“PEN Pinter 2016” ədəbi mükafatının qalibi açıqlandı
Mükafatı
olduqca böyük təvazökarlıqla qarşılayan kanadalı yazarın insan hüquqlarını
müdafiə edən yazılarına görə münsiflər heyəti tərəfindən ən layiqli namizəd kimi
təsdiqləndiyi bildirilir. "Guardian” xəbər verir ki, "Nobel” ədəbiyyat
mükafatına layiq görülmədikcə ədəbi çevrədə mükafat qoymayan kanadalı müəllif
Marqaret Etvud ona göstərilən bu etimad qarşısında boynubükük qaldığını deyib.
"Yer kürəsində söz azadlığından yararlanan və qanunsuzluğa qarşı etiraz səsini
qaldıran minlərlə insana simvol olduğu üçün” seçilməkdən böyük qürur hissi
keçirdiyini deyən yazar siyasi fəaliyyətinin ədəbi fondlar tərəfindən də
izlənilməsindən məmnun olduğunu bildirib.
"PEN
Pinter” mükafatı yeddi il əvvəl Nobel mükafatlı dramaturq Harold Pinterin
şərəfinə təşkil edilib və ədəbi fəaliyyəti ilə yanaşı, "bəşəri həssaslığı” ilə
seçilən və ictimai nüfuzlu fiqur kimi üstünlüyündən insan hüquqlarının
müdafiəsi üçün istifadə edən yazarlara təqdim edilir. Bir sözlə, fond Harold
Pinterin bir yazarda axtardığı əsas xüsusiyyətləri – cəsur, kəskin fikirli,
yolundan dönməyən, dərin intellektual mətnlər ortaya qoyan, həyatın və
cəmiyyətlərin əsl həqiqətlərini əks etdirən hekayələrə müəlliflik edən - özündə
cəmləyən ədiblərə üstünlük verir. "Nümunəvi ictimai intellektual”, "siyasi
etirazların qətiyyətli dəstəkçisi” kimi təqdim edilən Etvud Pinteri şəxsən
tanıyan biri kimi bu mükafatın onu daha da ürəkləndirəcəyini bildirib: "Pinteri
şəxsən tanımaq və onunla birgə işləmək mənə nəsib olub. Mən onu tanıyanda
1989-cu il idi, "Əldəqayırma nağıl” ("The Handmaid’s tale”) əsərinin ekran
versiyası üzərində işləyirdi. Hətta ömrünün o çağlarında belə Pinter incəsənət
xadimlərinə qarşı təzyiqlərə, repressiyalara, insan hüquqlarının pozulması
hallarına göstərdiyi həssas reaksiyadan bir zərrə belə azaltmamışdı, bu tip
məsələlərdə alovlu üsyankar idi. Məncə, minlərlə insanın vəkili olmaq kimi
şərəfli bir statusa layiq görülmək hamının arzusudur. Bu il Yer kürəsində
haqsızlıqla mübarizə aparan minlərlə insanın vəkili seçildiyim üçün fəxr
edirəm”.
"Man
Booker” mükafatlı yazarı bu mükafata layiq görən fondun münsiflər heyətinin
sədri Mauren Frili mətbuata verdiyi açıqlamada deyib: "Öz karyerasını quran,
tutduğu yolda yüksəldikcə-yüksəlməyə can atanların arasında bütün bəşəri və
ictimai məsələlərə zaman ayıra, hamıya baxa, hər şeyi görə bilən Marqaret Etvud
o qədər uğurludur ki, seçim etmək o qədər də çətin olmadı. O sadəcə roman
ardınca roman yazmaq prinsipləri üzərində durmur, onları sınayır, insanların
zövqünü tutmağa çalışır. Onun ən müxtəlif sahələrdə baş qaldıran etiraz
kampaniyalarında roman yazarkən göstərdiyi kimi yüksək fədakarlıq, həssaslıq
nümayiş etdirməsini, əsl hekayə yazarına yaraşan dərin emosional reaksiyalar
sərgiləməsini görməmək mümkün deyil. Etvud bizim hamımız üçün ilham mənbəyidir,
onun bütün dünyanı həvəsləndirməyə kifayət edəcək qədər enerjisi var.
Pinterin
xanımı, yazıçı Antonia Freyzer isə Etvudun təvazökar davranışlarından heç
təəccüblənmədiyini bildirib: "Pinter ona həmişə xüsusi hörmət bəsləyirdi – həm
yazar kimi, həm şəxsiyyət kimi, həm də əsl mübariz kimi. Əgər Etvudun bu
mükafatı alarkən, göstərdiyi təvazökarlığı, Pinterin adını daşıyan bir mükafata
layiq görülməkdən duyduğu qüruru görsəydi, "buna ən çox o layiqdir” deyərdi”.
Məlumat
üçün qeyd edək ki, Marqaret Etvud Britaniya Milli Kitabxanasının (BMK) cari
ilin oktyabr ayında keçiriləcək mərasimində də oxşar mükafat alacaq. Belə ki,
BMK-nın mükafat fondu "2016-cı ilin Beynəlxalq miqyaslı cəsur yazar” mükafatına
Etvudu layiq gördüyünü açıqlayıb.