“Rusiya Ermənistanı öz əlində saxlamaq istəyir”
2015-ci il
noyabrın 26-da imzalanmış razılaşmaya əsasən, Rusiya Ermənistana müasir
silahlar almaq üçün 200 milyon dollar kredit vermək öhdəliyi götürüb. Oktyabrın
12-də 100 milyon dollarlıq birinci kredit paketi təsdiq edilib. Müqaviləyə
əsasən, 100 milyonluq kredit Ermənistana 20 il müddətinə verilir. Bu müddətin 5
ilinin illik 3 faiz dərəcəsi ilə güzəştli olması nəzərdə tutulub. ATƏT-in Minsk
qrupunun həmsədr dövləti kimi Ermənistan-Azərbaycan, Dağlıq Qarabağ
münaqişəsinin sülh yolu ilə həllinə məsul olan Rusiyanın bu addımı mahiyyət
etibarilə işğalçı ölkənin silahlandırılmasına xidmət edir. Sözügedən məsələ ilə
bağlı "Kaspi”nin suallarını Demokratik
İslahatlar Partiyasının (DİP) sədri, millət vəkili Asim Mollazadəcavablandırır.
- Asim müəllim, Rusiyanın Ermənistana müasir silahlar almaq üçün 100
milyon dollar kredit verməsinə münasibətiniz necədir?
- Əsl reallıqda
Rusiya Ermənistana silah satmır. Çünki, Ermənistan silahlı qüvvələri Rusiya
silahlı qüvvələrinin tərkib hissəsidir. Rusiya Ermənistana 100 milyon dollarlıq
borc verir və bu borc adı ilə orada öz silahlı qüvvələrini silahlandırır. Bu
hal birinci dəfə deyil. Rusiya bu cür borclarla həm də Ermənistanın
iqtisadiyyatını özününküləşdirir. Rusiya Ermənistanı öz əlində saxlamaq
istəyir. Bu dəfə də işğalçı dövlətə verilən kredit müqabilində daha nələr isə
Kremlin nəzarətinə keçəcək. Bu gün heç kimə sirr deyil ki, Ermənistan
iqtisadiyyatı artıq Rusiyanın əlindədir. Məhz buna görə də Ermənistanın
nəqliyyatı, energetikası, ümumiyyətlə, hər bir sahəsi Rusiyaya məxsusdur.
Ermənistan artıq müstəqilliyini itirmiş bir ərazi, hərbi bazadır. Bu,
öz-özlüyündə bölgədə gərginliyi yaradan əsas səbəblərdən biridir. Bununla
yanaşı, Ermənistan dünya ictimaiyyətini aldatmaq istəyir ki, guya həm Avropa
ilə, həm də NATO ilə əməkdaşlıq edir. Əslində Ermənistan Rusiyanı bütün
beynəlxalq təşkilatlarda təmsil etməklə məşğuldur.
- İşğalçı dövlətin silahlandırılması danışıqlar prosesinə necə təsir
edir?
- Azərbaycanın
siyasəti nəticəsində Ermənistan dünyada beynəlxalq təzyiqlərlə üzləşir. Məhz bu
təzyiqlər nəticəsində işğalçı dövlət yenidən danışıqlar masasına qayıdıb. Lakin
bu, o demək deyil ki, danışıqların gedişində Ermənistan hansısa real addımlar
atacaq və ya buna hazırdır. Yaddan çıxarmaq lazım deyil ki, hazırda Ermənistan
siyasi hakimiyyətində olanlar hərbi cinayətlər törətmiş şəxslərdir. Onlar
beynəlxalq ictimaiyyəti aldatmaq üçün danışıqlara qayıtmaq adı altında
imitasiya ilə məşğuldurlar. Ermənistan elə hesab edir ki, münaqişə bu
vəziyyətdə qaldıqca, problemin həlli uzandıqca nəyəsə nail olacaqlar.
Azərbaycan isə haqlı olaraq prinsipiallıq nümayiş etdirir, münaqişənin yalnız
beynəlxalq hüquq, ərazi bütövlüyü çərçivəsində həllini tələb edir. Fikrimcə,
sülh danışıqlarının gedişində Rusiyanın qəti qərarı olmasa, problemin həllində
ciddi irəliləyiş əldə etmək qeyri-mümkündür.
- Ermənistana güzəştli şərtlərlə müasir silahlar satması Rusiyanın
ATƏT-in Minsk qrupundakı missiyası ilə nə dərəcədə uyğundur?
- Minsk qrupu
indiyə qədər münaqişənin həlli ilə bağlı hansısa böyük nəticə əldə etməyib. Bu
fakt özü onu göstərir ki, münaqişə tərəfi bəlkə də Ermənistanı gücləndirməklə
münaqişənin həllini yubadır.
- İşğalçı, təcavüzkar bir dövlətin silahlandırılması onun mövcud
olduğu regionun gələcəyinə necə təsir edə bilər?
- Çox mənfi.
Cənubi Qafqaz regionunda Ermənistanın hərbi baza kimi mövcudluğu beynəlxalq
əməkdaşlığın, inkişafın qarşısını alan ən ciddi maneədir.
