə - müəllimə verilən dəyəri nümayiş etdirib. Zaman-zaman
Azərbaycan ziyalıları da müəllimlik peşəsi barədə sanballı fikirlər söyləyib,
bu vəzifənin daşıyıcılarına ictimai qiymət veriblər. Xalqımızın görkəmli
ictimai-siyasi xadimlərindən olan Nəriman Nərimanov xalq müəllimlərinə verdiyi
tövsiyələrdən birində yazırdı ki, Vətənin xoşbəxtliyi onun cavanlarının yaxşı
tərbiyəsi ilə bağlıdır. Yaxşı tərbiyə isə insanın əqlini və əxlaqını gözəl, pak
şeylər əxz etməyi öyrətməkdən, ürəyini və vicdanını pisliklərdən çəkindirməkdən
ibarətdir. Azərbaycanın tanınmış bəstəkarı Üzeyir Hacıbəyov da öz yazılarında
müəllimlik vəzifəsini çox çətin və ən məsuliyyətli bir vəzifə kimi xarakterizə
edib. Bildirib ki, hər adam onun öhdəsindən gələ bilməz və hər adama müəllim
deyib, uşaqları ona tapşırmaq böyük xətadır. Yalnız bir təlimdən başqa, uşağın
tərbiyəsinin dəxi müəllimin öhdəsində olduğunu xatırladan dahi bəstəkar qeyd
edib ki, uşaq dəxi qabili - tərbiyə bir şey olduğuna görə, onu nə tövr tərbiyə
etsən, o cür də adam çıxar. Ü.Hacıbəyovun fikrincə, tərbiyə işində cüzi bir
səhlənkarlıq uşağın gələcəyini pozub, evini yıxar. Ona görə də bu ağır sənətə
qədəm qoyan müəllim əfəndi bunların hamısını əvvəlcə mülahizəyə almalıdır.
Yer üzündə müəllimdən yüksək ad tanımıram
Xalqımızın
ümummilli lideri, görkəmli şəxsiyyət Heydər Əliyev də müəllim adına, müəllimlik
peşəsinə daim hörmət və diqqətlə yanaşıb. O, müəllim əməyini yüksək
qiymətləndirərək deyib: "Mən yer üzündə müəllimdən yüksək ad tanımıram. Hər
birimizdə müəllimin hərarətli qəlbinin bir zərrəciyi vardır. Məhz müəllim doğma
yurdumuzu sevməyi, hamının rifahı naminə vicdanla işləməyi müdrikliklə və
səbirlə bizə öyrətmiş və öyrədir. Hər birimizin öz müəllimi vardır və biz bütün
ömrümüz boyu onun xatirəsini hörmətlə, minnətdarlıqla qəlbimizdə yaşadırıq”.
"Təhsil Haqqında Qanun”umuzda isə bildirilib ki, müəllimin vəzifəsi Azərbaycan
dövləti qarşısında öz məsuliyyətini dərk edən, xalqın milli ənənələrinə və
demokratiya prinsiplərinə, insan hüquqları və azadlıqlarına hörmət edən,
vətənpərvərlik və azərbaycançılıq ideyalarına sadiq olan, müstəqil və yaradıcı
düşünən vətəndaş və şəxsiyyət yetişdirməkdir.
İnsanı həyata hazırlayan müqəddəs varlıq
Görkəmli
şəxsiyyətlərin fikirlərindən, qanunvericilikdən gətirilən nümunədən də aydın
olduğu kimi, müəllimlik çətin, məsuliyyətli, eyni zamanda, şərəfli və müqəddəs
bir peşədir. Müəllim insanı həyata hazırlayan, onun dünyagörüşünü, mənəvi
dünyasını və ictimai-siyasi baxışlarını formalaşdıran müqəddəs varlıqdır.
Xalqın tərəqqisi məktəbdən, məktəbin tərəqqisi isə müəllimdən başlayır. Müəllim
yüksək əqidə, məslək sahibi, eyni zamanda əsl vətəndaş olmalıdır. O, xalqın,
Vətənin problemləri ilə yaşamalı, gəncliyi də bu ruhda yetişdirməlidir.
