Paşinyan hakimiyyətdə nə vaxta qədər qalacaq?
Ermənistanda baş nazirin
yerini tutmağa namizədlər hazırlanır
Ermənistanın kapitulyasiyasından sonra əksəriyyət hesab edirdi ki,
ölkədə yaşanan xaotik vəziyyət hakimiyyətin devrilməsi ilə nəticələnəcək. Və
Paşinyanın sayılı günləri qalıb. Lakin artıq iki həftədən çox vaxt keçib və baş
nazir nəinki kürsüsündə qalıb, hətta aktiv şəkildə vəziyyəti öz xeyrinə
dəyişməyə çalışır. Nəyin hesabına - həbslər, etirazların susdurulması ilə. Bunun
müqabilində ona "dur” deyən də yoxdur. Hələ ki, baş nazir sosial əhəmiyyətli 15
bənddən ibarət proqram irəli sürməklə vəziyyətdən çıxmağa çalışır. Bununla da
vətəndaşları "satın almağa” çalışmaqla, nəticədə vəziyyəti tam şəkildə öz
xeyrinə dəyişmək istəyir. İlk növbədə vəziyyətin nizamlanması üçün altı ay vaxt
istəyir və bu müddət ərzində koronavirusla mübarizəni önə çəkəcək. Görünür,
əvvəlki mübarizəsini uğurlu sayır. İnfrastrukturu bərpa etməyə, Qarabağdan
Ermənistana qaçanları geri qaytarmağa, bərbad vəziyyətdə olan ordunu yenidən qurmağa,
iqtisadiyyatı bərpa etməyə çalışacaq.
Rusiyanın "Kafkazki uzel” nəşri yazır ki,
hətta bura demoqrafik problemi həll etmək də daxildir. Sonda isə deyib ki, ən
əsas istəyi Ermənistanda demokratik sabitliyi qoruyub saxlamaq, hakimiyyətə
təhlükə olan mənbələri zərərsizləşdirməkdir. Beləliklə, bəlli olur ki, Paşinyan
üçün əsas hədəf hakimiyyətin qorunub saxlanılması olacaq. Bu hədəf kimisə
təəccübləndirəcəkmi? Çətin ki. Bu şəxs dəfələrlə sübut edib ki, məhz hakimiyyət
onun üçün bir nömrəli məsələdir, hətta yeganə hədəfdir. Onun lap əvvəldən
hakimiyyətdə nəyin bahasına olursa-olsun qalmaq istəyi, hətta bunun üçün
zorakılığa gedəcəyi də çoxdan bəlli idi. Bu səbəbdəndir ki, cəbhədəki əsgərlərə
çağırış edərək, geri dönüb opponentlərini yerində oturtmağa səsləməkdən belə
çəkinmədi. Bu, çoxlarını qəzəbləndirsə də, heç kimi təəccübləndirmədi. Hazırda
onun aktiv tərəfdarlarının olmadığı ilə də heç kimi təəccübləndirmək olmaz.
2019-cu ildən bu yana Paşinyan 2000 nəfərlik bir aksiya belə keçirməyə müvəffəq
olmayıb. Noyabrın 18-də Paşinyanın aksiyasına cəmi 500 adam gəldi ki, onların
da çoxu hərbçi idi. Baş nazir səsləndirdiyi bəyanatlarda baş verənlərdə əvvəlki
hakimiyyətin günahkar olduğunu bildirir. Bəlli olur ki, Qarabağda fərarilik pik
həddə olub, satqınlar baş alıb gedib. Paşinyan o dərəcədə qorxub ki, aksiyaya
çoxsaylı mühafizəçiləri ilə gəlib.
Bəs real vəziyyət necədir? "Baqramyan 26” teleqram kanalının
keçirdiyi sorğunun nəticələrinə görə, 36 faiz respondent Paşinyanın qalmasını, 64 faiz isə onun
getməsinin tərəfdarıdır. Maraqlıdır ki, bu teleqram kanal Paşinyanı
dəstəkləyir. Məsələ ondadır ki, müxalifət də hələ liderini müəyyənləşdirə
bilməyib. Nikol Paşinyanın istefasını tələb edən 17 partiyanın nümayəndələri
aktiv şəkildə rus elitasının nümayəndələri ilə işləyirlər ki, onlarla asan iş
münasibətlərinə malik olan yeni namizədi təklif etsinlər. "Joğovurd” nəşrinin
məlumatlarına görə, 17 partiya üç namizədi - Vazgen Manukyan, Artur Vanetsyan
və Hrant Baqratyanı müzakirə edib. Qeyd olunan namizədlərdən, Rusiya Vazgen
Manukyana üstünlük verib. "Üstəlik, məlumatlarımıza görə, Vazgen Manukyan bu
yaxınlarda öz namizədliyini müzakirə etmək üçün Moskvaya gedib. Lakin bu, yaxın
gələcəkdə onun Ermənistanın baş naziri olacağı demək deyil, sadəcə o, qarşıdakı
aylarda idarəetməyə keçidə və həm də azad, ədalətli seçkilərin keçirilməsinə
zəmanət verəcək müvəqqəti hökumətin rəhbəri olacaq. Yəni Manukyan qısamüddətli
hökumətin rəhbəri olacaq. Nə qədər təəccüblü görünsə də, bütün bunlara paralel
olaraq Paşinyanın Ermənistan vətəndaşları arasında xeyli sayda tərəfdarının
olduğu məlum olur. Nəşr bu mövzu ətrafında Vazgen Manukyanla danışmağa çalışıb,
lakin sonuncu qəti şəkildə suallara cavab verməkdən imtina edərək bildirib ki,
müsahibələr vermir”, - deyə nəşr yazır.
