Sənət adamlarının yeni rəhbərlikdən gözləntiləri var
Rasim Balayev: "Buna bir əncam çəkilməlidir”
Faiq Sücəddinov: "Yeni nazir müavinin təyin edilməsi bizləri
sevindirdi”
İyulun 20-də prezident İlham Əliyevin imzaladığı sərəncamıyla Anar Kərimov
Mədəniyyət nazirinin birinci müavini təyin edildi. Dövlət başçısının digər
sərəncamı ilə Mədəniyyət nazirinin vəzifələrini müvəqqəti icra etmək
səlahiyyəti də ona həvalə edildi. Bu təyinatdan sonra mədəniyyət adamları,
incəsənət nümayəndələri bu sahədə dəyişikliklər və islahatlar gözləyir. Biz də
tanınmış sənət adamlarının bu istiqamətdəki fikirlərini öyrəndik.
Xalq artisti Rasim Balayev bildirdi ki,
yeni nəslin formalaşması və fərd olaraq yetişməsi üçün kitab, kino, musiqi,
teatr və televiziya böyük rol oynayır. Bunun üçün də Mədəniyyət Nazirliyi müəyyən
layihələr həyata keçirməlidir: "Əgər bu sadaladıqlarım diqqətdən, nəzarətdən
kənar qalsa, yetişən nəsil fərqli əqidə ilə böyüyəcək. Mədəniyyət sahəsində bir
çox qüsurlarımız var. Bir koordinasiya mərkəzi qurulmalı, ona lisenziya
verməlidirlər ki, hər müğənni, hər mahnı, hər film birbaşa efirdə nümayiş
olunmasın. Müəyyən sərhədlər qoyulsun ki, bu musiqini efirdə nümayiş etdirmək
mümkündür, yoxsa yox. Bu gün efirdə nümayiş olunan mahnıları ifa edənlər
kiminsə həyətində, toyda, uşaq məclislərində oxuya bilərlər, onlara bir söz deyən
yoxdur. Amma bayağı mahnıları çıxıb efirdə səsləndirmək faciədir. Belə olmaz,
buna bir əncam çəkilməlidir. Nəsə etmək lazımdır”.
Xalq artisti son illər yeni operalarımızın, simfonik musiqilərimizin
yazılmamasından şikayətləndi: "Efirlərimiz ucuz, bayağı, keyfiyyətsiz
musiqilərlə doludur. Uşaq məclisində edilən söhbətlər, bazar adamları hamısı
efirdədir. Azərbaycan musiqisini bərbad hala salırlar. Özü də onlara efir boyu
elə tərif vururlar ki, elə bilirsən Azərbaycan musiqisinin banisi bunlardır. Bu
gün Azərbaycan tamaşaçısı Yusif Eyvazovu tanımır. Amma "Üç badam-bir qoz”
mahnısı oxuyanlar hər gün efirdədirlər. Bu kanaldan çıxıb, o biri kanala
gedirlər. Bilirəm, televiziyaların ixtiyarı Mədəniyyət Nazirliyində deyil, amma
bunlara hansısa formada nəzarət olunmalıdır. Biz cəhənnəm, bizdən keçib artıq,
amma yeni nəsil yazıqdır. Bu gün bizdə niyə keyfiyyətli filmlər çəkilmir? Necə
olur, əvvəl çəkə bilirdilər, indi yox? Belə məsələləri araşdırmaq lazımdır. Bu
işi bacaran da, bacarmayan da müxtəlif yollarla mədəniyyət sahəsində çalışır. Çoxu
da sənətə tanışlıqla gəlir. Yaradıcılıqda tanışlıq məsələsi olmamalıdır. İnsan
bir işi ya bacarır, ya da bacarmır. Küçədən keçənin əlinə kamera vermək olmaz. 50
ildir kino sənətində çalışıram. Bir neçə dəfə mənə rejissorluq təklif edilsə də,
bacarmadığımı demişəm. Çəkə bilən də, bilməyən də ucuz mövzularla reytinq
qazanır. Tamaşaçıların zövqünü korlayıblar. Mədəniyyət Nazirliyi bu işdə
diqqətli olmalıdır. Deyirik ki, keyfiyyətli, dünyaya çıxarılacaq filmlər
çəkilmir. Nazirlik film üçün büdcə ayırır, amma işi iş bilənə həvalə etmirlər”.
R.Balayev bugünkü tamaşaçısının ciddi verilişlərə, filmlərə baxmaq
istəmədiyini də vurğuladı: "Bizim nəsildən keçdi, gənc nəsli korlayırsınız? Olmaz
belə. Mən səviyyəli kinolar izləyib, kitablar oxumuşam, dəyərli musiqiləri
dinləmişəm və bunlar bir fərd kimi yetişməyimdə müstəsna rol oynayıb. Bu gün
gənclərin formalaşması üçün mədəni mühit
yoxdur. Mənim yeni təyin olunacaq nazirə yazığım gəlir. Bu qədər problemi necə
tənzimləyəcək, bilmirəm. Sanki hər şeyi pozub yenidən başlamaq lazımdır. Gələnə
Allahdan səbir və uğur diləyirəm. Çətin bir vəziyyətdəyik. Mən bir sənət adamı
yox, tamaşaçı kimi istəyirəm bu sadaladıqlarım sahmana salınsın. Efirdə
sanballı, sözükeçərli, dünyagörmüş şəxsləri görmək, onların fikirlərini eşitmək
istəyirəm”.
