Regionda əməkdaşlığın və təhlükəsizliyin möhkəmlənməsinə böyük töhfə
Qlobal transmilli layihələrin təşəbbüskarı
və onların reallaşmasında lider mövqeyə malik Azərbaycan regionda ikitərəfli və
üçtərəfli əməkdaşlıq formatlarının əsas təşəbbüskarı, aparıcı fiqurudur. Təsadüfi
deyil ki, Azərbaycan-İran-Rusiya, Azərbaycan-İran-Türkiyə, Azərbaycan-Gürcüstan-Türkiyə
və digər formatlar məhz Azərbaycanın təşəbbüsü ilə yaranıb və olduqca səmərəli
fəaliyyət göstərir. Bu, Azərbaycanın regionda liderliyini, bölgədə təhlükəsizliyin
təmin edilməsi və siyasi-iqtisadi əlaqələrin inkişafında oynadığı rolu aydın şəkildə
nümayiş etdirir. Digər formatlar kimi Azərbaycan-İran-Rusiya üçtərəfli formatı
da regional sabitliyin, təhlükəsizliyin təmin edilməsi, bölgədə əməkdaşlıq
mühitinin stimullaşdırılması, ölkələr arasında iqtisadi-ticari əlaqələrin,
enerji və nəqliyyat sahəsində mövcud olan əməkdaşlığın daha da inkişaf etdirilməsi
və digər aktual məsələlərin həlli üçün mühüm əhəmiyyətə malikdir. Belə bir
formatda prezidentlər arasında ilk görüş 2016-cı il avqustun 8-də Azərbaycanın
paytaxtı Bakı şəhərində keçirilib. Srağagün isə növbəti belə bir görüş İran
İslam Respublikasının paytaxtı Tehran şəhərində baş tutub.
Ekspertlər hesab edirlər ki, Prezident
İlham Əliyevin təşəbbüskarı olduğu bu görüşlər çərçivəsində əldə olunmuş
razılaşmalar yaxın gələcəkdə region üçün olduqca pozitiv nəticələr vəd edir. Milli Məclisin deputatı, politoloq Elman Nəsirovbildirib ki, Azərbaycan, Rusiya və İran prezidentlərinin üçtərəfli görüşü
regionda əməkdaşlığın və təhlükəsizliyin möhkəmlənməsinə böyük töhfə verir.
Onun sözlərinə görə, Tehranda keçirilmiş budəfəki görüşün əhəmiyyəti onunla bağlıdır
ki, dövlət başçıları üçtərəfli əməkdaşlıq formatına sadiq qaldıqlarını nümayiş
etdiriblər: "Görüşdə bundan sonra da üçtərəfli formatda müxtəlif istiqamətlərdə,
o cümlədən enerji, təhlükəsizlik, beynəlxalq terrorizmə qarşı mübarizə,
iqtisadi, ticarət, humanitar və digər sahələrdə əməkdaşlığın daha da inkişafı
ilə bağlı konkret mövqelər ortaya qoyulub. Görüşün ən mühüm iqtisadi əhəmiyyəti
ondan ibarətdir ki, Şimal-Cənub nəqliyyat dəhlizi bu üç ölkə ilə xüsusilə
bağlıdır. Yüklər Pakistandan İrana, İrandan Azərbaycana, Azərbaycandan
Rusiyaya, Rusiyadan isə Avropaya daşınacaq. Şimal-Cənub nəqliyyat dəhlizinin ən
mühüm birləşdirici ölkələri Azərbaycan, Rusiya və İrandır. Azərbaycan
paytaxtında keçirilən ilk görüşdə bu üçtərəfli əməkdaşlığın əsası qoyulub və
İranda bu əməkdaşlıq daha da genişləndirilir”.
Deputat E.Nəsirov vurğulayıb ki,
Bakı-Tbilisi-Qars dəmir yolunun ardınca Şimal-Cənub nəqliyyat dəhlizi ilə bağlı
atılmış bu addım hər üç dövlətin Avropa ilə Asiya arasında nəqliyyat
daşımalarında rolunu və çəkisini daha da gücləndirir: "Hesab edirəm ki, bu
görüş təkcə üçtərəfli deyil, ikitərəfli əlaqələr baxımından da əhəmiyyətlidir.
Belə ki, Azərbaycan dövlət başçısının həm Rusiya, həm də İran prezidenti ilə
ikitərəfli görüşləri keçirilib və münasibətlərin inkişafı ilə bağlı müzakirələr
aparılıb, ortaq mövqelər ortaya qoyulub. Belə görüşlərin keçirilməsi regionda əməkdaşlığın
və təhlükəsizliyin möhkəmlənməsinə böyük töhfə verir”.
Millət
vəkili, politoloq Hikmət Məmmədov da Rusiya, İran, Azərbaycan prezidentlərinin üçtərəfli
formatda növbəti görüşünün olduqca mühüm əhəmiyyət daşıdığını söyləyib. O, qeyd
edib ki, ölkəmiz üçün ən önəmli məsələlərdən biri Azərbaycan, Rusiya və İran
prezidentlərinin üçtərəfli görüşündə Qarabağ probleminin həlli ilə bağlı fikir
mübadiləsinin aparılması, ən əsası isə bu məsələnin yekun bəyannamədə öz əksini
tapmasıdır: "Bəyannamədə deyilir ki, Dağlıq Qarabağ probleminin həll edilməmiş
qalması regional inteqrasiyaya maneədir. Bəyanatda problemin bu günə qədər beynəlxalq
səviyyədə qəbul edilmiş qərarlar əsasında həll edilməsi də vurğulanıb. Bu,
olduqca əhəmiyyətli detaldır. Çünki, BMT Təhlükəsizlik Şurasının problemin həlli
ilə bağlı qəbul etdiyi qətnamələrdə erməni işğalçı qoşunlarının Azərbaycan ərazisindən
çıxarılması nəzərdə tutulur. Bundan başqa, görüşdə çoxsaylı iqtisadi, nəqliyyat
kommunikasiya, ticarət, terrorizmlə mübarizə, Xəzər dənizində narkotik malların
daşınmasının qarşısının alınması, hər üç ölkənin enerji xətlərinin birləşdirilməsi
və paralel fəaliyyəti kimi olduqca mühüm məsələlər müzakirə edilib ki, bütün
bunlar tərəflərə böyük iqtisadi və siyasi dividentlər vəd edir. Hesab edirəm
ki, tərəflər arasında belə görüşləri vacib edən çoxsaylı səbəblər var:
"Birincisi, bu tipli görüşlərdə hər üç ölkənin milli maraqlarına uyğun olan məsələlərin
müzakirə və eyni zamanda koordinasiya edilməsidir ki, bu, olduqca vacib məqamdır.
İkincisi, hazırda beynəlxalq münasibətlər sistemində baş verən mürəkkəb
siyasi-iqtisadi proseslər regionumuza ciddi şəkildə təsir göstərir. Belə təsirlərdən
qorunmağın ən effektiv yolu birgə fəaliyyətdir. Qlobal təsirlərdən və təhdidlərdən,
bir ölkənin təkbaşına qorunması, indiki şəraitdə olduqca çətindir”.
Rufik İSMAYILOV