Sumqayıt Dövlət Dram Teatrında 48-ci mövsümünün açılışı oldu
Noyabrın 22-si Azərbaycanın üçüncü böyük şəhəri
hesab edilən Sumqayıtın şəhər statusu almasının 67–ci ildönümü idi. Bu münasibətlə
Hüseyn Ərəblinski adına Sumqayıt Dövlət Dram Teatrında 48-ci mövsümün açılışı
qeyd olundu. Mərasimdə Azərbaycan Respublikası Mədəniyyət və Turizm naziri Əbülfəs
Qarayev və Sumqayıt Şəhər İcra Hakimiyyətinin başçısı Zakir Fərəcovun da
iştirak etdiyi tədbir əvvəlcə Heydər Əliyev Parkında ümummilli liderin abidəsini
ziyarət edib, önünə gül-çiçək dəstələri qoymaqla başladı. Daha sonra Sumqayıt
Dövlət Dram Teatrının açılış mərasiminə start verildi. Teatrın 48-ci mövsümünün
açılışı 60 ildən bəri ilk dəfə əsaslı təmir olunan və yenidən qurulan binada
keçirildi.
Bildiyiniz kimi, teatrın tamaşa göstərmək üçün
binası olsa da, orada texniki avadanlıqlar və istilik sistemi işləmirdi. İndi
isə teatrın binası.
Mədəniyyət və Turizm naziri və İcra hakimiyyətinin
başçısı əvvəlcə əsaslı şəkildə təmir olunmuş və ən müasir avadanlıqlarla təchiz
edilmiş teatr binasının konfrans zalına, iş, qrim və məşq otaqlarına baxdılar.
Sonra səhnəyə çıxıb tədbir iştirakçıları ilə öz təəssüratlarını bölüşdülər. Əslində
ilk dəfə idi ki, Sumqayıt Teatrını belə dolub-daşan görürdük. Hətta lojalarda
da oturmağa yer qalmamışdı. Tədbirdə Azərbaycan teatr camesinin görkəmli nümayəndələri,
Sumqayıt şəhərinin ziyalıları iştirak edirdilər.
Şəhər icra hakimiyyətinin başçısı Zakir Fərəcov öz çıxışında
yeni teatr mövsümünün açılışının şəhərin 67-ci ildönümü ilə üst-üstə düşməsini
xoş bir təsadüf adlandırdı. O, ümummilli lider Heydər Əliyevin hər zaman
Sumqayıta önəm verdiyini, incəsənətə xüsusi qayğı göstərdiyini dedi. Bildirdi
ki, bu gün Prezident İlham Əliyevin tövsiyə və göstərişləri, xüsusi qayğısı ilə
Sumqayıt inkişaf edir, öz tarixinə yeni şanlı səhifələr yazır: "Sumqayıt
Teatrının məskən saldığı bu bina 1957-ci ildə tikilib. Binanın tikilişi
Sumqayıtda müxtəlif tədbirlərin keçirilməsi üçün nəzərdə tutulmuşdu. Bu illər ərzində
teatrımız şərəfli yol keçərək günümüzə qədər gəlib çıxıb. Teatrda çalışan
yaradıcı heyətimiz də biri-birindən maraqlı obrazları ilə teatra rəng qatıblar.
Binada bu günə qədər heç bir əsaslı təmir işləri aparılmadığından buranı zirzəmidən
dam örtüyünə qədər yenidən qurduq. Binanın maddi-texniki bazasını tamamilə dəyişdik.
Nəticədə, gördüyünüz kimi gözəl bir bina alındı. 2009-cu ildən bu bina Mədəniyyət
və Turizm Nazirliyinin balansındadır”. Çıxışının sonunda Z.Fərəcov
sumqayıtlıları təbrik etdi.
Mədəniyyət və turizm naziri Əbülfəs Qarayev öz çıxışında
uzun müddət idi ki, Sumqayıtda olmadığını və şəhərə daxil olanda onu
tanımadığını bildirdi: "Şəhərin girişindən bu binaya qədər gəldiyimiz yolda
özümü başqa yerdə hiss etdim. Şəhəriniz gözəlləşib, xeyli abadlıq işləri
görülüb. Bu işlərin hamısı sumqayıtlıların əziyyəti hesabına ərsəyə gəlib”.
