Qəhrəmanlıq salnaməsinin yazıldığı gün - Fotolar
20 Yanvar tariximizdə faciəvi hadisə deyil, Azərbaycanın
istiqlal yolunun ilk zirvəsi, milli məfkurəmizin azadlıq istəyinin qanla
yazıldığı günüdür. Bu, uzun illər sovet imperiyasının əsarətində yaşayan xalqın
azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli
bir tarixdir. Sovet rəhbərliyinin himayədarlığı ilə başlayan Dağlıq Qarabağ
hadisələrinə, ermənilərin Azərbaycana əsassız ərazi iddiaları irəli sürməsinə,
xalqımıza qarşı təxribatlara, ən nəhayət Ermənistan ərazisindəki əzəli
torpaqlarından azərbaycanlıların qovulmasına etiraz edən geniş xalq kütlələri məhz
1990-cı il yanvarın19-dan20-nə keçən gecə sovet ordusunun xüsusi təlim
keçmiş hissələrinin hücumuna məruz qalıb. Həmin gecə keçmiş SSRİ-nin qoşun hissələri
fövqəladə vəziyyət elan edilmədən Bakışəhərinə yeridilib, dinc, əliyalın əhaliyə
divan tutulub, yüzlərlə insan qətlə yetirilib, yaralanıb, itkin düşüb. Ordu
hissələrinin, xüsusi təyinatlı dəstələrin və daxili qoşunların iri
kontingentinin Bakını zəbt etməsi xüsusi qəddarlıq və misli görünməmiş vəhşiliklərlə
müşayiət edilib. Fövqəladə vəziyyətin tətbiqi əhaliyə elan olunanadək, hərbi qulluqçular
82 nəfəri amansızcasına qətlə yetirib, 20 nəfəri ölümcül yaralayıblar. Fövqəladə
vəziyyət elan edildikdən sonra isə yanvarın20-də və sonrakı günlərdəBakı
şəhərində 21 nəfər öldürülüb. Fövqəladə vəziyyətin elan olunmadığı rayonlarda,
o cümlədən yanvarın25-dəNeftçalada və yanvarın 26-da Lənkəranda
daha 8 nəfər qətlə yetirilib. Beləliklə, qoşunların qanunsuz yeridilməsi nəticəsindəBakıda
və Azərbaycan rayonlarında ümumilikdə 137 nəfər öldürülüb, 744 nəfər yaralanıb,
841 nəfər qanunsuz həbs olunub.
Xalq dərdini demək üçün Basarkeçərdən Bakıya gəldi
Xalqımızın qəhrəmanlıq səhifəsinin yazıldığı həmin gün minlərlə azərbaycanlı
kimi Nadir Müseyibov da təpədən-dırnağa qədər silahlanmış rus qoşunlarının
qarşısına əliyalın çıxanlardan biri olub. O, 20 oktyabr 1966-cı ildə Qərbi Azərbaycanın
Göyçə mahalında - Basarkeçər rayonunun Nərimanlı kəndində anadan olub. 1983-cü
ildə Nərimanlı kənd orta məktəbini bitirərək Azərbaycanın paytaxtı Bakı şəhərinə
gəlib, burada dövlət imtahanlarında iştirak edərək, Azərbaycan Neft və Kimya
İnstitutunun istehsal proseslərinin avtomatlaşdırılması fakültəsinin avtomatika
və telemexanika ixtisasına qəbul olub. Həmin vaxt qanuna uyğun olaraq, ali təhsilinin
iki ilini başa vurub həqiqi hərbi xidmətə yollanıb. 1985-87-ci illərdə əvvəlcə
Ukraynada hərbi kurslara cəlb olunub, çavuş hərbi rütbəsi alıb, 6 ay sonra isə
Çexoslovakiyadakı hərbi hissəyə göndərilib. Yüksək mənəvi-psixoloji, fiziki
göstəricilərinə və şəxsi heyətlə iş bacarığına görə həmin vaxtdan düz xidmətinin
sonuna qədər artilleriya bölüyündə bölük komandirinin müavini vəzifəsini icra
edib. Xidmətini başa vuraraq Azərbaycana qayıdan N.Müseyibov yenidən ali təhsilini
davam etdirməyə başlayıb.
