QHT-lər koronavirusla mübarizədə hansı dəstəyi verə bilərlər?
"Qeyri-hökumət təşkilatları bu çətin anda dövətin
yanında olmalı, vətəndaşla dövlət arasında körpü rolunu oynamalıdır”
Dünyada yayılan koronavirus pandemiyası təhlükəsi Azərbaycanda
da mövcuddur. Bu təhlükənin qarşısının alınması istiqamətində dövlət qurumları,
səhiyyə müəssisələri və digər əlaqədar qurumlar əlindən gələni edir. Hətta
Nazirlər Kabineti yanında yaradılmış Operativ Qərargah tərəfindən tətbiq edilən
karantin rejimi ilə əlaqədar olaraq vətəndaşların özünütəcrdi qaydalarına əməl
edilməsi, gigiyenanı qoruması və mütəmadi olaraq dezinfeksiya işlərinin
aparılması ilə bağlı mövcud qaydalar tətbiq edilib. Lakin çox təəssüflə bildirmək
lazımdır ki, sosial məsuliyyətsizlikdən irəli gələrək, bir sıra insanlar
qaydaları pozur və özü ilə yanaşı digərlərini də təhlükə ilə üz-üzə qoyur. Bu
baxımdan əhali arasında məlumatlandırma və təbliğat-təşviqat işinin gücləndirilməsi
üçün vətəndaş cəmiyyəti institutlarının rolu önə çıxmış olur. Bəs görəsən
qeyri-hökumət təşkilatları koronavirusla mübarizə işinə hansı dəstəyi verə bilərlər?
Mövzu ilə bağlı "Kaspi” qəzetinə açıqlamasında Prezident
yanında Qeyri-Hökumət Təşkilatlarına Dövlət Dəstəyi Şurasının üzvü, "Sağlam
İnkişaf və Maarifləndirmə” İctimai Birliyinin sədri Anar Xəlilovbildirdi
ki, bu gün başda cənab Prezident olmaqla Azərbaycan hökuməti koronovirus təhlükəsinin
qarşısının alınması istiqamətində bütün zəruri tədbirləri atır: "Hətta mən deyərdim
ki, bu dünyanın bir çox inkişaf etmiş ölkələrinə nümunə ola bilər. Bunu artıq tək
biz yox, dünyanın bir çox tanınmış mütəxəssisləri dilə gətirir. Bu gün Azərbaycan
vətəndaşının da əsas vəzifələrindən biri tələb olunan qaydalara əməl etməklə,
dövlətə bu işdə yardımçı olmaqdır. Əlbəttə ki, vətəndaşların məsuliyyətli
olmağı bizi bu bəladan tez bir zamanda xilas edəcək. Bu gün eyni zamanda vətəndaş
cəmiyyətinin də nümayəndələrinin çiyninə çox böyük məsuliyyət düşür.
Qeyri-hökumət təşkilatları bu çətin anda dövətin yanında olmalı, vətəndaşla
dövlət arasında körpü rolunu oynamalıdır. Xüsisilə də, əhali arasında maarifləndirmə
işlərinin aparılması, psixoloji yardım, sosial şəbəkələrdə müxtəlif
kampaniyalar, çağırışlar və s. edilməlidir. İnamla deyərdim ki, Azərbaycanın
qeyri-hökumət təşkilatları bu işin öhdəsindən uğurla, məsuliyyətlə gəlir.
Sosial şəbəkələrdən tutmuş, küçə və prospektlərə qədər bütün maarifləndirmə işləri
aparılır”.
