Qış havasına keçdik, qaldı qış rejiminə keçmək
Qışı çağırılmamış qonaq da hesab etmək olar. Hələ gəlişinə xeyli vaxt qalsa
da, artıq hər kəs qış geyimlərinə keçib. Amma son günlərdə müşahidə etdiyimiz soyuq
geyimlə müdafiə olunacaq dərəcədə də deyil. Buna görə evlərin, ofislərin istiliklə
təmin olması vacibdir. Amma bir neçə gündür evlərə gələn təbii qazın verilişində
də zəifləmə müşahidə olunur.
Xanımların dili ilə desək, bir çaydan çay 1 saata qaynamır, günorta yeməyi
isə axşama hazır olur. Hər kəs də deyir ki, qış rejiminə 15 noyabrda keçildiyi üçün
qaz da həmin vaxta qədər zəif olacaq, mənzillərin istiliklə təminatına da o
vaxt başlanacaq. Bəs hava kəskin soyuduqda qış rejiminə tez keçmək mümkün
deyilmi?
"Azəriqaz” İstehsalat Birliyinin mətbuat
xidmətinin rəhbəriİbrahim Kərbalayev qəzetimizə açıqlamasında bildirdi
ki, qış rejimi qazın verilişində tətbiq olunmur, tələbat olduğu qədər də gündəlik
qazın verilişində də artım edilir: "Son günlər havanın qəfil
soyuması nəticəsində respublikanın bəzi yerlərindən daxil olan müraciətlər əsasında
məlum olub ki, bəzi ərazilərdə əhalinin təbii qaza tələbatı artdığı üçün
çatışmazlıqlar var. 15 və 16 oktyabr günləri arasında sistemə əlavə olaraq 1
milyon 193 min kubmetr qaz verilib. Bu da ondan irəli gəlir ki havaların
soyuduğu ilə əlaqədar əhalinin təbii qaza olan tələbatı artıb. Çatışmazlıqlar
olan ərazilərdən bizim qaynar xəttimizə daxil olan müraciətlər əsasında tənzimləmə
işləri aparılır. Əməkdaşlarımız yerlərdədirlər. Bu gün də o işlər tərəfimizdən
davam etdirilir. Qısa müddət ərzində çatışmazlıqlar aradan qaldırılacaq ki,
qarşıdan gələn soyuq-şaxtalı havalarda da qazın verilişində hər hansı məhdudiyyət
yaşanmasın.Əhalinin təbii
qaza olan tələbatı artdıqca, qazın verilişi də bir o qədər artır. 2 milyon
kubmetrə yaxın bir gün ərzində təbii qazın verilişində artım müşahidə olunması
o deməkdir ki, havaların qəfil soyuması nəticəsində təbii qaza tələbat artıb.
Qazın verilişindəki artım tələbatdan asılıdır. Nə qədər çox tələb edilsə, o qədər
də artım müşahidə olunacaq”.
İ.Kərbalayev deyir ki, "Azəriqaz” İstehsalat
Birliyi mövsümdə - 15 noyabr ərəfəsində yalnız qazanxanalara təbii qazın
açılmasını təmin edir: "Bu, qış-yay rejimi deyil. Yayda da mənzillərin qazla tələbatı
tərəfimizdən təmin edilir. Mənzillərin istiliyi ilə bağlı aidiyyəti qurum danışsa
daha yaxşı olar. Biz yalnız 15 noyabrda qazanxanalara qazın verilişini edirik. Noyabrın 15-i aidiyyəti
qurumlar tərəfindən mənzillərdə olan isitmə sistemlərinə istiliyin verilməsi təmin
olunur”.
"Azəristiliktəchizat" ASC-nin abonent və müştəri xidmətlərinin rəisi
Rafiq Əliyev isə Modern.az-a bildirib ki, mənzillərə istiliyin verilməsi noyabrın
15-dən etibarən reallaşacaq. O, ötən ilin payız-qış mövsümündə abonentlərin
istiliklə təchiz olunmasında yaranan problemlərin olmayacağına ümid etdiyini
bildirib: "Hazırda təmsil etdiyim qurumla "Azəriqaz” arasında olan borc məsələsinin
həll edilməsi istiqamətində işlər aparılır. Çalışacağıq ki, ötən ilki kimi
yubanma olmasın. Amma konkret söz deyə bilmirəm. Onu deyə bilərəm ki, noyabrın
15-dən etibarən "Azəristiliktəchizat”ın bütün qazanxanaları payız-qış mövsümünə
tam hazır olacaq”.