Azərbaycanlılara qarşı növbəti deportasiya siyasəti
1988-ci ildən Ermənistanda vəziyyət gərginləşməyə başlayıb, Kremlin
himayəsini üzərində hiss edən erməni siyasi rəhbərliyi azərbaycanlılara qarşı
növbəti deportasiya siyasətinə başlayıb. Baş verənlərdən böyük narahatlıq keçirən
N.Müseyibov Nərimanlı kəndindən gələn ağsaqqallarla birlikdə Mərkəzi Komitəyə dəfələrlə
ayaq döyüb, azərbaycanlılara qarşı törədilən vəhşilikləri, fiziki və mənəvi
zorakılıqları Azərbaycan rəhbərliyinin diqqətinə çatdırmaq istəyib. Lakin bütün
cəhdlərə baxmayaraq, həmin vaxt Azərbaycana rəhbərlik edən Əbdürrəhman Vəzirovun
qəbuluna düşmək mümkün olmayıb. Onun müavinləri Ermənistandan gələn azərbaycanlıları
qəbul edərək, ancaq quru vədlər verib, yola salıblar. Azərbaycan siyasi rəhbərliyinin
bu biganəliyi Ermənistandakı soydaşlarımızın vəziyyətini daha da mürəkkəbləşdirib,
azərbaycanlılar sıxışdırılıb və deportasiya kütləvi xarakter alıb.
N.Müseyibovun sözlərinə görə, ali təhsil aldığı institutda Basarkeçər
rayonundan olan tələbələr öz aralarında pul toplayıb Moskvaya - Kreml rəhbərliyinə
teleqramlar ünvanlayıb, Ermənistandakı vəziyyətə dair onlardan kömək istəyiblər.
Amma bu cəhdlərin də heç bir nəticəsi olmayıb. Beləliklə, həmsöhbətimizin vətənpərvərliyi,
el-oba yanğısı, öz soydaşlarına kömək etmək istəməsi onu Bakıda sovetlər
ittifaqının rəhbərliyi əleyhinə keçirilən mitinqlərə, Azərbaycan Xalq Cəbhəsi hərəkatına
gətirib çıxarıb. Ali təhsil aldığı institutda hərəkatın dayaq dəstəsini yaradan
N.Müseyibov fəal vətəndaş və təşkilat üzvü kimi bu aksiyaların keçirilməyə
başladığı ilk gündən 20 yanvar 1990-cı ilə qədər bütün mitinqlərdə iştirak
edib, SSRİ rəhbərliyinin biganəliyinə, riyakar siyasətinə öz etirazını
bildirib, bununla əlaqədar müəyyən təşkilatçılıq işləri görüb.
Yolun açılmayacağı təqdirdə, zirehli texnika ilə insanların
üzərindən keçəcəklərini bildiriblər
Həmsöhbətimizin söylədiyinə görə, SSRİ DTK-nın təşkil etdiyi, kənardan
gətirilən, şəxsiyyəti məlum olmayan təxribatçılar 1990-cı il yanvarın 13-dən
başlayaraq Bakıda erməni əsilli əhaliyə hücumlar təşkil etməyə, SSRİ rəhbərliyinə,
Dağlıq Qarabağda və Ermənistanda azərbaycanlılara qarşı törədilənlərə etiraz edən
qəzəbli kütləni də bu təxribatlara qoşmağa çalışıblar. Bununla onlar rus
qoşunlarının Bakıya yeridilməsinə zəmin yaratmaq istəyiblər. Baxmayaraq ki, həmin
vaxt Bakıda milis qüvvələri olub, eyni zamanda paytaxta kənardan əlavə 13 min
milis qüvvələri cəmləşdirilib, onlar bu vəziyyətə ancaq seyrçi mövqe nümayiş
etdiriblər. Hətta təxribat barədə milisə məlumat verilməsinə rəğmən, ictimai
asayişin qorunmasına məsul olan bu adamlar heç bir tədbir görməyiblər. Belə
olan halda, hərəkat üzvləri qərargah yaradıblar və bu qərargahla əlaqə saxlayan
erməni ailələrinin qorunmasını təşkil ediblər. Bununla da onlar həm təxribatların,