A.Xəlilov qeyd etdi ki, QHT-lər dövlət başçısının təşəbbüsünə
qoşularaq yaradılmış fonda ianələr köçürür: "Xüsusilə, bu çətin günlərdə
Prezident yanında Qeyri-Hökumət Təşkilatlarına Dövlət Dəstəyi Şurasının fəaliyyətini
qeyd etmək istəyirəm. İlk günlərdən Şura bu istiqamətdə dövlətin apardığı işlərin
yanında olub və qeyri-hökumət təşkilatlarını bu istiqamətdə səfərbər edərək
geniş maarifləndirmə kampaniyasına start verib. "Real” TV ilə birgə "Evdə qal”
kampaniyası, Şura üzvlərinin və katibliyin ianə köçürməsi, Şuranın birinci
müsabiqəsinin qalibi olmuş ixtisaslı qeyri-hökumət təşkilatlarının layihələrinin
koronavirusa qarşı mübarizə istiqamətinə yönləndirilməsi qeyd etdiklərimə
misaldır. Vətəndaş cəmiyyəti institutları da təşəbbüsü böyük məmnunluqla qəbul
etdilər və artıq bu istiqamətdə fəaliyyətə başlayıblar. Hesab edirəm ki, Azərbaycan
QHT-ləri bu gün öz üzərlərinə düşən missiyanı ləyaqətlə və həvəslə yerinə
yetirir, dövlətin yanında olaraq onun qoyduğu tələblər əsasında əhali ilə sıx
maarifləndimrə işlər aparırlar. İnanıram ki, dövlətimizin bu bəla ilə apardığı
mübarizə metodları və vətəndaşlarımızın da məsuliyyətli davranması sayəsində
ölkəmiz bu təhlükədən qurtulacaq. Tanrı Azərbaycanımızı qorusun!”
"ELS” Müstəqil Araşdırmalar Mərkəzinin sədri İradə
Yaqubova bildirdi ki, rəhbərlik etdiyi təşkilat "Real” TV və
Prezident yanında Qeyri-Hökumət Təşkilatlarına Dövlət Dəstəyi Şurasının birgə həyata
keçirdiyi layihə qoşulub: "Ümumiyyətlə, əvvəldən qeyri-hökumət təşkilatlarının əsas
funksiyası maarifləndirmədir. Nəzərə alsaq ki, bizə karantin rejimi ilə bağlı
qadağalar şamildir. Əlbəttə ki, ilk növbədə həmin maarifləndirmə işləri sosial
şəbəkə üzərindən həyata keçirilir. Həm də ki, qohumlar, tanışlar, qonşuların
hamısı ilə sosial şəbəkə vasitəsilə əlaqə saxlayırıq. Onu da qeyd edim ki, hər
qeyri-hökumət təşkilatının özünün əhatə dairəsi var və orada müəyyən
informasiya mübadiləsi və maarifləndirmə işlərini aparmaq mümkündür. Odur ki,
ilk növbədə məqsədyönlü şəkildə dövlətin, ölkə rəhbərliyinin virusla mübarizəyə
həsr olunmuş tədbirlərinin əhaliyə izah olunmasına, yəni təbliğat-təşviqat kampaniyasına
və təşvişin yaranmaması üçün əhali arasında lazımi məlumatların yayılmasına dəstək
olmalıyıq”.
Jurnalistlərin Həmkarlar İttifaqının sədri (JuHİ) Müşfiq Ələsgərli bildirdi ki, koronavirusa qarşı qlobal səviyyədə
aparılan mübarizə bir faktı ortaya qoydu ki, mübarizənin effektli olması üçün
dövlətlərin gördüyü işlər yetərli deyil: "Dövlət, səhiyyə müəssisələri əllərindən
gələni edirlər. İnzibati tətbiqlər var, həkimlər əlindən gələni edir, amma
bunun yetərli olmadığı özünü göstərir. Çünki yoluxma o qədər sürətlidir ki, səhiyyə
müəssisələri bunun qarşısını ala bilmirlər, bundan başqa müəyyən vəsait,
texniki çatışmazlıqlar olur və s. Yəni burada ilk məsələ yoluxma hallarının
tempinin aşağı salınmasıdır. Bu da dövlətdən yox, cəmiyyətdən asılı olan məsələdir.
Yəni indiyə qədər qlobal səviyyədə əldə olunmuş nəticə odur ki, insanlar nə qədər
çox az gəzsələr, başqaları ilə təmasda olsalar, yoluxma halları aşağı düşər. Bu
baş verərsə, dövlətlər də, səhiyyə müəssisələri də virusa qarşı effektiv iş görə
bilərlər. Sözü ona gətirirəm ki, yoluxmanın sürətinin artması birbaşa cəmiyyətdən,
fərdlərdən asılıdır. Ona görə də çox ciddi şəkildə təbliğat-təşviqat
aparılmalıdır və bu da aparılır. Bununda nəticəsində insanlar özlərini təcrid
etməlidirlər ki, yoluxmanın səviyyəsi aşağı düşsün və dövlət də qabaqlayıcı
addımlar ata bilsin”.
