Putinlə Ərdoğan niyə Dağlıq Qarabağdan danışmadılar?
Soçidə Rusiya prezidenti Vladimir Putin və Türkiyə prezidenti Rəcəb
Tayyib Ərdoğan arasında 4 saatdan artıq davam edən görüşdə bir sıra məsələlər
diqqət mərkəzində olub. Görüş zamanı bəzi mürəkkəb mövzulara toxunulub ki,
onların detalları açıqlanmır. Görəsən açıqlamayan məsələlərə Dağlıq Qarabağ
problemi ilə bağlı müzakirələr də daxildirmi? Çünki səfərdən əvvəl Türkiyə
prezidenti Rəcəb Tayyib Ərdoğan verdiyi açıqlamada Dağlıq Qarabağ münaqişəsinin
həlli ilə bağlı həmkarı Putinlə müzakirələr aparacağını qeyd etmişdi. Ərdoğanın
Moskvaya səfəri baş tutdu, lakin ikitərəfli görüşün yekunları ilə bağlı mətbuat
konfransında bu məsələ ilə bağlı bir cümlə belə işlədilmədi. Görəsən hansı
səbəbdən Dağlıq Qarabağla bağlı açıqlama verilmədi?
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, Rusiya
prezidenti ilə görüş öncəsi Türkiyə prezidenti Rəcəb Tayyib Ərdoğan səfər
çərçivəsində ikitərəfli münasibətlərin geniş spektrinə dair məsələlərlə yanaşı,
eyni zamanda Ermənistan-Azərbaycan, Dağlıq Qarabağ münaqişəsi və onun həlli
yolları ətrafında da fikir mübadiləsi aparacağı ilə bağlı mövqeyini də
açıqlamışdı: "İki ölkə başçısının görüşü baş tutub, lakin görüşün nəticələri,
xüsusilə Dağlıq Qarabağla bağlı mətbuatda hər hansı bir danışıqların aparılması
ilə əlaqədar heç bir məlumat yoxdur. Burada iki məsələ ola bilər. Birincisi,
digər məsələlər o qədər önəm kəsb edib ki, Qarabağ məsələsinin müzakirəsinə
vaxt çatmayıb. Yəni, bu məsələ bir qədər diqqətdən kənarda qalıb. Yaxud da,
kifayət qədər konfidensial danışıqlar getdiyi üçün tərəflər razılaşıblar ki,
Dağlıq Qarabağ münaqişəsi ilə bağlı aparılan müzakirələr və onun nəticələri
haqqında mətbuata heç bir məlumat sızdırmasınlar. Amma Türkiyə prezidenti
Ərdoğanın Azərbaycanın mövqeyini hər zaman müdafiə etdiyi reallığını və eyni zamanda
sözünün üstündə duran dövlət başçısı imicinə sahib olduğunu nəzərə alsaq, hesab
edirəm ki, ikinci variant daha ağlabatandır. Yəni, bununla bağlı danışıqlar
gedib, sadəcə, bir sıra məlumatların ictimailəşdirilməsi bəzən problemin
həllinə deyil, buxovlanmasına xidmət edir. Bu nöqteyi-nəzərdən istisna deyildir
ki, bu mövzu ilə bağlı mətbuata açıqlama verilməməsi razılaşdırılıb”.
E.Nəsirov münaqişənin həlli ilə bağlı Rusiya və Türkiyə
prezidentlərinin hansısa bir məqamda razılaşmadığı üçün açıqlamanın verilməməsi
məsələsinə toxunaraq qeyd etdi ki, bir çox hallarda məsələlərin həllin ilə
bağlı razılaşma olanda da və olmayanda da məlumat verilmir: "O baxımdan ki,
hansısa razılaşmanın əldə edilməsi Dağlıq Qarabağ məsələsində tərəflərin,
indiki halda Ermənistanın qıcıqlandırılmasına səbəb ola bilər. Təbii ki, bunlar
hamısı fərziyyələrdir. Lakin hər halda hesab edirəm ki, Rəcəb Tayyib Ərdoğan
Dağlıq Qarabağ münaqişəsi ilə bağlı rusiyalı həmkarı ilə danışıqlarda
toxunmayacağını bəyan etsəydi, bu halda məsələnin üstündən sükutla keçə
bilərdi. Yox, əgər bunu səsləndiribsə, deməli, onun konkret niyyəti olub.
