Sosial şəbəkələrdə tənqidin həddi necə müəyyənləşdirilməlidir? - Diskussiya
Sosial şəbəkələrdə hansısa paylaşımımızın gülüş hədəfinə
çevrilməsinin dəfələrlə şahidi olmuşuq. Bəzən ciddi-ciddi paylaşdığımız fikirlər
istifadəçilərdə əks reaksiya doğura bilir. Olur ki, özümüzdən icazəsiz
götürülmüş statuslarımıza, yaxud şəkillərimizə hansısa səhifələrdə və profillərdə
rast gələ bilirik. Kimi bizi haqlı çıxarır, kimi haqsız. Kimi tənqid edir,
kimisi də hətta təhqir. Bizim xəbərimiz olmadan düşüncələrimiz gülüş hədəfinə
çevrilir.
Bəs gənclər nə düşünür? Sosial şəbəkələrdə tənqid və təhqirin
həddi necə müəyyənləşdirilməlidir? Bu sualın cavabını Azərbaycan Texniki
Universitetinin tələbələri ilə müzakirə etdik.
Ziya
Bayramov:
- Bir çox statusların şəklinin çəkilib paylaşılmasının
şahidi olmuşam. Xüsusilə xanımların statusları daha çox paylaşılır. Məncə, Azərbaycanda
yaşamağımızı qəbul edib, mentalitetimizə uyğun hərəkətlər etməliyik. Statusları
yazmazdan əvvəl yüz ölçüb, bir biçmək lazımdır ki, tənqid obyektinə tuş gəlməsinlər.
Əgər sosial şəbəkələrdə düşündüyünü yazmaqdan çəkinmirsənsə, bunun nəticələrini
də qəbul etməlisən. Güclülər həmişə zəiflərdən istifadə etməlidir. Bu, həqiqətdir.
Sən özünü gülüş hədəfinə çevirirsənsə, bu sənin zəifliyindir. Sağlam düşünən
insan bilir ki, status paylaşarkən bunun sonu belə olacaq. Sosial şəbəkə
istifadəçilərinin çoxu anormal statuslar paylaşarkən bunu bilərəkdən və məşhur
olmaq üçün edirlər. Sırf tənqid obyektinə çevrilmək üçün bundan istifadə edən
istifadəçilər var. Tənqid olar, amma təhqir yolverilməzdir. İnsanları
statuslarına görə təhqir edənlər savadsızlardır və sosial şəbəkələrdən istifadə
qaydalarını bilmirlər.
Sona
Babayeva:
- Ziyanın fikri ilə razı deyiləm. Öz profilimdə istədiyim
kimi paylaşım edə bilərəm. Məncə, hansısa statusun şəklini çəkib başqa səhifədə
paylaşmaq düzgün deyil. Hər insanın öz fikri var və fikrini ifadə etməkdə
azaddır. Əlbəttə, müəyyən hədd olmalıdır. Yazarkən düşünmək lazımdır. Amma bir
istifadəçinin mənasız status yazması heç kimə haqq vermir ki, onu paylaşıb tənqid,
yaxud təhqir edəsən.
Ziya
Bayramov:
- Əlbəttə, təhqirin mən də tərəfdarı deyiləm. Kimisə təhqir
etmək qanun pozuntusudur. Təhqir edilən insan həmin şəxşdən şikayət edə bilər.
Amma tənqid etmək pis hal deyil. Tənqiddən nəticə çıxarıb səhvlərimizi görə bilərik.
Pərvin
Şabanova:
- Status paylaşan insan nəzərə almalıdır ki, buna
yaxşı rəylər gəlirsə, pis rəylər də gələ bilər. Hər kəsin düşüncəsi eyni deyil.
Fikrini ictimaiyyət içinə çıxaran insan bunun nəticələrinə də hazır olmalıdır.
