Bakı 23°C
Ohanyan səmimi deyil
"Erməni
və azərbaycan xalqları yanaşı yaşayıblar və bundan sonra da yaşayacaqlar, onlar
sülh istəyirlər, lakin bizim regionda sülh və tolerantlıq məsələsini həll etmək
üçün Azərbaycanla Ermənistan arasında balansı təmin etmək lazımdır. Eyni
zamanda, iki xalqı xalq diplomatiyasına təşviq etmək, qarşılıqlı etimad mühiti
formalaşdırmaq vacibdir”.
Bu sözləri
Ermənistanın keçmiş müdafiə naziri, hazırda keçmiş xarici işlər naziri Vardan
Oskanyan və "İrs” partiyasının lideri Raffi Ovanisyanla birlikdə blok yaradıb
parlament seçkilərinə hazırlaşan Seyran Ohanyan səsləndirib.
Xatırladaq
ki, bir müddət əvvəl digər müxalif lider, eks-prezident Levon Ter-Petrosyan da
oxşar fikirlər səsləndirmişdi və sülh şəraitinin zəruriliyindən danışmışdı. Bəs
Ermənistan müxalifətinin sülhdən, münasibətlərin normallaşdırılmasından
danışmasına səbəb nədir? Məlumdur ki, prezident Sarkisyan seçki üçün xal
qazanmaq istəyəndə cəbhədə vəziyyəti gərginləşdirir. Əgər bu taktika
uğurludursa, Sarkisyanın rəqiblərinin sülhdən danışması nəyin göstəricisidir?
Ola bilərmi ki, erməni toplumu əslində, sülh istəyir və müxalif qüvvələr bu məqamdan
yararlanmaq niyyətindədirlər?
Millət vəkili Şahin İsmayılov mövzu haqda fikirlərini "Kaspi” ilə bölüşərkən
bildirdi ki, Ohanyanın dediklərini səmimi qəbul etmir. Ş.İsmayılovun fikrincə,
onlar həmişə seçkilər zamanı Qarabağ kartından ciddi şəkildə istifadə edirlər: "Həmişə
cəbhədə vəziyyəti gərginləşdirmək, provakasiya, diversiya hərəkətləri etməklə Ermənistan
ictimaiyyətinin fikrini yayındırırlar. Bu, çox iyrənc taktikadır. Son proseslər
göstərir ki, Sarkisyan bu əməllərini davam etdirir. Ermənistanda daxili vəziyyət
pisdir, insanlar bədbindir. Ermənilər başa düşməlidirlər ki, Qarabağı işğalda
saxlamaqları onların öz ziyanına işləyir. Bütün böyük layihələrdən kənarda
qalıblar, iqtisadi blokadadadırlar. Ölkəni geri qayıtmamaq şərti ilə minlərlə gənc
tərk edir. Faktdır ki, Azərbaycan gündən-günə inkişaf edir, böyük iqtisadi
layihələrə imza atır, ordusu ən son texnika ilə təmin olunur. İstər Sarkisyan
olsun, istərsə də Ohanyan, onların əli azərbaycanlıların qanına batıb. Düşünürəm
ki, dediklərinin səmimiliyinə inanmaq sadəlövhlük olardı. Erməni xisləti elədir
ki, hər məsələdən öz məqsədləri üçün yararlanmağa çalışırlar. Ohanyanın belə bəyanat
verməsi ilk baxışda normal, praqmatik düşüncə kimi qəbul edilə bilər. Amma
xatırlayaq ki, o, indiyə qədər bu proseslərin içində olub, Qarabağ məsələsində
Sarkisyanla çiyin-çiyinə dayanıb. Onun birdən-birə fikirlərini 180 dərəcə dəyişməsini
sadəcə, seçkiyə getmək üçün istifadə olunan kart kimi dəyərləndirirəm”.
Millət vəkili
qeyd etdi ki, Ermənistanda reallığı dərk edən, münaqişənin onların ziyanına işlədiyini
düşünənlər var və Ohanyan onların səsini qazanmaq istəyir: "Əlbəttə, mən çox
istərdim ki, o, bunu real desin, doğrudan da məsələnin mahiyyətini dərk etsin. Amma
Ohanyanın indiyə qədər olan fəaliyyəti dediklərinin qeyri-səmimi olduğunu
düşünməyə əsas verir. Ona görə də bunu qeyri-səmimi və seçkiyə hesablanan bəyanat
hesab edirəm. Amma Ermənistanda Azərbaycan torpaqlarının gec-tez geri
qaytarılmalı olduğunu düşünənlərin olduğu məlumdur. Azərbaycan mövcud olduqca,
cənab prezidentin daxili və xarici siyasəti ilə heç vaxt öz torpaqlarımızdan
imtina etməyəcəyik və ərazi itkisi ilə barışmayacağıq. Bu cür blokada ilə onların
vəziyyəti gələcəkdə daha da pis olacaq. Bir qrup erməni başqalarının
torpaqlarından ötrü evlərində meyit qəbul etməkdən bezib. Müharibədə psixoloji məqam
da mühüm məsələdir. Azərbaycanlılar bu baxımdan da güclüdürlər və öz torpaqları
üçün mübarizə aparmağa razıdırlar, hazırdırlar”.
Politoloq Arzu Nağıyev də Dağlıq Qarabağ məsələsinin seçkilər üçün kart
olduğunu düşünür: "Bu mövzu mühüm siyasi gedişlərdən biridir. Bildiyiniz kimi,
Ohanyan Sarkisyandan ayrılaraq keçmiş nazirlərlə birgə müxalifətdə təmsil
olunur. Bütün bunlar göstərir ki, daxillərində bir-birinə zidd məsələlər var.
Onlar sülhməramlı millət olduqlarını göstərməyə çalışırlar. Lakin heç də belə deyil.
Sarkisyan öz hakimiyyətini saxlamağa çalışır. Yəni baş verənlərin hamısı seçki
ilə bağlıdır. Bütün bunlar seçkinin başındadır. Müxtəlif yollarla vətəndaşlarına
öz yalanlarını yeritməyə çalışırlar. Problem Dağlıq Qarabağ məsələsindən
seçkiqabağı platformada bir kart kimi istifadə etmələridir”.
Şəfa Tapdıq
