Uşağın da ölkə xaricinə çıxmaq hüququ var, amma...
"Uşağım
anadangəlmə qaraciyər kistasından əziyyət çəkir. Moskvada anadan olduğu üçün həkimləri
də oradadır. Ona görə Bakıya köçəndən sonra da müayinə və müalicəsi üçün
Moskvaya getmək lazım idi. Lakin keçmiş həyat yoldaşım uşağın mənimlə müayinə
üçün ora getməyinə razılıq vermədi. Uşağın ölkədən çıxarılması üçün mütləq digər
valideynin də notariusda təsdiqlənmiş icazəsi olmalıdır” - bu sözləri "Kaspi”yə
açıqlamasında Şəhla Hüseynova bildirib.
Ş.Hüseynova
deyir ki, uşağını təcili şəkildə Moskvada müayinəyə aparmaq lazım olsa da, buna
nail ola bilməyib. Məcburən uşağı ölkədə klinikalardan birinə aparıb və uşağının
atasının razılığı olmadan ölkədən çıxarılmasına nail olmaq üçün məhkəməyə üz
tutub: "Məhkəməyə müraciət edəndə icazə kağızı almaq olur. Hər hansı problem
olmur. Amma məhkəməyə müraciət etməyimlə, qərar çıxarılması bir ay yarım vaxt
apardı, Bir ay isə qərarın qüvvəyə minməsi üçün gözlədik”.
Amma
düşünülməyən, heç planlaşdırılmayan hadisələr də baş verir. Məsələn, uşağın
müalicəsi ilə bağlı ölkə xaricinə 2-3 günə çatdırılması lazım ola bilər. Yaxud,
uşaq hansısa yarışa qatılmalıdır, müəyyən bir vaxta qədər qeydiyyatdan keçməlidir,
lap elə xoş variantından danışaq, uşağın istirahət hüququ var.
18 yaşına
çatmamış vətəndaş ölkədən necə çıxa bilər?
Qeyd
edək ki, "Ölkədən getmək, ölkəyə gəlmək və pasportlar haqqında”
Azərbaycan Respublikasının qanununa əsasən 18 yaşına çatmamış vətəndaş ölkədən öz valideynlərinin
və ya qanuni nümayəndəsinin notarius tərəfindən və ya qanunvericiliklə nəzərdə
tutulmuş qaydada təsdiq edilmiş razılığı ilə gedə bilər. Valideynlərdən birinin
razılığı olmadıqda yetkinlik yaşına çatmamış vətəndaşın ölkədən getməsi məsələsi
məhkəmənin qərarı əsasında həll edilir.
Qanun
uşaqların təhlükəsizliyinin və hüquqlarının təmin edilməsi üçün əhəmiyyətlidir.
Amma müsahibimizin əvvəldə qeyd etdiyi kimi, təcili məqam olduqda, valideynlərdən
birinin razılığı olmadıqda, uşağın ölkədən çıxarılması mümkün olmur, məsələ məhkəmə
qaydasında həll olunur. Buna isə zaman lazım olur və uşağın hüququ pozulur. Bəs
elə bir mexanizm qurmaq olmazmı ki, uşağın ölkədən çıxarılması vacib olan məqamlarda
bu proses çox vaxt aparmasın?
"Boşanmamış
ailələrdə belə...”
Hüquqşünas Xəyal Bəşirov "Kaspi”yə açıqlamasında bildirdi ki, boşanmamış
ailələrdə belə yetkinlik yaşına çatmayan uşaqların ölkədən çıxarılması üçün ya
hər iki valideyn getməlidir, ya da valideynlərdən biri gedirsə, digər tərəfin
notarial qaydada razılığı olmalıdır. Amma boşanandan sonra çox vaxt valideynlər
arasında münasibətlər korlandığı üçün bir-birlərinə problem yaratmaq istəyirlər.
Bu zaman isə uşağın hüquqları pozulur: "Problemi əsasən ata yaradır. Çünki
yetkinlik yaşına çatmayan uşaqları adətən boşanma zamanı məhkəmələr anada
saxlayırlar. Çox istisna hallarda atada qalır. Əksər hallarda atalar ya
etibarnamə verməkdən imtina edirlər, yaxud etibarnamə verib sonra ləğv edirlər.