həm də Azərbaycan xalqına qarşı baş verə biləcək qırğının qarşısını almağa
çalışıblar. Növbəti günlərdə SSRİ rəhbərliyinin Bakı şəhərinə aeroport yolu,
indiki Saray qəsəbəsi, 20 yanvar dairəsi istiqamətindən qoşun yeridəcəyi barədə
məlumatlar yayılıb. Hamı kimi N.Müseyibov da bu qoşunların qarşısını kəsmək
üçün barrikadalar qurmaq, avtobus və yük maşınlarından istifadə etməklə zirehli
texnikanın irəliləməsinə maneələr yaratmaq prosesinə qoşulub. N.Müseyibovun
dediyinə görə, hadisə qanlı xarakter almazdan bir gün öncə Sumqayıt yolu ilə
Bakı şəhərinə daxil olmaq istəyən zirehli texnikanın qarşısını digər azərbaycanlılarla
birlikdə əl-ələ verərək kəsiblər. Hətta döyüş maşını BMP-ni camaatın üstünə sürən
hərbçilər yolun açılmayacağı təqdirdə, əliyalın insanların üzərindən keçəcəklərini
bildiriblər. Amma insanların ciddi müqaviməti, ən əsası da qorxmazlığı
müqabilində, həmçinin, aparılan söhbətlər nəticəsində hərbçilər geri qayıtmalı
olublar. Yanvarın 19-u axşam Dövlət Televiziyasının enerji blokunun
partladılmasından sonra hərəkat üzvləri müxtəlif yollarla barrikadalara gedərək,
vəziyyətin daha da mürəkkəbləşdiyini, qoşunların atəş açmaq, etirazçıları məhv
etmək ehtimalının böyük olduğunu anlatmağa, oradakı əliyalın əhalini geri çəkilməyə
çağırıblar. N.Müseyibov da bu məqsədlə 3 nəfər yoldaşı ilə birlikdə "Jiquli”
markalı maşında barrikadalara gediblər. Lakin qəzəbli kütlə idarəolunmaz bir vəziyyətə
gəldiyindən, eyni zamanda SSRİ rəhbərliyinə qəzəb hissi güclü olduğundan heç
kim bu çağırışlara əməl etməyib. Bir neçə saatdan sonra isə şəhərin müxtəlif
yerlərində atəş səsləri eşidilməyə başlayıb, qoşun şəhərə yeridilib.
"Meyitləri”
maşından çıxarmaq istəyiblər
N.Müseyibov yanvarın 20-i gecə saat 3-4 radələrində keçmiş "Papanin” - indiki Cəlil Məmmədquluzadə küçəsi ilə növbəti
barrikadaya tərəf gedərkən onların içində olduğu avtomobil ön və arxa hissədən
avtomat atəşinə tutulub. Nəticədə avtomobilin bütün pəncərələri sınıb, motor
yerləşən hissə dağılıb və avtomobil dayanıb. N.Müseyibov və 3 yoldaşı şok vəziyyətində
olduqlarından nə edəcəklərini bilməyiblər. Hətta o an elə düşünüblər ki, güllə
yarası alıblar, ölürlər. Az müddət sonra atəş açan hərbçilərdən biri avtomobilə
yaxınlaşıb. Rütbəcə mayor olan bir hərbçinin əmrinə uyğun olaraq, "meyitləri”
maşından çıxarmaq istəyib. Lakin baş leytenant rütbəli həmin hərbçi güllələnmiş
avtomobildəki adamların sağ olduğunu görəndə dərhal geri çəkilib, vəziyyəti
komandanlığa məruzə edib. Bundan sonra hərbçilər avtomobildəki 4 nəfəri yerə
düşürüb və qərargahlarına aparıblar. Orada rütbəcə mayor olan bir zabit əsgərlərə
silahı qaldırmağı, nişan alıb bu 4 nəfəri öldürməyi əmr edib. Elə bu vaxt qərargahdan
general rütbəli daha bir zabit çıxıb və atəş açmamağı əmr edib. Üst-başları
yoxlanandan sonra onlar yaxınlıqdakı binanın zirzəmisində saxlanılan digər 11 nəfərin
yanına gətirilib.
