Sahib Məmmədov: “Miqrant biznesi” Avropanın təhlükəsizliyini təhdid edir
"İnsanların bədbəxtliyi üzərində xoşbəxtlik qurmaq istəyən beynəlxalq
təşkilatların fəaliyyəti araşdırılmalıdır”
Almaniya polisi ölkənin
Nidersaksen, Şlezviq-Holşteyn, Bremen, Şimali Reyn Vestfaliya, Bradenburq və
Reynland-Pfalts əyalətlərində 38-dən çox ev və iş yerlərində yoxlama aparıb, "miqrant
alveri” ilə məşğul olan azərbaycanlılardan ibarət dəstəni saxlayıb. Yayılan
məlumatlara görə, bu şəbəkəyə daxil olan 7 nəfər həbs edilib. Həbs edilənlər
Almaniyada "miqrant alveri” ilə məşğul olmaqda, o cümlədən 3-10 min avro arası
ödəmə qarşılığında ən azı 20 nəfəri qaçaq yollarla Almaniyaya aparmaqda şübhəli
bilinirlər. Saxlanılan şəxslər barəsində yerli federal məhkəmələr tərəfindən 6
ay müddətinə həbs qətimkan tədbiri seçilib. Sözügedən şəxslərin Almaniyadan
Azərbaycana göndərilməsi ehtimalı, bununla bağlı hüquqi prosedur və digər
məsələlərlə bağlı "Kaspi” qəzetinin suallarını hüquqşünas Sahib Məmmədovcavablandırır.
-
"Miqrant alveri” ilə məşğul olmaqda ittiham edilən azərbaycanlı mühacirlərin
Almaniya polisi tərəfindən saxlanılması medianın əsas gündəminə çevrilib. Mövzu
ilə bağlı sizin də mövqeyinizi bilmək istərdik.
- Son baş verənlər əvvəldən
hər kəsə bəlli olan məsələ idi. Sadəcə, Almaniya polisinin keçirdiyi əməliyyat
bunu yenidən gündəmə gətirdi. Avropadakı müəyyən şəxslərin Azərbaycandakı
siyasi qüvvələrlə, ictimai birlik təmsilçiləri ilə əlaqədə olduğunu dəfələrlə
qeyd etmişik. Onların qurduğu şəbəkə həm Avropada, həm də Azərbaycanda
fəaliyyət göstərməkdə idi. Bu şəbəkə xaricdəki vəkil büroları ilə də əlaqədə
idi. Onların əsas fəaliyyəti yalançı siyasi qaçqın statusunun alınması
biznesidir. Miqrant biznesinin dünyada 10 milyardlarla dollar həcmində
dövriyyəsi var. Lazım gələndə onlar ölkələrdə süni şəkildə vəziyyəti pisləşdirə
bilirlər. Beynəlxalq status daşıyan bəzi qeyri-hökumət təşkilatları da bu
şəbəkədə təmsil olunurlar. Həmin QHT-lər vasitəsilə müxtəlif ölkələr daxilində
süni etiraz aksiyaları təşkil edilir, həmin dövlətlərin beynəlxalq imicinə ləkə
vurulur, bir növ təzyiq göstərilir. Bu şəbəkənin Avropanın bir sıra miqrasiya
xidmətləri ilə də əlaqələri var. Bu şəbəkə böyük, mütəşəkkil, korrupsiyalaşmış
bir sxemdir. Əvvəldən bilirdik ki, bu şəbəkə vasitəsilə Azərbaycan üzərindən də
bir biznes qurulub. Heç bir zərurət olmadığı halda Azərbaycanda aksiyaların, kütləvi
tədbirlərin, razılaşdırılmamış piket və mitinqlərin keçirilməsinə cəhdlər də
bir sıra hallarda məhz bu məqsədlə edilirdi. Başlıca hədəf budur ki, insanlarla
polis arasında münaqişə yaşansın, polisin güc tətbiq etməsinə, hər hansı
sanksiyaya, həbslərə dair faktlar olsun, foto və video çəkilişlər hazırlansın.
