“Riskləri gözə almağı elə o vaxtdan öyrəndim”
Emin Quliyev:
"Biznesimi batırsam, depressiyaya düşmərəm, əksinə, yenidən cəhd edərəm”
Hələ tələbə olduğu dövrdə bir çox yerdə işləyərək
öz xərclərini qarşılayıb. Restoranlarda ofisiant, usta köməkçisi işlədiyi
vaxtlar da olub. Deyir ki, bu təcrübələrin öz işini qurmaqda ona böyük faydası
dəyib. Müsahibim "Welcome Travel ”
şirkətinin təsisçisi və rəhbəri Emin Quliyevdir.
E.Quliyev deyir ki, riskləri gözə almağı tələbə
vaxtı öyrənib: "2006-cı ildə Qafqaz Universitetinin (indiki Bakı Mühəndislik
Universiteti) politologiya fakültəsinə qəbul oldum. İxtisasım politologiya olsa
da, dərslərimiz əsasən iqtisadiyyatın idarə olunması ilə bağlı idi. Yəni 5 il
müddətində siyasətdən çox, biznes və iqtisadiyyat öyrəndik. Tələbə olduğum
dövrdə işləyib öz xərclərimi qarşılamağa çalışırdım. O dövrdə restoranlarda
ofisiant, usta köməkçisi işləyirdim, ustalara ev təmirində köməklik edirdim.
Bir müddət sonra kiçik ətriyyat biznesinə başladım. Hansı ki, o biznes indi də
davam edir. Mağazalara ətir sataraq öz yol pulumu qarşılamağa çalışırdım. Bu
təcrübələr sonrakı karyeramda çox işimə yaradı. Fərqli sahələrdə çalışmağım
mənə heç bir işdən qorxmamağı öyrətdi. Riskləri gözə almağı elə o vaxtdan
öyrəndim. Həmin vaxt başa düşdüm ki, biznes elə sahədir ki, uğurlu da ola
bilərəm, uğursuz da. Yəni uğursuzluqları normal qəbul edib təhlil etməyi
öyrəndim. Biznesimi batırsam, depressiyaya düşmərəm, əksinə, yenidən cəhd edərəm. Bu gün çəkinmədən addım
atıramsa, bunu həmin təcrübələrimə borcluyam".
- Dediniz ki,
tələbə vaxtı müəyyən işlərdə çalışıbsınız. Bəs öz biznesinizi qurmaq ideyası
necə yarandı?
- 2012-ci ildə əsgərlikdən gəldikdən sonra imtahan
verərək "Unibank”da mikro kredit
mütəxəssisi olaraq işə götürüldüm. 15-20 gün işlədikdən sonra başa düşdüm ki,
bu, mənim sahəm deyil. Daha sonra "Azərsun Holdinq”də işə başladım. Bir ay sonra
o işimdən də ayrıldım. Bir qədər sonra "Araz” supermarketlər şəbəkəsində
işləməyə başladım. Bu işimdən də öz istəyimlə ayrıldım. Başa düşürdüm ki,
işlədiyim yerlərdə yeni heç bir təcrübə qazanmıram, getdikcə passivləşirəm.
Eyni işi görsəm də, görməsəm də, ayın sonunda həmin maaşı alırdım. Bir dəfə
Gəncədə tələbə yoldaşımın toyunda iştirak edirdik. Toydan qayıtdıqdan sonra
qrup yoldaşım Ramin Rzayevlə bir az söhbət etdik, həmin vaxt o da turizm
sahəsinə yönəlmişdi. Mənə dedi ki, gəl şirkət yaradaq. O zaman o, "Baku
Holiday” turizm şirkətini qurdu. Xarici turlara o, daxili turlara isə mən
nəzarət edirdim. Şirkətin daxili turlardan qazandığı gəlirlər mənə aid idi.
2016-cı ilə qədər bir yerdə işlədik. Amma 2015-ci ildən artıq öz şirkətimi
qurmaq qərarına gəlmişdim. Bu da elə tələbə yoldaşımın dəstəyi ilə oldu. O,
mənə dedi ki, sabah nə olacağını heç kim bilmir. Ona görə də, ikinci bir şirkət
yaratmaq lazımdır. İşlərimiz ayrılsa da, dostluq münasibətlərimiz bu günə kimi
davam edir.
- İlk vaxtlar
hansı çətinlikləriniz oldu?
- Təbii ki, hazırlıqsız olaraq biznesə başlamaq
bəzi problemlərə gətirib çıxarırdı. Təzə başlayanda müştərilərlə müəyyən
anlaşılmazlıqlarımız olurdu. Qeyd etdiyim kimi, ilkin mərhələdə, sadəcə daxili
turları təşkil edirdik. Bunun üçün detallı müqaviləyə ehtiyac yox idi. Daxili
turlar üçün hazırlanan müqavilə şərtləri elə də çətin deyildi. Amma xarici
turların müqavilələrini hazırlayarkən müəyyən boşluqlar olurdu. Hansı ki,
sonradan müştəri ilə aramızda narazılıq yaranırdı. Amma indi xarici turlar üçün
müqavilələrimiz daha detallıdır. Viza, transfer, otel xərcləri ətraflı şəkildə
müqavilədə qeyd olunmazsa, sonradan problem yaradır. Bəzi vacib məqamları
şifahi şəkildə desən belə, müştəri deyəcək ki, mənim bundan xəbərim yox idi.
