“Şimal Axını-2” ətrafında həlqə daralır
Rusiyanın ən iri enerji layihəsi – "Şimal Axını-2” layihəsinin baş tutmamaq
ehtimalı günbəgün artmaqdadır. Kremlin Ukraynadan yan keçəcək layihəsinin
gerçəkləşməsinə qarşı müqavimət hərəkatına getdikcə daha çox ölkə qoşulmaqdadır
və belə getsə "Qazprom” meydanda tək qalacaq. Məsələ ondadır ki, layihədə
Rusiyanın ən yaxın müttəfiqi olan Almaniya da susqunluq nümayiş etdirir. Ötən
gün isə Avropa İttifaqı (Aİ) Şurasının prezidenti Donald Tusk Aİ ölkələrini
Rusiyanın "Qazprom” şirkətinin "Şimal Axını-2” qaz kəməri layihəsinin qarşısını almaq üçün
tezliklə qanunlar hazırlamağa çağırıb. Tusk bununla bağlı Aİ ölkələrinin
liderlərinə məktub ünvanlayıb. Hələ Aİ liderlərinin hamısı məktubu almadığı
üçün onun tam mətni dərc edilməyib. Məktubun məzmunu isə belədir ki, Aİ
ölkələri sürətlə Avropa Komissiyasının bir neçə gün əvvəl qaz təlimatına
dəyişikliklə bağlı təklif etdiyi layihəyə diqqət yetirsinlər. Yeni qayda
dənizin dibindən keçməklə çəkilən kəmərlər də daxil olmaqla, qız ixracı üçün
nəzərdə tutulan bütün kəmərləri əhatə edir.
Qeyd edək ki, "Şimal Axını-2”
Rusiya qazının Baltik dənizinin dibi ilə Almaniya üzərindən Avropaya ixracını
nəzərdə tutur. Rusiya nəşrləri yazır ki, Avropa Komissiyası qaz kəmərinin
inşasında monopol nizamlayıcı qismində çıxış etmək niyyətindədir.
Layihənin reallaşmasında Rusiyanın əsas dəstəkçisi və müdafiəçisi olan
Almaniya isə yeni hökumət daxilində fikir ayrılıqları üzündən hələ ki, səsini
çıxarmır. Seçkilərdə yaşanan nəticə qaz layihəsinin perspektivlərini şübhə
altına alıb. Yeni hökumət "Şimal Axını-2” layihəsinin müdafiəsi ilə bağlı ritorikanı
azaldıb. Hazırda layihənin avropalı iştirakçıları da Berlindən qaz kəməri ilə
bağlı qəti mövqe gözləyirlər. İlk olaraq bu barədə Avstriyanın OMV enerji
layihəsinin rəhbəri Rayner Zele çıxış edib. O bildirib ki, Almaniyanın yeni
hökuməti layihənin reallaşması ilə bağlı qəti mövqe nümayiş etdirməlidir. Berlində
qaz kəməri ilə bağlı vahid mövqe yoxdur. Britaniyanın Financial Times nəşri açıq
şəkildə yazır ki, layihənin dəstəklənməsi ilə bağlı mövqe zəifləyir. KİV bu cür
dəyişiklikləri qaz kəməri ilə bağlı sərt mövqe nümayiş etdirən AFR-in yeni
hökuməti ilə əlaqələndirir. Kansler Angela Merkel hökuməti seçkilərdən əvvəl
layihənin qatı tərəfdarı kimi tanınıb. İndi isə vəziyyət kökündən dəyişib.
Vəziyyəti gərginləşdirən başqa hal odur ki, Avropa Komissiyası (AK) Üçüncü Enerji Paketinə dəyişiklik edilməsi
barədə bəyanat verib. Bu bəyanatı AK-nın vitse-prezidenti Maroş Şefçoviç
səsləndirib. AK-nın təklifləri Avropa İttifaqının qazla bağlı direktivlərinə
dəyişiklikləri nəzərdə tutur. Bu dəyişiklik reallaşarsa, onda Avropa Komissiyası
"Şimal Axını-2”
layihəsi ilə bağlı yeganə tərəf olur.
Qeyd edək ki, layihənin dəstəkçiləri sırasında Almaniya ilə yanaşı,
Fransa, Avstriya və Niderland çıxış edirdilər. Adları çəkilən ölkələrin enerji
şirkətləri də layihədə iştirakçı kimi çıxış edirlər. Layihəyə qarşı çıxan
dövlətlərə isə Polşa rəhbərlik edir. Bu ölkə hətta müvafiq koalisiya da
formalaşdırmağa müvəffəq olub. Onların əsas tələbi odur ki, layihə Avropa
İttifaqının təhlükəsizliyi üçün təhlükədir. Ən əsası, Ukraynanı Rusiya qazının
tranzitindən əldə olunan gəlirdən məhrum edir. Bu gəlir isə Ukrayna ümum daxili
məhsulunun 3 faizi deməkdir. Özü də gəlirdən tək ukraynalılar məhrum olmurlar.
Məsələn, Slovakiyanın mavi yanacaqdan əldə etdiyi gəlir 800 mln. avro təşkil
edir. AK ilin əvvəlindən "Şimal Axını-2” layihəsi ilə əsas danışıqçı mandatı əldə
etmək istəsə də, bu cəhdi alınmayıb - Almaniya buna imkan verməyib. Berlin bəyan
edib ki, Aİ qaz kəməri ilə bağlı işlərə qarışmamalıdır. Danimarkanın da mövqeyi
vəziyyəti gərginləşdirir. Hazırda parlament enerji layihələri ilə bağlı qanunun
müzakirəsinə başlayıb. Bu qanun enerji layihələri qəbul edilərsə, bu
layihələrlə bağlı qərarın xarici siyasət və təhlükəsizlik məsələləri nəzərə
alınmaqla qəbulu nəzərdə tutulur. Bu qanun qəbul olunarsa, onda layihənin
reallaşması növbəti problemlə üzləşə bilər.
Rusiyanın mövqeyinə gəldikdə, Moskva heç bir halda Üçüncü Enerji Paketinin
qaydalarına tabe olmaq istəmir.
Bir faktı da qeyd edək ki, "Şimal Axını-2” layihəsinin reallaşmasına
ABŞ-ın sanksiyaları da böyük təhlükə ola bilər. Ötən həftənin sonu layihə
iştirakçıları ABŞ prezidenti Donald Trampın müvafiq qərarı ilə tanış olmaq
imkanı əldə ediblər. Burada isə qeyd edilib ki, Rusiya boru kəmərlərinin
inşasına böyük həcmdə investisiya yatıran şirkətlər sanksiyanın təsiri altına
düşmüş olurlar. Burada, həmçinin ABŞ-ın gələcəkdə də açıq şəkildə "Şimal Axını-2” layihəsinə maneə olacağı
vurğulanıb.
Azər