Şərqi Qərblə, Şimalı Cənubla birləşdirən nəqliyyat qovşağı
Bakı-Tbilisi-Qars
(BTQ) dəmir yolu layihəsinin reallığa çevrilməsi məhz Azərbaycan Prezidenti
İlham Əliyevin siyasi iradəsi və böyük əməyi səviyyəsində mümkün olub. Bu
xəttin istifadəyə verilməsi iqtisadi və
siyasi əhəmiyyətinə görə Afrika ilə Asiyanı birləşdirən Süveyş kanalı kimi
titanik layihələrlə müqayisə oluna bilər. Əsas iştirakçıları Azərbaycan,
Türkiyə və Gürcüstan olan BTQ Avropa İttifaqı, ABŞ və Mərkəzi Asiya dövlətləri
tərəfindən də dəstəklənir. Sözügedən layihə Şərqdən Qərbə yük və sərnişin
daşımaları imkanlarını daha da artırır, bu daşımalara sərf olunan vaxtı və
maliyyə sərfiyyatını xeyli azaldır. İlkin mərhələdə BTQ-nin buraxılış
qabiliyyəti ildə 1 milyon sərnişin və 6,5 milyon ton yükə hesablanıb.
Planlaşdırılır ki, daşıma həcmi sonralar 17 milyon ton artacaq və tədricən 50 mln. tona çatdırılacaq. Sərnişin
sayı isə 2 milyon nəfər olacaq. BTQ dəmir yolu vasitəsilə Bakıdan Türkiyənin
Qars şəhərinə qədər yolun müddəti 16-17 saat təşkil edəcək. Sonra yol Ankara,
İstanbula qədər uzanacaq, Avropa üzərindən La-Manş və Londona keçəcək. Bu
dəmiryolu vasitəsi ilə Azərbaycan beynəlxalq nəqliyyat dəhlizlərinə və
Türkiyəyə birbaşa çıxış əldə edəcək. Yəni, dəmiryolu ilə bir günə Qarsa və iki
gün yarımaİstanbulagetmək mümkün olacaq. Bakı-Tbilisi-Qars
dəmiryolu Azərbaycanın iqtisadiyyatının inkişafında da əhəmiyyətli rol
oynayacaq. Azərbaycanın ilk illərdə tranzitdən minimal gəliri 50 mln. dollar
təşkil edəcək. Bu layihənin istifadəyə verilməsi ilə Azərbaycan özünü təkcə
neft və qaz hasil edərək ixrac edən ölkə kimi deyil, həm də Şərqi Qərblə,
Şimalı Cənubla birləşdirən nəqliyyat qovşağı və logistika mərkəzi kimi təqdim
edir.
Milli Məclisin deputatı, siyasi şərhçi Sahib Alıyevmövzu ilə bağlı "Kaspi”yə açıqlamasında bildirib ki, BTQ iqtisadi baxımdan
olduqca sərfəli layihədir. Onun sözlərinə görə, söhbət təkcə ondan getmir ki,
hazırda Avropa İttifaqı ilə Çin arasında illik 240 milyon ton civarında yükün
böyük bir hissəsinin daşınması məhz bu əlverişli xətt vasitəsilə mümkün ola
bilər. Bununla yanaşı, deputat bildirib ki, region ölkələri, xüsusən də Mərkəzi
Asiya dövlətlərinin, elə Azərbaycanın özünün istehsal etdiyi məhsulların
daşınması bu xətt vasitəsilə mümkün olacaq: "Təbii ki, bütün bunlar tranzit gəlirləri
ilə paralel olaraq, Azərbaycanın ixrac potensialını, imkanlarını da artırır.
Xarici bazarlara çıxış daha asan, təhlükəsiz, əlverişli, sərfəli olduğu
təqdirdə, yerli sahibkarlar da bu xəttin imkanlarından yararlanacaqlar. Bu
xəttə vasitəsilə əvvəlcə 1 milyon, sonralar isə 3 milyon sərnişinin daşınacağı
gözlənilir. Bu faktor regionun, o cümlədən Azərbaycanın turizm potensialına da
müsbət təsir göstərəcək. Bu da ayrıca gəlir deməkdir. Eyni zamanda, bu dəmir
yolu türk dövlətlərini bir-biri ilə birləşdirir, xalqlar arasında inteqrasiyanı
daha da sıxlaşdıracaq. Tarixi kökləri bir olan insanlar arasında bağlılıq
güclənəcək. Hesab edirəm ki, tarixi Azərbaycan torpaqlarında Ermənistan
dövlətinin yaradılması ilə türk dünyasının kəsilən bağlantısı BTQ vasitəsilə
yenidən bərpa ediləcək. Siyasi, strateji baxımdan bu, olduqca mühüm məsələdir.
