Talassemiyalı xəstələrə sağlam uşaq verən tibbi metod - Araşdırma
Və ya
süni mayalanma ilə bağlı bilməli olduqlarımız
Braun ailəsi 9 il övlad həsrəti çəkiblər. Çünki Lesley Braunda uşaqlıq borusunun bağlanması
problemi var idi. Robert Edvards və Patrik Steptoe adlı iki elm adamının
araşdırmaları sayəsində onların həsrəti sona çatır. Belə ki, hər iki valideyndən
sperma və yumurta nümunələri götürülüb laboratoriya şəraitində dölləndirildikdən
sonra qadının yumurtalığına yerləşdirilir və ekstrakorporal mayalanma (süni mayalanma)
ilə ilk uşaq – Luiza Braun 1978-ci ildə dünyaya gəlir.
Hazırda
41 yaşında olan Luizanın müsahibələrində sualların daha çox onun sağlamlığı, fərqliliyi
ilə bağlı olduğunu görürsən. "Həyatın necə keçir, bir fərqlilik yaşadınmı”
sualına cavabı belə olub: "Əslində hər kəsin həyatına bənzər idi, sadəcə olaraq
mətbuatın diqqət mərkəzindəydim. Dostlarımla bərabər böyüdüm. Məktəbə getməmişdən
öncə valideynlərim mənə bir az fərqli doğulduğumu izah etdilər və yaşadığım fərqlilik
bu qədər idi”.
Luizanın
doğumundan sonra valideynləri təhdid dolu məktublar alırlar, çünki bunu Allahın
işinə qarışmaq kimi qəbul edənlər olur. Ancaq əksinə, uşaq həsrəti çəkən ailələrdən
bu addımı dəstəkləyən məktublar da gəlir. Beləcə, tibbin bu kəşfi zamanla
dünyaya yayılır. 2004-cü ildən Azərbaycanda da süni mayalanma reallaşdırılır.
Tarix
olaraq bəlkə də böyük görünə bilər, amma insanlarda bununla bağlı tərəddüd dolu
suallar çoxdur. Müsahibimiz Nigar Əhmədova
məhz belə suallardan dolayı süni mayalanmaya müraciət edə bilmədiklərini deyir:
"6 ildir evliyik, amma övladımız yoxdur. Problem yoldaşımla bağlıdır. Dəfələrlə
müalicə etdirdik, xeyri olmadı. Həkimlər süni mayalanmanın tək çarə olduğunu
deyirlər. Ancaq buna getməyə risk edə bilmirik. Biri deyir ki, o uşaqların çoxu
xəstə olur, biri deyir ki, çox yaşamırlar. Qadında xərçəng yaratdığı, hamiləlik
dövründə qadının sağlamlığında problemlərə səbəb olduğu ilə bağlı da bəzi məlumatlara
rast gəlmişdim. Əslində, övlad sahibi olmaq üçün bunları gözə alaram, amma
yoldaşım ehtiyat edir. Səbəbi "o, öz uşağın olmur” tipli kimi fikirləri eşitməsidir”.
İnsanları
tərəddüdə salan bu suallar nə dərəcədə həqiqəti əks etdirir? Uşağı
olmayan hər kəs süni mayalanma etdirə bilərmi? Nə qədər pul çıxacaq? Bunun üçün
istənilən yaşda müraciət etmək olar? Azərbaycanda, yoxsa ölkə xaricində etdirək?
Neçə faiz alınma ehtimalı var?
Qiymətlər
İlk olaraq qiymətlərdən danışaq. Qiymətləri öyrənmək
üçün müştəri qismində fərqli mərkəzlərlə əlaqə saxladıq.
Mərkəzi Klinikadan bildirdilər ki, klinikada bu sahə üzrə bir neçə
mütəxəssis var. Qiyməti müəyyənləşdirmək üçün həkimin qəbulunda olmaq, müayinədən
keçmək lazımdır. Yaxud telefon vasitəsilə həkimlə əlaqə saxlayıb detallı məlumat
əldə etmək olar.