"Hayastan” ümumerməni fondunun keçmiş direktoru Ara Vardanyan isə hesab
edir ki, Nikolun vəzifəsini üzərinə götürə bilən insan var. Vardanyan bildirib
ki, Ermənistanın növbəti rəhbərinin indiki, gələcək və ya keçmiş şəxs
olacağının fərqi yoxdur, vacib olan bu adamın ölkəni bu vəziyyətdən çıxara
bilməsidir. "Bu gün Ermənistan həm iqtisadi, həm də investorlarla yaranmış
vəziyyətlə ən iyrənc vəziyyətdədir, iqtisadiyyatımız məhv olub. Bəli, düşünürəm
ki, həm Ermənistanda, həm də xaricdə bütün bunları dəyişə biləcək adam var. Lakin
demək istəyirəm ki, əziz gənclər, siz Baş nazir ola bilməzsiniz, Nikol Paşinyan
olubsa, bu o demək deyil ki, eyni səhvi ikinci dəfə təkrarlamalıyıq”, - deyə
Vardanyan qeyd edib. Əlavə edib ki, xalq deyimi deyir ki, asılanın evində ipdən
danışmırlar. Buna görə də Ermənistan dövləti və erməni xalqı məğlub olmuş baş
nazirlə yola davam edə bilməz. Paşinyan baş nazir stulundan yapışdığı üçün
qələbədən danışmaq mümkünsüzdür, hətta qələbə haqqında düşünmək belə
qeyri-mümkündür. "Paşinyan bir an öncə uzaqlaşmalıdır ki, Ermənistan və erməni
xalqı yaşamaq, gələcək, gələcək qələbələr haqqında düşünməyə başlasın”, - deyə bəyan
edib.
Parlamentinin keçmiş vitse-spikeri Arpine Hovhannisyan "bugünkü
həqiqət odur ki, xain Paşinyan İlham Əliyevin tərtib etdiyi kağızı o qədər cəld
imzalayıb ki, baxmaqdan və kəndin rəqibə keçib-keçmədiyini görməkdən narahat
olmayıb” - deyə bəyan edib. "Bunun üçün insanlar birdən öyrənirlər ki, onlar
mühacirət yolunu tutmalıdırlar. Bugünkü həqiqət odur ki, xain bütün 44 gün
ərzində insan haqqında düşünməyib, istər bu insan əsir olsun, istər yaralı
olsun, istər qurban olsun, yaxud köçürülən dinc sakin olsun. Gözlənilən
gerçəklik odur ki, nikol və nikolizm gedəcək. Geri sayım başlayıb. Tezliklə”, -
deyə o qeyd edib. Bildirib ki, artıq ifşa edilmiş xain rəhbərini vəzifəsindən
azad etmək iqtidarında olmayan bir xalq Qarabağı necə saxlaya bilərdi, bu
barədə düşünübsünüz? Axı 30 il ərzində faktiki olaraq dövlət yaratmağı elə də
bacarmayan həmin bu xalq idi: "Kobud səslənir, amma buna baxmayaraq, həmişə
demişəm ki, erməni xalqının böyük əksəriyyəti sadəcə dəlilərin (giclər və
axmaqlar) toplusudur və bu zavallılar öz vətənini qoruya və saxlaya
bilməyəcəklər. Nikol öz bandası ilə təkcə cahil diletantların qrupu yox, həm də
yadlara satılmış agentlər idi”. Populist dedikdə, əsasən Ermənistanın
fəaliyyətdə olan hakimiyyətindən istefa tələb edən daxili siyasi müxalifətçilər
nəzərdə tutulur. Onlar, adətən erməni xalqına istinad edərək deyirlər ki,
hakimiyyətdən istefa tələb edən təkcə onlar yox, həm də bütün xalqdır. Və onlar
yanılmırlar, çünki erməni xalqı həmişə hakimiyyətin istefasının tərəfdarıdır. Ekspert
vurğulayır ki, erməni müxalifətinin populizmi Şuşanın süqutundan və bədnam
sənədin imzalanmasından dərhal sonra başladı. "Ağrılısı odur ki, təkcə hakimiyyət
və müxalifət yox, həmçinin onlara bitişik olan KİV-lər və jurnalistlər də
populistdir.
Belliklə, görünən odur ki, Ermənistandakı mövcud hakimiyyət müəyyən
dairələri, əsas etibarilə də, Rusiyanı qane edir. Hazırkı baş nazir də onların
bütün istəklərini canla-başla yerinə yetirir. "Soros komandası” kimi erməni
tarixinə düşən nazirləri, məmurları dəyişir, rus kanallarını efirə qaytarır və
sürətlə qərbdən uzaqlaşmağa çalışır.
Azər NURİYEV