Paşinyanı bitirən müsahibə
Nikol Paşinyanın dünyaca məşhur BBC-nin proqramında biabırçı duruma
düşməsi Ermənistanda şok effekti doğurub. Jurnalistin sualları qarşısında aciz
qalan baş naziri siyasilərdən tutmuş, partiya sədrləri, media nümayəndələri
topa tutmaqdadır. Ermənistanın baş naziri Britaniyanın BBC telekanalının
"HardTalk” proqramına müsahibə verərək ölkənin daxili həyatı, xüsusən siyasi həyatı,
Qarabağ münaqişəsinin həlli ilə bağlı aparılan danışıqlar prosesi, xarici siyasət
məsələləri, epidemiya ilə mübarizə vəziyyəti və digər məsələlərə toxunub. Gözlənildiyi
kimi, Paşinyan, məsələn, ötən il Ermənistanın Avropada ən yüksək iqtisadi
inkişafa sahib olduğunu, iqtisadi uğurla yanaşı, Ermənistanın demokratiya, söz
azadlığı, məhkəmə müstəqilliyi və antikorrupsiya siyasətində də böyük irəliləyişlər
əldə etdiyini bildirib. "Hraprak” nəşri yazır ki, yaxın gələcəkdə həm iqtisadi,
həm də siyasi analitiklər Paşinyanın müsahibəsinin həmin hissəsinin reallıqla nə
qədər əlaqəli olduğunu deyərək, daha aydın bir mənzərə təqdim edəcəklər. Öz
növbəsində erməni kütləvi informasiya vasitələrinin məlumatına görə, Erməni
Milli Konqresinin (EMK) üzvü Levon Zurabyan sosial şəbəkədə yazdığı statusda
bildirib ki, baş nazir Nikol Paşinyan BBC-nin "HardTalk” proqramına müsahibə
verməklə Ermənistanın imicinə zərbə endirmiş oldu. EMK funksioneri Paşinyanın
müsahibəsini sərt tənqid edərək, bunun onda çox pis təəssürat yaratdığını
vurğulayıb. Bu müsahibəni, ilk növbədə Ermənistanın imici nöqteyi-nəzərindən fəlakət
adlandırıb. "Buna bir neçə səbəb var – cavabların məzmunu, ingilis dilini kifayət
qədər bilməməsi, baş nazirin əvvəlki addımları və indi onları təmizə
çıxarmaları və s-dir. Mən hesab edirəm ki, ən faciəvi olan onun Dağlıq Qarabağ məsələsinin
mahiyyətini bilməməsi, münaqişənin həlli ilə bağlı öz mövqeyinin, dəqiq siyasətin
yoxluğudur”, - deyə Zurabyan vurğulayıb. EMK nümayəndəsi qeyd edib ki, Ermənistanın
imici nöqteyi-nəzərindən Paşinyanın proqramda çıxışı, ümumiyyətlə, baş verməli
deyildi. Onun sözlərinə görə, baş nazir suallardan heç birinə savadlı formada
cavab evrə bilmədi. Məlumat üçün bildirək ki, son günlərə qədər Nikol Paşinyan
və Levon Zurabyan "barrikadanın” bir tərəfində idilər. 2008-ci il prezident
seçkilərində isə Levon Ter Petrosyanın komandasında təmsil olunurdular. Sonra
isə EMK-nin fraksiyasının tərkibində təmsil olunurdular. Lakin sonradan yolları
ayrıldı.
