QHT-lər layihələrini icra edə bilmirlər
Yüzlərlə QHT rəhbəri bankların göstərdiyi xidmətlərin
məhdudlaşdırılması ilə əlaqədar Prezident İlham Əliyevə müraciət ünvanlayıb. Son
günlər banklar Maliyyə Bazarlarına Nəzarət Palatasının məktubuna istinad
etməklə, qanunvericiliyə əsasən QHT-lərə göstərməli olduqları bank
xidmətlərinin əhatə dairəsini məhdudlaşdırıblar. Nəticədə ölkədə dövlət
tərəfindən maliyyələşdirilən yüzlərlə qeyri-hökumət təşkilatının ictimai
əhəmiyyətli layihələrinin icrasında qeyri-müəyyənliklər meydana gəlib.
Qeyd olunur ki, QHT-lər 15 min manatadək məbləğ çərçivəsində nağd
qaydada hesablaşmaların aparılmasını həyata keçirə bilmirlər. Hazırda Prezident
yanında Qeyri-Hökumət Təşkilatlarına Dövlət Dəstəyi Şurası tərəfindən keçirilən
müsabiqə nəticələrinə əsasən müxtəlif layihələrinin icrası ilə bağlı ayrılmış
maliyyə vəsaitləri QHT-lərin bank hesablarına köçürülsə də, bu vəsaitlərdən
istifadə praktiki olaraq mümkünsüz hal alıb.
Bu səbəbdən QHT-lər ictimai əhəmiyyətli layihələrinin həyata
keçirilməsi ilə bağlı yaranmış çətinliyin aradan qaldırılması və
qanunvericiliklə müəyyən edilmiş 15 min manatadək məbləğdə hesablaşmaların nağd
qaydada aparılmasının təmin olunmasına dair dövlət başçısından müvafiq göstəriş
verməsini xahiş ediblər.
Mövzu ilə bağlı "Kaspi” qəzetinə açıqlamasında Prezident yanında QHT-lərə Dövlət Dəstəyi Şurasının üzvü, Beynəlxalq
Münasibətlərin Araşdırılması Mərkəzinin (BMAM) sədri Rufiz Qonaqov bildirib
ki, Maliyyə Bazarlarına Nəzarət Palatası mövcud qanunvericiliyin bəzi
hissələrinin məhdudlaşdırılması ilə bağlı banklara tövsiyə xarakterli məktub
göndərib: "Həmin məktuba əsasən, hər bir vətəndaş cəmiyyəti institutuna Şura
tərəfindən ayrılan vəsaitin yalnız 5 min manatadək olan hissəsini nağd şəkildə
götürmək imkanı verilir. Qanunda isə göstərilib ki, nağd qaydada hesablaşma
aparılması mümkündür. Üzvü olduğum QHT-lərə Dövlət Dəstəyi Şurasının müsabiqəsindən
sonra qalib təşkilatların hesabına pul köçürmələri edilib. Lakin təəssüflər
olsun ki, qeyri-hökumət təşkilatları həmin vəsaiti çıxara bilmirlər. Nəticədə,
yüzlərlə çox vacib layihə kənarda qalıb və bu səbəbdən də qeyri-hökumət
təşkilatları prezidentə müraciət etdi”.
R.Qonaqov deyib ki, yeni qaydalar QHT-lərin fəaliyyətinə nəinki
çətinlik yaradıb, ümumilikdə təşkilatların işini iflic edib: "Əslində, qanuna
dəyişiklik edilərkən, çox güman, millət vəkilləri bunun təfərrüatına o qədər
varmayıblar. Çünki parlamentdə kifayət qədər qeyri-hökumət təşkilatı rəhbəri
olan deputatlarımız var. Qanunun tətbiqindən sonra artıq problemlər üzə çıxdı.
Belə ki, Şura tərəfindən qalib olan təşkilatların bank hesabına pul köçürüldü
və həmin vəsaiti almaq mümkün olmayanda qanuna belə bir düzəlişin olması məlum
oldu. Biz qanunundan kənar heç nə istəmirik. Çünki nağd hesablaşmaların
məhdudlaşmasını nəzərdə tutan qanunda göstərilib ki, 15 min manatadək nağd
şəkildə hesablaşma aparmaq olar. Amma təəssüf ki, QHT-lərə bu imkan verilmir. Ona
görə də biz Prezident İlham Əliyevə müraciət etdik”.
