Prezidentlərin Tehran görüşünün regional əhəmiyyəti nədən ibarətdir?
Bakı-Tbilisi-Qars dəmir yolu xəttinin açılışının ardınca
Tehranda Azərbaycan, Rusiya və İran prezidentlərinin iştirakı ilə üçtərəfli
görüş keçirildi. Prezidentlərin görüşündə regionda təhlüksəzilik, terrorçuluqla
mübarizə, iqtisadi sahədə əməkdaşlığın genişləndirilməsi və digər məsələlər
müzakirə olunub. Onu da qeyd edək ki, ilk belə üçtərəfli görüş Azərbaycanda
keçirilib.
Xəzər regionu ölkələrindən üçünün bu formatda
görüşündə, həmçinin "Şimal-Cənub” layihəsi barədə də fakir mübadiləsi aparılıb
və prezidentlərin yekdil qərarına əsasən bu layihənin tezliklə reallaşdırılması
qərara alınıb. Bu da bir daha Azərbaycanın regiondakı mövqeyinin əhəmiyyətini
ortaya qoymuş oldu.
Bütövlükdə isə Azərbaycan, Rusiya və İran arasında
üçtərəfli əməkdaşlıq iqtisadi baxımdan regiona hansı faydanı verə bilər?
Mövzu ilə bağlı "Kaspi” qəzetinə
açıqlamasında Milli Məclisin deputatı,
politoloq Aydın Mizəzadə bildirdi ki, Tehranda Azərbaycan, İran və Rusiya
prezidentlərinin iştirakı ilə üçtərəfli görüşün xüsusi əhəmiyyəti var:
"Birincisi, üç nüfuzlu dövlətin mehriban qonşuluq münasibətləri və birgə
layihələr üzərində çalışması regiona stabillik və təhlükəsizlik gətirir. Digər
tərəfdən, birgə iqtisadi layihələrin irəli sürülməsi hər üç ölkədə böyük sayda yeni
iş yerinin yaranmasına və "Şimal-Cənub” nəqliyyat dəhlizinin işə düşməsi
nəticəsində bir çox sahələrin inkişafına gətirib çıxaracaq. Eyni zamanda
ölkələrin bu qədər dostlaşması Xəzərin hüquqi statusunun müəyyənləşdirilməsində
mövqelərin yaxınlaşmasını təmin edəcək. Çox ciddi bir iqtisadi layihənin həyata
keçməsi müəyyən təcrübənin toplanmasına və gələcəkdə hər üç ölkə üçün maraq
doğuran yeni layihələrin işə düşməsinə səbəb olacaq. Ən əsası isə, Azərbaycan,
Rusiya və İran dünyaya mehriban qonşuluq əsasında bu gün stabilliyi təmin
etməyin və problemlərin həllinin mümkünlüyü mesajını vermiş oldu”.
AMizəzadə əlavə etdi ki, Azərbaycan geosiyasi
vəziyyətinə görə regionda çox əhəmiyyətli bir mövqedə yerləşir: "Ancaq
Azərbaycan rəhbərliyi bu gün sadəcə olaraq coğrafi üstünlükdən istifadə etmir.
Düşünülmüş daxili və xarici siyasət ölkənin problemlərinin həllinə, dostlarının
çoxalmasına və strateji fəaliyyətin aparılmasına səbəb oldu. Eyni zamanda
"Şimal-Cənub” layihəsinin həyata keçməsi Bakı-Tbilisi-Qars dəmir yolu xəttinin
daha böyük güclə işləməsinə səbəb olacaq. Çünki həm İrandan, həm Rusiyadan gələn
yüklərin bir qismini artıq Bakı-Tbilisi-Qars dəmir yolu xətti ilə yönləndirmək
mümkündür ki, hər iki ölkə buna böyük maraq göstərir. Həmçinin iki əhəmiyyətli
nəqliyyat dəhlizinin Azərbaycandan keçməsi ölkəmizin logistik mərkəzə
çevrilməsinə və nəqliyyata bağlı olan digər sahələrin intensiv inkişafına
gətirib çıxaracaq. Ümumən götürdükdə, Azərbaycanın bu gün nəqliyyat qovşağına
çevrilməsi ölkəmizin qeyri-neft sektorunun inkişafına da çox güclü təkan
verəcək”.
Millət vəkili,
professor Musa Qasımlı bildirdi ki,
prezidentlər İlham Əliyev, Vladimir Putin və Həsən Ruhaninin Tehranda görüşü
çoxşaxəli, çoxistiqamətli xarici siyasətimizi həyata keçirən diplomatiyamızın
uğurlu fəaliyyətinin konkret təzahürüdür. Onun sözlərinə görə, bu, bir daha
təsdiq edir ki, Prezident İlham Əliyevin yürütdüyü siyasət geniş və əhatəli
olub, Azərbaycanı təkcə Şərq və Qərb arasında deyil, eyni zamanda Şimal və
Cənub arasında qovşaq, şəbəkə ölkə halına gətirir, dövlətimizin rolunu artırır,
mövqelərini möhkəmləndirir: "Məhz bu əməkdaşlıq nəticəsində Şimal-Cənub
dəmiryol xəttinin işə düşməsi böyük əhəmiyyət daşıyacaq, ölkəmizi Fars
körfəzinə, Hind okeanına çıxaracaq və Ermənistan tərəfindən blokadada
saxlanılan Naxçıvanın da problemlərini həll etməyə yardımçı olacaq. Cənab Prezident İlham Əliyevin rəhbərliyi
altında dövlətimizin iştirak etdiyi və ya həyata keçirdiyi layihələr Azərbaycanın
beynəlxalq nüfuzunu daha da artırır, millətimizin mənəvi-psixoloji ruhunu və
özünəinam hissini yüksəldir”.
Politoloq Fikrət
Sadıxov isə qeyd etdi ki, Azərbaycan, Rusiya və İranın
dövlət başçılarının Tehran sammiti strateji əhəmiyyəti daşıyır: "Hesab edirəm
ki, Azərbaycan, Rusiya və İran prezidentlərinin Tehran sammiti uğurla
nəticələndi”. F.Sadıqov vurğuladı ki, sammit çərçivəsində enerji, nəqliyyat,
təhlükəsizlik, iqtisadi əməkdaşlıq və digər sahələrə dair mühüm müzakirələr
keçirildi. Onun sözlərinə görə, diqqət çəkən məqamlardan biri bu müzakirələrlə
yanaşı, həm də mühüm qərarların qəbul edilməsidir: "Bu qərarların bir hissəsi
nəqliyyat layihələri ilə bağlıdır. Artıq Astara-Rəşt dəmir yolunun Azərbaycan
tərəfdə olan hissəsi hazırdır. Fikrimcə, bu yolun çox böyük strateji əhəmiyyəti
var, çünki qlobal layihənin tərkib hissəsidir”.
Politoloqun sözlərinə görə, Azərbaycanın Rusiya və
İranla münasibətləri kifayət qədər stabildir və partnyorluq formatındadır:
"Məhz bu mənada Tehran sammitinin strateji əhəmiyyəti var. Həmçinin sammitin
regional əhəmiyyəti böyükdür. Prezidentlər regionda stabillik, terrorizmə qarşı
mübarizə, cinayətkarlığa qarşı birgə səyləri müzakirə edib. Bu da regionda
stabilliyin bərpa olunmasına və inkişafına böyük təkan verəcək”.
Bəxtiyar MƏMMƏDLİ