Düşünürəm ki, bu müzakirələrdə müəyyən pozitiv məsələlər ola bilər və sadəcə,
onun ictimailəşdirilməsi müəyyən mənada gərginliyə səbəb olacağından susmağa
üstünlük veriblər”.
"Atlas” Araşdırmalar
Mərkəzinin rəhbəri, politoloq Elxan Şahinoğlu bildirdi ki, Türkiyə prezidenti
Rəcəb Təyyub Ərdoğanın noyabrın 13-də Soçidə rusiyalı həmkarı Vladimir Putinlə
görüşündə açıqlandığı kimi iqtisadi və ticarət əməkdaşlığının uğurla
inkişafından, regional layihələrdən danışılıb: "Ancaq iki ölkə arasındakı bu
məsələlər əvvəldən də yoluna qoyulub və bunun üçün ayda iki dəfə görüşməyə
ehtiyac yox idi. Təbii ki, işlər öz axarı ilə davam edir, "Türk axını” Qara
dənizinin dibinə döşənir və qrafiki qabaqlayır, Rusiya Türkiyədə atom elektrik
stansiyasının tikintinə hazırlaşır, Rusiya bazarı Türkiyə pomidorları üçün
açılıb və s. Lakin diqqət etsək görərik ki, Ərdoğan Putinlə bu dəfə tamam
fərqli mövzuları müzakirə etmək istəyirdi. Misal üçün, elə götürək Dağlıq Qarabağ
məsələsini. Görüşdə böyük ehtimalla Dağlıq Qarabağ məsələsinə də toxunulub. Amma
çox təəssüflər olsun ki, buna qarşı tərəfin marağı olmayıb.Çünki ilk növbədə, Türkiyə prezidenti hələ bir həftə əvvəl demişdi
ki, Rusiya prezidenti ilə Dağlıq Qarabağ münaqişəsinin həllini müzakirə etmək
istəyir. Ərdoğan önəmli cümləsini əlavə etməyi də unutmamışdı: "Putin istəsə
münaqişə qısa müddətdə həll oluna bilər”. Ərdoğan Putinlə 4 saat qapalı görüş
keçirib. Mümkündür ki, həmin görüşdə Ərdoğan Qarabağ məsələsinə toxunub. Ancaq
Putinin bu mövzuda ümumi ifadələr işlətdiyi və dərhal başqa mövzuya keçdiyi
ehtimalı yüksəkdir. Kreml sahibi Ərdoğanın dediyi kimi Qarabağ münaqişəsinin
həllini sürətləndirəcək əsas şəxs olsa da, bu imkandan yararlanmaq istəmir.
Çünki Putin və Kreml rəsmiləri yaxşı anlayırlar ki, Türkiyə Azərbaycanın ərazi
bütövlüyünü dəstəkləyir və Dağlıq Qarabağ münaqişəsinin qısa müddətdə həllini
arzulayır. Amma Rusiyada fərqli düşündükləri üçün bu məsələ Ərdoğanla müzakirə
edilmədi”.
E.Şahinoğlu qeyd etdi ki, əgər müzakirə edilsəydi Türkiyə və Rusiya
prezidentləri görüşdən sonra keçirdikləri mətbuat konfransında Dağlı Qarabağ məsələsi
haqqında fikir bildirərdilər: "Bunun da iki səbəbi var. Birincisi, bu məsələdə
hər hansı razılıq olmayıb, ortaq məxrəcə gələ bilməyiblər. Digəri isə, Putin bu
məsələnin Ərdoğanla müzakirəsində maraqlı deyil”.
Bəxtiyar Məmmədli