Türkiyənin Memorial Süni Mayalanma Mərkəzinin Azərbaycan nümayəndəliyində isə qiymət 2475
avrodur. Müayinə ödənişsiz olsa da, ilkin analiz ödənişləri və iynə-dərman xərcləri
bu məbləğə daxil deyil. İlkin analiz xərci qadınlar üçün 3 565 TL (986.792
AZN), kişilər üçün isə 1 390 TL (384.752 AZN) civarındadır.
Bahçeci Bakı Süni Mayalanma Mərkəzi isə
ödəniş 2250
manatdır. İstifadə ediləcək iynə-dərmanların xərci bu qiymətə daxil deyil. İynə-dərmanları
ya klinikadan, ya da kənardan ala bilərsiniz. Əgər kənardan alacaqsınızsa,
klinikaya ödənişiniz 2250 manat olur. Əgər klinikadan alası olsanız, dərmanlarla
birlikdə 3750 manat ödəməlisiniz.
Baku
Medical Plaza Süni MayalanmaMərkəzində isə ödənişiniz 3550 manat olacaq.Həkim qəbulu
ödənişsizdir. Bu qiymətə analiz və dərman xərcləri də daxildir.
Hansı halda buna
gedilməlidir?
Mərkəzi Klinikanın ginekoloqu Dr.Ramin Salahov deyir
ki, övladı olmadığı üçün müraciət edən hər pasientə ekstrakorporal
mayalanma tətbiq etmək düzgün deyil: "Müraciət edən cütlükləri müayinə edirik, problemin
səbəbini müəyyənləşdirməyə çalışırıq. Əgər oğlanın hərəkətli spermalarının sayı
10 milyonun üzərindədirsə, xanımda uşaqlıq boruları açıqdırsa, yumurtaları
normal böyüyürsə, ilk olaraq təbii yolla müalicələrə başlayırıq. 6 kurs belə
müalicə edə bilərik. Alınmırsa, o zaman aşılama dediyimiz inseminasiyaya keçə
bilərik. Bu, spermanın kişidən alınması, təmizlənməsi, sonra təmiz, güclü
spermaların qadının uşaqlığının daxilinə vurulmasıdır. Bunda hamilə qalmaq
faizi 20-25-dir. Bunu 3 dəfə edə bilərik. Bu da alınmasa, ailədə hər şey
normaldırsa, biz buna səbəbsiz sonsuzluq deyirik. Onda ekstrakorporal
mayalanmaya müraciət edə bilərik”.
Müayinə
zamanı xanımın hər iki borusunun bağlı olduğunu görürüksə, laparoskopiya ilə də
bunu aça bilmiriksə, bu zaman o xəstə qrupu birdəfəlik ekstrakorporal
mayalanmaya gedir. Yaxud da ki normal dozada dərmanlar veririk, amma yumurtalar
böyümür. Yaxud polikistoz yumurtalardır. Və ya kişidə hərəkətli sperma sayı
milyon yarımdan azdırsa, bu qrup da birdəfəlik ekstrakorporal mayalanmaya gedə
bilər. Göstərişlər fərqli ola bilir”.
Problemli uşaqlar?
Ekstrakorporal mayalanma ilə dünyaya gələn uşaqların
sağlamlığı ilə bağlı problemlər olduğu da bildirilir. Bu, nə dərəcədə həqiqəti əks
etdirir? Həkim-genetik Fuad İsmayılov deyir ki, burda yanaşma fərqlidir: "Birincisi,
baxmaq lazımdır ki, süni mayalanma nəyə görə aparılır? Problem kişidə, yoxsa
qadındadır? Əgər sonsuzluğun səbəbi valideynlərdən hər hansı birində olan
genetik xəstəliklə əlaqədardırsa, süni mayalanma zamanı həmin patogen hüceyrələrdən
istifadə olunubsa, təbii ki bu zaman doğulan uşaq xəstə olacaq. Əgər kişinin təbii
mayalanma üçün spermatozoidlərinin sayı kifayət qədər deyilsə və bu səbəbdən
süni mayalanma aparılırsa, niyə də sağlam döl yaranmasın?”.
