Tianjin kitabxanası açıldı
Təqribən dörd ilə yaxındır inşaat işləri davam edən
və proyekti bütün dünyadan sirr kimi gizlədilən Tianjin Kitabxanası möhtəşəm
bir açılışla istifadəyə verildi. Ölkə əhalisinin rəsmən 15 milyonuna ev
sahibliyi edən Tianjin əyalətində kosmopolitləşmənin simvolu kimi inşa edilən
kitabxanada 1 milyon 200 min adda nümunə var. Təkcə kitabxana binası üç min
kvadratmetri əhatə edən bu möhtəşəm tikilinin ümumi sahəsi 33700
kvadratmetrdir. "boredpanda”-da yer almış ətraflı xəbərdə Çinin dünyanın
qüsursuz kitabxanası ilə minilliklərə meydan oxuduğu iddia edilir. Belə ki,
kitabxananın interyeri görənlərin ağlını başından alıb.
Heç kim kitab axtararkən və ya oxuyarkən diqqət cəlb
etmək istəməz. Amma siz kitab oxumaq üçün Tianjinə gəlmisinizsə, bu dəbdəbənin
arxasında gizlənmək sadəcə mümkün deyil. Belə ki, nəhəng yaşıl auditoriyanın
ortasında açılan iri bir göz kimi bütün əyaləti kölgəsi altına almış bu
kitabxana ziyarətçilərini bütün xidmətləri ilə təəccübləndirir və valeh edir.
Beş mərtəbəli kitabxana binası Tianjin Urbanizasiya Planlaşdırmaları və Dizayn
İnstitutunun maliyyəsi ilə alman dizaynerlər tərəfindən cızılıb. Birinci mərtəbəsi
sırf qiraət zalı üçün nəzərdə tutulub. Orta mərtəbələr isə ofislər, konfrans
zalları, kolleksiya kitabxanalar, görüş otaqları, komputer və audio otaqları,
yeməkxana arasında bölünüb. Yuxarı iki mərtəbə isə tamamilə rəflərdən ibarətdir.
Kitabxananın açılış günündən etibarən ilk bir həftə ərzində 2 milyon ziyarətçi
qəbul etdiyi bildirilir. Gələnlər isə kitablardan çox binanın interyeri ilə
maraqlanıblar. Kitabxana Tianjinin Binhai şəhərində tikildiyindən binanın adı
indidən "Binhainin gözü” kimi dillər əzbəri olub.
Çin bu il kitabxanaya ekskursiyalardan böyük gəlir
götürməyi planlaşdırır. Kitabxananın rəsmi layihə rəhbəri institut isə proyektin
bütün hüquqlarının Çin hökumətinə məxsus olduğunu və ikinci bir təkrarının
tikilməməsi üçün əsla satılmaması qərarı üzərində müqavilə bağlandığını
açıqlayıb. Çin hökuməti son illər ədəbiyyat və incəsənətə iri məbləğlər
yatırması ilə diqqət çəkirdi. Bu kitabxana isə hələ uzun müddət müzakirə
olunacaq. Belə ki, açılış günü "Washington Post”-da yer alan xəbərdə gedən bu fikir manşetləri bəzədi:
"Çinin nə yaratmaq istədiyini almanlar da təxmin edə bilməyib”.