Qaz razılaşması Gürcüstanı çalxaladı
Rusiyanın
qaz nəhəngi - "Qazprom”la Gürcüstan hökuməti arasında Ermənistana satılan təbii
qazın nəqlinə görə, ödənişlər barədə razılığın əldə olunması qonşu ölkədə
müzakirə olunan ən aktual məsələlər sırasındadır. Əksər siyasi partiyalar,
media və qeyri-hökumət təşkilatları bunu ölkənin milli maraqlarına zidd bir
razılaşma kimi qiymətləndirirlər. Məsələn, dünən80-ə
yaxın qeyri-hökumət təşkilatı Gürcüstan hökumətinə müraciət edərək Gürcüstan
ərazisindən Ermənistana gedən qazın tranziti ilə bağlı Rusiyanın "Qazprom”
şirkəti ilə əldə olunan razılaşmanın detallarının açıqlanmasını tələb ediblər.
"Rusiya
ilə Gürcüstan kimi dövlətlər arasında əldə olunan razılaşmaya kommersiya sənədi
çərçivəsində baxıla bilməz. Belə ki, Rusiya bizim ölkənin ərazisini işğal
edib”, -deyə İqtisadi Siyasətin Tədqiqi Mərkəzinin icraçı direktoru Nino
Evqenidze "Rustavi-2” telekanalına müsahibəsində bildirib. Vətəndaş cəmiyyəti
hökumətə ünvanladığı müraciətdə Rusiya şirkəti ilə əldə olunan razılaşmanın
doğura biləcəyi risklər barədə xəbərdarlıq edib. "Bizə bu razılaşmanın
kommersiya sirri olduğunu deyəndə heç nə aydın olmur. Halbuki, Rusiya işğalçı
dövlətdir. Bu, Gürcüstana ciddi bir zərbə vuracaq kapitulyasiya
razılaşmasıdır”, - bunu isə "Şərq Tərəfdaşlığı vətəndaş ictimai forumu” milli
platformasının sədri Laşa Tuquşi bildirib.
Qeyd
edk ki, müxalifət və bir sıra təhlilçilər də hökuməti Rusiya tərəfindən təklif
edilmiş təbii qaz qiyməti razılaşmasını qəbul etdiyinə görə kəskin tənqid edir.
Müxalif "Vahid Milli Hərəkat” yeni qaz razılaşmasının Gürcüstan üçün "zərərli”
olduğunu bildirir. Onlar hesab edirlər ki, bu razılaşma Gürcüstanın enerji
təhlükəsizliyinə hədə yaradır. "Vahid Milli Hərəkat”dan Sergi
Kapanadze isə bu qənaətdədir ki, yeni razılaşma Rusiyaya Gürcüstana təzyiq
göstərmək imkanı verəcək. O, hökuməti öz qərarından əl çəkməyə çağırıb. O deyib
ki, yeni saziş Gürcüstanın dövlət maraqlarına ziddir.
Təhlilçi
Soso Tsiskarişvili də deyib ki, Gürcüstan hökumətinin qərarı "kapitulyasiyaya”
bərabərdir. O, həmçinin "Qazprom”un öz öhdəliklərinə əməl edəcəyini şübhə
altına alıb. Deyib ki, Rusiya artıq bir dəfə "siyasi səbəblərlə Gürcüstanı
qasız qoyaraq dondurub”.
Avro-Atlantik
Gürcüstan Koalisiyası adlı QHT-lər birliyi isə bəyan edib ki, yeni razılaşma
Gürcüstanın enerji təhlükəsizliyi vəziyyətini pisləşdirəcək. "Transparency
International – Georgia” təşkilatı və Gənc Gürcü Hüquqşünaslar Assosiasiyası da
daxil, 22 QHT-ni birləşdirən koalisiya da hökuməti razılaşmanın təfərrüatlarını
ictimaiyyət üçün açmağa çağırıb.
Gürcüstan
hökuməti isə tənqidləri qəbul etməyərək bəyan edir ki, yeni razılaşma
Gürcüstanın enerji asılılığını artırmır və hələ ki təklif olunan şərtlər
"optimal” hesab olunur. Bundan əvvəl Gürcüstan Rusiya qazını Ermənistana nəql
etmək müqabilində onun 10 faizini özü işlədirdi. Rusiyanın qaz nəhəngi
"Qazprom”la imzalanmış yeni razılaşmaya əsasən, Gürcüstan 2017-ci ildə də
tranzit haqqı kimi qaz götürəcək, lakin 2018-ci ildən Rusiya tərəfi tranzitə
görə pul ödəməyə başlayacaq.
