“Sözlərinə aşiq olmasam, mahnını ifa etmərəm” - Fotolar
Martın 3-də Prezident İlham
Əliyev 8 mart – Beynəlxalq Qadınlar günü münasibətilə bir qrup qadına fəxri
adların verilməsi haqqında sərəncam imzaladı. Onların içərisində dəyərli müğənni,
çoxlarının sevimlisi Xumar Qədimova da var. Beləliklə, məlahətli səsi, qlamur
görünüşü, xanım-xatın davranışları ilə hər kəsin qəlbində taxt quran ifaçının
adının əvvəlinə "Azərbaycanın əməkdar artisti” statusu əlavə olundu.Bu fəxri ad gözlənilən və
insanların ürəyindən xəbər verən bir qərar idi. Çünki Xumar Qədimova xalqın
sevimli sənətkarıdır. Uşaqdan-böyüyə hər kəs onun mahnılarının vurğunudur.
İllər öncə oxuduğu mahnıları belə, bu gün aktualdır, dinlənilir, sevilir. Onun ifa
etdiyi mahnıların sözləri birbaşa olaraq insanların qəlbinə süzülür.İfaçının son dönəmlər ifa
etdiyi "Əl-ələ tut gedək”, "Bir də gəlməyəcək mənim tək qadın”, "Ürəyim” kimi
mahnıları isə bu günün ən hit musiqilərindəndir. Əslində Xumar xanımın
yaradıcılığı haqqında çox yazmaq, çox danışmaq olar. Biz isə yenicə fəxri ad
alan əməkdar artistimizi təbrik etmək qərarına gəldik.Fəxri ad alması münasibəti
ilə səbəbkarla əlaqə saxlayıb, onun təəssüratlarını öyrəndik və eyni zamanda
qarşıdan gələn 8 mart - Beynəlxalq Qadınlar günü münasibəti ilə əməkdar
artistimizi təbrik etdik. Şahidi olduq ki, Xumar xanımın hər kəsdən gizlətdiyi
o daxili dünyasında bayram bayrama qarışıb.
-
Xumar xanım, fəxri ad almağınız münasibəti ilə sizi təbrik edir və
uğurlarınızın davamlı olmasını diləyirik. İlk olaraq təəssüratlarınızı öyrənmək
istərdik.
- Təşəkkür edirəm, diqqətinizə
görə minnətdaram. Cənab prezidentin sərəncamı mənim üçün bir sürpriz və
unudulmaz 8 mart hədiyyəsi oldu. Müxtəlif sahələri təmsil edən qadınlarımızın
içərisində tək sənətçi olaraq mənim "əməkdar artist” fəxri adıyla təltif
olunmağım məni duyğulandırdı. Mənə və təltif olunan bütün qadınlarımıza bu
gözəl sevinci bəxş etdiyinə görə ölkə başçısına təşəkkürümü bildirirəm.Bu
təltif Azərbaycan musiqisinin, mədəniyyətinin təbliğində bundan sonra daha çox
enerjiylə çalışmağıma bir stimuldu. Bir daha cənab prezidentə minnətdarlığımı
bildirir və məni sevən, təbrik edən bütün insanlara təşəkkürümü çatdırıram.
- Təbrik edənlər çoxdur?
- Əlbəttə. 3 gündür ki,
edilən zənglərin ardı-arası kəsilmir. Məni təbrik edənlərin sayı-hesabı yoxdur.
Mesajlar yazırlar, zənglər edirlər. Çox sevindim. Həm də bu təbriklərdən çox
ruhlandım. Siz bilirsiniz ki, bizim kimi xanımlar, sənət adamları bir qədər
ruha bağlıdırlar. Mən də bundan ruhlanaraq gözəl nəğmələr yaratmaq istəyirəm.
İnşallah, qarşıda dəyərli yazarımız Sona Vəliyevanın gözəl qələmindən çıxan
şeirləri nəğməyə çevirmək istəyirəm. Sona xanımla daha gözəl layihələrimiz
olacaq.
-
Sabah 8 mart - Beynəlxalq Qadınlar günüdür. Bu günü necə keçirəcəksiniz?
- Həmin gün bir neçə
tədbirlərə dəvət almışam. İnşallah, həmin gün dəvət olunduğum tədbirlərdə
iştirak etmək niyyətindəyəm.
-
Bu bayram günündə Azərbaycan xanımlarına nələr arzu edirsiniz?
