Tokioda tarix yazmaq istəyən gənc - Portret
Bir neçə gün sonra ölkə idmansevərlərinin diqqəti
paytaxtımızda təşkil ediləcək İslam Həmrəyliyi Oyunlarına yönələcək. Hər bir idmançımızın
çıxışı diqqət mərkəzində olacaq, qazanılan hər medal ölkə idmansevərlərinin
böyük sevincə qərq edəcək. Əsas diqqət isə əvvəlki mötəbər yarışlarda ölkəmizə
medallar qazandırmış idmançılardan daha çox, gənclərə yönələcək. Məhz İslam
Oyunları kimi yarışlar bundan öncəki mötəbər turnirlərdə kənarda qalmış, ya da
az şans qazanmış gənc idmançıların nəyə qadir olduqlarını nümayiş etdirmək
baxımından daha çox əhəmiyyətlidir.
Ölkə idmansevərlərinin müsəlman ölkələrin
olimpiadasında əsas medal ümidləri isə yenə cüdo, boks, güləş və s. kimi döyüş
idman növlərindədir. Boks yığmamızın məşqçiləri mötəbər yarışda bir neçə gənc
idmançıya yer verməklə, onlara nəyə qadir olduqlarını nümayiş etdirmək üçün
gözəl şans verdilər. Bu cür gənclərdən biri də, aşağı yaş qruplarında dünya və
Avropa çempionatlarında, həmçinin beynəlxalq turnirlərdə ölkəmizin bayrağını
dəfələrlə dalğalandırmış Məsud Yusifzadədir. 52 kq çəki dərəcəsində yarışacaq
Məsud, bu çəkidə ölkəmizə dünya çempionluğu qazandırmış Elvin Məmişzadəni
layiqincə əvəz edəcəyini nümayiş etdirməlidir. Bu yazıda sizə gənc və
perspektivli boksçumuz Məsud Yusifzadədən bəhs edəcəyik.
Samarada başlayan
karyera
Məsud Yusifzadə 1996-cı il, avqustun 18-də Bakıda
dünyaya göz açıb. O, hələ məktəbə getməmiş boksla məşğul olmağa başlayıb. Belə
ki, vaxtilə güləşlə məşğul olmuş ata Yusifzadə, oğlunun sağlam böyüməsi üçün
onu idmana yazdırır. Məsudun atası uğurlu idmançı karyerası yaşaya
bilmədiyindən, oğlunun bu arzusunu reallaşdıracağını düşünərək, onu boksa
yazdırır. Bəs niyə güləş yox, məhz boks? Uşaq vaxtından dalaşmağa meylli olan,
adətən özündən böyüklərlə "döyüşən” kiçik Məsud, daha çox yumruq atmağa
üstünlük verirdi ki, bu nüans ata Yusifzadənin də diqqətindən qaçmır.
Məsud və ailəsi o vaxt atasının işləri ilə bağlı
Rusiyanın Samara şəhərində yaşadığından, boksun ilk sirlərinə də məhz orda
yiyələnir. Onun ilk məşqçisi Viktor Pavloviç olur. Məsud məşğul olduğu qrupda
yeganə azərbaycanlı idi. O, yad ölkədə müəyyən haqsızlıq, ikili standartla
üzləşsə də, Rusiyada yaşadığı dövrdə boksu atmır, sonadək məşqlərini davam
etdirir. Lakin bir problem var idi. Məsud Rusiya vətəndaşı olmadığından, ölkə
çempionatına buraxılmırdı. Hərdən əyalət yarışlarına qatılan Məsud, burda özünü
göstərməyi, çempion olmağı bacarmışdı.
