“Tutulan iradlara qarşı emosional davranmamaq önəmlidir” - Uğur hekayəsi
Ruslan Səfərov:
"Otel sektorunda çalışan insanın xarakterində təbii təbəssümün olması onun işinə
böyük köməklik göstərir”
Düşünür
ki, bildirilən iradlar özünü inkişaf etdirmək üçün önəmli ola bilər. Ona görə sənə
irad olaraq bildirilən fikirləri analiz etməli, üzərində işləməli və dərhal onu
aradan qaldırmağa çalışmalısan. Bunu uğurun əsas nüanslarından hesab edən müsahibimiz "Excelsior” otelin satış və
marketinq şöbəsinin direktoru Ruslan Səfərovdur.
- Tərcümə üzrə təhsil almısınız, amma bu gün otel
sektorunda çalışırsınız. İşləməyə, karyera həyatına otel sektoru ilə
başlamısınız?
-
2005-2009-cu illərdə Qərb Universitetində tərcümə üzrə təhsil almışam. İxtisasımdan
dolayı, tələbə vaxtı müxtəlif dövlət tədbirlərində tərcüməçi kimi fəaliyyət
göstərmişəm. Bəzi hallarda könüllü kimi çalışırdım, bəzən ödəniş edilirdi. Bələdçi
kimi də fəaliyyətim olub, bu zaman xarici turistlərlə işləyirdim. Bundan başqa,
üçüncü kursda oxuyanda, bir semestrlik tələbə mübadilə proqramı ilə İngiltərədə
təhsil aldım. 6 ay İngiltərədə olduğum müddətdə orda bir restoranda işlədim. Təhsilimi
başa vurduqdan sonra hərbi xidmətə getdim. Qayıdandan sonra artıq otel
sektorunda karyeram başladı.
- Otel sektorunun işiylə tanışlığınız var idi?
- Tələbə
vaxtı tərcümə sahəsində çalışmağım, bələdçi kimi fəaliyyətim məndə otel işinə
maraq yaratmışdı. Elə tələbəlik dövründə otel işi ilə bağlı dünyəvi şəbəkə
otellərindən birinin Bakıdakı bölməsindən iş təklifi də almışdım. Müsahibədə
iştirak edib, işə qəbul olmuşdum. Dərs saatlarımla onların tələb etdiyi iş
qrafiki uyğunlaşmadı deyə, həmin işə gedə bilmədim. Eyni zamanda, İngiltərədə
çalışarkən bir neçə şəbəkə otellərində təcrübə xarakterli müsahibələrim
olmuşdu. Həmin müsahibələrdə də otel işi ilə bağlı geniş nəzəri informasiya
aldım. Ona görə əsgərlikdən qayıdandan sonra otel sahəsində çalışmaq qərarı
verdim. 2010-cu ildən artıq otel sektorundayam.
- Oteldə işə satış şöbəsiylə başladınız?
- Yox,
yarım il restoran xidmətində çalışdım. Sonra şirkətdaxili imtahan verərək yeni
qurulmuş satış və marketinq şöbəsində satış koordinatoru işinə keçdim.
- Satış xüsusi bacarıq tələb edən sahədir. Heç də hər
kəs bu sektorda uğurlu fəaliyyət göstərə bilmir. Satışa keçmək sizin üçün çətin
gəlmirdi?
- Bələdçi
kimi çalışanda, müxtəlif ölkələrdən gələn qonaqlarla ünsiyyətdə olmağım məndə
özümə bir balaca əminlik yaratmışdı ki, bu da satış işinə keçməyimdə köməklik
etdi. Otel sektorunu bilənlərin bu sahədəki satışın ağırlığı haqqında da təsəvvürləri
var. Çünki bu iş elədir ki, hər zaman şirkətin hədəfləri olur və sən ona çatmaq
üçün peşəkar şəkildə, dayanmadan çalışmalısan. Təbii ki, bu ağırlıq mənim üçün
çətinlik kimi görünmədi. Əksinə, özümü sınamaq istədim və bu sınaqdan da uğurlu
nəticələr əldə etdim.