Sevindirici haldır ki, müstəqil Azərbaycanda bu cür yüksək keyfiyyətlərə malik
olan müəllimlərin sayı çoxdur. Onlardan biri də ömrünün böyük əksəriyyətini
pedaqoji fəaliyyətə, gənc nəslin təlim-tərbiyəsinə həsr edən Allahyar
İmanovdur. O, 1957-ci ildə Laçın rayonunun Arduşlu kəndində anadan olub.
1964-1968-ci illərdə doğma kəndindəki məktəbdə ibtidai təhsil alıb.
1968-1974-cü illərdə Vağazin kəndində orta təhsil alıb. Hərbi xidmətini başa
vurub doğma vətəninə qayıtdıqdan sonra bir müddət əmək fəaliyyəti ilə məşğul
olub. 1979-1984-cü illərdə indiki Azərbaycan Dövlət Pedaqoji Universitetinin
(ADPU) pedaqoji fakültəsində ali təhsil alıb. Təhsilə, elmə böyük maraq
göstərən, eyni zamanda fəal ictimaiyyətçi olan A.İmanov 1984-1986-cı illərdə
pedaqoji fakültənin komsomol komitəsinin katibi, 1986-1991-ci illərdə institut
komsomol komitəsinin katibi kimi fəaliyyət göstərib.
Şərəflə yaşanan müəllim ömrü
Azərbaycan
müstəqilliyini ikinci dəfə bərpa etdikdən sonra A.İmanov 1991-1994-cü illərdə o
zamankı Azərbaycan Dövlət Pedaqoji İnstitutunun (ADPİ) axşam fakültəsinin dekan
müavini, 1994-1997-ci illərdə pedaqoji fakültənin dekan müavini vəzifələrində
işləyib. Allahyar müəllim 1993-cü ildə "Məktəblilərin ordu sıralarına
hazırlanmasında məktəblə ailənin əlbir işinin məzmunu və formaları” mövzusunda
namizədlik dissertasiyasını müdafiə edərək, pedaqogika üzrə fəlsəfə doktoru
elmi dərəcəsini alıb. O, 2002-ci ildən indiki ADPU-nun Pedaqogika və
psixologiya fakültəsinin dekan müavini vəzifəsində çalışır. İbtidai təhsilin
pedaqogikası və metodikası kafedrasının dosentidir. Onun əmək və elmi
fəaliyyəti müntəzəm olaraq müxtəlif formalarda qiymətləndirilib, "Əmək
igidliyinə görə” medalı ilə təltif edilib. Müxtəlif məzmunlu məqalələrlə dövri
mətbuatda da çıxış edən A.İmanov "Qızıl qələm” mükafatı laureatıdır. Elmi və
pedaqoji fəaliyyətə ömrünün böyük hissəsini həsr edən A.İmanov, 6 dərs və 8
metodiki vəsaitin, 4 proqramın, 10 elmi
məqalənin, 15 tezisin müəllifidir.