"İrəli” İctimai Birliyinin
sədri Mirhəsən Seyidov qeyd edib ki, Maliyyə Bazarlarına Nəzarət Palatası
indiyədək Milli Məclisdə bir neçə qanun layihəsi ilə çıxış edib: "Hazırlanmış
qanun layihələrinin mahiyyəti yaxşı səslənsə də, onu icra edə biləcək cəmiyyət hələlik
formalaşmayıb. Belə ki, təklif olunan qanun layihələrinin bir çoxu digər
qanunvericilik aktları ilə ziddiyyət təşkil edir. "Nağdsız hesablaşmalar
haqqında” Qanunun 3,4 və 3,5 -ci maddələrinin implementasiyasına dair Palata
tərəfindən 04/15-174 nömrəli verilən daxili qərarla banklar qanunun tələblərini
ciddi şəkildə pozur. Azərbaycanda fəaliyyət göstərən 3000-dən artıq QHT-nin fəaliyyəti
daxili qərarlar əsnasında sıxışdırılır və qanunun tələblərinin doğru icra
olunmaması səbəbi ilə onların həyata keçirməkdə olduqları layihələrə və
bilavasitə öhdəliklərinə ciddi problemlər yaradılır. Qanun layihəsinin icrasında
tələskənlik göstərən bəzi banklar Palatanın daxili qərarı ilə "Qeyri-hökumət
təşkilatları haqqında”, "Qrant haqqında” olan qanunlarının müddəalarını
pozmaqdadır. Azərbaycanda bilavasitə vətəndaş cəmiyyəti institutları, xüsusilə
gənclər təşkilatları bütün proseslərdə yaxından iştirak edib, dövlətimizin
maraqlarının qorunmasında, gənclərin inkişafında əvəzsiz və aparıcı rola malik
olublar”.
M.Seyidov əlavə edib ki, vətəndaş cəmiyyətinin, xüsusilə gənclərin
birbaşa inkişafına yönəlmiş layihələr üçün Azərbaycanda 2 donor təşkilat
mövcuddur: "Hər iki təşkilat Prezident İlham Əliyevin şəxsi təşəbbüsü ilə
yaradılıb və onun yanında fəaliyyət göstərən fondlardır. Ümumilikdə,
maliyyələşdirdikləri layihələrin məbləği il ərzində 6 milyon manatı keçməyən
hər iki fond işini tam şəffaf şəkildə həyata keçirir və zərurət yaradan
layihələrin maliyyələşdirilməsinə çalışır. Bu donor qurumları qeyri-hökumət
təşkilatlarının fəaliyyətini daha da stimullaşdırır. Amma görünən odur ki, qanunun
aliliyini nəzərə almayan və banklar üçün daxili qərar ünvanlayan şəxslər birbaşa
bu təşəbbüsə qarşı çıxır. Vətəndaş cəmiyyəti institutlarının işini əngələ
salmağa cəhd edir. Məlumat üçün qeyd edim ki, həyata keçirilən layihələrin əsas
xəttini Azərbaycançılıq məfkurəsi təşkil edir. Buna görə də, 200-dən çox qeyri-hökumət
təşkilatı adından Prezident İlham Əliyevə müraciət ünvanladıq. Həmin müraciətin
bir nümunəsi də Palataya göndərilib”.
M.Seyidovun fikrincə, Azərbaycanda fəaliyyət göstərən QHT-lərin qeyri-kommersiya
təşkilatı olduğunu, buna görə vergi ödəmələrindən azad edildiyini unudan palata
tərəfindən banklara verilən daxili tapşırıq nəticəsində layihələrin icrasında
çox ciddi gecikmələr və problemlər yaşanmaqdadır: "Bütün layihələr donor tərəfindən
müsabiqə qalibi elan edildikdən sonra dövlət qeydiyyatına alınır və
qeyri-hökumət təşkilatları Ədliyyə Nazirliyinin Qeydiyyat və Notariat Baş
İdarəsinin bildirişi əsasında banklarda əməliyyat edə bilir. Verilən qərar isə
bu bildirişləri artıq təsdiqedici sənəd statusundan salır”.
Bəxtiyar MƏMMƏDLİ