- İlk vaxtlar iki oteldə eyni vaxtda çalışmısınız.
- Bəli,
hərbi xidmətdən qayıtdıqdan sonra həm "Sheraton” otelindən, həm də "Keppel
FELS” şirkətinə məxsus otellərdən birində işə qəbul olundum. Qrafikim uyğun gəldiyi
üçün bir il hər ikisində işlədim. Sonra isə digər oteldən ayrılıb "Sheraton”
oteldə çalışmağa davam etdim. Çünki satış işinə keçirdim və bu iş məndən daha
çox vaxt ayırmağı tələb edirdi. Bu nüansı nəzərə alaraq fəaliyyətimi "Sheraton”da
davam etməyi qərara aldım.
- Bəzən otel sektorunda çalışanlarla bağlı
"onların gecəsi-gündüzü" olmur deyirlər. İş rejiminiz bu 10 ildə necə
olub?
- Bəli,
deyilənlər həqiqəti əks etdirir. Çünki oteldə işin gərgin və eyni zamanda
maraqlı vaxtları olur. Gərgin vaxtları dedikdə, bəzən planlaşdırılmamış qruplar,
tədbirlər olurdu və biz iş qrafikindən əlavə çalışırdıq. Bu, xidmət sektorudur,
işdə axsamalar olmasın deyə, öz qrafikimizdən sonra da işləmişik. Qonaq xidmətimizdən
məmnun qalsın deyə bunu edirdik. Həftə sonları da işlədiyimiz olurdu. Ancaq işdə
qaldığımız həmin artıq saatlara, həftə sonları işləməyə görə bizə boş günlərdə əlavə
istirahət günü verilirdi. Təbii ki işin çoxluğundan dolayı şəxsi həyatımıza
vaxt ayıra bilmədiyimiz dönəmlər də olurdu.
Ancaq
işin maraqlı tərəfləri də çox idi. Bəzən yemək yeməyə vaxtımız olmadan
çalışırdıq, amma zövq aldığımız işi gördüyümüz üçün bir də görürdük ki, iş
bitib. Vaxt çox tez keçirdi.
- Otel sektoru elədir ki, ən aşağı pillədən qalxıb,
öz gücünə yaxşı vəzifəyə qalxa bilirsən. Sizdə də belə olub. Maraqlıdır, bu
prosesdə özünüzdən asılı olan nə idi?
- Bu
sektor elədir ki, bütün nüansları dərindən bilmirsənsə və vəzifəni yerinə yetirə
bilməyəcəksənsə, qonaq səndən məmnun qalmayacaq. Bu da ümumilikdə otelin xidmət
keyfiyyətinə təsir edir. Otel işlədənlər isə peşəkarlara və işi öyrənə biləcək əməkdaşlara
ehtiyac duyurlar.
Tələbəlik
illərində mən satış təcrübəsi də qazanmışdım, ancaq yenə də otelçilikdə satış
işinə başlayanda, müxtəlif treninqlərdə satış biliklərimi artırdım. Bu da nəticəsini
göstərdi. Mən işə satış koordinatoru olaraq başlamışdım. Növbəti pillə satış
icraçısı idi. Bir il sonra mənə artıq bu işi həvalə etdilər. Bir il üç ay o işi
gördükdən sonra satış meneceri vəzifəsinə təyin olundum. Bu vəzifəyə təyin
olunduqdan sonra şirkət rəhbərliyinin regionlarda yeni açdığı otellərin birbaşa
satış nümayəndəsi olaraq fəaliyyətə başladım. Üç otelin satış meneceri olduqdan
sonra isə "Pullman Baku”ya satış meneceri olaraq getdim. Ordan isə ilk dəfə
olaraq yerli şəbəkəyə aid olan "Excelsior” otelinə satış və marketinq direktoru
vəzifəsinə təyin olundum.