M.Ələsgərli bildirdi ki, cəmiyyətin səfərbər olunması və özünütəcrid statusuna keçməsi üçün ən yaxşı
vasitə cəmiyyət institutlarıdır: " Vətəndaş cəmiyyəti institutları da kütləvi
informasiya vasitələri və qeyri-hökumət təşkilatlarıdır. Bu baxımdan onların hər
ikisi cəmiyyət arasında təbliğat-təşviqat işinin, maarifləndirmənin
aparılmasında çox mühüm rol oynaya bilərlər. Düzdür, kütləvi informasiya vasitələri
burada ötürücü faktordur. Amma bu sahədə ciddi ekspertlərə, məlumat bazasına,
çoxlu vəsaitlərə ehtiyac var ki, bu məsələdə qeyri-hökumət təşkilatları bunu təmin
edə bilərlər. Ona görə də hesab edirəm ki, bu məsələdə vətəndaş cəmiyyəti
institutlarının rolunun gücləndirilməsi çox ağlabatan versiyadır. Bu baxımdan vətəndaş
cəmiyyətinin iki komponentinin, yəni kütləvi informasiya vasitələrinin və
qeyri-hökumət təşkilatlarının üzərinə çox mühüm missiya düşür. Media əvvəldən
prosesin içindədir və məlumatlandırma, maarifləndirmə işi aparır. Amma bununla
yanaşı, o qədər danışırlar ki, artıq məsələ şüarçılıq səviyyəsinə keçir. Ona
görə də, bir az yeni tətbiqlər etmək, metodologiyalar tapmaq lazımdır. Yeni
metodologiyanın da tapılmasında, Azərbaycan cəmiyyətinə çatdırılmasında
qeyri-hökumət təşkilatlarının müstəsna rolu ola bilər. Çox yaxşı haldır ki,
Prezident yanında QHT-lərə Dövlət Dəstəyi Şurası artıq bu təşəbbüslə çıxış
edib”.
"XXI Əsrin Qadınları” İctimai Birliyinin sədri Mahirə Əmirhüseynova bildirdi ki, rəhbərlik etdiyi təşkilat "Evdə qal,
cəmiyyəti qoru” adlı ictimai monitorinq və məlumatlandırma kampaniyasına
qoşulub: "Bununla əlaqədar olaraq, bu gün biz Bakının Nərimanov, Nəsimi və Səbail
rayonlarında monitorinq və məlumatlandırma kampaniyası apardıq. Müşahidələr onu
göstərdi ki, hələ də əhalinin bir qismi küçələrdədir, uşaqlar velosiped sürür,
valideynlər övladlarını gəzdirir, əhalinin çox hissəsi maskasızdır. Bundan əlavə
olaraq, əhalinin çoxu bu barədə tam məlumatlı deyil, məsələyə ciddi
yanaşmırlar, adi qrip kimi anlayırlar.Fikrimcə, ilk növbədə valideynlərlə maarifləndirici
iş aparmalıdır ki, uşaqları evdən çölə buraxmasınlar. Dayanacaqlarda
dezinfeksiya maddələri, spirt qoyularsa, daha yaxşı olar”.
M.Əmirhüseynova hesab edir ki, maarifləndirici
bukletlər olmalıdır:
"Plakatlar hazırlanıb marketlərdə, dayanacaqlarda və iş yerlərində yerləşdirilərsə,
məlumatlandırma daha effektli olar.İnanıram
ki, həmişə ölkəmizin milli maraqlarını üstün tutan QHT-lər və tərəfdaş
qurumlarla birgə bizi ciddi şəkildə təhdid edən koronavirusla mübarizədə bütün
resursları səfərbər edərək Şuranın başlatdığı layihəni dəstəkləyəcək,
xalqımızın təhlükəsizliyinin və sağlamlığının qorunması naminə üzərimizə düşən
vəzifəni layiqincə yerinə yetirəcəyik”.
BƏXTİYAR