Vətənə qayıdış
O, 13 yaşında olarkən, ailəsi Bakıya köçür. Məsud
karyerasını doğma vətəndə davam etdirmək fürsəti əldə edir. Rasim Məmmədovun
qrupuna yazılan Yusifzadə, tezliklə öz nəticələri ilə məşqçisinin simpatiyasını
qazanır. Məhz Bakıya köçdükdən sonra boksla daha ciddi məşğul olan, gərgin
məşqlər keçirən Məsudun əziyyəti nəticəsiz qalmır. O, 2009-cu ildə məktəblilər
arasında təşkil edilən Avropa çempionatını bürünc medalla başa vurur. Bundan
sonra uğurlar davamlı olur. Yusifzadə 2010-cu ildə yeniyetmələr arasında Avropa
çempionatında da bürünc medala yiyələnir.
Medalla zəngin
kolleksiya
2013-cü ildə gənclər arasında Avropa çempionatında
iştirak edən Məsud, yalnız finalda məğlub olaraq, ikinciliklə kifayətlənir.
Hollandiyada təşkil edilən yarışın finalında, irland boksçu ilə döyüşdə hakim
haqsızlığı ilə üzləşən Yusifzadə, "gümüş”lə kifayətlənməli olur. Məhz bu
yarışdan sonra onda özünəinam yaranır. O, artıq düz yolda olduğuna, bu idman
növü ilə daha böyük uğurlar qazana biləcəyinə inanır.
2014-cü ildə Bolqarıstanda gənclər arasında dünya
çempionatında 3-cü olan Məsud, yaşıdları arasında təşkil ediləcək olimpiadaya
vəsiqə qazanır. Lakin Bolqarıstandakı yarışda zədə alan Yusifzadə, olimpiadaya
lisenziya qazansa da, məhz zədə səbəbindən kənarda qalır. Ancaq zədə onu uzun
müddət boksdan ayrı sala bilmir. Kənarda qaldığı olimpiadadan bir ay sonra
zədəsini sağaldan Məsud, Xorvatiyada təşkil edilən Avropa çempionatına qatılır.
Yusifazdə Balkan ölkəsindən gümüş medalla qayıdır. 2015-ci ildə isə gənc boksçu
nəhayət, dünya miqyasında çempionluq sevinci yaşayır. O, Rusiyanın Nijnevaratovsk
şəhərində keçirilən neft ölkələrinin dünya kubokunu çempion kimi başa vurur.
Ölkə çempionatında isə Məsud məğlubedilməzdir. Belə
ki, aşağı yaş qruplarında dəfələrlə ölkənin ən güclüsü olmuş Yusifzadə, son 3
ildə böyüklər arasında ölkə çempionatının 52 kq çəki dərəcəsində 1-ci pilləni
"özəlləşdirib”.
Ümumiyyətlə, Məsudun yaşının az olmasına
baxmayaraq, onun medal kolleksiyası zəngindir. Vurğuladığımız yarışlardakı
uğurlarla yanaşı, gənc boksçu bir çox beynəlxalq yarışları da medallarla başa
vurub.
"Dəmir Mayk”ın
pərəstişkarı
İdmançının asudə vaxtı çox az olur. Gərgin məşqlər
və yarışlarla əlaqədar çox nadir hallarda əyləncəyə vaxt ayıra bilirlər. Məhz
buna görə, Məsud boş vaxtlarını daha çox ailəsi, əsasən, qardaşı ilə a
keçirməyə üstünlük verir. O, asudə vaxtında dostları ilə futbol oynamağı da
xoşlayır. Boksla çox kiçik yaşlarından məşğul olmağa başlayan Yusifzadə, ilk
illərdə ümumiyyətlə, bu idman növü ilə bağlı məlumatlı deyildi. Ancaq
məşqçisinin tapşırıqlarını yerinə yetirir, bu idman növü ilə bağlı təsəvvürləri
məşqlərdə gördüklərilə məhdudlaşırdı. Lakin yaşa dolduqca Məsudda bu idman
növünə maraq yaranır. O, artıq boks yarışlarını yaxından izləyirdi. Onun
boksdakı kumiri isə Mayk Tayson olub. Düzdür, Məsud boksun sirlərinə yeni-yeni
yiyələnəndə "Dəmir Mayk” artıq karyerasının qürub çağını yaşayırdı. Lakin
Yusifzadə amerikalı boksçunun keçmiş döyüşlərinin videoyazısını izləyərək, nə vaxtsa,
onun kimi döyüşçü olmağı arzulayırdı. Yerli boksçulardan isə Rövşən Hüseynov,
Samir Məmmədovun çıxışını daha çox bəyənirdi.