Ot kökü üstə bitər
Burada
bir məqamı da qeyd edim ki, A.İmanovun atası Süleyman İmanov da Böyük Vətən
Müharibəsindən öncə və sonra gənclərin təlim-tərbiyəsi ilə məşğul olub. Hitler
Almaniyasının dünya ağalığına iddia edərək, keçmiş sovetlər ittifaqının
ərazisinə hərbi müdaxilə etdiyi ilk günlərdən S.İmanov silaha sarılaraq ümumi vətənimizin
müdafiəsinə qalxıb. Onun əsgər olduğu 223-cü Azərbaycan diviziyası Terek çayı
sahilində yerləşən Qroznı şəhərinin müdafiəsində iştirak edib. O, bu döyüşdə
bədəninin iki yerindən yaralanıb və Mahaçkalada müalicə olunub. Sağalandan
sonra yenidən cəbhəyə yollanıb və 416-cı Azərbaycan diviziyasının 1374-cü
polkunda düşmənə qarşı vuruşub. 1942-ci ilin dekabr və 1943-cü ilin yanvar
ayında Mazdokda ağır, odlu-alovlu döyüşlərin iştirakçısı olub. Minvod, Kirsovka
və başqa şəhərlərin azad olunmasında yaxından iştirak edib. Rostov və Taqanroq
şəhərlərini düşmən tapdağından azad etdikdən sonra S.İmanovun xidmət etdiyi diviziya
416-cı Taqanroq diviziyası adlanıb. Mazdokdan başlayaraq sonradan 1354-cü
artilleriya polkunda Berlinə qədər keçən döyüş yolunda S.İmanov 14 dəfə
yaralanıb. O, Böyük Vətən Müharibəsində göstərdiyi şücaət və qəhrəmanlıqlara
görə, 14 orden və medala, çoxsaylı fəxri fərman və təşəkkürnamələrə layiq
görülüb. Bir qədər əvvəl vurğulandığı kimi, müharibədən sonrakı illərdə
S.İmanov gənc nəslin təlim-tərbiyəsi ilə məşğul olub. Müstəqilliyimizi ikinci
dəfə bərpa etdikdən sonra da S.İmanov Laçın Veteranlar Şurasının sədri kimi
tez-tez məktəblilərlə, əmək kollektivləri ilə görüşlər keçirib gənclərdə
vətənpərvərlik ruhunun formalaşmasına öz töhfəsini verib. S.İmanov şagird və
tələbələri ilə yanaşı, öz övladlarına da vətənpərvər olmağı, vətəni göz bəbəyi
kimi qorumağı vəsiyyət edib. Məhz bu səbəbdəndir ki, S.İmanovun övladı Maksim,
nəvələri Elxan, Təyyar və Arif də Qarabağ müharibəsində silaha sarılaraq
torpaqlarımızın müdafiəsinə qalxıblar.
Ürəyini şam kimi yandırmaq
Bu
xatırlatmadan da göründüyü kimi, A.İmanovun müəllimlik taleyi, gənc nəslin
təlim-tərbiyəsinə xidmət etmək amalı, vətənə, elə-obaya bağlılığı, dövlətinə və
xalqına sədaqətlə xidmət etməsi atası S.İmanovdan irsən keçmədir. May ayının
3-də 60 yaşını qeyd edəcək Allahyar müəllim bu gün də yorulmaq bilmədən
vəzifəsinin öhdəsindən layiqincə gəlir, peşəsinə sadiqlik nümayiş etdirir. Eyni
zamanda o, ideoloji cəbhənin əsgəri kimi öz qələmi ilə də vətəninə xidmət edir.
Sevinirəm ki, məhz belə bir ocaqda, öz peşəsinə qəlbən bağlı olan müəllim
ailəsində dünyaya göz açmışam. Uşaqlıqdan bu günə kimi Allahyar müəllimin
tərbiyəsini alıb, onun öyüd-nəsihətləri ilə böyümüşəm. Elə müəllimlik peşəsini
seçməyimə səbəb də atamın – A.İmanovun müəllim adını hər zaman uca tutması,
ürəyini şam kimi tələbələri yolunda yandırması, şərəflə müəllim adını daşıması
olub. Sonda qeyd edim ki, dünyanın ən məşhur insanları, müəllimə olan sevgi və
sayğılarını ifadə edərkən bildiriblər ki, müəllim günəş kimi qəlbi və ağlı
işıqlandırır, uşaqlara bağban qayğısı göstərir, mühəndis kimi insan qəlbinin
layihəsini cızır. Mən uşaqlıqdan indiyə kimi Allahyar müəllimin timsalında
bütün bunları müşahidə etmişəm. Gördüklərim və öyrəndiklərim əsasında çalışıram
ki, ən azı Allahyar müəllim qədər olum, bilik və bacarıqlarımı tələbələrə
aşılayım, sabahın kamil vətəndaşının yetişdirilməsinə öz töhfəmi verim.
Aynur
ALLAHYARQIZI,
Bakı
İdarəetmə və Texnologiya Kollecinin müəllimi