Bu xəttin istifadəyə verilməsi Azərbaycanın regionda, dünyada nüfuzunu, rolunu
artırmaqla bərabər, müstəqilliyini, dövlətçiliyini daha da möhkəmləndirəcək,
gücləndirəcək. Azərbaycanın belə bir layihəni reallaşdırması Xəzər dənizinin o
tayındakı türk dövlətləri üçün də faydalıdır, onların müstəqilliklərinin
möhkəmləndirilməsinə, manevr imkanlarının artırılmasına xidmət edəcək.
Türkiyəyə yanaşmada da bunu demək mümkündür. Bakı-Tbilisi-Ceyhan Türkiyəni
Avropanın gözündə böyük bir oyunçuya, BTQ nəqliyyat qovşağı isə vazkeçilməz
dövlətlərdən birinə çevirir. Bu da məhz Azərbaycanın reallaşdırdığı layihə
vasitəsilə baş verir. Digər tərəfdən, bu dəmir yolunun Naxçıvana qədər
uzadılması da nəzərdə tutulub ki, bu da muxtar respublikanın blokadadan
çıxarılması deməkdir. Eyni zamanda, Naxçıvan BTQ vasitəsilə tranzit qovşağına
çevrilir. İrandan gələn və ya İrana gələn yüklərin bir hissəsi bu yol
vasitəsilə daşınacaq. Ən azından, İran və Türkiyə üçün yüklərin daşınması
baxımından bu yol daha sərfəlidir. Bu reallıqlar İrandan Ermənistana dəmir yolu
çəkilməsi kimi layihəni də arxivə atır. BTQ-nin reallaşması ilə Ermənistanın
tranzit ölkə olmaq arzusunun üzərindən birdəfəlik xətt çəkilir”.
Milli Məclisin İqtisadi siyasət, sənaye və sahibkarlıq komitəsinin üzvü
Tahir Mirkişili də BTQ-nin əhəmiyyətindən danışarkən,
bu dəmir yolunun Avropanı Asiya ilə birləşdirən ən qısa və etibarlı yol
olduğunu vurğulayıb. Bildirib ki, bu layihə Avropa-Qafqaz-Asiya nəqliyyat
dəhlizinin mühüm bir hissəsidir: "Hazırda Avropa və Asiya arasında olan ticarət
əlaqələri, yük daşımaları hər il genişlənir. Avropa Birliyi ilə Çin arasında
ticarət həcmi 500 mlrd dolları, yük daşımalarının həcmi isə illik 100 milyon
tonu keçir. Genişlənməkdə olan bu əlaqələr tranzit ölkələr üçün də böyük iqtisadi
mənfəət vəd edir. Hazırda Avropa Birliyi və Çin arasındakı yükdaşımalar
şimaldan Trans-Sibir dəmir yolu vasitəsilə Rusiya ərazisindən keçməklə,
cənubdan isə Hind okeanı-Süveyş kanalı dəniz yolu ilə daşınır. Şimal dəmir yolu
marşrutu əsasən siyasi cəhətdən Avropa Birliyi ölkələri ilə sabit münasibətləri
olmayan Rusiyadan keçdiyindən yüksək siyasi risklər daşıyır. Cənub dəniz yolu
marşrutu isə xeyli vaxt tələb etdiyindən ticarətin artan dinamikliyinə cavab
verə bilmir. Məhz bu kontekstdə Avrasiya məkanında daha qısa, siyasi cəhətdən
sabit və bütün bölgələrin inkişafına təkan verəcək bir marşruta ehtiyac yaranıb”.