Ramin Salahov isə ekstrakorporal mayalanmanın
genetik problemi olan ailələrdə sağlam uşaq dünyaya gəlməsinə imkan yaratdığını
deyir: "Normalda
təbii yolla hamilə qalanların dünyaya gətirdikləri uşaqların 3 faizində problem
olur. Ekstra korporal mayalanmada isə, bu rəqəm 4-5 faizdir. Amma burda bir
nüans var. Hazırda ekstrokorporal mayalanma ilə biz genetik embrionları
araşdıra bilirik. Fərqi üsullarla yoxlama aparıb sağlam embrionları götürürük.
Genetik sağlam embrionu seçdiyimiz üçün qeyd etdiyim faiz normal hamiləlikdəki
qədər olur, hətta ondan da yaxşı nəticə əldə edə bilirik. Eyni zamanda xəstə
uşaqları olan cütlüklər müraciət edirlər ki, sağlam embrion seçək və uşaq
sağlam doğulsun. Valideynlər talassemiya xəstəliyi daşıyıcısı olanda da, bu
metod çox effektlidir. Ata-ana daşıyıcıdırsa, biz tam sağlam embrionu seçib
yerləşdirə bilirik”.
Qadının yaşı 40-dan çoxdursa...
Hindistanda 70 yaşlı bir qadın ekstrakorporal mayalanma ilə ana olmuşdu. Ötən il ölkəmizdə 64 yaşlı qadınla
70 yaşlı kişinin bu üsulla əkiz övladı dünyaya gəlmişdi. Ekstrakorporal
mayalanmanın tətbiqi üçün yaşın fərqi olmasa da, R.Salahovbildirdi ki, qadının yaşı 40-dan çoxdursa, bu zaman problemli uşaq doğulması
ehtimalı böyük olur: "Bu işdə yaşın ciddi rolu var. Bəzi ədəbiyyatçılar deyirlər
ki, 35 yaşdan sonra qadının yumurtalarında ciddi keyfiyyət pozğunluğu ortaya
çıxa bilir. 37 yaşdan sonra hamilə qalma şansı da azalır. 40 yaşdan sonra
ekstrokorporal mayalanma ilə uşaq dünyaya gətirmək faizi 15-dən aşağı olur.
Qadın 40 yaşdan sonra hamilə qalarsa, genetik araşdırma olmayıbsa, o hamiləlik
ya düşüklə nəticələnir, ya da uşaqda genetik xəstəlik olur. Əli, ayağı olmaya,
ciddi ürək qüsuru ola bilir. Ona görə xanımlara məsləhət görərdim ki, 35 yaşa qədər
hamiləliklərini planlasınlar. 40 yaşdan sonra biz genetik araşdırma edib sağlam
embrion seçib götürə bilirik. Ancaq bu yaşlarda sağlam embrion sayı az olur”.
Dəfələrlə uğursuz olmasının səbəbi nədir?
Səbinə 6
dəfə ekstrokorporal mayalanma etdirib, amma hər dəfə də uğursuz alınıb: "Hər dəfə
biz bunu böyük ümidlə edirik. Hamilə qalıram, hər dəfə ümidlənirik, nəticə
olmur. Həkimi dəyişirik, ölkə xaricində də etdirmişik, alınmayıb”
Bir
qisimdə birinci dəfədən uğurlu alınırsa, başqa birində dəfələrlə edilən cəhdlərin
nəticəsiz qalmasının səbəbi nədir?
Ramin Salahov bildirir ki, bu sualların ümumiləşdirilmiş bir
cavabı yoxdur: "Konkret səbəbini biz də bilmirik. Embriona, spermaya, anaya,
uşaqlığın içərisindəki patologiyaya, implantasiya, immunoloji və s. problemlərdən
dolayı belə hallar yaşana bilər”.
Genetik Fuad İsmayılov bildirdi ki, ekstrokorporal mayalanmanın
alınıb-alınmamasının səbəbləri çoxdur: "Məsələn, mayalanma aparıldıqdan sonra
onun genetik cəhətdən sağlam olub-olmamasını yoxlamaq lazımdır. Burda PGD
müayinəsi (Preimplantasion Genetik Diaqnoztika) aparmaq lazımdır. Sonra
embrioloq sağlam embrionları düzgün olaraq seçməlidir. Yerdə qalanlar qadınla əlaqədar
məsələlərdir”.
