Qəzetlər yayı necə keçirəcək?
Yay aylarında adətən insanların daha çox istirahətə üstünlük verməsi
hər kəsə məlumdur. Xüsusilə də şəhərdə yaşayan və işləyən insanlar üçün
belədir. Təhsil müəssisələrinin yay tətilinə çıxması, Milli Məclisin bu dövrü
əhatə edən iclaslarının olmaması və sair faktorlar siyasi-ictimai aktivliyi az
da olsa, aşağı salır. Bu qıtlıq Bakıda fəaliyyət göstərən kütləvi informasiya
vasitələrinin fəaliyyətinə də təsirsiz ötüşmür. Bu vəziyyət xüsusilə qəzetlərin
fəaliyyətində özünü göstərir. Belə ki, gündəlik çıxan qəzetlər bir çox hallarda
yay aylarında məlumat azlığından əziyyət çəkir. Ötən illərin təcrübəsinə
əsaslansaq deyə bilərik ki, bir sıra qəzetlər yay aylarında ya səhifələrin
sayını azaldır, ya da dövrülüyünü, ya da tirajını azaldır. Bəs görəsən bu gələn yay ayları necə olacaq?
"Şərq” qəzetinin baş
redaktoru Akif Aşırlı bildirdi ki, onun rəhbərlik etdiyi qəzetdə artıq
bununla bağlı bir təcrübə var: "22 iyul-Milli Mətbuat Günündən sonra ardıcıl
şəkildə jurnalistləri məzuniyyətə gördəririk. Əməkdaşlarımızın hər biri 10-12
gün müddətində məzuniyyətdə olurlar. Həmin ərəfədə də, yəni avqust ayında
qəzetin səhifələri azaldılır və 16-dan 8-ə endirilir. Yəqin ki, bu ildə belə
olacaq”.
A.Aşırlının sözlərinə görə, yay ayları qəzetlər üçün "ölü ay” hesab
olunur: "Ona görə də biz çalışırıq ki, həm jurnalistlərimiz istirahət etsin,
həm də qəzet dayanmasın, fasiləsiz olaraq çıxsın. Lazımi olan təhlili
yazılarımızı, müsahibələrimizi, reportajlarımızı dərc edək. Bu səbəbdən də
avqust ayı ərzində qəzetimiz 8 səhifə həcmində dərc edilir. Sentyabrın 1-dən
etibarən əvvəlki iş qrafikimizi bərpa edirik”.
"Yeni Müsavat” qəzetinin
baş redaktoru Rauf Arifoğlu qeyd etdi ki, yay ayları ilə bağlı qəzetin
fəaliyyətində heç bir dəyişiklik edilməyəcək: "Bizdə hansısa dəyişikliklərlə
bağlı plan yoxdur, adi qaydada işimizi dava etdirəcəyik. Əməkdaşlarımız da
sırası ilə məzuniyyət haqlarından istifadə edəcəklər. Qəzet ötən dövrdə necə
idisə, işini elə də davam etdirəcək”.
"İki sahil” qəzetinin baş
redaktoru Vüqar Rəhimzadə bildirdi ki, fəsildən asılı olmayaraq rəhbərlik
etdiyi qəzet sistemli olaraq fəaliyyətini davam etdirəcək: "Məzuniyyət
məsələsinə gəlincə, qəzetimizdə qrafik təsdiq olunur və buna uyğun olaraq əməkdaşlarımız
məzuniyyətə göndərilir. Ona görə də adi qaydada işimizi davam etdirəcəyik.
Səhifələrin sayı məsələsinə baxacağıq. İmkanlarımıza uyğun olaraq, yəqin ki,
qəzet gündəlik 16 səhifə dərc ediləcək. Amma yay ayları ərzində redaksiyanın iş
həcmini azaltmaq kimi məsələlər nəzərdə tutulmur. Belə deyək, həmişə kimi öz
işimizdə olacağıq”.
"Ekspress” qəzetinin baş
redaktoru Qəzənfər Bayramovun sözlərinə görə, rəhbərlik etdiyi qəzet
nəşr olunduğu müddətdə heç vaxt səhifələrin azaldılmasına və digər bu kimi
fəaliyyətin məhdudlaşdırılmasına getməyib: "Heç vaxt qəzetimizin səhifəsi
azaldılmayıb. Həmişə olduğu kimi bu ildə qəzetimiz gündəlik olaraq 16 səhifə
çıxacaq. Ancaq əməkdaşlarımızı məzuniyyətə göndərəcəyik. Bilirsiniz, bizim
qəzet əvvəllər 24 və 32 səhifədə çıxıb. Ona görə də indi 16 səhifə çıxmağımızda
heç bir problem yoxdur”.
"525-ci qəzet”in baş
redaktorunun müavini Yusif Rzayev qeyd etdi ki, iyul ayından
etibarən qəzetin əməkdaşları bir-bir məzuniyyətə göndərilir: "Təbii ki, bu
müddətdə qəzetimizi səhifələri azalır. Misal üçün, şənbə günü istisna olmaqla 4
gün ərzində 8 səhifə çıxırıqsa, əməkdaşlarımızın məzuniyyəti dövründə qəzetin
səhifəsi 4-ə enir. Onu da qeyd edim ki, iyul ayının yarısından etibarən
əməkdaşların məzuniyyəti başlaya bilər. Bu da avqustun axırına qədər davam
edir. Sentyabrın 1-dən etibarən "525-ci qəzet” yenə də əvvəlki qaydada nəşr
ediləcək”.
"Bizim yol” qəzetininkommersiya direktoru Vüsal Yusubov qeyd etdi ki, qəzetin
fəaliyyətində yay mövsümünə uyğun olaraq hər hansı dəyişikliklərin olacağı
gözlənilmir: "Fikrimcə, ötən dövr ərzində necə çap olunmuşuqsa, eləcə də davam
edəcəyik. Hazırda qəzetimiz 16 səhifədir və səhifələrin azaldılması
gözlənilmir. Əməkdaşlarımızın məzuniyyət məsələsinə gəlincə, bu, növbəli
şəkildə həyata keçirilir”.
Bəxtiyar Məmmədli