Millət vəkili
bildirib ki, məhz 2007-ci ildə Prezident İlham Əliyevin təşəbbüsü və siyasi
iradəsi, Azərbaycan dövlətinin iqtisadi dəstəyi ilə BTQ dəmir yolu layihəsinin
həyata keçirilməsi üzrə Azərbaycan-Türkiyə-Gürcüstan arasında saziş imzalanıb: "O
zaman digər bir layihənin də həyata keçirilməsi üçün Ermənistan rəhbərliyi və
onların havadarları bütün güclərini sərf etmişdilər. Bu layihə Qars-Gümrü-Tbilisi
layihəsi idi. Bu layihənin bəzi hissələri hazır idi. Ancaq Azərbaycan
dövlətinin gücü, Prezident İlham Əliyevin nüfuzu və BTQ layihəsinin iqtisadi
potensialı o layihəni gündəmdən çıxardı. BTQ dəmir yolu ilkin mərhələdə ildə 1
milyon sərnişin və 6.5 milyon ton yük daşımaq gücünə sahibdir. Dəmir yolunun
ildə 3 milyon sərnişin və 20 milyon ton yük daşımaq potensialı var. BTQ
layihəsi Qərb istiqamətində Türkiyə ərazisindən Marmaray layihəsi vasitəsilə
Avrasiya tunelindən keçməklə Avropa Birliyi dəmir yolları şəbəkəsinə
inteqrasiya olunub. Şərqdə isə Xəzər dənizinin şərq limanları vasitəsilə Çinə
qədər uzanacaq. Hazırda Qazaxıstanın Aktau limanının yük aşırma gücü ildə 19.5
milyon tona qədər çatıb. Ələtdə inşa olunan Bakı Beynəlxalq Ticarət Dəniz Limanının
da ilkin mərhələdə yükaşırma gücü 10 milyon ton ətrafındadır. Hazırda
Türkiyə-Gürcüstan-Azərbaycan arasında xarici ticarətin həcmi 4.2 mlrd
dollardır. İlkin hesablamalara görə, BTQ dəmir yolunun işə düşməsi ilə hər üç
ölkə arasındakı ticarətin həcmi 10 mlrd dollara çatacaq”.
T.Mirkişili
bildirib ki, layihənin tam işə düşməsi ilə Azərbaycanın yüklərin tranzitindən
əldə edəcəyi gəlir 1 milyard dollardan çox olacaq: "Bununla yanaşı,
Azərbaycanın iştirakçısı olduğu digər mühüm bir beynəlxalq dəmir yolu layihəsinin
bu yaxınlarda işə düşməsi planlaşdırılır. Bu, Şimal-Cənub beynəlxalq dəmir yolu
layihəsidir ki, bu layihənin də BTQ dəmir yolu ilə inteqrasiyası Azərbaycan
üçün əlavə böyük iqtisadi fayda yaradacaq. Layihə həm də Azərbaycan
ixracatçıları üçün yeni bazarlara daha sürətli və ucuz xərclərlə çıxmaq imkanı
yaradacaq ki, bu da ölkənin ixrac siyasətinin güclənməsinə böyük təkan verəcək”.
Milli Məclisin İqtisadi siyasət, sənaye və sahibkarlıq komitəsinin
üzvü Aydın Hüseynov da hesab edir ki, BTQ dəmir yolu
tarixi və strateji əhəmiyyətli qlobal layihədir. Onun sözlərinə görə, bu proses
bir daha Azərbaycan Prezidenti İlham Əliyevin müstəqil siyasət yürütdüyünü
sübuta yetirir: "Bu layihənin reallaşmasını istəməyən qüvvələr var idi. Bu
layihədə Azərbaycan təkcə tranzit ölkə kimi deyil, aparıcı dövlət rolunu
oynayacaq. Layihə Avropa ilə Asiyanı birləşdirən coğrafi məkanda yerləşən
Azərbaycanın qeyri-neft sektorunun inkişafına da töhfələr verəcək. Mən inanıram
ki, Azərbaycan dövlətinin maraqlarına xidmət edən bütün layihələr bundan sonra
da reallaşdırılacaq. Çünki, vaxtilə BTQ-nin reallaşdırılmasına da maneələr var
idi. Ancaq bütün çətinliklərə rəğmən, sözügedən layihə həyata keçirildi. Bu,
Prezident İlham Əliyevin siyasi iradəsi nəticəsində baş tutub”.
Rufik İSMAYILOV