Əgər pis rəylər almağa hazır deyilsənsə, o statusu paylaşmamalısan. Mən təniqidin
tərəfdarıyam. Tənqid normaldır və ondan nəticə çıxarmaq lazımdır. Çoxluq azlığa
tabedir. Əgər çoxluq bunun səhv olduğunu deyib, lağ edib gülürsə, deməli burada
yanlış var və sən o yanlışı düzəltməlisən. Amma təhqir yolverilməzdir.
Ziya
Bayramov:
- İnsanların əksəriyyəti sağlam düşünməyi bacarmır. Bu
da kitab oxumamaq və internetden düzgün istifadə etməməkdən irəli gəlir.
İnsanlar təhqirlə tənqidi ayıra bilmirlər. Orada verilən hansısa rəy ola bilsin
ki, tənqiddir, amma bunu təhqir kimi qəbul edib məsələni şişirdirlər.
Pərvin
Şabanova:
- Yaxşı statusu heç kim lağlağı edib paylaşmaz. Kimsə
gözəl fikir yazanda, hər kəs onu gözəl fikir kimi paylaşır. Əgər lağlağı ilə
paylaşılırsa, demək ki, orada çatışmayan nəsə var və gülüş hədəfinə çevrilir.
Sosial şəbəkələrdə heç kimə sərhəd qoymaq olmaz ki, bunu paylaşma, yaxud lağ
etmə. Səhv nə isə edirsənsə, ona mütləq reaksiyalar olacaq. İnsan qarşındakını
tanımır. Sosial şəbəkələr bizim güzgümüzdür. Paylaşdıqlarımız bizim düşüncəmizin,
intellektual səviyyəmizin göstəricisidir. Mən lağlağı edənlərdə günah görmürəm.
Günah özünü gülüş hədəfinə çevirəndədir.
Sahib
Əliyev:
- Pərvinin fikirləri ilə tam razıyam. Bizim
statuslarımızı paylaşıb gülüş hədəfinə çevirənlərdə günah yoxdur. Günah elə
gülünc status paylaşandadır. Paylaşmazdan öncə yüz ölçüb, bir biçmək lazımdır.
Fikirləş ki, bunun axırı hara gedir. Gülməli statusa, gülməli düşüncəyə gülərlər.
Milana
Fərzəliyeva:
- İnsanlar indi hər yerdə gülmək, ələ salmaq üçün bəhanələr
axtarırlar. Çünki belə paylaşımlarla gündəmə gəlib, çoxlu izləyici, "like”
toplayırlar. Paylaşım da hər bir insanın öz səviyyəsini göstərir. Düzdür,
insana öz səhvini bildirmək lazımdır ki, belə gülünc paylaşımlar etmə. Amma
insanın özünə demədən onun yalnız dostlar arasında paylaşdığı statusun şəklini
çəkib bütün səhifələrdə bəyan etmək yolverilməzdir.
Ziya
Bayramov:
- Reallıq odur ki, lağa qoyulacaq statusları paylaşan
insanların əksəriyyəti məşhur olmaq üçün belə edir. O qədər sosial şəbəkə
istifadəçisi var ki, məhz hansısa gülünc status ilə gündəmə gəlib və çox izləyicisi
var. Çox az insan isə həqiqətən bilməyərəkdən belə şeylər paylaşır.
Sona
Bayramova:
- Hər insan öz xarakterinə uyğun paylaşımlar edir. Heç
kimin haqqı yoxdur ki, ona lağ etsin. Düzdür, hər insanın da istədiyini
paylaşmasının tərəfdarı deyiləm, müəyyən hədd olmalıdır. Amma mən o həddi özümdə
müəyyələşdirmirəmsə, azad fikrimi paylaşıramsa, kimin haqqı var ki, məni izləyicisi
çox olan məkanda gülüş hədəfinə çevirsin? Bu, insanlıqdan kənar hərəkətdir. Tənqid
etmək olar, amma lağ etmək olmaz.
