Sağlamlıq və istirahət vəd edən turizm
Turizmin müxtəlif növləri var və zamanla yeniləri də
yaranır. Amma hər zaman əksər insanları maraqlandıran turizm istiqamətləri də
var ki, onlardan biri də çimərlik turizmidir. Çünki bu turizm növü həm istirahət
vəd edir, həm də sağlamlıq...
Ötən ildən başlayaraq ölkəmizə turist axınının
çoxalması bu istiqamətdə daha çox işlər görülməsinin vacibliyini ortaya qoydu.
Dənizə çıxışı olan ölkə kimi bu potensialdan bəhrələnməklə daha çox gəlir əldə
edə bilərik. Və artıq Prezident İlham Əliyev"Azərbaycan Respublikasında çimərlik turizminin
inkişafına dair 2017–2020-ci illər üçün Tədbirlər Planı”nın təsdiq edilməsi
haqqında sərəncam imzalayıb. Tədbirlər Planının icrasının təşkilində əlaqələndirici
orqanMədəniyyət və Turizm Nazirliyimüəyyən edilib.
Bəs Tədbirlər Planında nələr yer alıb? 4 il ərzində
hansı işlərin görülməsi planlaşdırılır? Bu istiqamətdə görülən işlər hansı ölkələrdən
turist cəlb etməyə imkan verəcək?
"Sənəd çimərlik turizminə
kompleks yanaşmağa imkan verəcək”
Azərbaycan
Turizm və Menecment Universitetinin rektor əvəziEldar Aslanov "Kaspi”yə açıqlamasında dedi ki, çimərlik
turizmi ölkəmizdə ənənəvi turizm növlərindən biridir. Təsdiq olunan sənəd bu
sahənin inkişafına kompleks yanaşma ortaya qoymuş olur: "Çimərlik turizmi ənənəsi
bizdə sovet
dövründən formalaşıb. Xüsusilə 70-80-ci illərdə Xəzər dənizinin qərb sahillərində
böyük turizm infrastrukturunun qurulması ilə bağlı böyük bir plan da
hazırlanmışdı. O planın mühüm tərkib hissələrindən biri də Siyəzəndən Yalamaya,
Rusiya sərhəddinə qədər olan hissədə çimərlik turizm kompleksinin yaradılması
idi. Qismət bu günəymüş. Bu sənəd çimərlik turizminə kompleks yanaşmağa imkan
verəcək”.
E.Aslanovun sözlərinə görə, Planda qeyd olunan tədbirlər
icra olunarsa, çimərlik turizminin ayrıca bir istiqamət olaraq inkişafının
şahidi olacağıq: "Sənədlə tanış olanda da görürük ki, ortada həm qanunvericilik
bazasının təkmilləşdirilməsi, həm çimərlik infrastrukturunun yaradılması, həm də
çimərlik turizmini həyata keçirən operatorların, özəl sahibkarların fəliyyətinə
dəstək, onların özünüidarəetmə qurumu olan assosiasiyanın yaradılması, ətraf
mühitin qorunması ilə bağlı xüsusilə mövsüm vaxtı tullantıların idarə olunması,
təhlükəsizlik tədbirləri, bu sahədəki marketinq işləri və s. məsələləri özündə əsk
etdirən bitkin bir iş planı var. Böyük ümid bəsləyirəm ki, icraçı və tövsiyə
olunan qurumların qeyd olunmuş tədbirləri həyata keçirmələriylə Xəzər dənizinə bağlı
çimərlik turizm potensialımızı turizmin ayrıca bir xətti kimi inkişaf etdirə
bilərik. Bu, turizmlə bağlı Yol Xəritəsində qeyd olunan mühüm məqamlardan
biridir”.
"Həm cənuba doğru Xəzərin Lənkəran-Astara, Şirvan Milli
Qoruğu istiqamətində gedəndə Ələt-Salyan xətti üzrə, həm Bakı-Abşeron
yarımadasında Sumqayıtdan Zığ şossesinə qədər olan hissədə, həm də Şimal sahil
sularında çimərlik turizmi infrastrukturunun müasir dövrün tələblərinə uyğun
yaradılması çox vacibdir. Ümid edirəm ki, hələlik "mavi bayraq”larsız vəziyyətdə
olan çimərlik turizmi kompleksimiz bu Tədbirlər Planı sayəsində inkişaf edib,
lazımi səviyyəyə çatacaq” – deyə E.Aslanov qeyd etdi.