Bir dəfə təcrübəmdə olub ki, 12 yaşlı uşağın Amerikada təhsil almaq şansı
yaranmışdı. Bir il pulsuz təhsil ala biləcəkdi. Ata ölkədən çıxışına razılıq
vermədiyi üçün şansı əldə verdi. Məhkəməyə verilsə də, qətnamə çıxarılana qədər
artıq onların Amerikaya getmə üçün qoyulan son tarix bitmişdi”.
Hüquqşünas
deyir ki, qarşı tərəf icazə verməyəndə, valideyn məhkəməyə müraciət etməklə
uşağın ölkədən çıxarılmasına digər valideynin icazəsi olmadan da nail ola bilər:
"Məhkəmə qətnaməsi olarsa, digər valideynin razılığına ehtiyac olmur. Bu zaman
məhkəmə uşağın ölkədə çıxarılmasını təmin edir, amma qaytarılmaq şərtilə. Birdəfəlik
aparmaq olmaz. Təhsil, müalicə kimi səbəblər olmasa belə, uşağın istirahət etmək
hüququ var”.
Bəzən bir ilə
qədər vaxt aparan mürəkkəb prosedur...
Qanunvericilik
məsələni bu qaydada həll edir. Bəs bu cür tənzimləmə, hüquq normalarının bu şəkildə
qoyulması uşağın mənafeyinə nə dərəcədə uyğundur? Hüquqşünas Ceyhun Cəfərli bildirdi ki, ölkə xaricinə getməsi təcili
olduğu və atası razı olmadığı, yaxud onunla əlaqə saxlamaq mümkün olmadığı məqamlarda
uşağın hüquqları pozulur: "Yaxınlarda bu məsələ ilə bağlı aidiyyəti qurumlara,
millət vəkillərinə müraciət etmək fikrim vardı ki, Mülki Prosessual Məcəllədə
bu kateqoriyadan işlərə baxılmasının fərqli, asanlaşdırılmış bir proseduru öz əksini
tapsın. Uşaq xaricdə olimpiadada iştirak edəcək, yaxud Azərbaycanda olmayan
hansısa müalicə, tibbi müayinə zərurəti yaranıb. Valideynlər ayrı yaşayır və
tutaq ki uşağı 3 gün ərzində İstanbulda hansısa xəstəxanaya çatdırmaq lazımdır.
Amma uşağın atası burada yoxdur. 3 gün ərzində bu məsələ necə olsun? Biz uşağı
necə göndərək? Atanın razılığı mütləq lazımdır. Biz vəkillər belə olan halda məhkəməyə
müraciət edirik. Məhkəmə isə belə kateqoriyadan olan işlərə Mülki Prosessual Məcəllənin
tələblərinə uyğun olaraq 3 ay müddətində baxmalıdır. Bu qərarı alandan sonra qərardan
narazı tərəfin şikayət verməsi, məsələyə Apellyasiya, sonra Ali Məhkəmədə
baxılması aylarla, bəzən bir ilə qədər vaxt aparan bir mürəkkəb prosedura
çevrilir. Bu zaman uşağın təcili müalicəsindən söhbət gedə bilməz. Uşağın
hüququ pozuldu, səhhəti təhlükə altına düşdü”.
Məsələ daha çevik necə həll oluna bilər?
Məsələnin
daha çevik həll olunması üçün prosedurların necə olmasına gəlincə, hüquqşünas
bildirdi ki, bu iş də müasir dövrün tələblərinə uyğun olaraq qanunvericilikdə
öz əksini tapmalıdır: "Atanın telefonu və ya rəsmi ünvanına dərhal bildiriş
göndərməklə bir neçə saat ərzində cavab almaq məsələsi qoyulmalıdır. Əgər cavab
vermirsə, məhkəmə məsələyə qısa bir zamanda baxılmalıdır. Məsələn, seçki günü
seçki şikayətlərinə Appelyasiya Məhkəməsində bir neçə saat ərzində baxılır. Əmr
icrası, yaxud bir şəxsin ölkədən getməsinə məhdudiyyət qoyulması ilə bağlı
vergi orqanlarının müraciətlərinə baxılma qaydasına qanunvericiliklə dərhal
baxılır və qərar verilir. Nə üçün biz öz uşaqlarımızın da taleyüklü məsələsini
belə həll etməyək? Mülki Prosessual Məcəllədə bu problemin qısa zamanda həlli
öz əksini tapmalıdır. Qanun uşağın ölkədən çıxarılması ilə bağlı məsələni tənzimləyir,
amma təcili zamanda ölkədən getməsi lazım olanda prosesin tezləşdirilməsi üçün
heç nə deyə bilmir”.
