“Terrorizm artıq beynəlxalq xarakter alıb”
Türkiyədə ötən ay Rusiyanın bu ölkədəki səfiri
Andrey Karlov qətlə yetirilib. Hər iki ölkə bu hadisəni terror aktı kimi dəyərləndirib.
Bu hadisədən sonra bir sıra xarici ölkələrdə də terror aktlarının törədilməsi xəbəri
yayılıb. Yeni il gecəsi İstanbul şəhərində törədilən terror aktında isə onlarla
dinc insan həyatını itirib və yaralanıb. Yanvarın 5-də İzmirdə Məhkəmə binası
önündə daha bir terror aktı törədilib ki, bu dəfə də 1 məhkəmə işçisi, 1 polis
həyatını itirib, 10 nəfər yaralanıb. Qardaş ölkədə davamlı terror aktlarının
törədilməsinin ardınca yeni bir terror xəbəri İsraildən gəlib. Yanvarın 8-də
Qüdsdə naməlum şəxs yük maşınını İsrail hərbçilərinin üzərinə sürüb. Hadisə
turistlər arasında məşhur olan Armon xa-Natsiv meydanı yaxınlığında baş verib.
Nəticədə 4 nəfər ölüb, 15 nəfər yaralanıb. İsrail hakimiyyəti baş verən olayı
terror aktı kimi dəyərləndirib. İsrailin baş naziri Binyamin Netenyahu hadisə
barədə mətbuata açıqlamasında bildirib ki, bütün məlumatlar Qüdsdə hərbiçilərin
üzərinə yük maşını sürən sürücünün İŞİD terror təşkilatının tərəfdarı olduğunu
göstərir. Sadalanan faktlardan da göründüyü kimi, artıq terror dünyanın, demək
olar ki, əksər ölkələrin əsl bəlasına çevrilib. Bu bəlanın yaranma səbəbi,
ondan qurtulmağın yolu və sair məsələlərlə bağlı "Kaspi”nin suallarını Türkiyədə yaşayan politoloq Toğrul İsmayılcavablandırır.
- Toğrul bəy,
çox təəssüf ki, Türkiyədə, eləcə də digər ölkələrdə silsilə terror atlarının
törədilməsi barədə hər gün xəbərlər eşitməkdəyik. Müasir dünyada terrorun bu
cür yayılmasına səbəb nədir?
- Terror hadisələri XX əsrin ikinci yarısından
etibarən yavaş-yavaş özünü göstərməyə başlayıb. Bu, əsas etibarilə bəzi
qrupların dövlətin müvafiq qurumlarına, həmçinin digər bəzi orqanlara hücum edərək
qorxu yaratmaq, təhdid etmək, hadisələri öz xeyirlərinə dəyişdirmək niyyəti
güdürdü. Yaxud, beynəlxalq aləmin hər hansı məsələyə diqqətini çəkmək istəyirdilər.
Lakin zaman keçdikcə, xüsusən də XX əsrin sonlarına doğru terrorun mahiyyəti dəyişməyə
başlayıb. Daha çox insan ölümünə, dinc insanların qətliamına səbəb olan terror
hadisələri, olimpiadalarda idmançılara edilən terror hücumlarının qarşısı
zamanında alınmadığından, müasir dövrdə dünyanın əsas probleminə çevrilib.
Böyük dövlətlərin güc mübarizəsi bəlli qrupların silahlanmasına meydan açıb. Bu
isə dolayısı ilə sözügedən güc mübarizəsinə adekvat olmayan mübarizəyə çevrilib.
Terror təşkilatları kimi tanıdığımız həmin qruplaşmaların hazırda bir çox ölkələrin
xüsusi xidmət orqanları ilə əlaqələri var. Hətta elə terror təşkilatları var
ki, hansısa dövlətin hüquq-mühafizə orqanı tərəfindən yönəldilir. Böyük dövlətlər
də hansısa ölkəyə qarşı güc nümayiş etdirmək üçün belə terror təşkilatlarının
xidmətlərindən yararlanırlar. Buna ən bariz misal kimi Türkiyədə var olan və
dövlətin mübarizə apardığı PKK terror təşkilatını misal gətirə bilərik. Yaxud
erməni terror təşkilatı kimi tanınan ASALA-nın adını çəkə bilərik. Bu iki təşkilat
bir-biri ilə əlaqəlidir. PKK-nın fəaliyyəti SSRİ-Qərb qarşıdurması, "soyuq
müharibə” illərində Qərbin müttəfiqi Türkiyənin daxilində narahatlıq,
bölücülük, qeyri-sabitlik yaratmaq üçün sol kommunist – kürd təşkilatının
yaradılması ilə başlayıb. Sovet imperiyasının dağılmasından sonra bu sol
kommunist təşkilatı öz mahiyyətini itirdi. Lakin bu dəfə Qərbdəki bəzi qüvvələr
həmin sol kommunist təşkilatının fəaliyyətini milli azadlıq mücadiləsi kimi
qiymətləndirib ona dəstək verməyə başladılar. Bu gün də Rusiya PKK-nın terror təşkilatı
kimi tanımır. Ona görə də PKK-nın Rusiyada fəaliyyəti sərbəstdir, hətta onlara
dəstək də verilir. Məlum təyyarə insidentindən sonra Rusiya mediasında, bəzi
dövlət qurumlarında nümayişkaranə şəkildə PKK-ya dəstək verilməsi gündəmə gətirilmişdi.