R.Salahov işin uğurlu alınmasının bir səbəbinin isə inam
olduğunu deyir: "İnam bu işin yarısı deməkdir. Çünki insanın psixoloji vəziyyəti,
pozitiv aurası, inam, ümid də təsirini göstərir. Ona görə bu işin uğurlu
alınmasında psixoterapiyanın da rolu böyükdür. Təəssüf ki bizdə o
psixoterapiyanı edən həkimlər azdır. O yük də bəzən biz ginekoloqların üzərinə
düşür. Bu işə əhəmiyyət verən 20-25 faiz ginekoloq var”.
Xərçəng yaradırmı?
Deyirlər
ki, digər hamiləliklərlə müqayisədə qadının sağlamlığı daha çox təhlükə altına
düşür. Hətta süni mayalanmanın qadınlarda beyin və uşaqlıq boynu xərçənginə səbəb
olması ilə bağlı fikirlər də səsləndirilir.Baş onkoloq Azad Kərimli deyir ki, deyilənlər o zaman doğru olar ki, elmi əsası
olsun: "Mənim əlimdə bununla bağlı elmi əsası olan hər hansı fikir yoxdur”
Ramin Salahov bildirir ki, bu fikirlərdə həqiqət payı çox
cüzidir: "Bu fikirlərdə həqiqət var. Ümumdünya Səhiyyə Təşkilatı, müxtəlif
tibbi mərkəzlər bunun üzərində ciddi araşdırma ediblər. Bəli, verdiyimiz dərmanlar,
hormonal tərkiblidir. İstər-istəməz yumurtalıq və döş şiş xəstəlikləri riskini
artırmış olur. Ancaq tam tərsinə, uşaq dünyaya gətirməyən qadınlarda da döş xərçəngi
yaranır. O qadın uşaq dünyaya gətirib 2 il onu əmizdirdiyi zaman döş xərçəngi
riskini azaltmış olur. Mən bizə müraciət edən pasientləri xərçənglə bağlı da
müayinə edirəm. Yaxınlarında döş xərçəngi olub-olmadığını soruşuram. Bu zaman
bu işi buraxmaq məcburiyyətində qalarıq. Ancaq ana olmaq, uşaq dünyaya gətirmək,
süd vermək qadının sağlamlığına müsbət təsir edir”.
Qadının sağlamlığına təsiri
Cərrah mama-ginekoloqXəyalə Muradova deyir ki, ekstrakorporal mayalanma zamanı istifadə
edilən iynə-dərmanlar yumurtalığı simulyasiya edə bilir. Ona görə burda bəlli həddi
gözləməkdə fayda var: "O limiti keçəndə, qadın orqanizminə mənfi təsir edə,
yumurtalıqda bəzi problemlərə səbəb ola bilər. Amma üç-beş dəfə təkrarlamaq
problem yaratmır. Müəyyən müddətdən sonra hormonal dərmanlar sovrulub gedir.
Bizdə ekstrakorporal mayalanma qiymətləri bahadır, ona görə, 4-5 dəfədən çox
buna gedənlər də olmur. Ekstrakorporal mayalanmanın sığorta ilə qarşılandığı
ölkələrdə 10 dəfədən də çox cəhd edənlər olur. Ancaq onu da deyim ki, elmdə
ekstrakorporal mayalanmanı 10-15 dəfə etdirəndə, sağlamlıqda problem yaratması
ilə bağlı hər hansı fikir yoxdur”.
Qadın, yoxsa kişi?
Əvvəllər
ailədə uşaq olmurdusa, ekstrakorporal mayalanma getməyə məcbur qalınırdısa,
bunu daha çox qadın faktoruna bağlayırdılar. R.Salahov deyir ki, müasir qruplaşma fərqlidir: "Əvvəllər daha çox
qadın faktorundan dolayı ekstrokorporal mayalanmaya müraciət edilirdisə,
indi kişi faktoru onun önünə keçib.