Atanın razılığı olmalıdır, amma...
C.Cəfərli
deyir ki, yetkinlik yaşına çatmayanların ölkədən valideynlərin hər ikisinin
razılığı ilə çıxarılması tələbi əslində önəmlidir. Çünki valideynin uşağının
ölkədən çıxarılması ilə bağlı məlumatlı olmaq haqqı var: "İndi elə bir zamandır
ki, qadın uşaqlarını götürüb hansısa terrorist təşkilatlara da qoşula bilər.
Buna görə də atanın uşağının ölkədən çıxarılmasına razılığı olmalıdır. Uşağı
hara və kimlə gedir, harada, nə qədər qalacaq və onların maliyyə qaynaqları
hardandır? Atanın öz övladının təhlükəsizliyinə əmin olması üçün bu kimi zəruri
informasiyanı almaq hüququ var. Sadəcə, uşağın ölkədən təcili getməsi məsələsi
zamanı olan problem aradan qaldırılsın ki, uşaqların hüquqları bu cür məqamlarda
pozulmasın”.
Ayrı yaşayan valideyn övladı ilə maraqlanmır,
aliment ödəmirsə...
Ailə, Qadın və Uşaq Problemləri üzrə Dövlət Komitəsinin hüquqi təminat şöbəsinin müdiriTaliyə İbrahimova deyir ki, məsələnin bu cür tənzimlənməsi
uşaqların mənafeyi
baxımından önəmlidir: "Çünki bəzən uşağı saxlayan valideyn onu digər
valideynindən ayrı saxlamaq üçün sui-istifadə edə bilər. Tutaq ki, uşağı
saxlayan valideyn onu digər valideyndən uzaq tutmaq məqsədilə xaricə apara bilər.
Bu zaman isə uşaq müdafiə olunmalıdır. Amma elə məqamlar da olur ki, uşaq təcili
ölkədən çıxmalı olsa da, ayrı yaşayan valideyn öz hüququndan istifadə edib, digər
tərəfə daha çox narahatçılıq yaratmaq üçün razılığı heç cür vermək istəmir”. Belə
bir məqamlar olur ki, boşanandan sonra uşaqdan ayrı yaşayan valideyn övladı ilə
maraqlanmır, aliment ödəmir. Birdən-birə uşağın xaricə aparılması məsələsi
ortaya çıxanda isə onun razılığı tələb olunur. T.İbrahimova bildirdi ki, komitəyə
bu məqamla bağlı çox müraciət daxil olur: " Əgər digər valideyn vəzifəsindən
sui-istifadə edərsə, alimenti qəsdən vaxtında ödəməzsə, o, valideynlik
hüququndan məhrum edilə bilər. Bu zaman isə onun notariat qaydada təsdiq
olunmuş razılığına ehtiyac qalmır. Çıxış yolu var. Anlaşılmazlıq varsa, bütün
hallarda məhkəməyə müraciət olunmalıdır. Əgər uşaq təcili getməlidirsə, bu
zaman məhkəmə təcili məqam olduğunu nəzərə alıb, prosesə daha tez baxa bilər.
Amma hər bir halda məhkəmənin qətnaməsi bir ay ərzində qüvvəyə minməlidir. Ona
görə uşağı ölkədən çıxarmaq istəyən valideyn işini öncədən bilməli, digər
valideyni tapıb razılığını almağa çalışmalıdır”.
T.İbrahimova
onu da bildirdi ki, uşağın bir valideyndən icazəsiz ölkədən çıxarılması beynəlxalq
sənədlərdə uşaq oğurluğu kimi qiymətləndirilir: "Bununla bağlı xüsusi
konvensiya da var. Düzdür, Azərbaycan hələ ki o konvensiyaya qoşulmayıb. Amma
qanunvericiliyimiz bu məsələləri tənzimləyir”.