Daha sonra nazir Sumqayıt teatrının keçdiyi inkişaf yolundan danışaraq, bu sənət
ocağının tamaşaçıların maariflənməsindəki xidmətlərindən söhbət açdı: "Uzun və
şərəfli bir yol keçmiş Azərbaycan teatrı son illərdə yeni inkişaf mərhələsinə qədəm
qoyub. Bu gün aparıcı teatrlarda fəaliyyət göstərən sənət adamlarının bir çoxu
bu sənət ocağının yetirmələri olub”. O, qısa müddətə teatrın binasının təmir
olunmasını yüksək qiymətləndirib və bu teatrda önəmli tamaşaların nümayişinin
ölkəmizin ictimai-siyasi həyatına da töhfə verəcəyini bildirdi: "Sumqayıtlar bu
teatrın qapılarını açaraq tamamilə başqa dünyaya qonaq olacaqlar. Teatr cəmiyyətin
aynasıdır. O aynada əks olunan səhnələr bizim hamımız ürəyinə toxunur. Teatrın
inkişaf etməsi üçün dövlət proqramı tərtib olunub və bundan əlavə teatrlarımıza
maliyyə yardımları göstərilir”.
Nazir həmçinin təmirdən yeni çıxmış teatrda
sanballı əsərlərin səhnələşdiriləcəyinə də ümid etdiyini dedi: "Bu cür məkanda
maraq doğuran əsərləri səhnələşdirməmək mümkün deyil. Burada müasir tələblərə
cavab verən tamaşalar qurulmalıdır. Yaradıcı kollektivə bu gözəl məkanda gözəl
yaradıcı mühit formalaşdırmaq bizim üçün sevindirici haldır. Teatr cəmiyyətimizi
qabağa aparan bir qüvvədir. Ümid edirəm ki, Sumqayıt camaatı teatra maraq göstərəcək
və bundan sonra teatr salonunda boş yerləri görməyəcəyik. Bu məkana gəlib, yeni
tamaşaların premyeralarını izləyərək asudə vaxt keçirəcəyik. Danılmaz faktdır
ki, bu gün Azərbaycan teatrı dünyaya
inteqrasiya edir və tanınır. Teatrlarımız müxtəlif beynəlxalq festivallarda ölkəmizi təmsil edirlər”.
Sonda mətbuat nümayəndələrinə açıqlama verən nazir
qeyd etdi ki, Sumqayıt həm asudə vaxtın, həm də mədəni həyatın təşkili
baxımından turist marşrutuna salınacaq və burada turizm obyektləri tikiləcək.
Sonra bir qrup şəhər sakini və mədəniyyət işçisi müxtəlif
fəxri adlarla, fəxri fərman və diplomlarla təltif olundu. Əməkdar artist Namis
Şirməmmədov çıxış edərək yaradılan şəraitə, yüksək qayğıya görə yaradıcı heyət
adından dövlətimizin başçısı İlham Əliyevə minnətdarlığını bildirdi.
Təltiflərdən sonra Sumqayıt Teatrının repertuarında
yer alan ən maraqlı tamaşalardan biri M.F.Axundzadənin "Hacı Qara” tamaşası təqdim
olundu. Sumqayıt teatrının yozumu və aktyor improvizəsi ilə fərqlənən "Hacı
Qara”sında baş qəhrəmanın rolunu istedadlı aktyor Akif Mirzəyev oynayırdı.
Tamaşanın quruluşçu rejissoru və musiqi tərtibatçısı Firudin Məhərrəmov,
quruluşçu rəssamı isə Mustafa Mustafayevdir. Əsas rolları əməkdar artistlər
İlahə Səfərova, Cəlal Məmmədov, aktyorlar Akif Mirzəyev, İlham Səfərli və İlahə
Səfərli ifa edirdilər.
Musiqili satirik-komediya janrında qurulmuş
tamaşada mahnı və musiqilər əsərə xüsusi rəng verir, onu daha da baxımlı edirdi.
Xəyalə Rəis