Gərək hər şey müqavilədə öz əksini tapsın. İki ilə yaxındır ki, bu problemləri
aradan qaldırmışıq.
- Müştərinin
etibarını qazanmaq və məmnuniyyətini təmin etmək üçün nələri vacib hesab edirsiniz?
- Təzə başlayanda tək işləyirdim. Bir müddət sonra
işçi götürə bildim. Ancaq daxili turlar təşkil edirdim. Bir neçə ay sonra
daxili turların müştəri bazası artmağa başladı. Müştərilərin inamını
qazandığıma görə, bilirdim ki, xarici turların təşkili problem olmayacaq.
Düzdür, o dövrdə daxili turdan daha çox gəlir qazanırdım. Amma indi daxili
turlardan gəlirlilik səviyyəsi aşağı düşüb. Bir müddət sonra xarici turların
reklamlarına başladıq. Amma reklam o qədər də müştəri bazası qazandırmadı.
Həmin vaxt başa düşdüm ki, mən özüm gəzdiyim ölkələrin reklamını etsəm, daha
yaxşı olar. Yəni heç vaxt İtaliyanı görməyən birinin sizə İtaliyanı tərifləməsi
heç bir effekt verməz. Amma özüm getdiyim ölkələrdə gəzməli yerlər, qiymətlər,
haqqında müştərilərə daha dolğun məlumat verə bilirdim. Bir müddət sonra bunun
həqiqətən də müştəri bazası qazandırdığını gördüm.
- Öz
biznesini qurmağın hansı müsbət və mənfi tərəfləri var?
- Öz işini qurmağın müsbət olduğu kimi, mənfi
tərəfləri də çoxdur. Biznes elə sahədir ki, səni öz ətrafından, dostlarından
təcrid edir. Xüsusilə, ilk vaxtlardan bütün diqqətini işə fokuslamasan, uğur
qazana bilməzsən. Yalnız müəyyən şeyləri yoluna qoyduqdan sonra özünə zaman
ayırmaq olur. Çünki zamanla artıq bütün işləri tək görmürsən. Bəzi işləri
komandaya həvalə edirsən. Bununla yanaşı, biznes sahəsi insanın əlaqələrini də
genişləndirir. Hansı ki, o əlaqələr sənin inkişaf etməyində böyük rol oynayır.
- Son illər
turizm sahəsinə böyük diqqət var. Hər kəs bu sahəyə yönəlmək istəyir. Rəqabətə
davam gətirmək çətin deyil ki?
- İndi bazarda dörd minə yaxın turizm şirkəti var.
Belə mühitdə rəqabət də güclüdür. Rəqiblərin çox olması o demək deyil ki, mən
bu işi bacarmayacağam. Əgər rəqabət varsa, sən də bu rəqabəti aparmalısan.
Bizdə rəqabət daha çox qiyməti aşağı salmaq kimi başa düşülür. Amma bazar
araşdırması etməklə, tələbi özün formalaşdıra bilirsən. Məsələn, biz daha çox
xaricdən qonaqların gətirilməsi ilə məşğuluq. Bazardakı bütün şirkətlər daxili
turlar təşkil edə bilər. Amma bu şirkətlərin hamısı Azərbaycana xaricdən turist
gətirməyi bacarmır. Hər adam riskə getmir. Bunun üçün dil biliyi də önəmli
məsələdir. Yəni rəqabətə davam gətirmək üçün öz fərqini ortaya qoymalısan.
- Gənclər
arasında öz işini qurmağa meylli olanların sayı kifayət qədər çoxdur. Onlara
nəyi tövsiyə edərdiniz?
- Bu gün öz biznesini qurmaq istəyənlərin sayı
çoxdur. Xüsusilə, turizm onlar üçün cəlbedici gəlir. İnsanlar elə bilir ki,
turizm şirkəti açanlar ölkələri gəzib kef edirlər. Amma bu, heç də belə deyil.
İlk növbədə bazarda qalmaq üçün müştərinin inamını qazanmaq lazımdır. Həmçinin,
təkcə maddi qazancı düşünsən, uzun müddət bazarda qala bilməzsən. Bu gün şirkət
yaratmaq istəyib sabah qeydiyyatdan keçməklə iş bitməz. Biznesə başlamaq üçün
ən azı beş ay əvvəldən bəzi şeyləri götür-qoy etmək lazımdır. Araşdırma
aparmadan şirkət qursan, sonradan bir çox çətinliklərlə rastlaşırsan.
Görəcəyiniz işin biznes planını əvvəlcədən hazır etməlisiniz. Tələsmək lazım
deyil, mən özüm də bu səhvləri etmişəm. Bazardakı rəqibləri yaxşı araşdırmaq
lazımdır. Öz fərqini ortaya qoymalısan ki, diqqət çəkməyi bacarasan. Fərqli heç
bir şey təklif etmirsənsə, müştərilərin marağını qazana bilməyəcəksən. Bunun
üçün isə yaxşı bazar araşdırması və biznes planı olmalıdır.
- Gələcək
planlarınız haqda da soruşmaq istərdik?
- Gələcək planlarım sırf işimlə bağlıdır. Əsas
hədəfim gördüyüm işin keyfiyyətini artırmaqdır. Xaricdən ölkəmizə turist
axınını gətirmək niyyətim var. Məqsədimiz Azərbaycanı bütün dünyada
tanıtmaqdır.
Şəbnəm
Mehdizadə