Onlar Azərbaycanı ancaq qara görürlər
Human Rights Watch təşkilatı növbəti hesabatını dərc edib. Oktyabrın
20-si açıqlanan hesabatda bu dəfə də Azərbaycan haqda kəskin tənqidi fikirlər
yer alıb. 75 səhifəlik hesabatdaqeyd olunub ki, ölkədə həbslər artıb.
Müəllif onu da bildirib ki, 2015-ci ildə neftin qiymətinin qlobal səviyyədə
ciddi şəkildə düşməsi, Azərbaycanın neft ixracından asılı olan iqtisadiyyatında
ciddi itkilərə səbəb olub: "Xəzər dənizindən Avropaya qaz ixracı məqsədi ilə
hökumət Xəzər dənizi Şahdəniz qaz yatağı və Cənub Qaz Dəhlizi də daxil olmaqla
mədən sənayesinə Dünya Bankı və digər bu kimi digər qurumlardan əlavə
beynəlxalq maliyyə yatırımlar əldə etməyə can atır”.
Mövzu haqda fikirlərini öyrəndiyimiz ekspertlərin qənaətinə görə,
təşkilat növbəti dəfə Azərbaycan barədə yalan məlumatlar yayıb və bu, təəccüblü
deyil. Çünki onlar hər zaman öz qərəzli mövqeləri ilə digərlərindən
fərqləniblər.
Millət vəkili Tahir Kərimli "Kaspi”yə
açıqlamasında dedi ki, Human Rights Watch təşkilatı hər zaman ölkəmiz haqda
belə fikirlər bildirir: "Oktyabrın 20-də dərc olunan hesabatı oxudum. Bir fakt
yenə də ortadadır. Onlar Azərbaycanı ancaq qara görürlər. Hesabatın özünü isə
ölkəmizin əleyhdarlarının dediklərinə əsasən hazırlayırlar. Hökumət
tənqidçiləri, bəzi hüquq müdafiəçiləri, özlərinə yaxın vətəndaş cəmiyyətinin
nümayəndələrinin məlumatları ilə hesabat hazırlayırlar. 75 səhifəlik hesabata
baxanda adama elə gəlir ki, bu ölkədə yaxşı heç nə baş vermir. Ən dəhşətlisi
odur ki, yenə də bir milyondan artıq qaçqınımızın hüquqları heç kimin yadına
düşməyib. Onlar barədə bir kəlmə söz yoxdur. Həmçinin Azərbaycan cəmiyyətinin
tolerant olması barədə bir kəlmə söz yoxdur. Halbuki bu, dünyaya nümunə olası
məsələdir. Bundan əlavə, sanki inflyasiya, devalvasiya ancaq Azərbaycanda var.
Guya dünyanın başqa ölkələrində böhran yaşanmır. Azərbaycanda kim həbs olunursa,
adını siyasi fəal qoyurlar. İstənilən jurnalist, hər hansı bir gənc, partiya
üzvü cinayət törətdikdə iddia edə bilər ki, məni müxalifətçi olduğuma görə,
hakimiyyət haqqında tənqidi fikirlər səsləndirdiyimə görə həbs ediblər. Bu
yaxınlarda prezident Avropa Parlamenti nümayəndələri ilə görüşdə onları fakt
qarşısında qoydu. Diqqətə çatdırdı ki, hesabatlar qərəzlidir və yalan üzərindən
hazırlanır. Məsələn, jurnalistlə futbolçu arasında yaşanan anlaşılmazlığı da
siyasətə qatırlar. Deyirlər ki, guya jurnalist prezidenti tənqid etdiyinə görə
bu cür vəziyyət yaranıb. Halbuki burada siyasi heç bir motiv yoxdur. Human
Rights Watch-un hazırladığı hesabatlar da bu silsilədəndir və həqiqəti əks
etdirmir”.
Millət vəkili onu da diqqətə çatdırdı ki, Azərbaycan haqda yalan məlumatları
xaricilərə ötürənlər radikal adamlardırlar: "Təşkilat üzvləri üçün bir prinsip
var - nə xəbər olur olsun, təki Azərbaycan əleyhinə məlumat olsun. Belə
informasiyaları dərhal da çap edirlər. Bildiyiniz kimi, bu yaxınlarda
referendum keçirildi. Bununla bağlı insanlara hər cür şərait yaradılmışdı.
Faktdır ki, mitinqlər də baş tutdu. Bu da bir daha sübut edir ki, sözügedən təşkilat
qərəzlidir. Əgər insan haqları məsələsi bir ölkənin daxili işi deyilsə, onda,
bu cür təşkilatlar ədalətli olsunlar. Qoy bütün məqamlar qeyd edilsin.
Azərbaycan haqqında yalnız mənfi rəy yazılması ölkə hakimiyyətinə təzyiq
xarakteri daşıyır”.
Beynəlxalq Münasibətlərin
Araşdırılması Mərkəzinin sədri Rufiz Qonaqov da Human Rights Watch kimi
qurumların birtərəfli və qərəzli fəaliyyət göstərdiklərini bildirdi: "Onlar
sərgilədikləri mövqe ilə dünyada obyektivliyini itirmiş, nüfuzsuz qurumlara
çevriliblər. Human Rights Watch-ı heç beynəlxalq təşkilat hesab etmirəm. Bir
təşkilat kimi, illər uzunu yalnız birtərəfli, qərəzli, real faktlara
əsaslanmayan məlumatlar yayıblar. Yalnız öz maraqları çərçivəsində fəaliyyət
göstərirlərsə, artıq hər şey aydındır. Ona görə də onların beynəlxalq
statusundan danışa bilmərik. Təşkilatın Azərbaycanla bağlı hesabatlarını
qeyri-ciddi hesab edirik. Düşünərəm ki, belə hallar Azərbaycanın dünyada
qazandığı imicə, nüfuza qarşı qısqanclıq mövqeyindən başqa bir şey deyil”.
Şəfa Tapdıq