"Sərəncam Xəzərsahili regionlarımızla məhdudlaşmır”
Mədəniyyət
və Turizm Nazirliyinin İnformasiya və ictimaiyyətlə əlaqələr şöbəsinin müdiri Vüqar
Şıxməmmədov bildirdi ki, bu sərəncam Xəzərsahili regionlarımızla məhdudlaşmır: "Ölkə
başçısının imzaladığı sərəncam 4 ili əhatə edir. Bu müddət ərzində ölkəmizdə çimərlik turizminin imkanlarının
inkişaf etdirilməsi üçün ölkə başçısı tərəfindən müvafiq tapşırıqlar verilib.
Azərbaycanda həm Bakı və Abşeron yarımadasında, həm də Xəzər dənizi sahilində
olan regionlarda çimərlik turizminin daha da inkişaf etdirilməsi üçün geniş
imkanlar mövcuddur. Amma bu sərəncam yalnız Xəzər dənizi sahilləri ilə məhdudlaşmır,
ölkə ərazisində olan müxtəlif göllər, çaylar və insanların istirahəti üçün
imkanlar olan su anbarlarını da əhatə edir. Mədəniyyət və Turizm Nazirliyi aidiyyatı
dövlət qurumları ilə birgə müxtəlif fəaliyyət istiqamətlərini müəyyənləşdirir. Məqsəd
müvafiq standartlara uyğun, ekoloji cəhətdən təmiz çimərlik imkanlarının həm
ölkə vətəndaşlarına, həm də xarici turistlərə təqdim olunmasından ibarətdir”.
Çimərlik turizminin mövsümü
uzadılır
V.Şıxməmmədovun sözlərinə görə, ötən ildən artmağa
başlayan turist axınının bu il daha çox olacağı proqnozlaşdırılır. Bütün
bunları nəzərə alaraq, Azərbaycanda çimərlik turizminin onlara həm standartlara
uyğun təqdim olunması, həm də mövsümünün günlərinin artırılması işi də
aparılacaq: "Azrbaycanda çimərlik turizmi günləri hava şəraitindən asılı olaraq
az müəyyənləşdirilir. Təxminən iyul-avqust aylarında insanlar bu turizm növündən
istifadə edirlər. Amma artıq normalara uyğun çimərlik turizmi infrastrukturu
yaradılarsa, iyunun sonundan sentyabrın əvvəllərinə qədər həm Azərbaycan vətəndaşları,
həm də turistlər bu imkanlardan istifadə edə bilərlər. Onu da nəzərə alaq ki,
xüsusilə şimaldan gələn turistlər bu aylarda çimərlik turizm növündən istifadə
etməkdəə maraqlıdırlar”.
Şöbə müdiri dedi ki, nazirlik ötən ilin iyun ayında ilk
pilot layihə olaraq Novxanı çimərliyində müvafiq icra hakimiyyəti orqanları ilə
birlikdə nümunəvi çimərlik modelini təqdim edib. O qeyd etdi ki, digər ərazilərdə
də eyni formadan istifadə edərək bu turizm növünün inkişafına nail olmaq
mümkündür.
"Dəniz kənarında aşağı büdcəli
otellərin olması vacibdir”
"Luna
Travel” turizm agentliyinin direktoru, hüquqşünasRəhman Quliyev bildirdi ki, turistlər istirahət edəcəkləri yeri seçərkən çimərlik məsələsinə
xüsusi diqqət edirlər: "Rus turistlər Antalyaya əsasən dənizə görə gedirlər.
