Saakaşvilinin partiyası parçalandı
Bir neçə gün bundan əvvəl Gürcüstanın
keçmiş prezidenti Mixail Saakaşvilinin lideri olduğu "Vahid Milli Hərəkat” Partiyasında
ikitirəlik olduğu, hətta parçalanacağı barədə proqnozlarımız özünü doğrultdu.
Bir vaxtlar hakimiyyət partiyası olan partiyanın aparıcı üzvləri onun
sıralarını tərk etdiklərini elan ediblər. Parlamentdə "Vahid Milli Hərəkat”ı
təmsil edən 27 deputatdan 21-nin üzvlükdən imtina etdiyi barədə xəbər ölkə
gündəmini tutub. 21 deputatın sıralarında məşhur simalar - David Bakradze,
Elene Xoştariya, Qiqa Bokeriya, Serqo Ratiani, Qeorqiy Tuquşi, Serqi Kapanadze,
Otar Kaxidze, İrakliy Abesadze, Akakiy Boboxidze, Qiqi Çereteli, Tenqiz Qunava,
Laşa Dameniya, Lela Keburiya, Mamuka Çikovani, Qeorqi Kandelaki və başqaları
var.
"Vahid Milli Hərəkat”da isə cəmi beş
deputat qalıb - Nika Meliya, Tinatin Bokuçava, Roman Qoçiridze, Salome
Samadaşvili və Koba Nakopya. Deputatlar yeni cəbhə yaradacaqlarını və bu
cəbhənin hakim partiyaya qarşı daha əzmlə mübarizə aparacağını bildiriblər. Keçmiş
spiker, ötən parlament seçkilərində partiyanın "siması” hesab edilən David
Bakradze hakim "Gürcü arzusu” Partiyasıyla mübarizənin yeni mərhələsinin
başladığını söyləyib. Paytaxt Tbilisinin keçmiş meri Gigi Ugulava isə
partiyanın dağılmasına görə onun başçısı M.Saakaşvilini günahlandırıb, M.Saakaşvilinin
daha liderlik edə bilmədiyini deyib: "Bunu söyləmək mənə ağırdır, amma M.Saakaşvili
artıq əvvəlki şəxs deyil, xalqı 2002-ci ildə birləşdirmiş Saakaşvili deyil...
Biz gələcəyə baxmalıyıq”. Özü də maraqlısı odur ki, partiyanı tərk edənlər
sırasında olan və bir vaxtlar İvanişvilinin tapşırığı ilə həbs edilən
Tbilisinin keçmiş meri Giqi Uqulava onu həbsə atandan deyil, Saakaşvilidən
narazılıq edir. Bu da təsadüfi deyil və sözsüz ki, tapşırığı məhz "boz
kardinal” kimi ad çıxaran İvanişvilidən alıb. Uqulava bildirib ki, o hər zaman
özünü Saakaşvilinin tərəfdarı sayıb, lakin hazırda onu effektiv lider hesab
etmir.
Digər bir maraqlı hal ondan ibarətdir
ki, yeni yaradılan təşkilatın üzvləri öz ilk brifinqlərini məhz İvanişvilinin
ofisində keçiriblər və tədbirlərini başdan ayağa kimi Saakaşvilinin tənqidi
üzərində qurublar.
Qərb nəşrləri baş verənləri
İvanişvilinin planının tərkib hissəsi kimi qələmə veriblər. Məsələn, "Eurasianet”saytı
partiyanın başı ilə bədəni arasında parçalanma yarandığını yazır. D.Bakradze
ayrılığın ondan ötrü də çox ağır olduğunu etiraf edib, partiyanı tərk edənlər
haqda danışarkən, "bu şəxslər Vahid Milli Hərəkatın əsas simalarıdır, onun
əsasını qoyanlar, onun onurğası rolunu oynayanlardır” - deyib.
Hazırda Ukraynada müxalif siyasətçi
kimi fəaliyyət göstərən M.Saakaşvili olanlarasosial şəbəkələr vasitəsilə
cavab verib. O, partiyasını tərk edənlərin çox şey itirdiyini və onlardan ötrü
darıxmayacaqlarını deyib. M.Saakaşvili partiyasının dağılmasında rəqibini,
hakim partiyanın təsisçisi Bidzina İvanişvilini günahlandırıb. Yanvarın 12-ni "Vahid
Milli Hərəkat” Partiyasının "azadlığa və xalqa qayıdış” günü adlandırıb. "Bizim
xalq İvanişvilinin mənim partiyadan qovulmaq planının reallaşmasına imkan
vermədi. Biz bu gün dönüklərin sayını gördük. Uqulavaya yazığım gəlir. Bu şəxs
mənim barəmdə oliqarx kimi danışır. Elə bil ki, mən onu həbsxanaya salmışam.
Bir insan kimi ona yazığım gəlir” – deyə o bildirib. Onlayn müzakirələrdə "Vahid
Mili Hərəkat” tərəfdarları da baş verənlərdə B.İvanişvilinin barmağı olduğunu
deyirlər. B.İvanişvili özü məsələyə münasibətini hələ ki bildirməyib. "Eurasianet”
saytı məsələ ilə bağlı ictimai rəyin haçalandığını qeyd edir. Bəziləri "Vahid
Milli Hərəkat”ı tərk edənlərin heç nəyə nail olmayacaqlarını, onların M.Saakaşvilinin
sayəsində yüksəklərə qalxdığını deyirlər. Bəzilərinin fikrincə, parçalanma
Gürcüstanda yeni siyasi başlanğıca səbəb olacaq.
Xatırladaq ki, M.Saakaşvili "Məxməri
inqilab”dan sonra - 2004-2013-cü illərdə Gürcüstanın prezidenti olub. 2012-ci
il parlament seçkilərində onun partiyası "Gürcü arzusu”na məğlub oldu. 2015-ci
ildə - M.Saakaşvili Ukraynanın Odessa vilayətinə qubernator təyin olunandan
sonra Gürcüstan vətəndaşlığından məhrum edildi. Hazırda o, Gürcüstanda
prezidentliyi dövründə törədilmiş bəzi cinayətlərdə ittiham olunur və həbs
təhlükəsi üzündən ölkəsinə gələ bilmir. 2016-cı ilin parlament seçkilərində
M.Saakaşvilinin partiyası hakim "Gürcü arzusu” Partiyasının əsas rəqibi idi,
amma müxalifət parlamentdə istədiyi qədər yer qazana bilmədi. Elə bu da
müxalifətçiləri liderlərindən narazı salan əsas səbəblərdəndir. Yanvarın 20-də "Vahid
Milli Hərəkat” Partiyasının konqresi keçirilməlidir.
Son məlumatlara görə, Saakaşvilinin
partiyasını tərk edənlər öz fəaliyyətlərini yeni təsis etdikləri "Avropa Gürcüstanı”
hərəkatında davam etdirəcəklərini bildiriblər.
Azər