Hökumətə
qarşı tənqidləri enerji naziri Kaxa Kaladze dəf etməyə çalışıb. "İmedi”
telekanalına müsahibəsində Kaladze israr edib ki, Gürcüstanın Rusiyanın enerji
daşıyıcılarından asılılığı artmayacaq və alınan qazın həcmi əvvəllər olduğu
kimi, 10-12 faiz civarında qalacaq. Lakin o, bundan daha çox təfərrüat verməyib
və bildirib ki, razılaşma məxfi xarakter daşıyır. "Mən vurğulamaq istəyirəm ki,
Azərbaycan bizim strateji tərəfdaşımız olaraq qalır. Bizim xalqımızın istehlak
etdiyi qazın 90 faizi Azərbaycandan gəlir” – deyə nazir bildirib.
"Bu
razılaşmaya gəlməzdən və spesifik təkliflər almazdan əvvəl bizim bir sıra
görüşlərimiz olmuşdu və razılaşma barədə mövqe və baxışlarımız tamamilə fərqli
idi. Biz narazı idik və deyirdik ki, "Qazprom”un təklifi bizim üçün tamamilə
qeyri-məqbuldur və biz çox uzun müddət müzakirə olunan bu təklifləri qəbul
etmək fikrində deyildik”- deyə nazir bildirib. Nazir deyib ki, bütün bunlara
baxmayaraq, nəhayət yanvarın 10-da 4 saat davam edən danışıqlardan sonra yekun
razılaşma əldə edilib: "Biz düşünürük ki, hazırkı reallıqda və situasiyada bu,
optimal təklif idi. Qiymət şərtləri 2018-ci ildən beynəlxalq standartlara uyğun
müəyyən ediləcək. Ümumilikdə biz beynəlxalq prinsipləri dəstəkləyirik. Bizim
ölkəmiz Avropa Enerji Xartiyasına imza atıb”.
Hakim
partiyanın vəzifəli rəsmisi Qiyaa Volski deyib ki, bu razılaşmadan əsasən
Rusiya mənfəətlənsə də, Gürcüstan mümkün olduğu qədər az itirməyə çalışır. "Interpressnews”
saytına müsahibəsində Volski razılaşmanı müdafiə edib və deyib: "Beynəlxalq
ödəniş praktikası göstərir ki, tranzit haqqını qazla yalnız Azərbaycan, Naxçıvana
qaz verilməsi üçün İrana ödəyir”. Volski vurğulayıb ki, əgər Gürcüstan
Rusiyanın təklifi ilə razılaşmasaydı, Rusiya Ermənistanı İran vasitəsilə qazla
təchiz edə bilərdi və Gürcüstan tranzit kimi əhəmiyyətini itirərdi: "Bütün
hallarda Rusiya Ermənistanın qayğısına qalacaqdı, bizsə bir tranzit kimi
funksiya və imicimizi itirə bilərdik. Digər tərəfdən, Ermənistanı qazsız qoymaq
bizim Yerevanla münasibətlərimzi korlayardı”.
Gürcüstan
baş nazirinin birinci müavini, iqtisadiyyat və davamlı inkişaf naziri Qeorqi
Qaxariya bildirib ki, müqavilədə Gürcüstanın Rusiyadan təbii qaz alması barədə
öhdəlik nəzərdə tutulmayıb: "Azərbaycandan lazımı qədər qaz almaq imkanımız var
və bu da, bizə başqa mənbədən mavi yanacaq almaq zərurəti yaratmır”.
Ermənistan
rəsmiləri bu məsələ ilə bağlı hələlik heç bir şərh verməyiblər.
Maraqlıdır
ki, razılaşmanı tənqid edənlər arasında Gürcüstan prezidenti Georgi
Marqvelaşvili də var. Prezidentin mətbuat katibi Eka Mişveladze ötən gün keçirdiyi
brifinqdə deyib ki, bu müqavilənin imzalanması ilə ölkənin enerji sektoru
zəifləyib, Gürcüstanın iqtisadi və siyasi maraqları zərər görüb: "Bu, gələcəkdə
bizə bir sıra problemlər yarada bilər. Prezident bunları nəzərə almaqla,
parlamentə müraciət edərək lazımi addımlar atmağı tövsiyə edib. Bildirib ki,
ölkəni üzləşə biləcəyi risk və təhlükələrdən qorumaq üçün parlament
Konstitusiya ilə təsbit olunmuş funksiyasını yerinə yetirməlidir”.
Azər