“Qorqud atadan günümüzə aşıqlıq ənənəsi” - Fotolar
Bakı Dövlət
Universitetində Yunus Əmrə İnstitutunun təşkilatçılığı ilə "Qorqud atadan
günümüzə aşıqlıq ənənəsi” adlı simpozium keçirilib. BDU-nun rektoru, akademik
Abel Məhərrəmov tədbir iştirakçılarını və türkdilli ölkələrdən gəlmiş
çoxsaylı qonaqları salamlayıb, bu tədbirin
Bakı Dövlət Universitetində keçirilməsini yüksək qiymətləndirib. Bildirib ki,
təxminən 100 il bundan əvvəl-1919-cu ildə yaradılmış Bakı Dövlət
Universitetinin ilk 2 fakültəsindən biri Tarix-filologiya adlanıb, ötən dövr
ərzində xalqımızın milli-mənəvi dəyərləri, o cümlədən qardaş türk xalqları ilə
bağlı müştərək tariximiz, mədəniyyətimiz dərindən araşdırılıb. Bu irsin ən
dəyərli nümunələrindən biri olan "Dədə Qorqud” abidəsinin zəngin tarixini, onun
mifologiyadan
yazıya, eposdan kitaba
çevrilmək qüdrətini tədqiq etmək baxımından alimlərimiz çox böyük
işlər görüblər. Rektor onu da qeyd edib ki, ümummilli lider Heydər Əliyevin
təşəbbüsü ilə 1999-cu ildə "Kitabi-Dədə Qorqud" dastanının 1300
illik yubileyi beynəlxalq səviyyədə qeyd edilərkən BDU alimləri həmin tədbirlərdə aparıcı qüvvə kimi iştirak
ediblər. Bu gün BDU-da "Dədə Qorqud”
Elmi-tədqiqat laboratoriyası fəaliyyət göstərir. Burada dastanın bir
müqəddimə, on iki boydan ibarət olan Drezden nüsxəsi və bir müqəddimə, altı boydan ibarət Vatikan
nüsxələri geniş tədqiq olunur, kökləri mifoloji dünyagörüşünə gedib çıxan
dastandakı bəzi süjetlərin qədim Yunanıstanda yaranmış analoji süjetlərə qida
verməsi məsələsinə qədər çoxşaxəli tədqiqatlar aparılır. Rektorun
sözlərinə görə türkdilli xalqların, demək olar ki, hamısına aid edilən və hər
birinin də izi olan "Kitabi-Dədə Qorqud" dastanlarının daha çox
Azərbaycan əraziləri, toponimikası və bədii təfəkkürü ilə bağlılığı
tədqiqatçılar tərəfindən təbii hesab edilir.
Tədbirdə
Türkiyənin Azərbaycandakı fövqəladə və səlahiyyətli səfiri Erkan Özoral, millət
vəkili Hikmət Babaoğlu, Türkiyənin "Türk dili” qurumunun rəhbəri, professor
Mustafa S.Kaçalin, Bayburt Universitetinin rektor köməkçisi Süleyman Ciydem,
Qırğızıstan-Türkiyə Manas Universitetinin rektoru, professor Sebahattin Balcı,
Qazaxıstan Respublikası Qorqud Ata Elmi Araşdırmalar İnstitutunun müdiri
Şirinbek Koylibayev, AMEA-nın Folklor İnstitutunun direktoru Muxtar İmanov və
Yunus Əmrə İnstitutunun direktoru İbrahim Yıldırım çıxış ediblər. Qeyd edilib
ki, Dədə
Qorqud boylarının əsas mahiyyətini yurdun və xalqın qorunması, xeyir qüvvələri
təmsil edən qədim oğuzların yadelli işğalçılara – şər qüvvələrə qarşı
ölüm-dirim savaşı, öz əhəmiyyətini indi də itirməyən bir çox əxlaqi-didaktik
görüşlər təşkil edir.
Türkiyədən
27, Azərbaycandan 14, Qazaxıstandan 5, Qırğızıstan 4 və ümumilikdə 53
tədqiqatçı və müğənninin iştirak etdiyi simpozium bölmə iclasları ilə davam
edib. İclaslarda aşıq sənəti və ənənələrindən, ayrı-ayrı el sənətkarlarından
bəhs edən mövzular ətrafında müzakirələr aparılıb, mədəni tədbirlər keçirilib
və Dədə Qorqud bəstələri səsləndirilib.
Onu
da bildirək ki, simpozium çərçivəsində Bakı Dövlət Universiteti ilə Bayburt
Universiteti arasında əməkdaşlıq müqaviləsi imzalanıb.