Vətəndaş cəmiyyətinə verilən önəm
Hökumət-QHT dialoqunda ictimai nəzarətin həyata keçirilməsi üçün zəruri olan resursların əldə edilməsi ilə bağlı təkliflər verilib
Azərbaycan müstəqillikdən sonrakı dövrdə bir çox
sahələrdə ciddi irəliləyiş əldə edib və dünyanın inkişaf etmiş ölkələri
sırasına daxil olmaqla yanaşı, həm də vətəndaş cəmiyyətinin qurulması istiqamətində
bir sıra nailiyyətlər qazanıb. Ölkəmizdə bu sahənin inkişafına xüsusi diqqət və
qayğı göstərilir. Çünki güclü dövləti şərtləndirən amillərdən biri də güclü vətəndaş
cəmiyyətinə sahib olmaqdır. Dövlətin vətəndaş cəmiyyəti təsisatlarını dəstəkləməsinə
dair konkretmexanizmlər formalaşdırılıb, insan haqlarının müdafiəsinin
gücləndirilməsi məqsədilə Milli Fəaliyyət Proqramı qəbul edilib, siyasi
partiyaların dövlət büdcəsindən maliyyələşdirilməsi üçün qanunvericilik
islahatları həyata keçirilib. Azərbaycanda vətəndaş cəmiyyətinin dəstəklənməsinə
və inkişafına yönələn ən mühüm addımlardan biri vətəndaş cəmiyyətinin aparıcı
elementlərindən olan Qeyri-Hökumət Təşkilatlarının xarici donorlardan
asılılığının azaldılması və dövlətin bu təşkilatlar üçün əsas donora çevrilməsi
üçün mexanizmin formalaşdırılmasıdır. Dövlət bu istiqamətdə ciddi addımlar
atır. Ölkəmizdə QHT-lərin fəaliyyətinə böyük önəm verilir. Bunun nəticəsidir ki, 26 avqust tarixində Azərbaycan
Respublikası Prezidentinin köməkçisi, Azərbaycan Respublikası Prezidentinin
Administrasiyasının Xarici siyasət məsələləri şöbəsinin müdiri Hikmət Hacıyev
ölkənin bir çox fəal qeyri-hökumət təşkilatları rəhbərlərinin daxil olduğu
"İctimai Liderlər Platforması"nın üzvləri ilə onlayn görüş keçirib.
Görüşü giriş sözü ilə açan Azərbaycan Respublikasının Prezidenti yanında
Qeyri-Hökumət Təşkilatlarına Dövlət Dəstəyi Şurasının sədri Azay Quliyev
Prezidentin köməkçisi Hikmət Hacıyevə QHT-lərlə görüşdüyünə görə təşəkkür edib
və bu təşəbbüsün QHT-hökumət münasibətlərində yeni keyfiyyət mərhələsinin
başlanğıcı olacağına və QHT sektoru üçün prioritet olan məsələlərin həllinə təkan
verəcəyinə əminliyini ifadə edib.Azərbaycan Respublikası Prezidentinin
köməkçisi Hikmət Hacıyev Prezident İlham Əliyevin cəmiyyətimizdə QHT-lərin fəaliyyətinə
və ictimai nəzarət mexanizmlərinin gücləndirilməsinə xüsusi önəm verdiyini qeyd
edib. H. Hacıyev QHT sektorunun ölkəmizin ictimai həyatında fəal iştirakını
vurğulayıb, hökumətin QHT-lərlə dialoqun genişlənməsində və QHT-lərin
diqqətində olan məsələlərin müzakirəsində maraqlı olduğunu bildirib. O, vətəndaş
cəmiyyəti institutlarının ölkəmizin dayanıqlı sosial iqtisadi inkişafı, vətənpərvərliyin
gücləndirilməsi, milli maraqlarımızın qorunması, həmçinin təhsil,
humanitar və ictimai əhəmiyyət daşıyan digər sahələrdə mühüm roluna toxunub,
dövlət başçısının qeyd etdiyi kimi, ictimai nəzarət mexanizmlərinin və onun tətbiqinin
səmərəliliyinin artırılmasının zəruriliyini diqqətə çatdırıb. Qeyd edək ki,
görüşdə bir çox QHT rəhbərləri iştirak edib, sektorun
gücləndirilməsi və QHT-ləringündəliyində olan məsələlərin həlli ilə bağlı
fikir və təkliflərini səsləndiriblər. Görüşdə iştirak edən bəzi QHT rəhbərləri
ilə həmsöhbət olub təəssüratlarını öyrəndik.
