“Pasientlərin hüquqlarının qorunması haqqında” qanuna ehtiyac varmı?
"Azərbaycanda "Pasientlərin
hüquqlarının qorunması haqqında” yeni qanun layihəsi hazırlana bilər". Bu
haqda Trend-ə Milli Məclisin Səhiyyə Komitəsinin üzvü Musa Quliyev məlumat
verib. Bildirib ki, icbari tibbi sığortanın tətbiqinə artıq start verilib:
"Pasientlərin hüquqlarının qorunması haqqında” qanun da icbari tibbi sığorta
ilə sıx bağlı olacaq bir qanundur. Hesab edirəm ki, biz komitə olaraq yaz
sessiyasında bunun da üzərində işlərə başlaya bilərik”.
Bəs burada söhbət nədən gedir?
Qanun layihəsinin mahiyyəti nədən ibarət olacaq? "Pasientlərin hüquqlarının
qorunması haqqında” qanuna ehtiyac varmı? Ekspert İlqar Hüseynli "Kaspi”yə
açıqlamasında bildirdi ki, yeni qanunvericilik təşəbbüslərilə çıxış edərkən
beynəlxalq hüquq normalarına istinad olunur. Pasientlərin hüquqlarının
müdafiəsini tətbiq edən və protokol qaydası deyilən bir qayda təcrübədə tətbiq
olunur: "Protokol qaydası nədir? Yəni ki, xəstəliklərin diaqnozlar üzrə konkret
protokol qaydası olur. Xəstə klinikaya, həkimə müraciət edərkən o protokol
qaydasına uyğun olaraq ona tibbi yardım göstərilir. Əgər cərrahi müdaxiləyə
ehtiyac varsa, əməliyyatı şərtləndirən amillər, müddəalar da protokol
qaydasında olur. Bir sözlə, hər bir həkim xəstəyə beynəlxalq təcrübədə tətbiq
olunan protokol qaydası ilə yanaşır. Orada həm xəstənin hüquq və vəzifələri,
həm də həkimlərin bu sahədə üzərinə götürdüyü öhdəliklər öncədən bəyan edilir.
O protokol xəstə, həkim və ya cavabdeh şəxslər tərəfindən imzalandıqdan sonra
həkim xəstə üzərinə icra edəcəyi işləri görməyə başlayır. Diaqnostikadan tutmuş
mövcud xəstəliyin müalicəsinə qədər”.
Proses
protokol qaydası altında həyata keçirilsə...
İ.Hüseynli bildirdi ki, müayinə və müalicə
prosesi protokol qaydası altında həyata keçirilsə, orada tərəflərin hansısa
hüquqlarının müdafiəsi ilə bağlı zəruri
tədbirlərə ehtiyac yaranacağını düşünmür:
"Bizdə icbari tibbi sığortanın tətbiqi ilə bağlı pilot olaraq iki rayonda
layihənin icrasına başlanılıb. Yaxın vaxtlarda bu Azərbaycanın bütün
bölgələrini əhatə edəcək. Burada pasientlərin hüquqlarının müdafiəsi dedikdə
ikitərəfli yanaşma ola bilər. Əgər biz pasientlərin hüquqlarını sığorta
məsələləri ilə bağlı müdafiə edəcəyiksə, burada "Xəstə tibbi sığortadan hansı
formada yararlana bildi?”, "Tibbi sığortanın şərtləri pozuldumu?”, "Sırf tibbi
sığortadan irəli gələn müvafiq tədbirlər pasient üzərində həyata keçirildimi?”
kimi suallar olacaq. Eyni zamanda, burada əksinə olaraq müvafiq klinikaların,
həkimlərin də mənafeyi müdafiə olunmalıdır ki, tibbi sığorta tətbiq olunmuş
xəstələrin ödəniş mexanizmləri doğru-düzgün yerinə yetirildimi? Bu mərhələlər
üzrə həyata keçirilən hər bir addıma həm klinika, həm pasient, həm də sığorta
ödəyicisi tərəfindən riayət olundumu? Bu mənada pasientlərin hüquqlarının
qorunmasına zəruri ehtiyac var.
Əgər
qanun layihəsi sığorta ilə bağlı olacaqsa, tibbi sığortanın tətbiqində baş verən
problemlərin aradan qaldırılmasından irəli gələcək müdafıə olacaqsa bunu
alqışlamaq olar. Bu zəruri və başadüşüləndir. Amma tutaq ki, cərrahi müdaxilə
zamanı öd kisəsinin götürülməsi əməliyyatı həyata keçirilir. Əgər bu zaman
bütün kliniki diaqnostik tədbirlər həyata keçirilibsə, laborator analizlər
düzgün aparılıbsa, sırf tibbi cərrahi prosesin özü protokol qaydasına riayət
olunaraq həyata keçrilibsə, bundan bir neçə gün sonra xəstənin ümumi vəziyyətində
ağırlaşmalar baş veribsə, artıq biz hüquqların müdafiəsində həmin protokol
mexanizminə istinad etməliyik. Burada yanaşma doğru olmalıdır. Ani baş verən hər
hansı xətalara görə bütövlükdə Azərbaycanın səhiyyə korpusunu, tibb heyətini
tamamilə günahlandırıb orada müdafiəçi qismində çıxış etməyimiz həkimlərin özlərinin
də risklərini artırır”.
