Rus xalq mahnılarının əvəzsiz ifaçısı
Və ya həmişə özü olmağı bacaran Nadejda Babkina
Rusiyanın
Xalq artisti, professor Nadejda Babkinanın koronovirusa yoluxması xəbəri ölkə mətbuatının
gündəmindən düşmür. Amma həkimlər müğənninin virusa yoluxmasını inkar edərək,
ona ağır pnevmaniya (ikitərəfli sətəlcəm) diaqnozu qoyulduğunu bildirirlər.
Koma vəziyyətində olan 70 yaşlı müğənni hazırda reanimasiyada ciddi nəzarət
altındadır. Həkimlər "Babkinada qorxulu
heç nə yoxdur, sağalması üçün bütün lazımı prosedurlar həyata keçirilir” deyirlər.
"Nadejdanın vəziyyəti ciddidir, amma həkimlərin
dediyinə görə, stabildir. Ona süni ciyər aparatı qoşulub. Ümid edək ki, hər şey
yaxşı olacaq” deyə oğlu Daniil mətbuata açıqlayıb.
Əgər tamaşaçının gözündə heyrət varsa…
Nadejda
Babkina rus xalq mahnılarına məhdud mütəxəssis dairəsinin stereotip münasibətini
dəyişən müğənnidir. Onun bədii rəhbəri olduğu məşhur "Russkaya pesnya”
ansamblının səhnədə yaratdığı gözəlliklərə klip çəkməyə ehtiyac olmayıb. "Əgər
tamaşaçının gözündə heyrət varsa, demək, məqsədə çatmışıq” deyə müğənni hər
zaman bildirir.
Nadejda
Babkina 1950-ci ildə Volqa çayı sahillərində, Həştərxan vilayətinin kiçik
Bolxun kəndində doğulub. Atası Georgi İvanoviç ağ qvardiyada xidmət edən
kazaklardan idi. Anası Tamara Aleksandrovna isə inqilabaqədərki illərdə şəxsi
manifakturaya malik olan varlı ailəsindən idi. Evlərində tez-tez qonaqlar
yığışır, şən maskaradlar təşkil edir, qarmonun sədası altında şən mahnılar
oxuyurdular. Volqa sahillərinin gözəl mənzərəsi, kəndlərinin yaşıl meşəsi,
insanlarının səmimiyyəti qızın yaddaşına elə yazılmışdı ki, Babkina sonralar da
oraları məhəbbətlə xatırlayırdı.
Nadeşda
uşaqlıqda nadinc idi, gecələr o qədər qışqırardı ki, anası "deyəsən səsini itiləyir”
deyərək şikayətlənərdi. 12 yaşı olanda dostları ilə birlikdə atasının motosikletini
qaçırtmışdı. Buna görə bir ay ev dustağı oldu. Müğənnilik arzusu isə nə qədər qəribə
də olsa, qızcığazda 4 yaşı olanda yaranmağa başladı. Baxmayaraq ki, valideynləri
qəti olaraq bu peşəyə qarşı idilər, ancaq qız inadından dönmədi. Ata-anası onu
həkim, mühəndis və ya müəllim kimi görmək istəyirdi. Nadejdanın oxuduğu kənd məktəbində
müxtəlif millətlərin – rus, belarus, çeçen, inquş, kazakların uşaqları
oxuyurdu.
Artıq
1-ci sinifdə oxuyanda Nadejda bütün zalı müəllim və şagirdlərlə doldurub xalq
mahnıları ifa edir və hamını heyrətləndirməyi bacarırdı. Anası qızı ilə qürur
duysa da, onu musiqi məktəbinə yazdırmağa tələsmirdi. Qardaşı Valerinin isə bəxti
gətirdi. Onu 5 yaşı olanda musiqi məktəbinə yazdırdılar. Tezliklə evdə pianino
və gitara görünəndə Valeri bacısını alətlərdə müşaiyət edən ilk musiqiçi oldu.
Məktəbdə isə Babkina bədii dərnəyə yazıldı. Ancaq musiqi təhsilini harda
alacağını bilmirdi. "Mən özümü hansısa dodaqları boyanmış, hündürdaban tuflidə,
qəşəng ipək paltar geyinmiş artist kimi təsəvvür edirdim” deyə müğənni sonralar
xatırlayırdı.
Bəxti
onda gətirdi ki, 8-ci sinifdə oxuyanda məktəbin uşaqlarını, musiqi istedadını
yoxlamaq üçün Həştərxana apardılar. Nadejda da onların arasında idi. Gənc müğənni,
ürəyi şiddətlə döyünərək vokal müəlliminin cavabını gözləyirdi. Müəllim qıza məsləhət
gördü ki, iki il də gözləyib səsini möhkəmləndirsin. Bundan sonra o qızı yenidən
dinləməyə razı oldu.
