Ukrayna Rusiyaya nota verməyə hazırlaşır
Ukrayna
xarici işlər nazirinin müavini, Beynəlxalq Haaqa Məhkəməsində Ukrayna nümayəndə
heyətinin rəhbəri Yelena Zerkal bildirib ki, Rusiyaya diplomatik nota ilə
müraciət edəcəklər. Rəsmi Kiyev notada Krımla bağlı BMT məhkəməsinin çıxardığı
qərarı Moskvanın nə vaxt yerinə yetirəcəyinə cavab istəyəcək. Öz növbəsində,
Ukrayna Ədliyyə Nazirliyi də Krımla bağlı məhkəmə qərarına Rusiyanın əməl
etməməsinə reaksiya verməyə hazırlaşır. Ukrayna ədliyyə naziri Pavel Petrenko
bildirib ki, əgər Moskva Haaqa Məhkəməsinin qərarlarını icra etməsə, onda BMT
Baş Assambleyası qarşısında Rusiyanın cəzalandırılması məsələsini qoyacaqlar.
Ukrayna
yanvar ayında Rusiyanı Beynəlxalq Haaqa Məhkəməsinə verib və bu günlərdə
bununla bağlı qərar qəbul edilib. Ukrayna Krımla yanaşı, Donbasdakı vəziyyətlə
də bağlı Haaqa Məhkəməsi qarşısında iddia qaldırmışdı. Ukrayna tərəfi məhkəmədə
Rusiyanın terrorizmi maliyyələşdirməsini sübuta yetirməyə çalışıb. Bununla
bağlı rəsmi Kiyev Moskvanı Donetsk və Luqansdakı qondarma qurumlara yardım
etməməyə, eləcə də Ukrayna ilə sərhədlərdə vəziyyəti nəzarətə almağa çağırıb.
Lakin Avropa İnsan Haqları Məhkəməsində sonuncu məsələ ilə bağlı Ukrayna
tərəfinin iddiaları əsassız hesab edilib. Krımla bağlı isə tək Ukrayna
tərəfinin deyil, ATƏT-in missiyasının arqumentləri də əsas götürülüb. Ukrayna
tərəfi Krımda Ukrayna dilində təhsilin alınmasında problemlərin olduğunu hesabata
salmağa müvəffəq olub. Eləcə də Krım tatarlarının Məclisinin ləğv edilməsinin
mənfi nəticələri barədə məsələ də orada öz əksini tapıb. Qeyd edək ki, ötən
ilin aprelində tanınmamış Krım Ali Məhkəməsi Məclisi ekstremist təşkilat kimi
tanıyıb və onun fəaliyyətinə qadağa
tətbiq edib. Haaqa Məhkəməsinin qəbul etdiyi qərarda göstərilir ki,
Rusiya Krım tatarlarının nümayəndəliklə bağlı hüquqlarını məhdudlaşdırmamalı, o
cümlədən Məclisin fəaliyyətinə razılıq verməlidir. İkinci qərar isə Krımda
Ukrayna dilində təhsilə imkan yaradılması ilə bağlı olub. Lakin tanınmamış Krım
bunların heç birinə reaksiya vermək istəmədiyini bəyan edib. Rusiya
prezidentinin mətbuat katibi Dmitri Peskov isə Məclisin taleyi ilə bağlı
bildirib ki, Rusiya ərazisində ictimai təşkilatların fəaliyyətinə heç bir
qadağa yoxdur.
Öz
növbəsində, siyasi analitik Sergey Sideronko hesab edir ki, bu məsələlərdə
Ukraynanın mövqeyi güclüdür. Rəsmi Kiyev tələb edir ki, Moskva Krım Məclisinin
rəhbərləri Refat Çubarov və Mustafa Cəmilovun bölgəyə səfərlərinə qoyduğu
qadağanı aradan qaldırmalıdır. Ukraynada keçirilən rəy sorğularının
nəticələrinə görə, ukraynalıların 70 faizi Krımın onlara məxsus olduğu
qənaətindədir. 12 faiz yarımada üçün müstəqilliyi, yalnız 7 faiz Krımın Rusiya
tərkibində qalmasını zəruri sayır.
Yeri
gəlmişkən, münaqişənin iki ölkə iqtisadiyyatına vurduğu ziyan milyardlarla
dollarla ölçülür. "Stratfor” Ukraynadakı münaqişənin vurduğu iqtisadi ziyanın
nəticələrindən bəhs edən araşdırma hazırlayıb. Qeyd edilir ki, separatçı üsyan
irimiqyaslı müharibəyə çevrildikdən sonra Ukraynadakı müəssisələrin böyük
əksəriyyəti dayanıb. Ölkə ixracının böyük bir hissəsindən məhrum olub. Ukrayna
2013-cü ildə Rusiyaya 15 mlrd. dollarlıq mal ixrac edirdi və bir il sonra bu
rəqəm 9 mlrd. dollara düşüb, 2015-ci ildə 4, ötən il isə 3 mlrd. dollara kimi
enib. İki ölkə arasında münasibətləri gərginləşdirən başqa bir məsələ qazla
bağlıdır. 2020-ci ildə "Qazprom” Avropaya yeni qaz kəmərinin yeni xəttini işə
salacaq. Bu isə Ukrayna ilə tranzit müqavilənin sonu demək olacaq. Lakin
avropalılar Rusiyadan Ukrayna tranzitindən imtina etməməyi tələb edirlər.
Rusiyanın qaz nəhəngi "Qazprom” dünən Ukrayna üçün saxlaya biləcəyi
tranzitin həcmini açıqlayıb. Bu həcm
əvvəlkindən beş-altı dəfə azdır. "Röyters”ə müsahibəsində "Qazprom”un rəhbəri
Aleksey Miller bildirib ki, onlar danışıqlara hazırdırlar: "Lakin indiki nəql
il ərzində 15 mlrd. kub metr ola bilər. Bu həcmdə yalnız Ukrayna ilə qonşu
ölkələrə çatdırıla bilər”.
Məlumat
üçün bildirək ki, Ukrayna ərazisindən vaxtilə il ərzində 120 mlrd. kub metr qaz
nəql olunurdu. Ötən il nəql 82 mlrd. kub metrə düşüb. Ukrayna özü bu kəmər
vasitəsilə bir kub metr də qaz almır. Onun hamısı Avropaya nəql olunur.
Avropaya tək Ukrayna ərazisi ilə qaz nəql edilmir. Yamaladan Belarusa, oradan
isə Polşaya da nəql edilən qaz kəməri mövcuddur. Eləcə də, "Şimal axını-1” boru xətti ilə
Baltik dənizinin dibi ilə Almaniyaya Rusiya qazı nəql edilir. 2016-cı ildə
"Qazprom” Avropaya rekord həcmdə - 179 mlrd. kub metr qaz nəql edib.
"Qazprom”un Avropa bazarında payı son 20 il ərzində üç dəfə artıb. Kompaniya
hesab edir ki, Brüsselin Moskvadan enerji asılılığından ehtiyat etməsinə
baxmayaraq, həcmi artıra bilərlər.
Azər