“Qadın və İnkişaf” Mərkəzi maarifləndirmə tədbirlərinə başlayır
Azərbaycan
Respublikası "Qadın və İnkişaf” Mərkəzi Azərbaycan Respublikasının Prezidenti
yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi
ilə regionlarda "Regionlarda
reproduktiv sağlamlıq və ailə planlaşdırılması haqqında maarifləndirmə
tədbirlərinin təşkil edilməsi” adlı layihə həyata keçirir.
Layihənin
əsas məqsədi əhali, xüsusilə hamiləliyəqədərki dövrdə olan qadınlar və gənc ailələr
arasında reproduktiv sağlamlıq və ailə planlaşdırılması haqqında maarifləndirmə
işlərinin həyata keçirilməsi, mövcud problemlərin öyrənilməsi, təklif və
tövsiyələrin hazırlanaraq aidiyyatı qurumlara təqdim edilməsi və nəticə etibarı
ilə ana və körpə ölümünün sayının azalmasına, yoluxucu xəstəliklərin qarşısının
alınmasına nail olmaqdan ibarətdir.
Kürdəmir,
Ucar, Qusar və Xaçmaz rayonlarında keçiriləcək tədbirlərdə iştirakçılara
selektiv abortların qarşısının alınması, reproduktiv sağlamlıq, ailə planlaşdırılması,
doğuş qabağı və doğuşdan sonrakı xidmət, abortların ziyanı, erkən nikahların
fəsadları, yoluxucu xəstəliklərin qarşısının alınmasının yolları, hamiləlikdən
səmərəli qorunma üsulları barədə məlumatlar veriləcək, onların fikirləri
öyrəniləcək, rayonda qadın və uşaq sağlamlığının qorunması ilə bağlı mövcud
problemlər müzakirə ediləcəkdir. Eyni zamanda, maarifləndirmə işinin
səmərəliliyinin artırılması məqsədilə yerli kütləvi informasiya vasitələrinin
diqqətini bu məsələlərə cəlb olunması üçün tədbirlər görüləcəkdir. Seminarlarda
rayon icra hakimiyyətinin nümayəndəsi, səhiyyə şöbəsinin əməkdaşı, tibb
işçiləri, fertil yaşlı qadınlar, gənclər və müəllimlər iştirak edəcəkdir.
Layihənin
yekununda təklif və tövsiyələr hazırlanaraq aidiyyatı qurumlara təqdim
ediləcəkdir.