Pərvin Kərimzadə: İşğalçı Ermənistan heç bir sahədə Azərbaycanla rəqabət apara bilməz
"Dahi şəxsiyyət Heydər Əliyevin xaos və anarxiyadan, dövlətçiliyin itirilməsi
təhlükəsindən xilas etdiyi, dinamik islahatlar yoluna çıxardığı
müstəqil Azərbaycan bu gün
sabit şəraitdə sürətlə
inkişaf edir. Ulu öndərin layiqli davamçısı Prezident İlham
Əliyevin rəhbərliyi ilə həyata keçirilən məqsədyönlü sosial-iqtisadi siyasət
nəticəsində ölkəmiz dünyanın ən sürətlə inkişaf edən, yeniləşən,
müasirləşən, demokratikləşən dövlətinə çevrilib”.
Bu barədə "Kaspi”
qəzetinə açıqlamasında millət vəkili Pərvin Kərimzadə bildirib. O qeyd edib ki,
dinamik inkişaf yolunda əmin addımlarla irəliləyən Azərbaycan uğurlu
idarəetmə nəticəsində beynəlxalq
aləmdə mövqeyini əhəmiyyətli dərəcədə gücləndirib, istənilən
müstəqil dövlətin həsəd apara biləcəyi zirvələri
fəth edib.
Deputat P.Kərimzadə deyib ki, Azərbaycanda
vətəndaşların
mənafeyinin və hüquqlarının üstünlüyünü hədəf seçmiş islahatlar, enerji, nəqliyyat sferalarında, xarici
siyasətdə qazanılan bənzəri olmayan uğurlar bir-birini
tamamlayaraq, dövlətin dayanıqlı inkişafında harmoniya yarada bilib. Onun
fikrincə, qazanılan uğurlarla, əldə edilən
nailiyyətlərlə yanaşı, Ermənistan-Azərbaycan, Dağlıq Qarabağ
münaqişəsi ən ağrılı problem olaraq
bir an da olsun diqqətdən kənarda qalmır: "Prezident
İlham Əliyev yanvarın 13-də 2019-cu ilin yekunlarına həsr olunmuş müşavirədə
tutarlı, kəsərli faktlarla beynəlxalq aləmdə mövqeyini dayanmadan möhkəmləndirən
ölkəmizin Ermənistan-Azərbaycan, Dağlıq Qarabağ münaqişəsinin ədalətli həllinə
gedən yolun bir addımlığında dayandığını nəzərə çatdırıb. Dövlət başçısı işğalçı
Ermənistanın heç bir sahədə Azərbaycanla rəqabət aparmaq imkanında olmadığını, bütün əsas parametrlər üzrə ölkəmizin işğalçı
Ermənistanı böyük fərqlə qabaqladığını diqqətə çatdırıb. Azərbaycanın
2011-ci ildə 155 ölkənin dəstəyi ilə BMT Təhlükəsizlik Şurasına qeyri-daimi üzv
seçilməsini xatırlayan Prezident İlham Əliyev bildirib ki, 2011-ci ildə bizdən
əvvəl Ermənistan da öz namizədliyini vermişdi. Ancaq biz namizədliyi verəndən
sonra onlar götür-qoy etdilər və gördülər ki, bizimlə rəqabətdə onlar 100 faiz
uduzacaqlar, çox sakitcə, qorxaqcasına öz namizədliyini geri götürdülər. Çünki
bilirdilər ki, BMT-də biz onlara böyük fərqlə qalib gələcəyik və beləliklə,
onlar rüsvay olacaqlar. Yəni, bu, 9 il bundan əvvəl baş vermiş hadisədir və onu
göstərir ki, beynəlxalq müstəvidə Ermənistanın və Azərbaycanın hörməti və
çəkisi nə dərəcədə fərqlənir. BMT Təhlükəsizlik Şurasına seçilməyimiz bizim
böyük siyasi və diplomatik qələbəmizdir və eyni zamanda, Ermənistan üzərində
böyük qələbə idi. "Dünyanın ən güclü orduları
reytinqində Azərbaycan 52-ci, Ermənistan isə 96-cı yerdədir. O cümlədən hava
gücü üzrə Azərbaycan 63-cü, Ermənistan 86-cı yerdədir. Dəniz gücü üzrə
Azərbaycan 67-ci yerdədir, Ermənistanda dəniz yoxdur. Tank gücü üzrə Azərbaycan
32-ci, Ermənistan 78-ci yerdədir. Mənbə "Global Firepower 2019” hesabatıdır” - ölkə başçısının
səsləndirdiyi bu rəqəmlər işğalçı Ermənistanın heç bir sahədə Azərbaycanla
rəqabət aparmaq imkanında olmadığının təsdiqidir”.
Millət vəkili P.Kərimzadə müşavirədə Azərbaycan
Prezidenti İlham Əliyevin diqqətə çatdırdığı faktlara istinad edərək vurğulayıb
ki, makroiqtisadi
sahədə göstəricilər Azərbaycanın inkişafının, tərəqqisinin
işğalçı Ermənistan ilə müqayisəedilməz dərəcədə yüksək olduğunu nümayiş
etdirir. Deputatın sözlərinə görə, təkcə sosialyönümlü
islahatlarla zəngin 2019-cu ilə nəzər yetirmək kifayətdir ki, Azərbaycanda əməkhaqları və
pensiyaların işğalçı qonşu ölkə ilə müqayisəedilməz dərəcədə yüksək olduğunun şahidi
olasan: "Cənab Prezidentin dilə gətirdiyi statistik, real faktlardan bir daha
əyan oldu ki, minimum pensiyaya görə Azərbaycan MDB-də ikinci, Ermənistan doqquzuncu
yerdədir. Minimum pensiyanın alıcılıq qabiliyyətinə görə Azərbaycan MDB-də
birinci, Ermənistan onuncu, yəni axırıncı yerdədir. Azərbaycan Prezidentinin
müşavirədə səsləndirdiyi rəqəmlər, ötən ilin oktyabr ayının 3-də Rusiyanın Soçi
şəhərində keçirilmiş "Valday” Beynəlxalq Diskussiya Klubunun XVI illik iclasında
dərin məzmunlu çıxışı hər bir Azərbaycan vətəndaşını qürurlandırır. Eyni
zamanda Prezident İlham Əliyevin milli maraqlarımız naminə sərgilədiyi
qətiyyətli mövqeyi işğalçı Ermənistanın avantürist hakimiyyətinin baş nazirinin öz ölkəsinin "uğurları”
haqqında danışarkən Ermənistanı Azərbaycanla müqayisə etməyə haqqı
çatmadığının tutarlı faktlarla daha bir təsdiqidir. "Bilirsiniz, əvvəllər mən
Azərbaycanı heç bir ölkə ilə heç vaxt müqayisə etməmişəm. Biz işimizi kimisə
qabaqlamaq üçün görmürük. Biz işimizi Azərbaycan xalqı, dövləti naminə görürük,
sadəcə olaraq, Ermənistanın növbəti yalanlarını ifşa etmək üçün məcbur olub, bu
müqayisəli təhlili sizə və Azərbaycan xalqına təqdim etdim. Özü də mənim
gətirdiyim rəqəmlər həqiqəti əks etdirir, Ermənistanın gətirdiyi rəqəmlər
növbəti əfsanədir, növbəti yalandır"- Ölkə Başçısının reallığa, humanizmə
əsaslanan bu fikirləri müstəqil Azərbaycanın siyasi və iqtisadi sahələrdə
sabitliyinin əmin əllərdə olduğundan xəbər verir”.
Alpər TURAN