Bakı 21°C
Timur Əsgərov niderlandlı xoreoqrafın baletində çıxış edəcək
Martın 23-də Sankt-Peterburq Dövlət Akademik Mariya Teatrında niderlandlı xoreoqraf Hans Van Manenin quruluşunda balet axşamı keçiriləcək.
AZƏRTACteatrın saytına istinadla xəbər verir ki, "Mariya-2” səhnəsində nümayiş olunacaq xoreoqrafik əsərlərdən "İki cütlük üçün variasiyalar”da gənc balet artisti Timur Əsgərov da çıxış edəcək. Bu baletin dünya premyerası 2012-ci il fevralın 15-də Niderland Milli Teatrında olub. Səhnə əsəri Mariya Teatrında ilk dəfə 2014-cü il iyunun 15-də nümayiş etdirilib.
T.Əsgərov 2008-ci ildə Bakı Xoreoqrafiya Akademiyasını bitirib, Azərbaycan Dövlət Akademik Opera və Balet Teatrında, Ukrayna Milli Akademik Opera və Balet Teatrında çalışıb. O, 2011-ci ildən Mariya Teatrının truppasında fəaliyyət göstərir. Azərbaycan Respublikasının Prezidenti İlham Əliyevin 2014-cü il 1 fevral tarixli Sərəncamı ilə T.Əsgərov Gənclər üçün Prezident Mükafatına layiq görülüb. Gənc balet artisti 2015-ci ildə Rusiya Böyük Teatrının səhnəsində görkəmli Azərbaycan bəstəkarı Arif Məlikovun "Məhəbbət əfsanəsi” baletində Fərhadın partiyasını oynayıb. O, Mariya Teatrı truppası ilə birlikdə Avropa, Amerika və Asiya ölkələrində qastrolda olub.