İki il
göz qırpımında keçdi. Valideynləri yenə də qızın seçimi ilə barışmaq istəmir, sənədlərini
tibb məktəbinə verməsini təkid edirdilər. Nadejda tibb məktəbində cəmi bir
smestr oxudu. Bundan sonra isə drijor işləyən qohumunun evinə yollandı və ondan
musiqi məktəbinə daxil olmasına kömək etməyi xahiş etdi. 1967-ci ildə Babkina
artıq musiqi məktəbinin birinci kurs tələbəsi idı.
Tələbəlik
illərində bəstəkar Anatoli Qladçenko ilə tanışlığı həyatında mühüm mərhələ
oldu. Onlar xalaq mahnılarını yenidən işləməklə geniş bir repertuar yaratmağa
nail oldular. Həmin mahnılar artıq Nadejdanın ifasında səslənməyə başladı. Əlbəttə,
populyarlıq birdən qazanılmadı. Ona qədər Lyudmila Zıkina, Olqa Voroneç, Yekaterina
Şavrina, Aleksandr Stralçenko xalq mahnılarına öz parlaq ifalarını gətirmişdilər.
İndi isə xalq mahnı mədəniyyətinin yeni tərzini dinləyicilərə təqdim etmək
lazım idi.
Nadejda
müntəzəm olaraq musiqi festivallarında iştirak edirdi. Hələ 10-cu sinifdə
oxuyanda xalq mahnıları janrında gənclər arasında Ümumrusiya müsabiqəsinin
qalibi olmuşdu. Daha sonra yaradıcılıq bioqrafiyası yerli kinoprokat idarəsində
davam etdi. O, kino seanslarından əvvəl musiqi kompozisiyalarını səsləndirirdi.
Tezliklə adamlar kinoya baxmaqdan daha çox onun mahnılarını dinləməyə gəlirdilər.
Nadejda
1985-ci ildə Ümumittifaq Kinematoqrafiya İnstitunun estrada rejissorluğu və
kütləvi tamaşalar fakültəsinə daxil oldu. "Russkaya pesnya” vokal ansamblı ilə əlaqələri
də bu institut vasitəsilə yarandı. Ansambl Nadejdaya müğənni kimi olmazın şöhrət
bəxş elədi. Gənc qız yeni yaranmış
kollektivin ilk tərkibinə bədii təhbər kimi daxil oldu və qastrol səfərlərinə
başladı. Ansamblda 6 qız vardı, sonra kollektivə üç kişi də qatıldı. Zavod və
fabriklərdə, kolxoz və savxozların əməkçi insanları qarşısında verilən konsertlər
böyük anşlaqla keçirdi. 1976-cı ildə Soçidə sovet mahnılarının Ümumrusiya
müsabiqəsində qalibiyyət isə kollektivin pərəstişkarlarının çoxalmasına səbəb
oldu. Artıq xalq mahnılarına yeni yanaşma üzdə idi. Ansambl ümumilikdə 100-dən
artıq xalq mahnısını yenidən işləyib təqdim etdi. Kollektivin ölkə boyunca və
xaricdə tematik konsert proqramları, tamaşaları əsl şlyagerə çevrildi.
Babkina
1991-ci ildə Vitebskdə müğənni-solist kimi "Slavyan bazarı”nda uğurla debüt elədi.
Bundan sonra isə müğənninin solo konsertləri başladı. Babkinanın
repertuarındakı romanslar, xalq mahnıları, kazak nəğmələri və müasir bəstəkarların
mahnıları dinləyiciləri ovsunlayırdı.
Rusiyanın
Xalq artisti, sonradan Çeçen, Kareliya və İnquşetiya respublikalarının da Xalq artisti adına layiq görüldü.
Xoşbəxt görünən qadın
Nadejda indi
də gözəlliyini itirməyən qadındır. O, təkcə məşhurluğuna görə deyil, həm də
qadın gözəlliyinə görə heç zaman kişilərin diqqətindən kənarda olmayıb. Daim
onun İosif Kobzon, Lev Leşenko, Vladimir Vinokur və b. məşhur insanlarla macəralarının olmasından yazıblar. Ancaq
Babkina bütün ömrü boyu bircə dəfə rəsmi nikahda olub. 24 yaşında baraban
ifaçısı Vladimir Zasedatellə ailə qurub.
Tanışlıqlarının isə maraqlı tarixçəsi var. Onlar aeroportda tanış olublar.
Nadejda gənc ifaçının nəzakətli davranışını, Vladimir isə qızın səmimiliyini və
sadəlyini dəyərləndirdi. Təsadüfi tanışlıq yarım ildən sonra toyla və oğulları
Daniilin dünyaya gəlməsi ilə nəticələndi. Ancaq Nadejdanın aylarla qastrollarda
olması Vladimiri o qədər də qane etmirdi. Onda Babkina ümid elədi ki, uşaqların
doğulması ailəni xilas edə bilər. Beləcə,
nikahları 17 il sürdü, amma ailəni xoşbəxt adlandırmaq çətin idi. Vladimir
musiqiçi olsa da, həyat yoldaşının məşhurluğunu qısqanır və gizlində macəra
yaşayırdı. Nadejda bundan xəbər tutanda Vladimiri bağışlamadı, sakitcə
çemodanını yığıb oğlunu götürdü və ərini həmişəlik tərk etdi.
