Roqozinin səfərinin pərdəarxası
Rusiya baş nazirinin müavini, prezident Vladimir
Putinin ən etibarlı adamlarından biri, ölkəsinin hərbi-sənaye kompleksinin
kuratoru Dmitri Roqozin Bakıya gəlişi İsrailin Baş naziri Benyamin Netanyahunun
Azərbaycana səfərindən cəmi 3 gün sonraya təsadüf edib. D.Roqozin dekabrın
16-da Bakıda keçirilən Azərbaycan-Rusiya Hökumətlərarası Komissiyasının növbəti
iclasında iştirak edib. Rusiyanın "Kommersant” qəzeti yazıb ki, D.Roqozin
Bakıya Azərbaycan-Rusiya Hökumətlərarası Komissiyasının iclası ərəfəsində gəlib
və səfərin gündəliyinə Azərbaycan rəhbərliyi ilə görüş, ən önəmlisi isə silah
ixracına dair danışıqlar daxildir. Mətbu orqanda bu mövzuda yer alan məqalədə
qeyd edilib ki, danışıqlarda məqsəd həmçinin "İsgəndər” operativ-taktiki raket
kompleksinin Ermənistanda yerləşdirilməsinə aydınlıq gətirmək, rəsmi Moskvanın
mövqeyini Azərbaycan tərəfinə izah etməkdir.
Azərbaycanlı ekspertlər də
D.Roqozinin Bakıya səfərinə münasibət bildirərkən İsrail baş nazirinin Azərbaycanda
səfərdə olmasına, prezidentlə təkbətək görüşdən sonra mətbuata birgə bəyanatla
çıxış etməsinə diqqət çəkirlər. Onların sözlərinə görə, Prezident İlham Əliyev
mətbuat qarşısında çıxış edərkən bildirib ki, müdafiə sənayesi sahəsində İsrail
və Azərbaycan bir neçə ildir fəal əməkdaşlıq edir. Prezident bəyan edib ki,
indiyədək Azərbaycan və İsrail şirkətləri tərəfindən müdafiə avadanlığının
alınması ilə bağlı imzalanmış müqavilələrin dəyəri 5 milyard dollara yaxındır və
bu müqavilələrin çox böyük hissəsi artıq həyata keçirilib.
Ekspertlər bu qənaətdədirlər
ki, Azərbaycan həm də Rusiyanın silah-sursat alıcısı olduğundan, Prezident İlham
Əliyevin son bəyanatı, açıqladığı rəqəmlər Rusiyada narahatlıq yaradıb.
Onların fikrincə, Qərbin sanksiyalar altında yaşayan, Ermənistana bağışladığı
"İsgəndər” raketlərinə görə rəsmi Bakının narazılığı ilə üzləşən Rusiya Azərbaycan
kimi böyük həcmdə silah-sursat alıcısını itirməmək üçün öz hərbi-sənaye
kompleksinin kuratorunu Bakıya danışıqlara göndərib.
Millət vəkili,
politoloq Elman Nəsirov mövzuya
dair "Kaspi”yə açıqlamasında bildirib ki, İsrail baş nazirinin Bakı səfərində
Prezident İlham Əliyevlə Benyamin Netanyahu arasında əsas müzakirə mövzusu məhz
hərbi-texniki əməkdaşlıq məsələsi olub. Azərbaycanın silah-sursat idxal etdiyi
ölkələr arasında İsrailin xüsusi yeri var. Deputatın sözlərinə görə,
B.Netanyahunun Bakı səfəri, burada səslənən bəyanatlardan sonra D.Roqozinin Azərbaycana
gəlişi həqiqətən də müəyyən suallar doğurmaqdadır: "Bir qisim insanlar düşünür
ki, bu, tam qanunauyğun bir prosesdir, burada qeyri-adi heç nə yoxdur, sırf təsadüfdür.
Lakin bəziləri fərqli mühakimələr yürüdürlər. Hesab edirəm ki, bu barədə birmənalı
fikir yürütmək olduqca çətindir. Amma danılmaz həqiqət bundan ibarətdir ki,
Roqozinin Bakıya gəlməsi başqa vaxta deyil, məhz İsrail baş nazirinin səfərindən
sonraya təsadüf edib. Bu, aktual məsələdir. Düşünürəm ki, Roqozinin Bakıda
keçirdiyi görüşlərdə Azərbaycan ilə Rusiya arasında hərbi-sənaye sahəsində əməkdaşlıq
məsələləri də diqqətdə saxlanılacaq”.