"Bizi huşumuzu itirənə qədər döyürdülər”
N.Müseyibovun dediklərinə görə,
saxlandıqları gündən yanvarın 27-ə qədər hər gün ümumilikdə 15 nəfərə fiziki, mənəvi,
psixoloji işgəncələr verilib, uzun-uzadı sorğu-sual aparılıb: "Bizi ac və susuz
saxlayır, bir bəhanə ilə döyür, təhqir edirdilər. Hər gün sorğu-sual edir,
boynumuza qoymaq istəyirdilər ki, guya biz hərbçilərə silahlı müqavimət göstərmişik.
Hətta bu cür izahat tərtib edib bizlərdən onu imzalamağı tələb edirdilər. Təbii
ki, imtina edirdik və buna görə avtomatın qundağı ilə bizi huşumuzu itirənə qədər
döyürdülər. İstəyirdilər ki, qoşunların Bakıya yeridilməsinin əsaslı olduğunu
bu yolla sübut etsinlər, müvafiq sənədləşmə işi görsünlər. Buna qol
qoymadığımız üçün bizi döyməklə bərabər, saxlandığımız yerdən çıxarır, soyuq
qış günündə qarın, palçıqlı suyun içində ağzı üstə uzadır, müxtəlif işgəncələr
verirdilər. Hətta bizlərdən bir nəfəri hasara dırmaşmağa məcbur etmək istəyirdilər
ki, guya qaçmağa hazırlaşırmış adı ilə hamımızı güllələsinlər. O zaman heç kim
buna getmədi, durduğu yerdən tərpənmədi. Hamı dedi ki, öldürürsünüzsə elə
burada öldürün. Beləliklə, bizi düz 7 gün ərzində döyməklə, işgəncələr verməklə
öldürüb-diriltdilər. Amma ölümü gözə aldığımızdan müqavimətimizi qıra, iradəmizi
sındıra bilmədilər”.
Sovetlər imperiyasının süqutu
Hal-hazırda Gəncə Telekommunikasiya İdarəsində şöbə rəisi
vəzifəsini icra edən N.Müseyibov deyir ki, özü də daxil olmaqla saxlanılan
yoldaşlarının azad olunmasına səbəb onlar barədə qohum-əqrəbanın müvafiq
qurumlara çoxsaylı müraciətləri olub. Onun sözlərinə görə, Xalq şairi Bəxtiyar
Vahabzadə, Ali Sovetin o zamankı sədri Elmira Qafarova, sabiq millət vəkili
Sabir Rüstəmxanlının proseslərə müdaxiləsi, atdıqları addımlar onların həyatda
qalması ilə nəticələnib. Əgər barələrində axtarış olmasaydı, yəqin ki, onlar da
haqq dünyasında idilər. N.Müseyibov bizimlə söhbətində yaşadıqlarından zərrə qədər
peşmançılıq hissi keçirmədiyini, əksinə bundan qürur duyduğunu da dilə gətirdi.
Sonda bir daha qeyd edək ki, qabaqcadan düşünülüb hazırlanmış və 1990-cı ilin
19-20 yanvarında törədilmiş bu təcavüzkarlıq aksiyası Azərbaycan xalqının
demokratiya və milli azadlıq uğrunda mübarizəsini boğmaq, xalqı təhqir edərək
ona mənəvi zərbə vurmaq məqsədi daşıyırdı. Lakin Nadir Müseyibov kimi Azərbaycanın
çoxsaylı fədakar, mərd və cəsur oğul-qızları sayəsində təcavüzkarların əsl niyyətləri
baş tutmadı, xalqımız sınmadı, müstəqilliyinə qovuşdu. 20 Yanvar hadisəsi isə
xalqlar həbsxanası adlandırılan sovetlər imperiyasının süqutuna gətirib
çıxardı.
Rufik İSMAYILOV