Piyada keçidlərində birtərəfli işləyən eskalatorlar
Bu dünya nərdivandır,
Qalxanda mehribandır,
Enəndə nə yamandır.
Bu dəfə
haqqında yazacağımız nərdivan şeirdə bəhs edilən nərdivandan fərqli olaraq, nə
qalxır, nə də ki, enir. Şəhərimizin bir çox küçəsində vətəndaşların yolu rahat
keçməsi üçün yeraltı piyada keçidləri tikilib. Bu, təbii ki, təqdirəlayiq bir
işdir. Amma bir neçə məkanda bəzi piyada keçidlərindəki eskalatorların fəaliyyətini
tam yerinə yetirmədiyini müşahidə etdik. Ya enən eskalator işləyir, ya da əksinə
olur. Və bu da insanlar üçün müəyyən çətinliklər yaradır. Belə ki, uşaq arabası
ilə gələnlər, yaşlılar, pilləkənləri qalxarkən və ya düşərkən əziyyətlə üzləşməli
olurlar, məcburən kiminsə köməyinə ehtiyac duyurlar. Ən çox istifadə etdiyimiz
yeraltı keçidlərdən biri də Hüseyn Cavid prospektində olan piyada
keçididir. Üç çıxışı olan bu keçid natəmizliyi
və eskalatorlarının iş fəaliyyətinə görə diqqətimizi cəlb etdi. Əksər yeraltı
keçidlərdə ikitərəfli - yəni həm qalxan, həm enən olan eskalatorlar olduğu
halda, burada birtərəfli fəaliyyət göstərir. Yəni sadəcə, eskalatorla qalxmaq
olar, düşmək isə... Və bundan əlavə, artıq uzun müddətdir ki, eskalatorlardan
biri ümumiyyətlə, işləmir. Füzuli küçəsi boyunca yerləşən yeraltı keçidlərin
hamısında isə eskalatorlar ikitərəfli olsa da, onlardan yalnız biri işlək vəziyyətdədir.
Eskalatorla yalnız qalxmaq mümkündür. Yeraltı keçidlərdə eskalatorların niyə bu
vəziyyətdə olduğunu öyrənməyə çalışdıq.
İlk olaraq keçidə nəzarət edən şəxslə
danışdıq. O, eskalatorun servisində problem olduğunu və
artıq uzun müddətdir işləmədiyini dedi. Həmçinin bu problemi aidiyyəti qurumlara
bildirsə də, hələ ki, bir tədbir görülməyib. "Artıq uzun müddətdir ki, çıxışın
biri işləmir. Vətəndaşlar da bundan gileylənirlər. Onlar problemlə bağlı mənə
müraciət edəndə, mən "Azəryolservis”ə bu haqda məlumat verdim. Amma uzun müddətdir
ki, bununla əlaqədar heç bir iş görülmür”.
Məsələ
ilə maraqlandığımızı görən vətəndaşlar da yaxınlaşaraq iradlarını bildirdilər. Solmaz Abdullayeva keçidin daha çox natəmizliyindən
şikayət etdi. O, bildirdi ki, insanların ən çox istifadə etdiyi keçid olmasına
baxmayaraq, burada təmizliyə baxan yoxdur. Fərman dayı yaşlı olduğunu, hər dəfə
bu keçiddən keçərkən əziyyət çəkdiyini dedi. "Yaşlı adamam, yerin üstündən keçə bilmirəm. Məcbur
yeraltı keçiddən istifadə edirəm. Keçidin də vəziyyətini özünüz görürsünüz, natəmizlik
baş alıb gedir, eskalatorların biri işləyəndə, o biri işləmir. Beş gün işləyir,
on gün işləmir. Buna kimsə nəzarət etməlidir
ya, yox? Lazımı qurumlar niyə bu problemi aradan qaldırmaq üçün bir tədbir
görmür ?”
Elə Fərman
dayının verdiyi sualların cavabı bizə də maraqlı gəldi. Bunun üçün də, "Azəryolservis”lə
əlaqə saxlamaq qərarına gəldik.
"Azəryolservis” ASC-nin mətbuat xidmətinin rəhbəri Anar Nəcəfli deyir ki,
eskalatorlar daim işlək vəziyyətdə
olan mexanizmlər olduğundan onların
sıradan çıxması, xarab olması normal haldır: "Əgər təmiri mümkündürsə, biz dərhal
onu təmir edib yenidən vətəndaşın
istifadəsinə veririk. Yox, əgər təmiri mümkün deyilsə və ya hər hansısa bir
avadanlığı dəyişilməlidirsə, bu zaman həmin təchizatı xaricdən sifariş edirik. Həmin
avadanlığın da gəlməsi, köhnəsi ilə əvəz edilməsi bir az vaxt alır. Çox güman
ki, ona görə həmin eskalator fəaliyyət göstərmir”.
Günel Azadə