Avropa isə PKK-nı terror təşkilatı kimi tanısa da, öz qapılarını bu təşkilata
açır. Yaxud, PKK-nın Suriyadakı törəməsi, davamçısı sayılan PYD və digər ünsürləri
ABŞ dəstəkləyir, bu təşkilatdan Bəşər Əsəd rejiminə qarşı istifadə edir. Eynilə
Amerika PKK-nın digər qanadı PJAK-dan İrana qarşı istifadə edir. Amma bununla bərabər,
ABŞ İŞİD-i terror təşkilatı kimi tanıyır, ona qarşı mübarizə aparır. İran da
PKK-dan Qərbin bu regiondakı müttəfiqi Türkiyə və başqa ölkələrə qarşı istifadə
edir. Yəni, terrorizm bu cür qarmaqarışıq bir mübarizə üsuluna gəlib çatıb.
Halbuki, PKK, PYD, İŞİD və sair terror təşkilatları qeyri-qanuni, silahlı
qruplaşmalardır, onların hamısına qarşı mübarizə aparılmalıdır. Bununla bərabər,
biz bu hadisələr çərçivəsində silah bazarı məsələsini də diqqətdən kənarda
saxlaya bilmərik. Çünki, sadaladığımız terror təşkilatlarının varlığı yeni
münaqişə mərkəzlərinin yaranmasına, yeni müharibələrin ortaya çıxmasına səbəb
olur. Bu da silah ticarətinin artmasına gətirib çıxarır, silahlanma yarışı ilə
nəticələnir. Fikir versək, Yaxın Şərqdəki mübarizə, müharibə meydanları enerji
və sair məsələlərlə yanaşı, həm də silah ticarətinin artdığı yerlərdir. O səbəbdən
terrorizm artıq beynəlxalq xarakter alıb.
- Hansısa məqsədlər
üçün terror təşkilatlarının xidmətlərindən yararlanan dövlətlər özləri
terrordan sığrtalanıblarmı? Ümumiyyətlə, dünyada terrordan sığrtalanan dövlət
varmı?
- Sağlam məntiqlə heç bir dövlət terrordan
sığortalanmayıb. Ola bilsin kimsə İslandiyanın adını çəkər. Amma unutmayaq ki, əvvəla
bura heç kimə lazım deyil, ikincisi də İslandiya ada dövlətdir və girən-çıxan bəllidir.
Bəlkə də bu dövlət çox güclü nəzarət altında terrordan özünü sığortalaya bilər.
Yaxud, Antraktidanın adını kimsə çəkə bilər ki, bura terrordan sığortalanıb.
Adını çəkdiyim bu iki yerdən başqa, dünyada heç bir dövlət deyə bilməz ki, mən
terrordan sığortalanmışam. Bəzən mediada İsrailin adını bu mövzuda tez-tez çəkir,
terrora qarşı yüksək təhlükəsizlik tədbirləri gördüyünü qeyd edirlər. Belə
mülahizələri heç bir halda əsaslı saymıram. İsrail özü müharibə içərisindədir,
Fələstinlə münaqişə vəziyyətindədir. Unutmaq olmaz ki, İsrail öz prezidentini
terror zamanı itirmiş bir ölkədir. Terrorun hardan gəldiyini yəqinləşdirmək çətindir.
İsrail terror hadisəsini ən çox ərəblərdən gözlədiyi halda, bir İsrail vətəndaşı
ölkədə terror törətdi. Eləcə də yanvarın 8-də Qüdsdə baş verən terror hadisəsini
misal gətirə bilərik. Yaxud, dünyanın superdövləti kimi təqdim edilən ABŞ-da
terrora qarşı yüksək təhlükəsizlik tədbirləri görülməsinə rəğmən, istənilən vətəndaş
silahı əlinə alıb hansısa məkanda sivil insanları öldürə, terror aktı törədə
bilər. Bu günə qədər Amerikada belə hadisələr çox olub. Amma ABŞ bu hadisələri
terror aktı kimi deyil, qətl, adi cinayət kimi qiymətləndirir. Ancaq 2001-ci
ilin 11 sentyabrında "Əl-Qaidə” təşkilatının üzvü olan terrorçular qaçırdıqları
sərnişin təyyarələrini Nyu-Yorkda yerləşən Dünya Ticarət Mərkəzinin iki
binasına çırpdılar, insan tələfatı ilə nəticələnən partlayışlar törətdilər. Həmin
vaxt terrorçular daha bir təyyarəni ABŞ Müdafiə Nazirliyinin – Pentaqonun
binasına çırpmışdılar. Ağ Evə istiqamət alan daha bir intihar təyyarəsi isə
hava hücumundan müdafiə qüvvələri tərəfindən səmada məhv edilmişdi. Bu hadisəni
Amerika terror hadisəsi kimi qiymətləndirdi. SSRİ kimi qapalı bir imperiyada
1977-сi il yanvarın 8-də ermənilər Moskva metropoliteninin "İzmaylovskaya” və
"Pervomayskaya” metro stansiyaları arasında vaqonda terror törədiblər. Eyni
vaxtda ermənilər SSRİ KQB-sinin yerləşdiyi binanın yaxınlığındakı 15 saylı ərzaq
mağazasında və "25 Oktyabr” küçəsində yerləşən 5 saylı mağazada da terror
aktları həyata keçiriblər. Yəni, terrordan maksimum səviyyədə qorunmaq
imkansızdır. Əgər bir terror təşkilatının hədəf aldığı hansısa dövlət içərisində
onların dəstəkçiləri, yandaşları varsa, həmçinin bəzi xarici ölkələr də
terrorçularla əlaqədədirsə, bu işdə maraqlıdırsa, o zaman həmin dövlət hətta ən
yüksək təhlükəsizlik tədbirləri görsə belə, terrordan sığortalana bilməz.