- İrəliləməklə bağlı danışanda, işi öyrənmək məsələsini
vurğuladınız. Öyrənmək deyərkən nəyi nəzərdə tutursunuz?
- Gündəlik iş prosesində həm komanda
yoldaşlarının, həm də digər şöbələrin əməkdaşlarının işə yanaşması sənin üçün
yaxşı nümunə ola bilər. Sən hər hansı çatışmaz tərəfini onların nümunələrindən
yararlanıb düzəldə bilərsən. İnkişaf etmək üçün keçirilən treninqlərdə aktiv
iştirak etmək lazımdır. Eyni zamanda, iş fəaliyyəti ərzində təcrübələrdən
yararlanaraq növbəti pilləyə yüksəlmək üçün əlindən gələni etməlisən. Otel kənardan
gərgin və stressli sahə kimi görünür. Bəzən həqiqətən də belə olur. Buna
baxmayaraq, daim yeniliyə açıq olmalı, o yenilikləri gündəlik iş fəaliyyətində
də tətbiq etməlisən. Beləliklə, bunlar sənə hədəflərinə çatmaq üçün kömək göstərir.
- Deyirlər ki, çalışdığın sahə sənin xarakterinlə
uyğunluq təşkil etməlidir. Otel işinin sizin xarakterinizlə olan uyğunluğu nədən
ibarətdir?
-
Düşünürəm ki, otel sahəsində ən vacib şeylərdən biri qarşı tərəfin, yəni
qonağın tez bir zamanda nə istədiyini anlamaqdır. Bunun üçün də ünsiyyət
qabiliyyəti olmalıdır. Otel sektoruna qoşulmadan öncə tələbəlik illərimdə bələdçilik
fəaliyyəti ilə məşğul olmağım mənə ünsiyyətlə bağlı çox şey öyrətmişdi. Oteldə
də çalışmağa başladıqda yenidən müxtəlif insanlarla ünsiyyətdə oldum, onların hər
hansı ehtiyacını tez bir zamanda anlamağa çalışdım.
Otel
sektorunda çalışan insanın xarakterində təbii təbəssümün olması onun işinə
böyük köməklik göstərir. Onu da demək istəyirəm ki, oteldə keçirilmiş
mükafatlandırma mərasimində oteldaxili əməkdaşların arasında "ən yaxşı təbəssümlü
əməkdaş” mükafatına layiq görülmüşdüm.
- Otel işi sizə nə öyrətdi?
- Əsasən
təmkinli və daha səbirli olmağı öyrətdi. Gərgin və stressli sahədə sən bunun öhdəsindən
gəlirsən. Eyni zamanda, problemi daha çevik və asan üsulla həll etməyi öyrədir.
- Rubrikamızın ənənəvi sualı: sizə görə uğurun
sirri nədir?
- İlk
olaraq deyim ki, sənin daim inkişaf üçün planların olmalıdır. Özünə hər zaman
öyrənmək üçün vaxt ayırmalı, peşəni sevməlisən. Bərabər çalışdığın insanlara
qarşı hər zaman müsbət fikirlər duymalısan. Bəzən hər sahədə olduğu kimi pis
niyyətli insanlarla da üzləşirsən, xoşagəlməz hadisələrlə qarşılaşırsan, sənin
inkişafını həzm edə bilməyənlər də olur. Bu hadisələr də realdır. Amma sən hər bir pislikdən yaxşı nümunə götürə bilərsən
və yenə də öz uğuruna davam edərsən. Düşünürəm ki, öz zəhməti hesabına uğur əldə
edə bilən insan şübhəsiz ki, daşlı-kəsəkli yollardan keçir. Tutulan iradlara
qarşı emosional davranmamaq önəmlidir. Bu uğurun əsas nüanslarındadır. Hansısa
zəif cəhətin varsa, bu, sənə tövsiyə olunursa, üzərində çalışmalı, onu dərhal
aradan qaldırmalısan.
Aygün Asimqızı