- Avropa İttifaqı ilə Azərbaycan arasında münasibətlər yeni müstəviyə
qədəm qoyduğu bir ərəfədə Avropa Şurası Parlament Assambleyasında ölkəmizə
qarşı qərəzli qətnamələr qəbul olundu. Ardınca AŞPA baş katibi Turbyern Yaqlandın
Moskva səfəri barədə xəbər yayıldı. Azərbaycan Prezidentinin cenevrə səfəri
öncəsi isəErmənistanın silahlandırılması üçün 100 milyon dollarlıq birinci
kredit paketi təsdiq edildi. Bu hadisələr arasında hər hansı əlaqə varmı?
- Bilavasitə
əlaqə var. Söhbət ondan gedir ki, münaqişə sadəcə səngərdə gedən müharibədən
ibarət deyil. Bu gün Azərbaycana qarşı geniş miqyasda informasiya müharibəsi
aparılır. Bütün beynəlxalq təşkilatlarda Azərbaycanı diktatura,
qeyri-demokratik ölkə kimi göstərməyə çalışanların yalnız bir məqsədi var. Onlar
guya ki, insan hüquqlarının ölkəmizdə kobud şəkildə pozulduğunu nümayiş
etdirirlər. Bununla da Dağlıq Qarabağ ermənilərinin azərbaycanlılarla bir yerdə
yaşamasının qeyri-mümkünlüyünü sübut etməyə, regionun Ermənistana birləşdirilməsinin
vacibliyini əsaslandırmağa can atırlar. Bu oyunları və planları erməni
diasporu, lobbisi təşkil edir. Paralel olaraq da Azərbaycanla Qərbin, Avropa
ölkələrinin, ABŞ-ın münasibətlərini pozmağa çalışırlar. Sovet imperiyasını
yenidən bərpa etməyə çalışan qüvvələr də bütün qüvvələrini səfərbər edərək,
şəbəkələrini işə salaraq bütün bu proseslərdə öz məqsədlərini güdürlər. Əgər
biz Avropa parlamentində bu fəaliyyəti kimlərin daha fəal nümayiş etdirməsinə
fikir versək, görərik ki, baş verənlərin arxasında kimlər, hansı qüvvələr
dayanır. Qəribə bir vəziyyət yaranıb, Avropa Şurasının baş katibi Yaqland
Azərbaycana qarşı sanksiyalar tətbiq etməyə çalışır, bundan irəli gələrək
tamamilə qərəzli, qeyri-obyektiv qətnamələrin qəbulunu gerçəkləşdirir. Bu hadisədən
bir neçə gün sonra isə o, Moskvaya gələrək danışıqlar aparır, Rusiya üzərindəki
sanksiyaları qaldırmaq üçün fəaliyyət ortaya qoyur. Bu iki fakt bütövlükdə
proseslərin arxasında hansı qüvvələrin dayandığını bir daha nümayiş etdirir.
- Sentyabrın 22-də bir qrup Türkiyə vətəndaşı Azərbaycanın icazəsi
olmadan Ermənistan tərəfindən işğal altında saxlanılan Dağlıq Qarabağ ərazisinə
səfər edib, oradakı qondarma rejim təmsilçiləri ilə görüşüblər. Bu hadisə ilə
bağlı fikriniz nədən ibarətdir?
- Bunun ümumilikdə
Türkiyə dövlətinə, türk xalqına aidiyyəti yoxdur. Bu hadisə yenə də erməni
lobbisi, diasporu ilə sıx bağlı olan müvafiq qrupun işidir. Həmin qrup nəinki
Azərbaycana, ümumən türk dünyasına, o cümlədən Türkiyəyə qarşı siyasət yürüdən
qüvvələrin nümayəndələridir. Baş verənlərə bu kontekstdən yanaşmaq gərəkdir.
Çox təəssüflər olsun ki, lobbiçilik fəaliyyətini biz türklər bacarmırıq. Hətta
Türkiyənin daxilində də erməni lobbisi türk lobbisindən daha güclü işləyir.
-
Azərbaycan və Ermənistan prezidentlərin Cenevrədə növbəti görüşü keçirilib.
Bununla bağlı Azərbaycan və Ermənistan xarici işlər nazirlərinin, ATƏT-in Minsk
Qrupu həmsədrlərinin yaydığı birgə bəyanatda qeyd olunub ki, görüş konstruktiv
mühitdə keçib. Partiya sədri, siyasətçi kimi Sizin də bu görüş barədə
münasibətinizi bilmək istərdik.
- Azərbaycana sülh
lazımdır. Azərbaycan Prezidenti İlham Əliyev öz iradəsini nümayiş etdirərək,
problemin sülh yolu ilə, danışıqlar vasitəsilə, qan tökülmədən, ölkəmizin ərazi
bütövlüyü çərçivəsində həllinə nail olmağa çalışır. Rəsmi Bakı bununla bir daha
nümayiş etdirir ki, problemin beynəlxalq hüquq normaları çərçivəsində həlli
üçün istənilən danışıqlara hazırdır. Lakin keçmişdə baş verən proseslər onu
deməyə əsas verir ki, Ermənistan yenə də hansısa bəhanəyə və yaxud təxribata əl
ataraq bu danışıqlar prosesini pozmağa can ata bilər. Bu da danışıqları
nəticəsiz başa çatdırar.
Rufik
İSMAYILOV