Babkina
ailə uğursuzluğunu unutmaq üçün başını daha çox işlə qatırdı. Ancaq sevgi yenə
də onun bir addımlığında idi. 2003-cü ildə, mahnı müsabiqəsində müğənni Yevgeni
Qorla tanışlığı yeni bir macəra yaşamasına səbəb oldu. Yevgeni Nadejdadan 30 il
cavan idi. Onların macərası publikanı şoka saldı. Üstəlik, Yevgeni alfons, öz
maraqlarını güdən adam kimi tanınırdı. Həqiqətən də o, Nadejdaya ehtirasdan
başqa heç nə verə bilmədi. Nə Qor, nə də Nadejda münasibətlərini rəsmiləşdirmək
haqqında düşündü. Ancaq cütlük münasibətlərini mətbuatdan gizlətmir, haqlarında
gəzən şaiyələrə əhəmiyyət vermirdilər. Yevgeni pasportda nikah möhürünü formal
hesab etdiyini deyirdi. Müğənni isə artıq çoxdan qeyri-adi hərəkətləri ilə pərəstişkarlarını
heyrətləndirməyə adət etmişdi. Nadejda etiraf edirdi ki, bu, onun üçün ilk
baxışdan məhəbbətdir. Biləndə ki, yeni sevgili ondan xeyli cavandır, onun
haqqında düşünməkdən vaz keçmək istəyib, ancaq hansısa bir hiss onu Yevgeniyə tərəf
çəkib. Nəticədə bütün publikanın diqqəti 55 yaşlı Babkina ilə 25 yaşlı
Yevgeninin romantik münasibətlərinə yönəlib. Hətta ilk illər Babkina özünü xoşbəxt
qadın hesab edirdi.
Müğənni
iş adamı Anton Sobyaninin şirkətində görünəndə yenə də haqqında yeni şaiyələr
dalğası yarandı. Ancaq verilişlərin birində müğənni efirə çıxaraq belə dedi:
"Yaradıcılıqdan başqa məni Antonla heç nə bağlamır. Mən onu, sadəcə, ansambla
kömək etməyə dəvət etmişəm”.
"Mən başa düşdüm ki, qadın üçün xoşbəxt görünmək
xoşbəxt olmaqdan daha asandır”- deyə Babkina müsahibələrinin birində söyləyib.
Amma
haqqında danışılan söz-söhbətlər və şaiyələr nə müğənninin sənətinə, nə də şəxsiyyətinə
kölgə saldı. O milyonlar üçün həmişəki kimi sevimli müğənni və ictimai
xadimdir…
Hanı onun gözəlliyi?
70 yaşlı
Nadejda Babkina fəal ictimai xadimdir.
"Vahid Rusiya” partiyasının üzvü, Moskva şəhər Dumasının deputatıdır.
Demək olar ki, bütün dövlət təltiflərinə layiq görülüb. Gərgin qrafikinə
baxmayaraq, o, həm "nənə” funksiyasını yerinə yetirir, həm də televiziya
proqramlarında pərəstişkarları ilə görüşməkdən zövq alır.
Müğənni,
makiyajsız fotolarını sosial şəbəkələrdə tez-tez yayıb "Babkinadan təkcə soyadı
qalıb. Hanı onun gözəlliyi?” deyərək irad bildirənlərə də soyuqqanlıqla
yanaşır. Hərçənd, bir neçə dəfə estetik əməliyyatlardan da istifadə edib.
Fiqurasını qoruyub saxlasa da, pərəstişkarları qarşısına heç vaxt çimərlik
paltarında çıxmayıb: "Bəlkə bunda mənim sənətimin, oxuduğum mahnılarda "xalq”
sözünün olması rol oynayıb. Daha çox xalq adət-ənənəsinə hörmətlə yanaşmağa
çalışmışam” - deyə bildirib. Müğənni deyir: ”Güzgüdə özümə baxıram - çox dəyişmişəm.
20 il bundan əvvəl başqa idim, ancaq
özüm idim. İndi dəyişmişəm – yenə də özüməm. Zahiri görkəmimə diqqət çəkməkdənsə,
vacib dəyişiklikləri həyatımda, yaradıcılığımda etməyə üstünlük vermişəm. Axı mən
sənətimlə xalqa xidmət etmişəm”.
İndi isə
müğənninin milyonlarla pərəstişkarı onun səhhəti ilə bağlı xəbərləri
narahatlıqla izləyir. Xalq "ansamblla bağlı çoxlu planlarımız var” deyən
sevimli ifaçılarının tezliklə ictimai həyata qayıtmasını arzulayır.
Rusiya mətbuatından
tərcümə etdi
Təranə Məhərrəmova