Qarabağda müharibə ehtimalı artır
Aprel döyüşlərindən sonra Dağlıq Qarabağ münaqişəsinin həlli ilə
bağlı danışıqlar intensivləşsə də, əksəriyyətin gözləntilərinin əksinə olaraq, irəliləyiş
əldə olunmadı. Yaranmış mənzərə, danışıqların, gözləntilərin yenidən fiaskoya
uğraması isə Azərbaycanın maraqlarına uyğun gəlmir. Bu səbəbdən, növbəti dəfə
aprel ayında yaşanan müharibəyə, hətta daha güclü hücuma ehtiyac olduğu barədə fikirlər
bildirilir.Bu barədə fikirlərini bölüşən Prezident Administrasiyası rəhbərinin
müavini, Xarici əlaqələr şöbəsinin müdiri Novruz Məmmədov rəsmi qəzetdə dərc
olunan məqaləsində yazıb ki, Dağlıq Qarabağ münaqişəsinin dondurulmuş qalması hər
an qaynar müharibəyə səbəb ola bilər.
N.Məmmədov onu da qeyd edib ki, Dağlıq Qarabağ münaqişəsi regionun
inkişafına ən böyük maneədir: "Azərbaycanın regional və beynəlxalq səviyyədə
fəaliyyətinin qarşısında dayanan birinci dərəcəli məqsəd öz ərazi bütövlüyünün
bərpasıdır. Ermənistan-Azərbaycan, Dağlıq Qarabağ münaqişəsi isə təkcə Azərbaycanın
deyil, eləcə də bütün regionun inkişafı qarşısında duran əsas maneədir. 20 ildən
çoxdur ki, Azərbaycanın ayrılmaz hissəsi olan Dağlıq Qarabağ və onun ətrafındakı
7 rayon Ermənistanın işğalı altındadır. Ermənistanın hərbi təcavüzü və etnik təmizləmə
siyasəti nəticəsində torpaqlarımızın 20 faizi işğal edilmiş, ölkədə 1 milyondan
çox insan qaçqın və məcburi köçkün vəziyyətinə düşmüşdür. Azərbaycanın mövqeyi
bundan ibarətdir ki, münaqişə yalnız beynəlxalq hüquq normalarına uyğun, Azərbaycanın
ərazi bütövlüyü çərçivəsində həll olunmalıdır".
Biz də mövzunu inkişaf etdirərək, yaxın zamanlarda təmas xəttində
növbəti müharibə ehtimalının nə qədər olduğunu soruşduq. Ekspertlərin fikrincə,
Azərbaycan üçün müharibə variantı hər zaman aktuallığını saxlayır. Çünki
torpaqlarını işğaldan azad etmək bizim ən təbii haqqımızdır.
Millət vəkili Elşən Musayev "Kaspi"yə açıqlamasında dedi
ki, PA rəsmisi Novruz Məmmədovun Qarabağla bağlı söylədiyi fikirlər əslində,
dövlətin mövqeyidir: "Tamamən də açıq, düzənli formada beynəlxalq
ictimaiyyətə yönəlik açıqlamadır. Həqiqətən də, regiondakı inkişafı əngəlləyən ən
ciddi səbəblərdən biri Dağlıq Qarabağ münaqişəsinin həll edilməməsidir. Bu
yaxınlarda cənab Prezident İlham Əliyev də çıxışlarının birində növbəti dəfə
vurğuladı ki, Qarabağla bağlı qəbul edilən sənədlər, qətnamələr, qərarlar icra
olunmalıdır. Həm də dərhal icra olunmalıdır. Əks halda, bu cür hərəkətsiz,
icraya yönəlməyən vəziyyət bu qərarları qəbul edən beynəlxalq təşkilatların
nüfuzu və perspektivi üçün də acı gələcək vəd edəcək. Gerçəkdən də, belədir və
artıq ədaləti bərpa edə bilməyən ikistandartlı dünya bizim üçün müharibədən
savayı çıxış yolu qoymur. Bu gedişlə isə aprel döyüşlərinin ikinci, üçüncü, dördüncü
mərhələsi qaçılmazdır. Düzdür, Azərbaycan tərəfi müharibə, hücum bəyanatları
verən kimi müxtəlif provokasiyalarla üzbəüz qalır. Amma sonuc etibarilə bu torpaqlar
nə zamansa qayıtmalıdır və Azərbaycanın siyasi hakimiyyəti də bütün iradəsini məhz
o məqsəd üzərindən səfərbər edib ki, işğal olunmuş torpaqlarımız tezliklə geri
qayıtsın. Ən əsası isə budur ki, Azərbaycan xalqı müharibədən qorxmur, aprel döyüşlərindəki
şücaəti daha kütləvi formada göstərməyə hazırdır". Millət vəkili qeyd etdi
ki, Azərbaycanın hərbi potensialı işğal altındakı torpaqları qaytarmaq gücündədir
və bu proses hər nə yolla olursa olsun, çox yaxınlarda reallaşacaq:
"Novruz Məmmədov tamamən haqlı olaraq söyləyir ki, artıq bıçaq sümüyə dirənib.
