AZE | RUS | ENG |


Xalq Artisti Fəxrəddin Manafov yenidən səhnədə

Xalq Artisti Fəxrəddin Manafov yenidən səhnədə
S.Vurğun adına Azərbaycan Dövlət Rus Dram Teatrı yeni mövsümü fransız dramaturqu Ejen İoneskonun "Kral ölür" pyesi əsasında hazırlanmış "Mərasim" tamaşası ilə açıb.

AZƏRTAC xəbər verir ki, bakılı tamaşaçıların diqqətinə teatr mühitimiz üçün qeyri-adi tamaşa - absurd teatrı təqdim edilib.

Kral iki saatdan sonra ölməlidir. Krallıqda ağlasığmaz hadisələr baş verir: divarlar uçur, hakimiyyətin sərhədləri məhdudlaşır, saray əhli başını itirir, krallığı qoruyanlar qəfil xəstəlikdən ölürlər, ilin fəsilləri nizamsız qaydada bir-birini əvəz edir. Bununla belə əsas personaj (Kral) hər vəchlə müqavimət göstərir, sona qədər vəziyyəti dəyişmək və ölümdən qaçmaq istəyir.

Səhnə əsəri dərin fəlsəfi dialoqlarla zəngindir ki, bu da tamaşaçıları həyat və ölüm, ölümdən sonrakı həyat barədə düşüncələrə aparıb çıxarır. Aktyorların parlaq ifası tamaşaçıları səhnədə baş verənləri son dərəcə diqqətlə izləməyə sövq edib.

Tamaşanın quruluşçu rejissoru Ərşad Ələkbərov AZƏRTAC-a müsahibəsində qeyd edib ki, əsərin başlıca mövzusu ölüm və insanın dünyasını dəyişməsidir. "Tamaşada biz insanın ölümqabağı nə dərəcədə güclü qorxu hissi keçirdiyini göstəririk. Burada Fəxrəddin Manafov ölümü qəbul etmək anını necə təsəvvür etdiyini göstərir. Bu pyes ali məktəbin dördüncü kursunda oxuyarkən fikrimi məşğul etmişdi. Onu indi reallaşdıra bildim", - deyə rejissor bildirib.

F.Manafovla əməkdaşlıqdan danışan Ə.Ələkbərov qeyd edib ki, aktyor Şekspirin pyesində oynamaq istəyirdi. "Lakin biz Ejen İoneskonu seçəndə başa düşdük ki, bu absurd əsərdə həm Şekspir, həm də Çexov ruhu duyulur".

Tamaşadan və 97-ci mövsümün açılışından əvvəl çıxış edən Xalq Artisti, Rus Dram Teatrının baş rejissoru Aleksandr Şarovski dəvətli rejissorlarla əməkdaşlıq nöqteyi-nəzərindən teatrın planlarından, habelə yeni eksperiment və premyeralardan danışıb.

"Mərasim" tamaşasının quruluşçu rejissoru Ərşad Ələkbərov (Sankt-Peterburq), quruluşçu rəssamı Azərbaycanın Əməkdar Mədəniyyət İşçisi Olqa Abbasova, işıq üzrə rəssamı Nikolay Rudıçevdir.

Tamaşada Xalq Artisti Fəxrəddin Manafov, Əməkdar Artist Mehriban Zəki, aktyorlar Oleq Əmirbəyov, Həcər Ağayeva, Mariya Dubovitskaya, Natiq Hüseynov, kütləvi səhnələrdə Azərbaycan Dövlət Mədəniyyət və İncəsənət Universitetinin tələbələri iştirak ediblər.





Paylaş:

Facebook-da

Reklam

Xəbər lenti

Valyuta məzənnəsi

Tipi Ədə. Adı AZN
IRR 100 İran rialı 0.0042
GEL 1 Gürcü larisi 0.6539
GBP 1 İngilis funt sterlinqi 2.2653
TRY 1 Türk lirəsi 0.4424
KWD 1 Küveyt dinarı 5.6250
SEK 1 İsveç kronu 0.2020
EUR 1 Avro 1.9983
CHF 1 İsveçrə frankı 1.7166
USD 1 ABŞ dolları 1.7001