Politoloqun sözlərinə görə, artıq Rusiya mediası
yazır ki, Roqozinin səfərində Ermənistana verilən "İsgəndər” operativ taktiki
raketlərinin Azərbaycana da satılması gündəmə gətirilə bilər. Millət vəkili
deyib ki, əgər Rusiya belə bir addım atmazsa, Azərbaycan İsraildən oxşar
silahı, yaxud ondan da keyfiyyətlisini almaq məcburiyyətində qalacaq: "Ən azı
ona görə ki, bu silah artıq Ermənistana Rusiya tərəfindən verilib. Ona görə də
rəsmi Moskva dilemma qarşısında qalıb. Onlar fikirləşirlər ki, bu silahı Azərbaycana
versinlər, yoxsa verməsinlər. Təbii ki, verilməzsə Azərbaycanın silah alacağı
yeni ünvanlar bəllidir. Bu səbəbdən Roqozinin Bakı səfərində bu məsələ ətrafında
müzakirələrin aparılacağı şübhəsizdir. Bütün dünyaya, o cümlədən region dövlətlərinə,
Rusiyaya da yaxşı məlumdur ki, Azərbaycan hansı səbəbə görə ən müasir
silahlarla silahlanır. Bizim torpaqlarımız işğal altındadır. Dağlıq Qarabağ və
onun ətrafındakı 7 rayon da daxil olmaqla, ümumilikdə Azərbaycanın 20 faizi Ermənistan
silahlı qüvvələri tərəfindən işğal olunub, 1 milyondan artıq azərbaycanlı
qaçqın və məcburi köçkünə çevrilib, on minlərlə vətəndaşımız bu işğal nəticəsində
həlak olub. Çox təəssüf ki, 20 ildən artıq müddətdə davam edən sülh
danışıqları, Dağlıq Qarabağ probleminin dinc yolla həll olunması istiqamətində
atılan addımlar heç bir səmərə vermir. İşğalçı Ermənistan beynəlxalq hüququn
prinsiplərinə hörmətsiz yanaşır, işğalçılıq siyasətini davam etdirir, rəsmi İrəvan
sülh danışıqlarından boyun qaçırır. Belə olan halda, kim təminat verə bilər ki,
hərbi əməliyyatlar yenidən başlamayacaq? Xüsusən də bu ilin aprel döyüşlərindən
sonra bütün dünya görüb ki, Dağlıq Qarabağ problemi "dondurulmuş münaqişə”
deyil, burada istənilən vaxt gərginlik arta, müharibə yenidən başlaya bilər. Məhz
buna görə də Azərbaycanın silahlanması, ordusunu, maddi-texniki təminatını daha
da gücləndirməsi, ən müasir silahlar əldə etməsi məntiqidir. Ona görə də Netanyahunun
səfərində olduğu kimi Roqozin Bakıda olduğu müddətdə də bu kimi məsələlərin
gündəmdə saxlanılacaq”.
Siyasi şərhçi,
millət vəkili Sahib Alıyevisə qəzetimizə açıqlamasında D.Roqozinin Azərbaycan-Rusiya Hökumətlərarası Komissiyasının
Rusiya tərəfdən həmsədri olduğunu diqqətə çatdırıb. Qeyd edib ki, bu
komissiyanın dekabrın 16-da Bakıda keçirilən toplantısı bir-iki günün işi deyil
və əvvəlcədən planlaşdırılıb: "Azərbaycan xarici siyasətdə hər hansı addım atan
zaman bu, kompleks şəkildə müəyyənləşdirilir. Bu, hərbi-texniki əməkdaşlıq sahəsinə
də aiddir. Ona görə də Roqozinin Bakıya gəlməsini Netanyahunun Azərbaycan səfərinə
qarşılıq, cavab olaraq görmürəm. Azərbaycan xarici siyasətdə ən düzgün qərarları
qəbul etmək üçün bir sıra hallarda ən müxtəlif maraqları güdən tərəflərlə
ardıcıl görüşlər keçirir. Bu, rəsmi Bakıya daha geniş manevr imkanları yaradır.
Netanyahunun səfərinin ardınca Roqozinin Bakıya gəlməsinə də bu kontekstdə
yanaşıram. Bu səfərlərin təsadüfi olmaması da Azərbaycanın maraqlarına cavab
verən, planlarına uyğun gələn məsələdir”.
Rufik
İSMAYILOV