Türkiyənin bu gün başında olan bəlalardan birinin səbəbi də məhz budur. Yaxın Şərqdə
ciddi mübarizə gedir. Dünya dövlətləri bu regionda öz oyunlarını oynayırlar.
Türkiyə də mövcud olduğu bu regionda həmin işlərə açıq şəkildə müdaxilə edib,
oradakı bütün terror təşkilatları ilə savaş içindədir. Həmin terror təşkilatları
Türkiyə ilə açıq savaşa bilmədiklərindən ölkənin içərisində terror aktları törədirlər.
- Həssas
coğrafi məkanda yerləşən Azərbaycanın da terror təşkilatlarının hədəfinə
çevrilməsi riski varmı?
- Azərbaycan Şərqlə Qərbin arasında körpü rolunu
oynayan, strateji əhəmiyyətə malik tranzit ölkədir. Zaman-zaman Azərbaycanda
terror aktları törədilib, çoxsaylı sivil insan həyatını itirib. Sovetlər
ittifaqı dağılandan sonra erməni xüsusi-xidmət orqanlarının yönləndirməsi ilə
metroda, sərnişin avtobusunda bir neçə terror aktı törədilib. Müstəqillik
qazandıqdan sonra da Azərbaycanda terror aktları törədilib, dövlət və hökumət
adamları qətlə yetirilib. Müasir dövrdə 2009-cu ilin 30 aprelində Azərbaycan
Dövlət Neft Akademiyasında 12 nəfərin qətlə yetirilməsi ilə müşayiət olunan
terror aktını da misal gətirə bilərik. Bu baxımdan, Azərbaycan da terrordan
sığortalanmış, yaxud ən yüksək səviyyədə qorunan ölkə deyil. Təəssüflə qeyd
olunmalıdır ki, İŞİD terror təşkilatına qoşulanlar arasında azərbaycanlılar da
var. Düzdür, belələri ölkəyə qayıdan kimi dərhal hüquq-mühafizə orqanları tərəfindən
saxlanılır, həbs olunur. Amma bütün görülən bu tədbirlər terrordan tam
sığortalanmaq anlamına gəlməz. Heç şübhəsiz, regionda marağı olan ölkələrin, o
cümlədən qonşu dövlətlərin kəşfiyyatları Azərbaycanda da mövcuddur. Azərbaycan
müstəqillik qazandıqdan indiyə qədər dövlət başçısı da daxil olmaqla bir çox hədəflər
daim təhdid altında olub. Bütün bunlar Azərbaycanın nə dərəcədə həssas bir ölkə
olduğunu göstərir. Lakin bu gün Azərbaycanda bir konsensus var, böyük güclər tərəfindən
ciddi basqı, təzyiqlə üzləşmirik. Amma sabah nə olacağını kimsə bilməz. Qərbdə,
Şərqdə, Cənubda və ya Şimalda olan güc mərkəzləri Azərbaycanda öz maraqlarını təmin
etmək istəyərsə, yaxud öz maraqlarını daha da artırmaq istəyərsə, vəziyyət mürəkkəbləşə
bilər.
- Sizcə,
dünya terror adlı bu bəladan necə xilas olmalıdır?
- BMT Təhlükəsizlik Şurasının daimi üzvü olan, beynəlxalq
sülhün və təhlükəsizliyin qorunmasına əsas məsuliyyət daşıyan Çin, Fransa,
Rusiya, Böyük Britaniya, ABŞ dünyanın ən böyük silah satıcılarıdır. Əgər
dünyada terrorun kökünü kəsmək istəyiriksə, ilk növbədə qanunsuz silah ticarətinin
qarşısı alınmalıdır. Bu silah ticarəti davam etdikcə, dünyada terror hadisələri
də bitməyəcəkdir. Bununla yanaşı, hadisələrə yanaşmada ikili standartlara da
son qoymaq lazımdır. Dünya ciddi şəkildə terrorla mücadilə aparmalıdır. Əks təqdirdə
terrorla mübarizə ciddi effekt verməyəcəkdir.
Rufik İSMAYILOV