Rusiyanın ermənipərəst siyasəti narazılıq doğurur
Azərbaycan müstəqil ölkə olaraq bütün dünya dövlətləri
ilə qarşılıqlı maraqlara söykənən, bərabərhüquqlu münasibətlərin tərəfdarıdır.
Xarici siyasətdəki bu yanaşma və tələb işğalçı Ermənistan istisna olmaqla bütün
ölkələrə, o cümlədən qonşularımıza qarşı da tətbiq edilməkdədir. Azərbaycan hətta
müxtəlif ölkələrlə hər hansı səviyyədə yeni münasibətlər qurarkən də mövcud
olduğu regiondakı vəziyyəti, həmçinin qonşularının maraqlarını da nəzərə alır,
qarşılıqlı əlaqələrə həssaslıqla yanaşır. Şimal qonşumuz Rusiyaya qarşı da bu həssaslıq
daim özünü göstərməkdədir. Beləki, Azərbaycan qütbləşmiş dünyada hər hansı
qütbün yanında birmənalı yer almır, regionu, ölkə ərazisini böyük güclərin
mübarizə poliqonuna çevirmir. Ölkəmiz hər hansı böyük dövlətin himayəsinə sığınaraq
öz qonşularına qarşı cəbhə açmır. Dünyada, beynəlxalq siyasi arenada məhz bu
cür tanınan, etibarlı tərəfdaş imici qazanan Azərbaycan digər dövlətlərdən, o
cümlədən qonşularından da məhz bu cür yanaşma gözləyir.
Lakin təəssüflər olsun ki, bəzi hallarda Azərbaycan
qeyri-adekvat, qeyri-obyektiv, ikili standartlara söykənən münasibətlə üzləşməli
olur. Bu günlərdə Rusiyadan Azərbaycana qarşı atılan və böyük narazılıq doğuran
addım da bu qəbildəndir. "Musavat.com”un məlumatına görə, aprelin 17-də Moskva
milyonçularının sevimli məkanlarından biri olan "Safis” restoranında Rusiya Erməniləri
İttifaqının prezidentiAra Abramyanın 60 illiyi qeyd olunub. Tədbirin
qonaqları arasında Rusiyanın xarici işlər naziri Sergey Lavrov və prezident
Vladimir Putinin mətbuat katibi Dmitri Peskov da olub. Yubileyə həmçinin
Liberal Demokrat Partiyasının lideri, "Kremlin danışan dilləri”ndən sayılan
Vladimir Jirinovski də qatılıb. Prezident Vladimir Putinin özü isə yubilyara təbrik
məktubu göndərib. Diqqət çəkən məqam bundan ibarətdir ki, yubiley tədbirində
Ermənistan prezidenti Serj Sarkisyan və Qarabağ separatçılarının lideri Bako
Saakyan da iştirak edib. Həmin tədbirdə Peskov Ara Abramyana nəhayət ki, rus
dilini öyrənməyi arzu edib. Jirinovski isə belə bir arzu ifadə edib ki, növbəti
yubileyədək Artsax bütün ölkələr tərəfindən tanınsın və ermənilər Araratı
(Türkiyə torpaqları - red.) geri qaytarsınlar.
Təbii olaraq bu hadisə Azərbaycanda çox böyük
narazılıqla qarşılanıb. İlk növbədə ona görə ki, Rusiya Azərbaycanın yaxın
qonşusu olmaqla bərabər, ATƏT-in Minsk qrupunun həmsədr dövlətidir. Minsk
qrupunun həmsədr dövlətləri ABŞ və Fransa kimi Rusiya da Ermənistan-Azərbaycan,
Dağlıq Qarabağ münaqişəsinin sülh yolu ilə həllinə bilavasitə məsuldur. Belə
bir məsuliyyəti, beynəlxalq missiyanı üzərinə götürən dövlət isə tərəfsizliyini
daim qoruyub saxlamalıdır. Ən önəmlisi isə həmsədr statusu daşıyan bir ölkə heç
bir dünya dövlətinin, beynəlxalq təşkilatın tanımadığı separatçı qurumun "rəhbəri”
ilə məsafə saxlamalı, onunla bir arada olmamalıdır. Bununla yanaşı, Azərbaycan
xalqlarımız arasındakı tarixi, mədəni, iqtisadi əlaqələri nəzərə alaraq, hər
zaman Rusiyadan ədalətli mövqe gözləyir. Ermənistan-Azərbaycan, Dağlıq Qarabağ
münaqişəsinin dinc yolla həllində də Rusiyanın xüsusi rol oynadığına inanır. Məhz
bu səbəbdən indiyə qədər Rusiyanın müəyyən dairələrinin birtərəfli mövqeyini
qabartmamağa çalışıb.
Ancaq son zamanlar baş verən proseslər, xüsusən də
Rusiya rəsmilərinin atdığı addımlar ortada olan inamı sarsıdır. Belə təəssürat
yaranır ki, rəsmi Moskva Dağlıq Qarabağ probleminin həllində birmənalı olaraq
işğalçı Ermənistanın mövqeyini dəstəkləmək xətti tutub. Son vaxtlar Moskvadan gələn
mesajlar da belə nəticə çıxarmaq üçün kifayət qədər əsas verir. Rusiya
diplomatlarının, hökumət təmsilçilərinin, münaqişənin həllinə birbaşa məsul
olan rusiyalı həmsədrin açıqlamalarına diqqət edəndə də bunu aydın şəkildə görmək
mümkündür. Əgər Peskov, Jirinovski, Lavrov dünyanın heç bir dövləti tərəfindən
tanınmamış, separatçı rejimin "rəhbəri” ilə bir masa arxasında oturur,
separatçı sağlıqlara badə qaldırırlarsa, buna başqa nə ad vermək olar? Çox
maraqlıdır, Azərbaycanı strateji tərəfdaş adlandırmaqdan yorulmayan Moskvanın
öz yüksək çinli rəsmilərini aşağı səviyyəli erməni tədbirinə yollamaqla, İrəvana
növbəti loyallıq nümunəsi göstərməklə nə əldə edir? Belə bir dövlətdən Dağlıq
Qarabağ münaqişəsi ilə bağlı ədalətli və qərəzsiz vasitəçilik ummağa dəyərmi?
Yaxşı olardı ki, Rusiya rəsmiləri bütün bu sualları yaxşı-yaxşı götür-qoy
etsinlər.
Əlbəttə ki, bütün bu baş verənlər ən azı acı təəssüf
doğurur. Çünki, Rusiya rəsmilərinin sözügedən hərəkətləri ilk növbədə Rusiyanın
beynəlxalq imicinə zərbə vurur, Azərbaycan xalqında da bu dövlətə qarşı
antipatiyanı artırır. Rusiya rəsmilərinin addımları həm də Azərbaycan və rus
xalqları arasında mövcud olan tarixi dostluq əlaqələrinin ruhuna zərbə vurur. Rəsmi
Moskva işğalçı tərəfə, Dağlıq Qarabağ separatçılarına bu cür münasibət sərgiləməklə
bütün mənalarda Azərbaycanı üzəcək hərəkətlərə yol verir. İnsanlarda qəti əminlik
yaranır ki, Rusiya heç zaman Azərbaycanın strateji tərəfdaşı sayıla bilməz. Bu
isə Azərbaycanı adekvat addımlar atmağa vadar edir.
Rufik
İSMAYILOV