Xalq artisti, tanınmış
bəstəkar Faiq Sücəddinov musiqi sahəsində də islahatlara ehtiyac olduğunu
vurğuladı: "Yeni nazir müavinin təyin edilməsi bizləri sevindirdi. Yeni nazir
təyin edildikdə ondan bir neçə xahişim olacaq. Azərbaycan musiqinin qədim
tarixi var. Bu musiqi nə dünən, nə də ondan əvvəlki gün meydana gəlməyib.
Bunlara önəm verməli, festivallar, tanıtım xarakterli layihələr həyata
keçirilməlidir. Yeni mövsümdə konsert fəaliyyətinə önəm verilsə, məqsədəuyğun
olar. Bu gün bizim ifaçılarımızın konsert fəaliyyəti çox zəifdir. Dövlət konsertlərinin
təşkil edilməsi və gənc ifaçıların tamaşaçılara təqdim edilməsi vacibdir.
Bundan başqa, Azərbaycan musiqisi nəinki ölkə daxilində, eyni zamanda xaricdə
təbliğ olunmalıdır. Bu gün bizim bədnam qonşularımız musiqimizi mənimsəyib,
adlarına çıxarırlar. Xalq mahnılarının təbliği ilə bağlı ansamblların
hazırlanması və onların beynəlxalq arenada tanıdılması da diqqətdə olmalıdır. Son
zamanlar Musiqili Teatrda da yeni tamaşalar yoxdur, elə hər dəfə keçmiş
tamaşalar oynanılır”.
F.Sücəddinov yeni operettalarımızın azlıq təşkil etdiyini də bildirdi:
"Hazırda Opera və Balet Teatrında müasir əsər görə bilmirik. Yeni əsərlər, yeni
operettalar görmək istəyirik. Bundan başqa, bizdə həmişə keyfiyyətli və maraqlı
filmlər çəkilib. Bu gün isə o filmləri görə bilmirik. Yaxşı filmlərin çəkilməsi
üçün yaxşı ssenari və yaxşı rejissorlara ehtiyac var. Yaxşı kadrları bir araya gətirib
baxımlı və dünyaya çıxarılacaq filmlər çəkilməlidir. Biz müharibə şəraitində
yaşayırıq. Müharibə şəraitində yaşayan ölkəyə vətənpərvər gənclər lazımdır.
Bunun üçün bu ruhda mahnılar yazılmalı, filmlər çəkilməlidir. Hərbi hissələrə
gedib vətənin keşiyində dayanan əsgərlərimizi ruhlandırmaq üçün filmlər nümayiş
etdirilməli, onlarda ruh yüksəkliyi yaradılmalıdır”.
Bəstəkar hesab edir ki, ciddi musiqiyə daha çox diqqət ayrılmalı,
bununla xalqın musiqi zövqünün formalaşmasına yardım göstərilməlidir: "Mədəniyyət
Nazirliyi uzun müddətdir ki, simfonik, bəstəkar musiqilərinə müraciət etmir. Bölgələrimizdə
fəaliyyət göstərən musiqi məktəblərinin müəllimlərinin müasir simfonik musiqilərdən
xəbərləri yoxdur. Onlara xaricdə təhsil almış, yeni musiqilərdən anlayışı olan
peşəkarların ustad dərsləri keçirilsə, yaxşı olardı. Onların dünyagörüşünün
artmasına, musiqi zövqünün daha da inkişafına ehtiyac var. Paytaxtda fəaliyyət
göstərən musiqi məktəblərində tanınmış bəstəkarla həsr edilmiş musiqili həftələr
keçirmək mümkündür. Bu konsertlər silsiləli şəkildə keçirilsə, yetişən nəsil
bizim korifeyləri unutmaz. Ümumilikdə yeni nazirə və onun köməkçilərinə uğurlar
arzu edirəm”.
Kinorejissor Tahir
Tahiroviç də hesab edir ki, yeni Mədəniyyət
nazir üçün çətin olacaq: "Çünki illərlə itirilən məqamlar var. Yəqin bu ili
sakit yola verməklə mövsümü başa vurmaq olar. İndiki halda, kino sahəsində yeni
nəsə gözləmək də düzgün olmazdı. Həm də o şöbədə islahat aparmaq asan
olmayacaq. Kinomuz artıq islahatlardan bezib. Kinoda islahatın bir adı var,
idarəçilikdə dəyişiklik etmək lazımdı. Bir də ən əsası maliyyədir. O da bu aralar
müşkül olacaq. İşə yeni kadrları və sənətini sevənləri cəlb etsələr, yaxşı
olacaq”.
Xəyalə Rəis