Yaxud saxlanılan şəxslərin guya işgəncəyə məruz qalmasına, ac saxlanmasına,
onlara tibbi xidmət göstərilməməsinə dair "faktlar” ortaya çıxsın. Ardınca
bütün bu "faktlar” bəzi "media qurumlarında” tirajlanır, əsas hadisə kimi
gündəmdə saxlanılır. Ən nəhayət, bütün bu "faktlar”, həmçinin bu barədə
"medialarda” yer alan materiallar barədə hesabatlar hazırlanır, həmin o
şəbəkəyə ötürülürdü. Beləliklə də proses baş tuturdu. Hətta şəbəkənin
"taarifləri” barədə ictimai-siyasi proseslərə bələd olan hər kəsdə dəqiq
məlumat var idi. Misal üçün heç bir əziyyət çəkmədən, hansısa inzibati cəza
almadan, həbsdə yatmadan Avropaya getmək istəyənlər daha çox pul xərcləməli
idi. Vaxtilə Leyla Yunus kiməsə bu cür bir "full paket” – yəni arayış vermək
üçün 50 min, hansısa vətəndaşı "siyasi məhbus” siyahısına salmaq üçün isə 10
minlərlə avro alırdı. Bütün bu faktlara göz yuman, özünü bilməməzliyə vuran
Avropa idi. Lakin indi ayılırlar və görürlər ki, bu "miqrant biznesi” onların
milli təhlükəsizliyini təhdid edir. İndi Almaniya hökumətindən soruşan lazımdır
ki, sən bu insanlara hansı əsaslarla sığınacaq vermisən?
-
Bu şəbəkəyə qarşı mübarizə hansı formada aparılmalıdır?
- Saxta sənədlərin
verilməsindən tutmuş çirkli yollarla pul alanlara qədər hamısını ifşa etmək
gərəkdir. Amma bu, o qədər də asan iş deyil. Misal üçün, miqrasiya etmək
istəyən bir şəxs hansısa müxalifət partiyasına müraciət edir ki, təşkilata üzv
olmaq istəyirəm. Partiya hansısa maraq müqabilində o adamı üzv qəbul edir, ona
üzvlük vəsiqəsi, ardınca bir arayış verir. Həmin şəxs də bundan sonra
müxalifətçi kimi, guya Azərbaycanda təqib olunduğundan Avropada siyasi
sığınacaq alır. Partiyaya bu barədə irad tutanda deyəcək ki, mənim üzvüm idi,
arayış istədi, mən də verdim. Ancaq bu hərəkətin arxasında pul əməliyyatının
dayanıb-dayanmadığını açıqlamaq, isbat etmək o qədər də asan məsələ deyil.
Bununla belə, müvafiq dövlət orqanları bununla məşğul olmalıdır. Sərt cəza
tətbiqinin tərəfdarı olmasam da, konkret bu halda Almaniya hökuməti ilə
əməkdaşlığa gedilməli, şəbəkənin həm buradakı, həm oradakı üzvləri təkzibedilməz
faktlarla tapılıb ifşa edilməlidir. Əks halda bu, Avropanın, o cümlədən
Almaniyanın özünün ziyanınadır.
-
Almaniya polisi müxtəlif şəhərlərə keçirdiyi əməliyyatlar zamanı saxladığı
azərbaycanlıları ölkəmizə göndərə bilərmi? Bununla bağlı hüquqi prosedur
necədir?
- Bu, nəzəri baxımdan
mümkündür. Çünki, bizim Almaniya ilə qarşılıqlı hüquqi yardım haqqında
müqaviləmiz yoxdur. Həmin şəxslərin ölkəmizə ekstradisiyası ancaq dövlətlərin
könüllü razılığı ilə ola bilər. Ramil Səfərovun ölkəmizə ekstradisiyası buna
nümunə ola bilər. Macarıstanda baş vermiş hadisəyə görə, Macarıstan
Respublikası Azərbaycanla könüllü razılığa gələrək həmin şəxsi Azərbaycana
qaytardı. Belə bir praktikanın olması göstərir ki, bu yolla ekstradisiya mümkün
ola bilər. Digər halda isə bu, çətin olacaq. Düzdür, biz "Ekstradisiya haqqında”
Avropa Konvensiyasına tərəfdaş çıxmışıq. Amma burada fərqli məsələlər var. Biri
var şəxs cinayəti törədib ölkədən qaçmış olsun, biri də var cinayəti xarici
ölkədə törətsin. Düzdür, onların təqsirsizlik prezumpsiyası hüququ var. Biz
bunu pozmamalıyıq. Əgər cinayət xarici ölkədə törədilibsə, həmin şəxs və
şəxslərin ölkəmizə ekstradisiyası çətin məsələdir. Azərbaycanın İran, Rusiya
ilə belə bir müqaviləsi var ki, ölkəmizdə cinayət törədən Rusiya və İran
vətəndaşı cəzasının yerdə qalan hissəsini çəkməsi üçün öz ölkəsinə ekstradisiya
oluna bilər. Amma bizim konkret Almaniya ilə belə bir müqaviləmiz yoxdur. Ona
görə də, bu, mənə praktiki baxımdan çətin görünür. Əgər şəxs öz ölkəsində
cinayət törədib başqa ölkəyə qaçırsa, İnterpol vasitəsilə həmin cinayətkar öz
ölkəsinə tutularaq göndərilir. Olduğu xarici ölkədə cinayət törədənlərin
ölkəmizə ekstradisiyası isə çətin məsələdir. Əgər baş vermiş cinayət faktı
sübut olunarsa, onun Azərbaycanla bağlılığı ortaya çıxarsa, həmin şəxslərin
ölkəmizə göndərilməsi real görünə bilər.