Azərbaycan Gənc
Alim, Aspirant və Magistrlər Cəmiyyəti İctimai Birliyinin sədri İlqar Orucovun sözlərinə görə,görüş
zamanı vətəndaş cəmiyyətini narahat edən bir çox məqamlara toxunulub:
"Toxunulan mövzuları bir neçə yerə bölmək olar. İlk olaraq qanunvericiliyin təkmilləşdirilməsi
məsələsi gündəmə gəldi. Eyni zamanda Azərbaycan-Ermənistan konflikti ilə bağlı
həqiqətlərin dünyaya çatdırılması məsələsindən danışıldı. Daha sonra cəmiyyətdə
baş verən hadisələrə operativ münasibətin bildirilməsi ilə bağlı QHT-lərin üzərinə
düşən vəzifələr, dövlət qurumları ilə vətəndaş cəmiyyəti arasında əməkdaşlığın
gücləndirilməsi, vətəndaş cəmiyyətində rəqabət mühitinin yaxşılaşdırılması və inkişaf
etdirilməsi, yaradıcı və innovativ təşəbbüslərin irəli sürülməsi, qrant layihələrinin
maliyyələşdirilməsi, QHT-lərin qeydiyyatı, beynəlxalq qurumlarda təmsilçilik
kimi məsələlər müzakirə olundu. Bu görüş onu göstərir ki, dövlətdə vətəndaş cəmiyyəti
ilə bağlı yeni fikir formalaşır. Vətəndaş cəmiyyəti qurumlarına belə önəm
verilməsi Azərbaycan dövlətinin müəyyən bir dəyərlərə, prinsiplərə sadiqliyini
nümayiş etdirir. Ona görə də, bu kimi görüşlərin gələcəkdə də təkrarlanması ilə
əlaqəli fikirlər səsləndirildi”.
"Multimedia
Sistemləri” İctimai Birliyinin sədri Osman Gündüz bu görüşün çoxdandır gözələnilən və ehtiyac duyulan
olduğunu bildirdi: "Uzun müddət idi ki, belə bir görüş keçirilmirdi. Yəni yüksək
səviyyəli hökümət nümayəndəsi və vətəndaş cəmiyyəti liderlərinin görüşü illər əvvəl
olub. Bu baxımdan, görüş arzu olunan və ciddi ehtiyac duyulan idi. Prezident
İlham Əliyev də, demək olar ki, bütün çıxışlarında vətəndaş cəmiyyəti və
medianın müzakirə olunan məsələlərə diqqət yetirməli olduğunu, ictimai nəzarətin
gücləndirilməsini vurğulayır. Düşünürəm ki, Hikmət Hacıyevin bizimlə olan
görüşündə də məqsəd prezidentin çıxışında qeyd etdiyi məsələlərdən qaynaqlanır.
Görüşün mahiyyətinə gəlincə isə bu sahəni əhatə edən bütün məsələlərə və
problemlərə toxunuldu. Həmçinin ictimai nəzarətin həyata keçirilməsi üçün zəruri
olan resursların əldə edilməsi ilə bağlı xeyli təkliflər verildi”.
"Təmiz Dünya”
Qadınlara Yardım İctimai Birliyinin sədri Mehriban Zeynalova deyir ki, belə bir görüşün keçirilməsi QHT rəhbərləri üçün olduqca önəmlidir: "Uzun
müddət sonra bu görüşün baş tutmasını yüksək qiymətləndirirəm. Bir hökümət
nümayəndəsinin bizi dinləməsi, QHT-lərin ölkədəki fəaliyyəti ilə bağlı müzakirələrin
aparılması xoş oldu. Görüş çox səmimi keçdi, hər kəsə fikirlərini səsləndirməsi,
təkliflərini bildirməsi üçün imkan verildi. Qanunvericilik, QHT-lərin rolu ilə
bağlı məsələlərdən danışıldı. Düşünürəm ki, görüşdə müzakirə olunan məsələlər
qısa zamanda öz həllini tapacaq, bəzi təkliflər həyata keçiriləcək”. Görüş iştirakçılarından olan Beynəlxalq Avrasiya Mətbuat Fondunun sədri Umud Mirzəyev belə
görüşlərin mütəmadi olaraq keçiriləcəyini qeyd etdi: "Hikmət Hacıyevlə vətəndaş
cəmiyyətinin tanınmış simalarının görüşü kifayət qədər effektli oldu. Görüş
zamanı vətəndaş cəmiyyətinin bütün sahələrini əhatə edən məsələlərlə bağlı
fikir mübadiləsi aparıldı. Həmçinin QHT-lərin gələcək fəaliyyəti ilə əlaqəli da
bəzi nüanslara toxunuldu. Hazırda vətəndaş cəmiyyətinin işini əngəlləyən məqamlar
çox açıq şəkildə dilə gətirildi. Təxminən 20 yaxın iştiakçı vardı. Danışıqlar
zamanı belə görüşlərin mütəmadi olacağı
da vurğulandı”.
Günel Azadə