Bundan sonra düşünməyə çox az zamanımız var".
Politoloq Arzu
Nağıyev də münaqişə danışıqlar yolu ilə həlli olmasa, müharibənin qaçılmaz
olduğunu bildirdi. Xatırlatdı ki, münaqişənin həlli istiqamətində bir neçə yol
var. Bunlardan birincisi, diplomatik yoldur: "İkincisi, ATƏT-in Minsk
qrupunun həmsədrlərinin üzərlərinə götürdüyü missiyasıdır. Üçüncüsü isə təbii
ki, müharibə yoludur. Biz sülhsevər millətik. Dövlət olaraq da, hər zaman mövqeyimizi
açıqlayanda deyirik ki, münaqişənin sülh yolu ilə həllini tapmasını istərdik.
Amma bu yolla nəticə olmayanda öz suverenliyimizi, ərazi bütövlüyümüzü qorumaq üçün
hərbi yola əl atmağa məcbur oluruq. Bu gün Azərbaycan təbii ki, həm diplomatik
yollar, həm də ATƏT-in Minsk qrupuna həvalə olunan məsələlərlə məşğuldur. Amma
üçüncü - ehtiyat variantımız həmişə var". Politoloq düşünür ki, müharibədən,
hərbi toqquşmadan əvvəl münaqişənin sülh yolu ilə həlli mümkündür. Amma təəssüf
ki, ermənilər sülh yoluna gəlmirlər: "İllərdir danışıqlar aparılır, lakin
ortada heç bir nəticə yoxdur. Bu, təbii ki, Azərbaycanı qane etmir, edə də bilməz.
ATƏT-in Minsk qrupunun həmsədrliyində Birləşmiş Millətlər Təşkilatının beş
daimi üzvünün üçü təmsil olunur - Rusiya, Fransa, ABŞ. Buna baxmayaraq, real nəticə
əldə edilmir. Hər üç dövlət müxtəlif cür bəyanatlar verməklə kifayətlənirlər,
sanki münaqişənin həllində müsbət addımlar atmaq istəmirlər. Yəni verdikləri bəyanatlar
tam deklorativ xarakter daşıyır. Məlumdur ki, cənab prezident İlham Əliyev də dəfələrlə
təkrar edib ki, biz aprel döyüşlərində çox vacib qələbə əldə etmişik. Ermənilər
də bundan öz nəticələrini çıxardılar. Bu gün müxtəlif siyasi şoulara əl
atırlar. Çünki Serj Sarkisyan bu yollarla öz hakimiyyətini qoruyub saxlamağa
çalışır, müxtəlif addımlara qol qoyur. Yəqin ki, Dağlıq Qarabağ ərazisində separatçılara
verdiyi müstəqillik sözünü yerinə yetirə bilmədiyinə görə müxtəlif səpkili
addımlar atır. Kollektiv Təhlükəsizlik Müqaviləsi Təşkilatının İrəvanda keçirilən
son iclasında istər Putinin bəyanatı, istər Lukaşenkonun çıxışı, Nazarbayevin
iştirak etməməsi və s göstərdi ki, bu təşkilat vacib qurum deyil və beynəlxalq
qüvvələr tərəfindən tanınmır. Ona görə də bu istiqamətdə hər hansı köməyi edə
bilməz. Regionda nüfuz sahibi olmaq üçün Putin dəfələrlə münaqişənin həlli
istiqamətində bir sıra addımlar atmaq istədi. Lakin Ermənistanla olan münasibətlərinə
görə bu addım danışıqlar masasından o yana keçmədi. Danışıqlar xatirinə də
danışıqlara getmək bu gün Azərbaycana sərf etmir. Yəni biz bu gün şərt qoyub,
diqtə edən tərəf kimi çıxış edirik. Aprel hadisələrinin təkrarı olmasa da,
ehtiyat variant kimi, Qarabağ münaqişəsinin həlli, eyni zamanda suverenliyin
qorunması, işğalçıların ərazidən çıxarılması üçün bir antiterror əməliyyatı
keçirilə bilər".
Şəfa Tapdıq