"Azəriqaz" İstehsalat Birliyinin (İB) İctimaiyyətlə əlaqələr şöbəsinin
rəisi İbrahim Kərbəlayev isə bildirib ki, "Azəristiliktəchizat" ASC sərf
etdiyi qaz üzrə təxminən 35-38% səviyyəsində ödəniş edir: "Respublikada 510
qazanxana mövcuddur ki, mövsüm başlayanda ilkin olaraq debitor borcu
olmayanlara mavi qaz verilməsi təmin olunacaq. Yerdə qalanlarla bağlı aidiyyəti
quruma dəfələrlə müraciət olunub. Biz gözləmə mövqeyindəyik”. İ.Kərbalayev
deyib ki, cari ilin 9 ayı ərzində "Azəristiliktəchizat" ASC-nin
"Azəriqaz" İstehsalat Birliyi qarşısında əlavə olaraq 8 mln. 416 min
manat həcmində debitor borcu yaranıb. Onun sözlərinə görə, "Azəriqaz” İB
payız-qış mövsümündə əhalinin fasiləsiz şəkildə təbii qazla təmin olunması üçün
bütün zəruri tədbirləri görüb: "Payız-qış mövsümü ilə əlaqədar respublika
üzrə 7 211 km
qaz xətti quraşdırılıb, 321
km qaz xətti əsaslı təmir olunub. Qəza hadisələri
istisna olmaqla əhali hətta qarlı-şaxtalı günlərdə də təbii qazla fasiləsiz, tələbata
uyğun şəkildə qazla təmin olunacaq. Bu məsələ qurum rəhbərliyinin birbaşa nəzarətinə
götürülüb".
Xatırladaq ki, 2015-2016-cı ilin payız-qış mövsümündə iki dövlət qurumu
arasında yaranan borc probleminə görə, paytaxtdakı mənzillərin istiliklə təchizatı
təxminən 1 aya yaxın gecikdirilmişdi.
Kommunal məsələlər üzrə ekspertNüsrət Qasımovun sözlərinə görə,
qış-yaya rejimi sovetdən
qalma bir miras, zərərli tendensiyadır: "Onda belə çıxır ki, noyabrın 15-i gəlməmiş
palto geyməyək, papaq qoymayaq? Bu tendensiya artıq köhnəlib. Hava soyuqdursa,
dərhal qış rejiminə keçmək lazımdır”.
N.Qasımov deyir
ki, havalar soyuyan kimi qış rejiminə keçməməyin bir çox mənfi təsirləri olur.
Bunları da nəzərə almaq lazımdır: "Qazın azlığı ondan irəli gəlir ki, istilik təmin
olunmayan evlərdə əhali qaz piltələri ilə evi isitməyə çalışır. Bu da şəbəkədə
təzyiqin aşağı düşməsinə səbəb olur. Digər tərəfdən, qazdan zəhərlənmə halları
artır. Çünki qazın yanma məhsulları zəhərlidir. Qaz piltələri yananda zəhər
yaşayış evinin divarlarına hopur, bu da insanların sağlamlığına ciddi ziyan
vurur. Bu tendensiya həm də elektrik şəbəkəsinə zərər vurmuş olur. Bütün
istilik verən kondisionerləri, işıqla işləyən istilik verən batareyaları işə
salırlar. Kabellər gücə düşür və yanğın hadisələri baş verir. Digər tərəfdən,
soyuqdan insanlar arasında müxtəlif epidemiyalar artır”.
N.Qasımov
bildirdi ki, "Azəriqaz” istənilən vaxt istənilən qədər qaz verə bilər. Bu şərtlə
ki, "Azəristiliktəchizat” ASC
onlara verilən qazın dəyərini ödəsin: "Azəristiliktəchizat”
isə Bakı Şəhər İcra Hakimiyyətindən asılıdır. BŞİH qış rejiminə keçməklə bağlı əmr
versə, "Azəriqaz” hazırdır. Amma "Azəristiliktəchizat”ın qazanxanaları hazır deyil.
Bunun da əziyyətini əhali çəkir. İnsanlar işlətdikləri istiliyin dəyərini ödəyirlərsə,
onlara niyə əziyyət verilir? Yaşlısı, xəstəsi, uşağı olan var”.
Aygün Asimqızı