- Beynəlxalq qadınlar günü
münasibəti ilə bütün Azərbaycan xanımlarını təbrik edirəm. Onlara qadın xoşbəxtliyini
arzulayıram. Qoy xanımlarımız dünyanın ən bəxtəvər insanları olsunlar. İstəyirəm
ki, hər bir xanım öz sahəsinin peşəkarı olsun və könülləri xoş olsun. O zaman insan
özünü çox xoşbəxt hiss edir. Həmin an insan düşünür ki, doğrudan da bu həyatda yaşamağa
dəyər. Mən bütün xanımlara şəxsi və iş həyatında uğurlar arzu edirəm. Əslində qadınlarımıza
deyəcək çox sözüm var. Onun üçün ayrıca bir zaman lazımdır.
-
Xumar xanım, iç dünyanız sizi digər xanımlardan çox fərqləndirir. Bilirik ki, Xumar
xanımın tamam başqa bir dünyası var. İstərdik ki, bizə bir az o dünyadan danışasınız.
- O dünyadan heç Xumarın özünün
xəbəri yoxdur (gülür). Hərdən öz-özümə danışıram, deyirəm ki, "ay Xumar, sən məni
çox incidirsən axı”. Bu yaxınlarda sözləri Nəriman Həsənzadəyə məxsus olan "Ürəyim”
adlı bir nəğmə ifa etdim. Mahnının bir misrasında deyilir ki, "Ey mənim əlimdən
ölən ürəyim”. Bəzən o mahnıda özümü görürəm. O qədər həssas, hər şeyi ürəyinə salan
bir insanam ki... Sizə Xumarın dünyasından xəbər verə bilməyəcəm. Çünki bunun
izahı yoxdur. Özüm üçün də izah edə bilmirəm ki, bu Xumar Qədimova kimdir...
-
Yaxşı, bəs fərqli qadın olmaq necə hissdir?
- Özüm üçün əziyyətlidir. Amma
insanlardan gördüyüm münasibətlərə görə maraqlıdır.
Hamı kimi olmaq maraqsızdır,
fərqli olmaq gözəldir. Mən onun əziyyətini çəkirəm. Başa düşən insanlar üçün gözəldir.
Fərqlilik bir az da qıcıqlandıran bir şeydir, onu da qəbul edirəm. Amma insanları
həqiqətən də bu çox maraqlandırır.
-
Eşitdiyimə görə, siz mahnını ifa etməmişdən öncə onun sözlərində bir qədər düzəlişlər
edirsiniz. Bu doğrudurmu?
- (Təəccüblənir) Ay maşallah,
siz onu necə hiss etmisiniz? Gəlin, buna düzəliş deməyək. Özümdən nələrisə əlavə
edirəm. Bu mənim içimdən gələn bir şeydir. Ancaq bu o demək deyil ki, ifa
edəcəyim hər hansı şairin şeirini dəyərləndirmirəm və yaxud da ki, bəyənməyib
sözlərində dəyişiklik edirəm. Əgər mən o şeiri bəyənməsəm, ona aşiq olmasam, heç
vaxt həmin mahnını ifa etmərəm. Bu mənim xasiyyətimdə belə yoxdur. Əgər içimdən
gəlirsə, mütləq ona əlavələr edirəm.
-
Bəlkə elə məhz bu düzəlişlərdən sonra mahnılarınız insanların qəlbinə asan
şəkildə yol tapır?
- Əslində bu işin sirri
səmimiyyətdir. Mahnılarım da səmimi olduğuna görə, siz dediyiniz kimi, insanların
qəlbinə asanlıqla yol tapır. Səmimiyyət gözəldir. Səmimi olanda insanların qəlbinə
yol tapmaq asan olur.
-
İfa etdiyiniz mahnıların çox böyük mənəvi yükü olur. Mahnı seçərkən ən çox nəyə
diqqət edirsiniz?
- Əlbəttə ki, sözə. Mənim üçün
mahnı ifa edərkən ilk sırada söz gəlir... Görkəmli şairimiz Mikayıl Müşfiq "Duyğu
yarpaqları” şeirində deyib:
Ey bizim dünyanın söz deyənləri,
Ruhun dodağına tutun meyləri,
Bir nəğmə söyləyin heyrətdə
qalsın,
Bütün dövrlərin müğənniləri.
Bu o deməkdir ki, elə bir söz
yazın, o sözün özü bir nəğmə olsun. Söz mənim üçün hər şeydən önəmlidir.
Ümumiyyətlə, nəğməni yaradan gözəl sözdür.
Xəyalə Rəis