Afrika ölkələrində olanda müşahidə etdim ki, Avropa vətəndaşları 2-3 ulduzlu
oteldə qalmağa üstünlük verirlər. Söhbət zamanı dedilər ki, bizə otel, yemək
lazım deyil. Bizim şirkətə müraciət edənlərə əsasən deyim ki, azərbaycanlılar
turist kimi gedəndə otel, yeməklə daha çox maraqlanırlar. Amma istirahət yemək
yox, dəniz qırağında D vitamini, Günəşdən qida almaqdır. Dəniz bizdə var deyə,
adi gəlir, alışmışıq. Amma Rusiya kimi ölkələrdə həkimlər reseptə dənizdə,
qumda olmağı yazırlar. Bu bizim infrastrukturdur, niyə inkişaf etdirməyək? Çox
gözəl də qumumuz var. Xəzərin havası astma xəstəliyinin dərmanıdır. Dənizin
duzluluğu yüksək səviyyədədir”.
R.Quliyev bildirdi
ki, çimərlik turizminə insanları cəlb etmək üçün dəniz kənarında 5 ulduzlularla
yanaşı, aşağı büdcəli otellərin olması da lazımdır. 2-3 ulduzlu otellər dəniz kənarından
çıxarılmamalı, onların sayının daha da çox olmasına şərait yaradılmalıdır: "Gələn
turistə heç də 5 ulduzlu otel lazım deyil, onlar yeməyə gəlmirlər. Aşağı büdcəli
insanların qala biləcəyi otellərin inşa olunması vacibdir. Antalyada dəniz
qırağında bütün kateqoriyaya aid otellər var. Dəniz kənarından 2 ulduzlu oteli
çıxarıb, yerində 5 ulduzlu otel tikməyin mənası yoxdur. Antalyada Belek bölgəsində
az ulduzlu otel qalmayıb, hamısı 5 ulduzludur. Amma əvvəl hamı orda istirahət
edirdi, indi ora çox adam girə bilmir. Azərbaycanı da o səviyyəyə gətirmək
olmaz. Bizə hazırda kütləvi turist axınının olması lazımdır. Ona görə elə təşkil
etməliyik ki, turistlər qaçmasınlar. 2-3 ulduzlu otellərin çox olması lazımdır.
Hətta pulsuz çimərliklər də olsun. Pulsuz olmasa belə, cüzi ödənişli olsun”.
R.Quliyev onu da qeyd etdi ki, çimərlik turizminin
inkişafı üçün təkcə biristiqamətli iş görmək düzgün yanaşma olmaz: "Sərəncamdakı
tapşırıqlara əsasən, bütün sahilboyu çimərliklərdə təmizlənmə işləri gedəcək,
200 metr ara məsafəsi məsələsinə nəzarət olacaq, qum olmayan yerlərdə süni
qumluqlar yaradılacaq və s. işlər görüləcək. Biz bunlarla yanaşı, turizmə aid hər
bir şeyi diqqətdə saxlamalıyıq. Hərtərəfli iş görülsə, bu turizm növü də
inkişaf edəcək”.
Yaxın 5 ildə populyar turizm
məkanına çevrilmək hədəfi...
Azərbaycan
Turizm və Menecment Universitetinin Turizm və qonaqpərvərlik fakültəsinin
dekanıRəhman Səfərov deyir ki, Azərbaycanın hədəfi yaxın 5 ildə dünya ölkələri
arasında populyar turizm məkanına çevrilməkdir: "Son bir neçə ildə turizm
sektorunun inkişafı ilə bağlı ölkə başçısı bir çox sərəncam və fərmanlar
imzalayıb. Ən son sərəncam isə çimərlik turizmi ilə bağlı oldu. Çimərlik
turizmi deyəndə, ilk növbədə Xəzər dənizinin Azərbaycana aid hissəsində həm çimərlik,
həm də dəniz turizmi nəzərdə tutulur. Çimərlik turizminin gücləndirilməsi həm də
yaxın gələcəkdə kruiz gəmi və yaxta turlarının (xüsusilə kiçikhəcmli yaxtalar)
təşkili cəhətdən əhəmiyyətli olacaq. Düzdür, Bakıda bu var, amma dənizətrafı
digər rayonlarda da təşkil ediləcək. Cənub və şimal zonasının hərəsində bir
yaxta və kruiz gəmi limanının olması zəruridir. Sərəncamdan irəli gələn
addımlar Azərbaycanda turizm sektorunun bir çox istiqamətdə inkişafını nəzərdə
tutur”.
Aygün Asimqızı