Müasir qruplaşma belədir. 30-35 faiz qadınlar, 30-35 faiz kişilər, 30-35 faiz
isə hər ikisində problem olanlardır”.
Niyə "ölkədə mütəxəssis yoxdur” deyirlər?
Bir
qisim insan esktrakorporal mayalanma üçün ölkə xaricinə - daha çox Türkiyəyə üz
tutur. Səbəbini soruşanda, "ölkədə mütəxəssis yoxdur” kimi cavab işlədirlər. Tibbi ekspert Adil Qeybulla bu yanaşma
ilə razılaşmır: "Ölkəmizdə müxtəlif mərkəzlərdə mütəxəssislər fəaliyyət göstərirlər.
Bu fikirlə razılaşmıram. Ancaq belə fikirlərin yaranmasının səbəbi var.
Ekstrakorporal mayalanmada heç kim yüz faizli zəmanət vermir. Dünyanın hansı
ölkəsində etdirirsən, etdir”.
Hər kəs övlad sahibi ola bilir?
Müasir
tibb problemlə üzləşən bütün cütlüklərə övlad sahibi olmaq imkanı verirmi? R.Salahov bildirdi ki, burda 80 faiz nəticə
almaq mümkündür: "Təbii müalicə, aşılama, ekstrokorporal mayalanma və s. bütün
bunlardan istifadə edərək 80 faiz problemi olanlarda müsbət nəticə əldə edə
bilirik”.
Başqasının uşağı?
Ekstrokorporal
mayalanma ilə uşaq dünyaya gətirməyə risk etməyənlərin bir qismi düşünür ki, o
sənin öz uşağın olmur, həkim səni aldada bilər. R.Salahov deyir ki, atanın sperması sıfırdırsa, TESE əməliyyatı
edib onun xayasından sperma götürülüb mayalanır.
Günel bu üsulla bir müddət öncə uşaq dünyaya gətirib. O,
bu kimi fikirdən dolayı tərəddüd edənlərə səsləndi: "Hamiləliyim çox yaxşı
keçdi. Təbii hamiləlikdən fərqi olmadı. Sağlam övladımız var. Çox adam düşünür
ki, həkim sizi aldadır, uşağın atası başqası olur və s. Bu uşaq oyuncağı deyil, həkim məsuliyyət
daşıyır. Həm də ki uşaq göz qabağındadır, nəinki atasının, həm də babasının
eynisidir”.
Cütlüklərin psixoloji narahatlığı
Məsələnin
bir də psixoloji tərəfi var. Psixoloq Pərvin
Süleymanova deyir ki, ekstrakorporal mayalanmaya müraciət edən cütlüklərin psixoloji
dəstək alması önəmlidir: "Psixoloji dəstək uğursuz nəticədən sonra yox,
prosedura başlayanda və davam etdiyi müddətdə getsə, yaxşı olar. Çünki bu
prosesin cütlüklərin psixologiyasına təsiri böyük ola bilir. Bir neçə cəhd
uğursuz olanda isə, burda cütlük psixoloji olaraq altı mərhələ keçir.
Birincisi, şoka düşürlər, təəccüblənirlər. İkincisi, cavabı qəbul etmirlər, təkrar
analizlər verirlər. Üçüncü mərhələ qəzəblənməkdir. Özlərinə, bir-birlərinə,
valideynlərinə, cəmiyyətə və hər şeyə. Dördüncü, özlərini ətrafdan təcrid etməkdir.
İnsanlarla görüşmürlər, uşaqlı ailələrdən uzaq dururlar, çünki başqalarının
"necə oldu” sualına cavab vermək istəmirlər. Beşinci, özlərini günahlandırmağa
başlayırlar. Axırda isə depressiv əlamətlər özünü göstərməyə başlaya bilir”.
Beləliklə,
süni mayalanma tibbin bir kəşfidir, müsbət tərəfləri olduğu kimi, mənfi yönləri
də olur. Seçim isə artıq hər kəsin özünə qalır.
Aygün
Asimqızı