"Həkimlərlə
xəstələr arasında etimadsızlıq mühiti yarana bilər”
Tibbi
ekspert Adil Qeybulla "Həkim etikası
kodeksi”nin tətbiqini daha məqsədəuyğun gördüyünü bildirdi: "Biz hərdən müəyyən
təşəbbüslərlə çıxış edirik. Amma bu təşəbbüslərin dünya təcrübəsində necə
tətbiq olunduğundan həmişə yan keçirik. Ümumiyyətlə, pasinetlərin hüquqlarını
kimdən qoruyuruq? Dünyanın hər yerində "Həkim etikası kodeksi” var. Bu həkimlə
xəstə, tibb kollektivi arasında bütün münasibətləri tənzimləyir. Belə bir qanun
hazırlanmalıdır. Yoxsa, bizdə "Hippokrat andı” var. Bu, dünyanın heç yerində
yoxdur və mənəvi xarakter daşıyır. Bu, insanları nəyəsə məcbur edə bilməz. Onun
hüquqi qüvvəsi yoxdur. Amma həkim etikası kodeksi bir qanunverici aktdır və
hüquqi gücü var. Onun müddəaları pozulduqda hüquqi məsuliyyət yaranmış olur. O
məsuliyyətə görə də məsələ dəyərləndirilir.
Söhbət bundan gedir ki, əgər həkim peşə
borcunu yerinə yetirərkən özündən asılı olan və yaxud olmayan səhvə yol veribsə,
bununla bağlı, xəstənin sağlamlığına hər hansı zərər dəyibsə, bu məsələlər
peşəkar şəkildə araşdırılır və qərar qəbul edilir. Bizdə isə nə baş verir?
Pasientin hər hansı narazılığı varsa, polisə və yaxud hər hansı hüquq-mühafizə
orqanlarına müraciət edir. Həmin orqanlara da həkimi çağırırlar və məsələ bu
yola həll olunur. Amma məsələ bu cür həll oluna bilməz. Həkim müalicə
prosesində hansısa səhvə yol veribsə, bilərəkdən və yaxud bilməyərəkdən səhv
edibsə, yaxud xəstəlik ağırlaşdığından hansısa problem yaranıbsa, bütün bunları
xüsusi tibbi komissiyalarda araşdıra bilər. Bu, dünya təcrübəsində belədir”.
A.Qeybulla deyir ki, pasientlərin
hüquqlarının müdafiəsi məsələsinin gündəmə gəlməsi əslində həkimlərlə xəstələr
arasında bir etimadsızlıq mühiti yarada bilər: "Heç kim düşünmür ki, həkimlərin
də sosial vəziyyətinin yaxşılaşdırılması istiqamətində addımlar atılmalıdır.
Burada məsələyə kompleks yanaşmaq lazımdır. Elə bir qanun layihəsi
hazırlanmalıdır ki, burada nəinki pasiyentlər, hətta həkimin də hüququ
qorunsun, onların arasındakı münasibətlər hüquqi baxımdan tənzimlənsin. Dünya
hansı yolla gedirsə, biz də o yolla getməliyik”.
"Bu iş icbari tibbi sığortanın tətbiqi ilə paralel
getməlidir”
Milli Məclisin Səhiyyə komitəsinin üzvü, millət vəkili
Qənirə Paşayevaisə bildirdi ki, "Pasientlərin hüquqlarının qorunması” ilə bağlı qanun layihəsi
qəbulu icbari tibbi sığortanın tətbiqi ilə paralel getməlidir. Əgər belə olmasa,
qanun layihəsi yetəri qədər effektiv olmayacaq: "Pasientin hüquqlarını müdafiə
edən qanun mütləq lazımdır. Amma icbari tibbi sığortanın tətbiqi gərək bununla
paralel getsin. Əgər bunlar ikisi bərabər şəkildə gedərsə, o zaman effektiv işləyən
bir qanuna çevrilə bilər. Pasientlər də bunun xeyrini görər”.
Q.Paşayeva
deyir ki, burada yeni nə isə kəşf etmək lazım deyil, Avropa ölkələri, qardaş
Türkiyədə bunun mexanizmi var: "Tibbi sığorta işləyən cəmiyyətlərdə bu məsələlərdə
sıxıntı olmur. Problem tibbi sığorta olmadığı hallarda olur. Səhiyyə bir
orqanizmdirsə, tibbi sığorta onun onurğa sütunudur. Onurğa sütunu olmayan,
yaxud çalışmayan sistemi ayaqda dik saxlaya bilmərik. Səhiyyə, sağlıqla bağlı
olan bir çox problemlərin kökü sığorta ilə bağlıdır. Sığorta normal şəkildə
çalışarsa, probleminin müəyyən qismi aradan qaldırılmış olacaq. Tibbi sığortanın
dairəsi genişlənməyəcəksə, nə qədər qanun qəbul edilsə də, yetərli qədər effekt
almaq çətin olacaq. İki rayonda tibbi sığortaya pilot olaraq başlanılıb. Ümid
edirik ki müsbət nəticələr əldə olunacaq və qısa zamanda bu layihə ölkəmizin hər
tərəfinə geniş şəkildə yayımlanmış olacaq”.
Aygün
Asimqızı