Məsud musiqini də sevir. O, döyüşlərdən sonra
yorğunluğunu sakit tərzdə olan mahnıları dinləməklə çıxarmağa çalışır. Film
izləməyi də sevən gənc boksçu, əsasən, döyüş filmlərinə baxır.
Tarix yazmaq
istəyən gənc
Məsudun əsas hədəfi 3 il sonra Tokioda təşkil
ediləcək olimpiya oyunlarıdır. Lakin gənc boksçu "əsas iştirakdır” şüarı ilə
razılaşmır. Belə ki, o, Yaponiyanın paytaxtında təşkil ediləcək dünyanın ən
nəhəng idman yarışında təkcə iştirakı yox, həm də çempionluğu hədəfləyib.
Azərbaycan təmsilçiləri bu günə kimi olimpiadaların boks yarışlarında bir neçə
dəfə müxtəlif əyarlı medallar qazansalar da, hələ də çempionluq sevinci
yaşamayıblar. Məsud məhz bu sindroma son qoymaq, Azərbaycanın olimpiya çempionu
olan ilk boksçusu kimi tarixə düşmək istəyir. O, əsas məqsədlərinə nail
olduqdan sonra özünü peşəkar boksda da sınamağın əleyhinə deyil.
Ancaq bundan öncə də onu bir neçə mühüm yarış
gözləyir. Bu "imtahanlar”dan ilki isə bir neçə gün sonra paytaxtımızda baş
tutacaq İslam Həmrəyliyi Oyunlarında olacaq. Boks millimizin məşqçiləri 52 kq
çəki dərəcəsində həmişə beynəlxalq yarışlarda görməyə adət etdiyimiz Elvin Məmişzadəyə
yox, məhz gənc istedad Məsud Yusifzadəyə şans verəcək. Bu yarış Məsuda özünü
sübut etmək üçün əla fürsətdir. O, doğma şəhərdə təşkil ediləcək yarışı medalla
başa vurmaqla, məşqçilərin etibarını qazanmalıdır. Məsud bu məsuliyyəti yaxşı
başa düşür və məhz buna görə, paytaxtımızda təşkil ediləcək yarışda yalnız
"qızıl”ı hədəfləyib.
Bundan sonra isə o, iyunun 12-də Ukraynada təşkil
ediləcək Avropa çempionatında medalçılar sırasına düşməyi planlaşdırır. Burda
qazanılacaq medal isə avqustda Almaniyada keçiriləcək dünya çempionatının
qapılarını onun üzünə açacaq. Ukraynada keçiriləcək qitə birinciliyi həm də
Almaniyada keçiriləcək dünya çempionatına lisenziya xarakteri daşıyacaq.
Portret
Ambisiyalı, döyüşkən, əzmkar - Məsudun portretini
formalaşdırarkən, ilk növbədə bu xarakterləri üzə çıxır. Rinqdə ilk
dəqiqələrdən döyüşə atılmaqdan çəkinməyən, son ana kimi eyni fiziki hazırlıqla
döyüşməyi bacaran Məsudda əsas diqqətçəkən xüsusiyyəti də rəqibdən çəkinməməyidir.
O, bütün yarışlarda ilk növbədə medalı yox, məhz "qızıl”ı düşünür. Böyük
ambisiyaları olan Yusifzadə üçün bu il əsl imtahan olacaq. İlk imtahan isə
İslam Həmrəyliyi Oyunlarıdır. Gənc və perspektivli idmançı həm müsəlman
ölkələrinin olimpiadasında, həm də yayda baş tutacaq Avropa və dünya
çempionatlarında əsas hədəfinə çatmaqla, məşqçilərin seçimini doğrultmalıdır.
Gənc boksçunun əsas hədəfi olan olimpiya çempionluğuna gedən yol, məhz bu cür
yarışlardan keçir.