-
"Miqrant alverçiləri” Almaniyada cəzalarını çəkdikdən sonra Azərbaycana
deportasiya oluna bilərmi?
- Qanuna görə, əcnəbi və
vətəndaşlığı olmayan şəxs cinayət məsuliyyətinə cəlb olunarkən cəzasını
çəkdikdən sonra ölkədən deportasiya olunur. Belə hallar bir çox ölkələr üçün
xarakterikdir. Mümkündür ki, Almaniyada saxta sənəd alveri ilə məşğul olan
şəxslər də təqsirli bilinsələr, cəzalarını çəkdikdən sonra deportasiya
olunsunlar. Cinayət əməlindən asılı olaraq onlara yüngül cəza və cərimə tətbiq
oluna bilər.
-
"Miqrant alveri” ilə məşğul olan şəxslərin müxtəlif yollarla Avropanın bir sıra
ölkələrinə apardığı, orada qalmasına şərait yaratdığı azərbaycanlılara qarşı da
hansısa tədbirlər görülə bilərmi?
- Bu şəxslərin bir çoxu
aldadılmış insanlardır. Aldadılmış, miqrant dəllallarının toruna düşmüş
şəxslərə qarşı xarici ölkələrdə tətbiq edilən ən böyük cəza öz ölkələrinə
deportasiya olunmalarıdır. Hesab edirəm ki, insanların bədbəxtliyi üzərində
xoşbəxtlik qurmaq istəyən beynəlxalq təşkilatlara qarşı cəza tətbiq edilməli,
onların fəaliyyəti araşdırılmalıdır. Görürsən ki, kimsə "Facebook”da status
yazıb paylaşıb ki, Avropaya gəldim, burada övladımın qayğılarını hökumət öz
üzərinə götürüb, pulsuz yaşayış yeri ilə təmin olundum və sair. Bir vətəndaş da
həmin "Facebook” istifadəçisinin "inbox”una mesaj yazır və sual edir ki, mən də
ora gəlmək istəyirəm, bunu necə edə bilərəm, hansı yollarla gəlim? Beləliklə,
biznes əlaqəsi yaranır, qarşı tərəf şərtləri açıqlayır. Bu cür reklam
vasitələrlə insanları cəlb edirlər. Onlara inanan bəzi adamlar burada kimdənsə
borc alır, evini satır, saxta sənədlər düzəltmək üçün 15-40 min avro, bəzən
daha çox pul xərcləyir gedir Avropaya. Lakin getdiyi ünvana çatanda ona vəd
olunan xoşbəxtliyin olmadığını görür. Aldadılan bu cür insanlar iki yol ayrıcında
qalırlar xaricdə. Hansısa erməni lobbisinin, yaxud başqa antiAzərbaycan
qüvvələrin yaratdığı mərkəzlər onlara xaricdə qalmağa köməklik göstərirlər.
Bunun müqabilində isə onları Azərbaycan əleyhinə təbliğata cəlb edirlər.
Beləliklə də xaricə xoşbəxt həyat dalınca gedən şəxs antiAzərbaycan dairələrin
toruna, ermənipərəst qüvvələrin təsirinə düşür, agentura şəbəkəsinin üzvünə
çevrilirlər. Xaricə gedən bəzi insanlar isə bu prosesə qoşulmaq istəmirlər. O
zaman onlar bir müddət yoxlama prosesi keçir, müvəqqəti olaraq orada
yaşayırlar. Yoxlama prosesi başa çatan kimi təkrar Azərbaycana göndərilirlər. Birdəfəlik
anlamaq lazımdır ki, hansısa siyasi problemə görə xarici ölkədə hansısa şəxsə
sığınacaq verilmir. Sığınacaq verilməsi üçün etnik, dini, siyasi, cinsəl
təqiblər, təzyiqlər əsas götürülür və bu adlarla gedib xaricdə sığınacaq
alırlar. Hər hansı təzyiqə, təqibə məruz qalmadan, saxta sənədlərlə buradan
xaricə gedənlərin əksəriyyəti həmin o ölkələrdəki vətəndaşların – vergi
ödəyicilərinin ayırdığı ianə pulu ilə dolanmağı, yaşamağı özlərinə rəva
bilirlər. Bu, təxminən küçədə oturub dilənməyə bərabər situasiyadır. Təəssüf
ki, bunu özlərinə rəva bilənlər var.
Rufik
İSMAYILOV