2003-2014-cü illərdə BBC-nin jurnalisti olmuş Mark Qriqoryan isə
hesab edir ki, bu verilişdə qonaq olmaq böyük məsuliyyətdir. Onun sözlərinə görə,
müxtəlif ölkələrin rəhbərlərini çətin söhbətə dəvət edirlər və çox çətin
suallar verirlər. "Əminəm ki, Nikol Paşinyan düzgün formada hazırlaşsaydı, daha
sərfəli təəssürat buraxardı”, - deyə Qriqoryan qeyd edib. Onunla razı olan erməni
politoloq Ara Vardanyan yazıb ki, bu gün biz hakimiyyət daxilində olan müxtəlif
komandaların çox ciddi mübarizəsinin şahidiyik: "Biz Nikolu hakimiyyətdən
uzaqlaşdırmaqla məşğul olduğumuz halda, o, Sorosla ciddi fikir ayrılıqlarına
girib. Fikir ayrılıqlarının əsas səbəbi ona qarşı qoyulmuş gündəmdən
yayınmaqdır. Bu yayınma öz növbəsində Ermənistanda çox ciddi və ideoloji
müxalifətin mövcudluğu ilə əlaqəlidir”. Ermənistan parlamentinin "İşıqlı Ermənistan”
fraksiyasının rəhbəri Edmon Marukyan "Məgər hakimiyyətin reytinqi düşüb, keçmiş
səlahiyyətli şəxslər nə haqqında danışırlar?” sualına cavab verərkən deyib ki,
sosial sorğuları izləyirik, görürük, bunlar göstərir ki, əgər sabah seçkilər
olsa, üç parlament qüvvəsindən başqa bu gün minimum həddi keçən qüvvə yoxdur, yəni
inqilabdan sonra bu baxımdan siyasi sahədə böyük yerdəyişmələr yoxdur. Marukyan
qeyd edib ki, müxtəlif məyusluqlara görə Nikol Paşinyanın reytinqi azalmağa,
aşağı düşməyə başlayır. "Ölkə daxilində populizm silahını rəhbər tutduğunda,
anlaşılandır ki, hakimiyyətdə qalmağa və qeyri-milli, qeyri-dövlət siyasətinin
kök salması məsələsini həll etməyə çalışırsan. Ancaq BBC-də eyni metodla və
eyni manipulyasiyalarla beynəlxalq auditoriyanı, ictimaiyyəti də çaşdırmağa
çalışdığında, dövlətin reytinqini aşağı salırsan”, - deyə o qeyd edib.
"Britaniyanın BBC telekanalının məşhur verilişinə müsahibə növbəti dəfə sübut
etdi ki, Nikol heç bir mövzu ilə bağlı dərin biliyə sahib deyil, bundan başqa,
heç bir əlaqəyə malik olmadığını özünə aid etməkdə tərəddüd etmir, habelə həyata
keçirmədiyi və uğursuz olmuş vədlərini unudur”. Bunu isə erməni politoloq Qaqik
Hambaryan "Facebook” səhifəsində yazıb. "Nikol müsahibə zamanı Qarabağı
(qondarma qurum) danışıqlar masasının ətrafına daxil etmək barədə uğursuz planına
tamamilə toxunmadı”, - deyə o qeyd edib.
"BBC-nin "Hard Talk” formatı çox vacib xüsusiyyətə malikdir: məhz
başlanğıcdan xəbərdarlıq edirlər ki, ağır və əlverişsiz suallar olacaq”. Bunu
isə erməni siyasi-ictimai xadim Mihran Hakobyan öz "Facebook” səhifəsində
yazıb. "Yaxşı, ölkəni bu qədər sevməmək olar? Həmvətənlərə bu qədər nifrət etmək
olarmı ki, bu adam hamını kədərlənməyə məcbur edir? Niyə, xalqımızın hansı
günahına görə bu adam ingilis dilli auditoriya qarşısında bilmədiyi dildə özünü
alçaltmağa razı oldu?”, - deyə o qeyd edib. Erməni politoloq Stepan Danielyan "Nikol
Paşinyanın BBC-nin verilişi zamanı səsləndirdiyi cavabların məzmunu çox
primitiv idi, bir çox hallarda zəif cavablar idi” deyib. Erməni politoloqun
sözlərinə görə, bu göstərir ki, Nikol Paşinyan Qarabağ məsələsində ağır
danışıqlara gedir, ancaq bunlara hazır deyil. "Ermənistanın ciddi addımlara
qadir olmayan, siyasət tarixinə bələd olmayan populist rəhbərə sahib olduğu
növbəti dəfə təsdiqləndi”, - deyə Stepan Danielyan qeyd edib.
Azər NURİYEV