"İcra nümayəndəliyində
bu işə baxan şöbə, yaxud məsul şəxs olmalıdır”
Milli Məclisin insan hüquqları komitəsinin üzvü
Tahir Kərimli deyir
ki, əgər uşağın müalicəsi xaricdə aparılacaqsa, təcili ölkədən
çıxarılmalıdırsa, atasından icazə almaq mümkün olmursa, nəinki hüququ pozulur,
həm də həyatı təhlükə qarşısında qalır. O, bildirdi ki, sovet dövründə bu
problemin tez bir zamanda həlli üçün mexanizm var idi: "O vaxtlar qəyyumluq
idarələrindən arayış almaqla, müəyyən məsələləri tez bir zamanda həll etmək
olurdu. Milis şöbələrinin nəzdində azyaşlılara nəzarət bölməsi fəaliyyət göstərirdi.
Bütün hallarda mübahisəli məqam yaranırdısa, məhkəmə qaydasında həll olunurdu”.
T.Kərimlinin
sözlərinə görə, hər bir rayonun icra nümayəndəliyində bu cür məsələlərin qısa
zamanda həlli üçün şöbə yaradıla, yaxud bu işlərə məsul şəxs təyin edilə bilər:
"Təhsil şöbələrində bununla bağlı müvafiq struktur yaratmaqla da, problemin həlli
istiqamətində iş görmək olardı. Amma indi təhsil şöbələrinin regionallaşdırılması
baş verir. Bütün rayonu əhatə edən bələdiyyə orqanları da yoxdur. Burada məsələ
ancaq icra nümayəndəliyinin üzərində qalır. Hər bir rayonun icra nümayəndəliyində
bu işə baxan şöbələr, yaxud məsul şəxs olmalıdır. Onlar uşağın ölkə xaricinə təcili
çıxması zəruri amilə çevrildikdə, işə qarışmalı, lazım olan orqanlarla əlaqə
saxlayıb müvafiq materiallar hazırlayaraq ən azı məhkəmə qarşısında vəsadət
qaldırmalıdırlar ki, heç olmasa uşağın müalicəsi tez bir zamanda təmin olunsun.
Valideynlərdən hansınınsa süni əngəl yaratdığı məlum olsa, icra orqanının bu
işlə məşğul olan şöbəsinin, yaxud şəxsinin müraciətindən sonra məhkəmə müvafiq
qərar verə bilər”.
Məhkəmə qətnaməsinin qüvvəyə minməsi üçün niyə 1 ay
gözlənilsin?
Millət vəkili
deyir ki, alimentlə bağlı məhkəmə qətnaməsinin icra olunması üçün 1 aylıq müddətin
ləğv edilməsini bu mexanizmdə də tətbiq etmək olar: "Artıq alimentlərlə bağlı məhkəmə
qətnaməsinin icra müddəti üçün 1 aylıq limit yoxdur. Belə bir dəyişiklik
edilib. İşə baxılan anda məhkəmə uşağın xaricə təcili müalicə üçün getməli
olduğunu müəyyən etsə, belə hallarda qərarın qüvvəyə tam minməsini gözləmədən
icraat aparmaq mümkündür. Bütün bunlar qanuni səviyyədə həllini tapmalıdır”.
Bu məsələylə
bağlı Milli Məclisdə hər hansı dəyişikliyin olub-olmadığına gəlincə, T.Kərimli
bunları söylədi: "Ancaq alimentlərlə bağlı müvafiq dəyişiklik olub. Alimentlərlə
bağlı məhkəmə qərarı dərhal icraya yönəldilir. Sizin qeyd etdiyiniz məsələ də
aktualdır. Ona görə bu problemi Təhsil Şöbəsi, AQUPDK və digər aidiyyəti orqanlar
araşdırıb, dövlət səviyyəsinə qaldırmalı, qanun layihəsi hazırlayıb təqdim etməlidirlər
ki, müvafiq dəyişiklik olsun”.
Aygün Asimqızı
Yazı
Almaniya Beynəlxalq Əməkdaşlıq Cəmiyyətinin (GIZ) "Cənubi Qafqazda hüquq sahəsində
Avropa standartlarına yaxınlaşma” regional proqramı çərçivəsində jurnalistlər
arasında "Uşaq hüquqlarının qorunması: milli/beynəlxalq qanunvericilik və təcrübə”
mövzusunda keçirdiyi müsabiqəyə təqdim edilir