Ziya
Bayramov:
- Bəzən məşhur simaların, yaxud yenicə məşhurlaşmağa
çalışan insanların hansısa uğursuzluqlarını əsas gətirərək "caps”lar, gülünc şəkillər
düzəldib paylaşırlar. Bu, cəmiyyətin səhvidir. Əgər bir insan yıxılırsa, onu
baltalayır və motivasiyasını salırıq. Cəmiyyətimizdə gülməli hadisələri izləməyə
tələbat var. Hər şeydə gülüş axtarırıq. Amma hansısa iş görmək istəyən insanın
motivasiyasını salmaq insanlığa uyğun hərəkət deyil. Biz həmin "caps”a gülüb
keçə bilərik. Amma uğursuzluğuna görə cəmiyyətdə gülüş hədəfinə çevrilən
insanın yerinə özümüzü qoyub, bir az da olsa düşünməliyik.
Paylaşılan təhqiramiz "caps”ları paylaşmamaq bizdən
asılıdır. Bu məsələdə palaza bürünüb el ilə sürünməli deyil, öz fikrimizi
ortaya qoymalıyıq. Əgər biz bəyənməsək, paylaşmasaq, bunu edənlərə irad bildirsək,
qarşısını ala bilərik.
Pərvin
Şabanova:
- Facebookda ən çox "xoşbəxt qadınlar klubu”nda
qadınların statuslarının şəklini çəkib paylaşırlar. Hər bir insanın yazdığı
statusdan onun dünyagörüşünü müəyyələşdirmək olur. Əgər evdar bir xanımın
düşüncəsi kasaddırsa, bunu nə üçün paylaşıb gülməliyik? Ən acınacaqlısı da odur
ki, həmin xanımların profil şəklini, adını silmədən paylaşırlar. Bu, etik
deyil.
Yusif
İskəndərov:
- Əgər yaxşı bir şey paylaşırsa, heç bir insan ona lağ
edə bilməz. Amma bəzən bilərəkdən gülünc və düşüncəsiz fikirləri mən də
paylaşıram. İnsan özü-özünü gülüş obyektinə çevirir. Əgər insan özü onu istəyirsə,
mən də paylaşıb gülürəm. Burada pis heç nə yoxdur.
Sona
Bayramova:
- Əslində Yusif düz deyir. Bəzən qısa videolar çəkib həqiqətən
özlərini camaata güldürürlər. Bəzilərinə insanları öz hərəkətləri ilə güldürmək
zövq verir və paylaşmaqlarından da qorxmurlar. Əgər videoda yersiz hərəkət etməsə,
kimə maraqlıdır ki, onu səhifəsində paylaşsın. Acınacaqlısı odur ki, izləyicilərin
özləri də belə videolara baxmağa maraqlıdır və gözləyirlər. Belə insanlar kitab
və maarifləndirici səhifələri yox, məhz gülüş obyektinə çevrilən insanları izləyib
gülmək istəyir.
Ziya
Bayramov:
- İnsanlar gülmək istəyir. Məşhur olmaq üçün nə etmək
lazımdır? İnsanların istədiyini vermək lazımdır. İnsanların istədiyi də məhz
budur - gülmək. İnternetə əylənmək və gülmək üçün girirlər. Artıq bəzi istifadəçilərin
həyat tərzi budur. Onları qınamağa heç kimin haqqı yoxdur.
Yusif
İskəndərov:
-
Əgər
bir insan özünü gülünc vəziyyətə salmaq istəyirsə, ona heç kim heç nə edə bilməz.
Bu, kitab oxumamaqdan, yaxud savadsızlıqdan irəli gəlmir. Hər bir insanın
düşüncəsi var və ona uyğun hərəkət etməlidir. O qədər savadlı insanlar var ki,
bilərəkdən özünü gülüş hədəfinə çevirir, yaxud gülüş hədəfinə çevrilənləri
paylaşıb gülür.
Aygün
ƏZİZ
Fotolar:
Günel AZADƏ